‘Kɛlɛ be Matigi Ala le bolo’

Saan 1999, Faransi faamanw y’a fɔ ko Betɛli ye nili minw sɔrɔ saan 1993 ni saan 1996 cɛ, u ka ɲi ka lanpo sara o kosɔn. An tagara n’o koo ye Faransi ka kititigɛso dɔw la nga u ma joo di an ma. O kama, an tagara kititigɛso wɛrɛ la, nga u bele ma joo di an ma. O kɔ, Faransi ka gofɛrɛnɛman ye dolari miliyɔn wɔɔrɔ ni waa kɛmɛ saba bɔ Betɛli ka kɔnti la. Walisa u k’an ka wari segi an ma, an labanna ka taga n’o koo ye Erɔpu mara ka kititigɛso la min be adamadenya joo lafasa. Nga ka kɔn kiti ɲɛ, Erɔpu mara ka kititigɛso min be adamadenya joo lafasa, ale y’a ɲini ko an ka ɲɔgɔnye dɔ kɛ n’a ka lasigiden dɔ ani Faransi gofɛrɛnɛman awoka dɔw ye. O ɲɔgɔnye kuun tun ye k’a filɛ n’an bena se ka bɛn kelen ma.

Faransi gofɛrɛnɛman y’a ɲini an fɛ ko an ka wari min sara, an tun b’a miiri k’o lasigiden tun bena a ɲini an fɛ an k’o wari hakɛ dɔ sara. Nga an y’a faamu ka gwɛ ko n’an y’o wari sara hali ni dɔrɔmɛ kelen lo, o tɛna bɛn ni Bibulu ka sariyakolow ye. Balimaw ye niliw kɛ walisa ka dɛmɛ don Masaya ka koow la. O la, o wari tɛ gofɛrɛnɛman ta ye (Mat. 22:21). O bɛɛ n’a ta, an tagara o ɲɔgɔnye la walisa k’a yira ko an be Erɔpu mara ka kititigɛsoba ka sariyaw labato.

Ɲɔgɔnyew be kɛ kititigɛsoba ka boon cɛɲumanin minw na, an y’o ɲɔgɔnye kɛ u dɔ lo kɔnɔ. Nga o ɲɔgɔnye daminɛko ma ɲɛ. Kititigɛsoba ka lasigiden ye kuma ta k’a fɔ ko Faransi gofɛrɛnɛman y’a ɲini Jehova Seerew fɛ u ka lanpo min sara, u ka ɲi k’o hakɛ dɔ sara. O la, an sinna k’a ɲininga ko: “Yala i b’a kala ma ko gofɛrɛnɛman ye dolari miliyɔn wɔɔrɔ ni kɔ bɔ an ka kɔnti la ka ban wa?”

A ɲɛda cogo tun b’a yira ko o koo y’a kɔnɔ gwan. Tuma min na gofɛrɛnɛman ka awokaw y’a yira ko u y’o lo kɛ tiɲɛn na, a ka miiriya yɛlɛmana pewu o kitiko la. A sɔngɔra u kuun ani a sinna k’o ɲɔgɔnye kuncɛ. O la, n’ y’a faamu ko Jehova ye koo bɛɛ yɛlɛma cogo dɔ la, an tun ma miiri min na walisa an ka see sɔrɔ o kitiko la. An bɔtɔ o ɲɔgɔnye la, an ninsɔn tun ka di kosɔbɛ ani min tun kɛra, o y’an kabakoya.

Saan 2011 zuwɛnkalo tile 30, Erɔpu mara ka kititigɛsoba ka kititigɛlaw bɛɛ bɛnna kelen ma ka joo di an ma. Faransi ka gofɛrɛnɛman tun y’a ɲini Betɛli fɛ a ka lanpo min sara, u y’o lasa. Gofɛrɛnɛman tun ye wari min bɔ Betɛli ka kɔnti la, u y’a ɲini a fɛ fana a k’o segi Betɛli ma ani ka wari dɔ yɛrɛ la a kan! O desizɔnba sababu la, tiɲɛn batoli be yiriwara Faransi jamana na fɔɔ ka na se bi ma. An sinna ka ɲiningali kelenpe min kɛ, o kɛra i n’a fɔ bɛrɛ kelenpe min ye Goliyati faga. O ɲiningali ye koow yɛlɛma. Mun na an ye see sɔrɔ do? Sabu i ko Dawuda y’a fɔ Goliyati ye cogo min na, ‘kɛlɛ be Matigi Ala le bolo.’—1 Sam. 17:45-47, Biblu Ala ta Kuma.

An ma see sɔrɔ o kitiko dɔrɔn lo la. Hali k’a sɔrɔ gofɛrɛnɛmanw ni diinanw b’an kɛlɛ kosɔbɛ, an ye see sɔrɔ kitiko 1225 la jamana 70 ka kititigɛsobaw ani kititigɛso caaman wɛrɛw la duniɲa kuru bɛɛ kɔnɔ. Joo b’an fɛ sariya sira fɛ k’an ka diinankow kɛ, ka waajuli kɛ jamayɔrɔw la, ka ban k’an seen don faso kanuyakow la, ani ka ban joli ka don an fari la. An ye see sɔrɔ kitiko minw na, o b’an dɛmɛ k’an ka joo lafasa o koow la.

A kɛra cogo di n’ nana dɛmɛ don kitiko dɔ la Erɔpu k’a sɔrɔ n’ tun be baara kɛra Jehova Seerew ka sigiyɔrɔsoba la Niyɔriki mara la, Etazini?

N’ BANGEBAGAW KA KISƐYA YE NƆƆ TO N’ KAN

N’ facɛ George ni n’ bamuso Lucille ye Gilead klasi 12nan kɛ. N’ wolola tuma min na saan 1956, u tun be Etiyopi jamana na. U ye n’ tɔgɔ la ko Philip, i ko saan kɛmɛkulu fɔlɔ “kibaru diman fɔbaga Filipu.” (Kɛw. 21:8). Saan min tugura o kɔ, gofɛrɛnɛman ye bali sigi an ka batolikow kan. Hali k’a sɔrɔ n’ tun ka dɔgɔ, n’ hakili b’a la ko n’ somɔgɔw tun be batolikow kɛ dogo la. Komi n’ tun ye denmisɛn ye, o koo tun ka di n’ ye! A fɔ man di nga faamanw y’an waajibiya ka Etiyopi jamana bila saan 1960.

N’ somɔgɔw yɛlɛmana Wicita, Kansas mara la Etazini. Waajuli baara tun ka di n’ bangebagaw ye cogo min na k’u to u ka misɔndenya baara la, foyi ma bɔ o kanuya la hali dɔɔni. U ye ne ni n’ kɔrɔmuso Judy ni n’ dɔgɔcɛ Leslie kalan walisa an ka Jehova kanu ani ka baara kɛ a ye n’an dusu bɛɛ ye. N’ kɔrɔmuso ni n’ dɔgɔcɛ fana wolola Etiyopi. N’ batizera tuma min na, n’ tun be ni saan 13 ye. Saan saba o kɔ, an tagara dɛmɛ don yɔrɔ min na weleweledalaw man ca Arekipa, Peru jamana na.

Saan 1974, Peru tɔnbolo ye ne ni balima naani kɛ danna piyɔniyew ye. O tuma na, ne tun be ni saan 18 ye. U y’an ci ka taga waajuli kɛ Ande kuluyɔrɔw la. Mɔgɔ si tun ma waajuli kɛ o yɔrɔ la fɔlɔ. An tun ka ɲi ka kecuwakan ani ayimarakan fɔbagaw lo waaju. An ye voyazi kɛ mobili sifa dɔ kɔnɔ min kɔnɔna be i ko boon. N’ hakili b’a la ko n’ tun be baara kɛ ni Bibulu ye walisa k’a yira kecuwakan ani ayimarakan fɔbagaw la ko yanni dɔɔni Jehova bena dan sigi fantanya, bana, ani saya la (Yir. 21:3, 4). U caaman kɛra Jehova batobagaw ye.

N’ Y’A DAMINƐ KA BAARA KƐ AN KA SIGIYƆRƆSOBA LA

Saan 1977, balimacɛ Albert Schroeder nana bɔ Peru balimaw ye. Jehova Seerew ka Koow Ɲɛnabɔla Jɛnkulu mɔgɔ dɔ tun lo ani a ye n’ jija ko n’ ka demandi dɔ dafa walisa ka taga baara kɛ an ka sigiyɔrɔsoba la. N’ y’o lo kɛ. Dɔɔni o kɔ, n’ y’a daminɛ ka baara kɛ Buruklini Betɛli la saan 1977, zuwɛnkalo tile 17. Saan naani minw tugura o kɔ, n’ tun be dɛmɛ don ka Betɛli saniya ani k’a ladon.

Saan 1978 zuwɛnkalo la, ne ni Elizabeth Avallone ye ɲɔgɔn kunbɛn lajɛnba dɔ la Nuvɛli Ɔrileyan, Luizian mara la. O lajɛnba tun labɛnna jamana caaman kama. Elizabeth bangebagaw y’a lamɔ tiɲɛn sira kan ani i ko ne bangebagaw, olu fana tun be Jehova batora n’u dusu bɛɛ ye. N’ ye Elizabeth kunbɛn tuma min na, a tun ye kudayi piyɔniye ye a saan naani ye nin ye, ani a tun b’a fɛ ka to kudayi cidenya baara la a sii tɔɔ bɛɛ la. An tora ka kaan bɔ ɲɔgɔn ma ani a ma mɛɛn, an jarabira ɲɔgɔn na kosɔbɛ. An furula saan 1979 ɔkutɔburukalo tile 20, ani an y’a daminɛ ka baara kɛ Betɛli la ɲɔgɔn fɛ.

An ka kafo fɔlɔ tun ye ɛsipaɲɔlikan kafo lo ye Buruklini. O kafo balimaw tun b’an kanu kosɔbɛ. Saanw tɛmɛtɔ an ye kafo saba wɛrɛw kɛ, ani o yɔrɔ balimaw fana y’an kanu ani u y’an jija walisa an ka to ka baara kɛ Betɛli la. An b’u waleɲuman lɔn u ka dɛmɛ kosɔn. An teriw ani an somɔgɔw y’an dɛmɛ walisa an ka se k’an janto an bangebagaw la tuma min na u kɔrɔla ani u mako tun be dɛmɛ na. An b’olu fana fo.

N’ YE DƐMƐ DON KITIKOW ƝƐNABƆKO LA

Saan 1982 zanwiyekalo la, u ye n’ ci ka taga baara kɛ Betɛli ka biro dɔ la, min be an ka kitikow ɲɛnabɔ. Saan saba o kɔ, u y’a ɲini n’ fɛ ko n’ ka taga kalan kɛ inivɛrisite la walisa ka awoka diplomu sɔrɔ. O kalan tuma na, n’ y’a faamu ko Etazini ani jamana wɛrɛw mɔgɔw be sera ka koo caaman kɛ ɲɛsuma na sabu Jehova Seerew ye see sɔrɔ o koow la kititigɛsow la. Klasi kɔnɔ, an y’o koo kɔrɔtaninw sɛgɛsɛgɛ koɲuman.

Betɛli ka biro min be an ka kitikow ɲɛnabɔ, u ye n’ kɛ o ɲɛminɛbaga ye saan 1986. O wagati la, n’ tun be ni saan 30 lo ye. N’ ninsɔn diyara sabu balimaw y’a yira k’u lanin be n’ na hali k’a sɔrɔ n’ tun ye kanbele ye. Nga n’ tun sirannin lo fana sabu n’ tun tɛ koo caaman lɔn, ani n’ tun b’a lɔn k’o tɛna kɛ baara nɔgɔman ye.

N’ ye n’ ka diplomu sɔrɔ saan 1988 ani n’ kɛra awoka ye. Nga n’ tun y’a to o inivɛrisite kalan ye nɔɔ to n’ ka Alakow kan ani n’ yɛrɛ tun ma bɔ o kala ma. Kalanbabaw be se k’a to an be kɛ kuncɛba ye ani an b’a miiri ko an ka fisa tɔɔw ye sabu u m’o kalanw ɲɔgɔn kɛ. Nga Elizabeth ye n’ dɛmɛ ka segi ka kɛ ni delinanko ɲumanw ye Alako ta fan fɛ, i ko n’ tun be ni minw ye sanni n’ ka taga o kalan kɛ. N’ sera ka n’ magwɛrɛ Jehova la kosɔbɛ tugun, nga o ye wagati ta. N’ be se k’a fɔ aw ye ko ɲɛnamaya kɔnɔ, ka kɛ ni lɔnniya caaman ye, o lo kɔrɔtanin tɛ. Nga min kɔrɔtanin lo, o ye ka kɛ ni jɛnɲɔgɔnya ɲuman ye ni Jehova ye ani k’ale n’a sagokɛlaw kanu kosɔbɛ.

AN YE KIBARO DIIMAN LAFASA ANI K’A SABATI KITITIGƐSOW LA

N’ ka diplomu sɔrɔnin kɔ, n’ y’a daminɛ ka dɛmɛ don bɛrɛbɛrɛ Betɛli ka kitikow ɲɛnabɔko biro la. Joo min b’an fɛ ka waajuli kɛ, n’ tun be dɛmɛ don fana k’o joo lafasa. N’ ka baara tun ka di n’ ye kosɔbɛ, nga gwɛlɛyaw fana tun be yen sabu koow be yɛlɛma joona an ka ɔriganisasiyɔn kɔnɔ. Misali la, fɔlɔ la an tun be bolomafara deli mɔgɔw fɛ ka sɔrɔ k’an ka sɛbɛw di u ma. Nga an ka ɔriganisasiyɔn tun b’a fɛ k’o lalɔ minkɛ, saan 1990, a ɲinina kitikow ɲɛnabɔko biro balimaw fɛ u ka dɛmɛ don ani ka cikanw di walisa o ka se ka kɛ. O kɔ, Jehova Seerew y’a daminɛ k’u ka sɛbɛw di mɔgɔw ma gwansan. O yɛlɛmani ye koow nɔgɔya Betɛli la ani waajuli baara la. O y’an dɛmɛ fana k’an yɛrɛ tanga gwɛlɛya dɔw ma lanposara koo la. Dɔw tun b’a miiri k’o yɛlɛmani bena a to an be bɔnɛ wari caaman na, ko an tɛna se ka sɛbɛ caaman bɔ makodonmɔgɔw ye ani ko o kama, mɔgɔ caaman tɛna se ka Jehova lɔn. Nga koow ma kɛ ten hali dɔɔni! Kabi saan 1990, Jehova sagokɛlaw hakɛ cayara fɔɔ ka tɛmɛ sigiyɔrɔma fila kan. Ani bi, mɔgɔw be dumuni sɔrɔla Alako ta fan fɛ gwansan. N’ y’a kɔrɔsi ko yɛlɛmaniba minw kɛra an ka ɔriganisasiyɔn kɔnɔ, u sera ka kɛ sabu Jehova lo b’an dɛmɛ ani a be tɛmɛ jɔncɛ kantigiman fɛ k’an ɲɛminɛ.—Ɛkiz. 15:2; Mat. 24:45.

An be ni awoka ɲumanw ye minkɛ, o dɔrɔn lo t’a to an be see sɔrɔ kititigɛsow la. Tuma caaman na, an ka kɛwale ɲumanw lo b’a to kititigɛlaw ni faamanw be joo di an ma. N’ y’o lo kɔrɔsi saan 1998, tuma min na Koow Ɲɛnabɔla Jɛnkulu mɔgɔ saba n’u musow tagara lajɛnba kɛrɛnkɛrɛnnin dɔw la Kiba jamana na. An tun y’an jija k’a ɲɛfɔ o jamana faamanw ye ko an t’an seen don politikikow la. Nga Koow Ɲɛnabɔla Jɛnkulu mɔgɔw n’u musow y’u minɛ ni ɲumanya ani bonya ye minkɛ, o lo y’a to u lara a la ko an t’an seen don politikikow la.

Nga tuma dɔw la walisa ka tilenbaliyako dɔ latilen, fɔɔ an ka ‘kibaru duman lafasa’ ani k’a sabati kititigɛsow la (Filip. 1:7, Bible senuma). Misali la, joo min b’an fɛ ka baara wɛrɛ kɛ sɔrɔdasiya nɔɔ na, saan caaman kɔnɔ, Erɔpu mara ani Kore worodugu fan fɛ faamanw banna k’o joo di an ma. O kama, u ye Erɔpu balima 18000 ɲɔgɔn ani Kore worodugu fan fɛ balima 19000 ni kɔ don kaso la sabu u banna ka sɔrɔdasiya kɛ.

A laban, saan 2011 zuwekalo tile 7, Erɔpu mara ka kititigɛsoba ye desizɔnba ta kitiko dɔ la balimacɛ Bayatyan koo la Arimeni jamana na. O kititigɛsoba y’a latigɛ ko Erɔpu mara bɛɛ la, faamanw ka kan ka sɔn mɔgɔw ka baara wɛrɛw kɛ sɔrɔdasiya nɔɔ na. O kɔ, Kore worodugu fan fɛ ka kititigɛso dɔ y’o desizɔn ɲɔgɔn ta saan 2018, zuwɛnkalo tile 28. O sesɔrɔliw tun tɛna kɛ ni balima damanin dɔrɔn tun ma to kantigiya la.

Biro min be an ka kitikow ɲɛnabɔ sigiyɔrɔsoba la, o biro be baara kɛ ni biro wɛrɛw ye tɔnbolow la duniɲa kuru bɛɛ kɔnɔ. Joo min be an fɛ ka Jehova bato ani ka waajuli kɛ a ka Masaya koo la, u be baaraba kɛ walisa k’o joo lafasa. Faamanw b’an balima minw kɛlɛ, nɛɛma lo an fɛ k’u lafasa kititigɛsow la. Hali n’an ma see sɔrɔ kitiko dɔ la, an be seereya kɛ faamanw, masaw ani siyaw ɲɛɛ fɛ (Mat. 10:18). An be sɛbɛ minw dafa k’o di kititigɛso la, an be vɛrise dɔw kofɔ u kɔnɔ ani n’an b’an yɛrɛ lafasara, an be kuma vɛrise dɔw koo la fana. Kititigɛlaw, gofɛrɛnɛman ka lasigidenw, zurunalisiw ani jama b’o vɛrisew lajɛ. O la, mɔgɔ kɔnɔgwɛw b’a lɔn Jehova Seerew ye mɔgɔ minw ye tigitigi ani u b’a lɔn fana ko u ka lannakow basiginin be Bibulu lo kan. O mɔgɔ dɔw kɛra an kerecɛnɲɔgɔnw ye.

I NI CE JEHOVA!

Saan 40 tɛmɛninw na, n’ ye nɛɛma sɔrɔ ka baara kɛ ni tɔnbolow ye duniɲa kuru bɛɛ kɔnɔ walisa ka kitikow ɲɛnabɔ. N’ ye nɛɛma sɔrɔ fana ka taga kititigɛsoba caaman na ani ka kuma ɲɛmɔgɔ caaman ɲɛɛ fɛ. Ne ni balima minw be baara kɛ an ka sigiyɔrɔsoba la ani tɔnbolow la duniɲa kuru bɛɛ kɔnɔ walisa ka kitikow ɲɛnabɔ, u koo ka di n’ ye kosɔbɛ. N’ wasanin lo n’ ka ɲɛnamaya kɔnɔ ani n’ ye duga caaman sɔrɔ.

A saan 45 ye nin ye, Elizabeth be n’ dɛmɛna kantigiya la. A b’o kɛra ni kanuya ye wagati diimanw ani wagati gwɛlɛw na. N’ b’a kanu sabu a b’o kɛ hali k’a sɔrɔ bana dɔ b’a tɔɔrɔla ani k’a barika dɔgɔya.

An y’a kɔrɔsi k’a ye ko an be see minw sɔrɔ, ani an be ni fanga min ye, o tɛ bɔ anw lo fɛ. I ko Dawuda y’a fɔ cogo min na, Jehova “lo be fanga di a ka jama ma.” (Zab. 28:8). Siga t’a la, ‘kɛlɛ be Matigi Ala le bolo.’