La a la ko Jehova yafara i ma

1-2. Jurumukɛla minw nimisara, mun lo be se k’u dusu saalo? (jaa lajɛ fana).

MASACƐ Dawuda ka jurumu tɛmɛninw y’a dusu kasi kosɔbɛ (Zab. 40:13; 51:1, 2, 5). Nga a nimisara sɔbɛ la ani Jehova yafara a ma (2 Sam. 12:13). Dawuda ninsɔn diyara kosɔbɛ tuma min na Jehova yafara a ma.—Zab. 32:1.

² I ko Dawuda, an be se ka dususalo sɔrɔ Jehova ka makari n’a ka yafali la. K’a lɔn ko Jehova labilanin lo ka yafa an ma, tiɲɛn na, o b’an hakili sigi yɛrɛ le! Hali n’an ye jurumuba lo kɛ, n’an nimisanin lo sɔbɛ la, n’an y’an ka jurumu kofɔ ani n’an b’an seko bɛɛ kɛ walisa an kana o ɲɔgɔnna kɛ, Jehova be sɔn ka yafa an ma! (Talenw 28:13; Kɛw. 26:20; 1 Zan 1:9). An ninsɔn ka di sabu ni Jehova y’an ka jurumuw yafa, a be i n’a fɔ an ma jurumu kɛ ka ye!—Ezek. 33:16.

3-4. Balimamuso dɔ tun be mun lo miiri a batizenin kɔ? An bena mun lo ye barokun nin na?

³ Nga tuma dɔw la, a ka gwɛlɛ mɔgɔ dɔw ma ka la a la ko Jehova yafara u ma. An ka Jennifer ka koo lajɛ. Ale lamɔna tiɲɛn sira kan. A sunguru tuma na, a tun be dogo ka kojugu dɔw kɛ. Saan caaman tɛmɛnin kɔ, a segira Jehova ma ani a ye saratiw dafa walisa ka batize. A ko: “N’ ka ɲɛnamaya kɛcogo tun ye ka boli boli bololafɛnw kɔ, ka kakalayako kɛ, ka dɔrɔ min ka dama tɛmɛ, ani n’ tun ka teli ka dimi mɔgɔw kɔrɔ. N’ nimisara ani n’ ye Jehova deli a ka n’ ka jurumuw yafa. N’ tun b’a lɔn ko Krista ka kunmabɔsara barika la, Jehova be se k’an ka jurumuw yafa. Nga a tun ka gwɛlɛ n’ ma ka la a la ko Jehova yafara ne ma.”

⁴ Yala a ka gwɛlɛ i ma tuma dɔw la ka sɔn a ma ko Jehova y’i ka jurumu tɛmɛninw yafa wa? Jehova b’a fɛ an ka la ale ka makari la i ko Dawuda tun lanin b’o la cogo min na. Barokun nin na, an bena a ye fɛɛn min kama an ka ɲi ka la a la ko Jehova yafara an ma ani min be se k’an dɛmɛ ka la o la.

MUN NA AN KA ƝI KA LA A LA KO JEHOVA YAFARA AN MA?

5. Sutana b’a fɛ an ka mun lo miiri? Misali dɔ fɔ.

⁵ N’an lanin b’a la ko Jehova yafara an ma, o be se k’an dɛmɛ an kana ben Sutana ka jan dɔ kɔnɔ. I kana ɲinɛ ko Sutana be koo bɛɛ kɛ walisa an ka Jehova sago kɛli dabila. Walisa k’a ka laɲinita dafa, a be se k’a kɛ an b’a miiri ko an ka jurumuw tɛ se ka yafa. An ka Korɛnti kafomɔgɔ dɔ ka koo lajɛ. Ale tun ye kakalayako kɛ ani u y’a bɔ kafo kɔnɔ (1 Kor. 5:1, 5, 13). Kɔfɛ a nimisara, nga Sutana tun b’a fɛ kafomɔgɔw ka ban ka yafa a ma ani u kana a bisimila kokura kafo kɔnɔ. O wagati kelen na fana, Sutana tun b’a fɛ o cɛɛ k’a miiri ko Jehova tɛna yafa ale ma abada. A tun b’a fɛ o miiriya k’a dusu kasi “fɔɔ a hakili be ɲagami ka dama tɛmɛ.” O cogo la, o cɛɛ tun bena Jehova sago kɛli dabila. Sutana b’a fɛ o ɲɔgɔn lo ka an fana sɔrɔ. Nga “an b’a ka miiriya lɔn.”—2 Kor. 2:5-11.

6. N’an bele b’an yɛrɛ jalakira an ka jurumu tɛmɛninw kosɔn, mun lo be se k’an dɛmɛ?

⁶ N’an lanin b’a la ko Jehova yafara an ma, o b’an dɛmɛ ka hakilisigi sɔrɔ. N’an ye jurumu kɛ, an ka teli k’an yɛrɛ jalaki (Zab. 51:19). O tɛ kojugu ye, sabu o be se k’a to an be yɛlɛmani kɛ (2 Kor. 7:10, 11). Nga n’an tora k’an yɛrɛ jalaki k’a dama tɛmɛ, o be se k’an fari faga. N’an lanin b’a la ko Jehova yafara an ma, o be se k’an dɛmɛ an kana an yɛrɛ jalaki tugun. O la, an bena se ka Jehova bato ni dusukun ɲuman ani ninsɔndiyaba ye, i ko a yɛrɛ b’a fɛ cogo min na (Kɔlɔs. 1:10, 11; 2 Tim. 1:3). Nga an be se ka mun lo kɛ walisa ka la a la ko Ala yafara an ma?

MUN LO BE SE K’AN DƐMƐ KA LA A LA KO JEHOVA YAFARA AN MA?

7-8. Jehova ye mun lo fɔ Musa ye a yɛrɛ koo la ani o b’a to an be la mun lo la? (Ɛkizɔdi 34:6, 7).

⁷ Jehova ye min fɔ a yɛrɛ koo la, miiri o la. Misali la, a filɛ a ye min fɔ Musa ye Sinayi kulu kana (Ɛkizɔdi 34:6, 7 kalan). Hali ni Jehova tun be se k’a daminɛ k’a jogo n’a ka kokɛcogo caaman kofɔ Musa ye, a y’a latigɛ k’a fɔ a ye ko ale ye “makaritigi, hinɛbaga Ala” ye. Yala o Ala sugu be se ka ban ka yafa a sagokɛla dɔ ma, min nimisanin lo sɔbɛ la a ka jurumu kosɔn wa? Abada! Ni Jehova ma yafa o ɲɔgɔnna mɔgɔ ma, a bena jati Ala ye min ka jugu ani min tɛ makari. Jehova do tɛna kɛ ten abada!

⁸ Ni Jehova y’a fɔ an ye ko ale ye makaritigi ye, a be tiɲɛn lo fɔra an ye sabu a tɛ ngalon tigɛ abada (Zab. 31:6). O la, an be se ka la a ka fɔta la. N’i bele be to k’i yɛrɛ jalaki i ka jurumu tɛmɛninw kosɔn, i yɛrɛ ɲininga ko: “Yala n’ lanin b’a la ko Jehova ye makaritigi ani hinɛbaga Ala ye tiɲɛn na, ani ko minw bɛɛ be nimisa u ka jurumuw na, a tɛ ban ka yafa u ma wa? O la do, yala n’ man ɲi ka la a la ko a yafara ne ma wa?”

9. Jehova be yafa an ma cogo min na, Zaburuw 32:5 be mun lo yira an na o koo la?

⁹ Jehova y’a kɛ Bibulu sɛbɛbagaw ye min fɔ a ka yafali koo la, miiri o la. Misali la, a filɛ Dawuda ye Jehova ka yafali koo lakali cogo min na (Zaburuw 32:5 kalan). A ko: “E ye ne ka kojugu kunko bɔ ne kan.” Tuma min na Jehova yafara Dawuda ma, a kɛra a fɛ i n’a fɔ Jehova ye doniba dɔ lo bɔ a kun. O y’a to Dawuda lafiyara (Zab. 32:2-4). An fana be se k’o lafiya ɲɔgɔn sɔrɔ. N’an nimisara sɔbɛ la an ka jurumuw na, an man kan ka to k’an yɛrɛ jalaki tugun o kosɔn sabu Jehova yafara an ma.

10-11. N’a fɔra ko Jehova be sɔn ka yafa, o be mun lo yira an na a koo la? (Zaburuw 86:5).

¹⁰ Zaburuw 86:5 kalan. Dawuda y’a fɔ ko Jehova be sɔn ka yafa. O kɔrɔ ko Jehova tɛ dimi joona n’an ye fili dɔ kɛ. Nga minw be nimisa, a ka di a ye tuma bɛɛ ka yafa u ma. Mun na Jehova b’o kɛ? O vɛrise yɔrɔ laban b’a fɔ ko: “E be ɲumanya kɛ i daalibagaw ye kosɔbɛ.” Barokun tɛmɛnin na, an y’a ye ko Jehova ye layidu ta ko minw b’ale kanu, a bena to k’a ka kanuya kantigiman yira olu la ani ko a tɛna u to yen abada. Jurumukɛla minw bɛɛ be nimisa, Jehova be sɔn ka yafa u ma a ka kanuya kantigiman kosɔn (Ezayi 55:7). N’a ka gwɛlɛ i ma ka la a la ko Jehova yafara i ma, i yɛrɛ ɲininga ko: “Yala n’ lanin b’a la ko jurumukɛla minw bɛɛ be nimisa ani u be Jehova deli a ka makari u la, a be sɔn ka yafa u ma wa? N’o lo, n’ be se ka la a la ko tuma min na ne fana y’a deli ko a ka makari n’ na ani ka yafa n’ ma, a y’o lo kɛ.”

¹¹ Bibulu b’a fɔ an ye ko Jehova b’a lɔn kosɔbɛ an danna cogo min na ani a b’a lɔn fana ko an ye mɔgɔ dafabaliw ye. O koo b’an hakili sigi yɛrɛ le! (Zab. 139:1, 2). O yirala ka gwɛ Dawuda ka Zaburu wɛrɛ la. An k’a filɛ o Zaburu be se k’an dɛmɛ cogo min na ka la a la ko Jehova yafara an ma.

JEHOVA B’A HAKILI TO MIN NA, KANA ƝINƐ O KƆ

12-13. Jehova hakili be mun lo la ani a b’an minɛ cogo di? (Zaburuw 103:14).

¹² Zaburuw 103:14 kalan. Minw nimisara u ka jurumuw na, kuun minw kama Jehova be yafa u ma, Dawuda ye u la dɔ lakali. A ko Jehova “hakili b’a la ko an ye buguri ye.” O kɔrɔ ko a b’a lɔn ko an ye dafabaliw ye. An k’o kuma kɔrɔ lajɛ k’a pereperelatigɛ.

¹³ Dawuda ko Jehova b’a lɔn “an danna ni fɛɛn min ye.” Jehova ye Adama “dan ni buguri ye.” O la, a b’a lɔn adamadenw danna cogo min na ani u mako be min na. Misali la, u mako b’a la ka dumuni kɛ, ka sinɔgɔ ani ka nɛnɛkiri. Hali mɔgɔ dafaninw mako b’a la k’o fɛɛnw kɛ (Zɛnɛzi 2:7). Kumasen min bayɛlɛmana ko “an ye buguri ye,” o kɔrɔ be se ka kɛ fana ko Adama ni Awa ye jurumu kɛ minkɛ, an be wolo mɔgɔ dafabaliw ye ani an ka ɲi ka bondori kɛ walisa an kana koo jugu kɛ. Jehova b’o kala ma koɲuman. Nga o dɔrɔn tɛ, tuma min na Dawuda ko Jehova hakili b’a la ko an ye buguri ye, a tun b’a fɔra le fana ko komi Jehova b’a lɔn ko an ye jurumutɔw ye, a be makari an na tuma bɛɛ. An be se ka Dawuda ka kuma fɔ ka surunya nin cogo la: Jehova b’a lɔn ko an bena fili tuma dɔw la. N’an filila, a be makari an na ani ka yafa an ma n’a y’a ye ko an nimisanin lo sɔbɛ la.—Zab. 78:38, 39.

14. a) Jehova be yafa an ma fɔɔ ka se hakɛ min ma, Dawuda y’o ɲɛfɔ cogo di? (Zaburuw 103:12). b) Jehova yafara Dawuda ma cogo min na, an be kalan juman lo sɔrɔ o la? (koorilen nin lajɛ: “Jehova b’an ka jurumuw yafa ani a b’a hakili bɔ u la”).

¹⁴ Jehova be yafa an ma fɔɔ ka se hakɛ juman ma? (Zaburuw 103:12 kalan). Dawuda ko ni Jehova yafara an ma, a b’an ka filiw yɔrɔ janya an na i ko “kɔrɔn fɛ ni tileben ka jan ɲɔgɔn na cogo min na.” Tileben ni kɔrɔn ka jan ɲɔgɔn na kosɔbɛ. O yɔrɔ fila tɛ se ka ɲɔgɔn kunbɛn ka ye. O be mun lo yira an na Jehova ka yafali koo la? Ɲɛfɔli kɛra o vɛrise koo la gafe dɔ kɔnɔ ko Ala b’an ka jurumu yɔrɔ janya an na cogo min na, o be i n’a fɔ kasa be tunu ka bɔ fɛɛn dɔ la pewu pewu cogo min na. O la, an be se ka la a la ko Jehova tɛna miiri tugun o jurumu koo la abada wala k’an hakili jigi a la. Tuma dɔw la, fɛɛn dɔ kasa be se k’an hakili jigi koo tɛmɛnin dɔ la. Nga ni Jehova y’an ka jurumu dɔ yafa, foyi t’a hakili jigi o la tugun wala k’a kɛ a b’an jalaki wala k’an ɲangi o kosɔn.—Ezek. 18:21, 22; Kɛw. 3:19.

15. N’an be to k’an yɛrɛ jalaki an ka fili tɛmɛninw kosɔn, an be se ka mun lo kɛ?

¹⁵ Dawuda ye min fɔ Zaburuw 103nan kɔnɔ, o be se k’an dɛmɛ cogo di ka la a la ko Jehova yafara an ma? N’an be to k’an yɛrɛ jalaki an ka jurumu tɛmɛninw kosɔn, an be se k’an yɛrɛ ɲininga ko: “Jehova b’a hakili to min na, yala ne ɲinɛna o kɔ wa? Yala n’ ɲinɛna ko a b’a kala ma ko n’ ye jurumutɔ ye ani ko minw nimisara u ka jurumuw na i ko ne, a be yafa olu ma wa? Jehova y’a latigɛ ka koo minw bɔ a hakili la, i n’a fɔ a ye n’ ka jurumu tɛmɛnin minw yafa ani a tɛna n’ ɲangi o minw kosɔn, yala ne be n’ hakili to o la wa?” Jehova t’a hakili to an ka jurumu tɛmɛninw na. An fana man ɲi k’o kɛ (Zab. 130:3). N’an lara a la ko Jehova yafara an ma, o bena an dɛmɛ an kana to k’an yɛrɛ jalaki an ka jurumu tɛmɛninw kosɔn. O la, an bena to ka Jehova bato ninsɔndiya la.

16. Farati juman lo b’a la ka to k’an yɛrɛ jalaki an ka jurumu tɛmɛninw kosɔn? Misali dɔ fɔ (jaa lajɛ fana).

¹⁶ An ka misali dɔ lajɛ. N’i be to k’i yɛrɛ jalaki i ka fili tɛmɛninw kosɔn, a be komi i be mobili bolila k’i ɲɛɛ basanin to retorovizɛri kan. Koo ɲuman lo ka to k’i ka retorovizɛri filɛ tuma kelen kelen sabu o be se k’i dɛmɛ k’i yɛrɛ tanga farati dɔw ma. Nga walisa i latanganin ka to sira kan, i ka ɲi ka to ka filɛri kɛ i ɲɛfɛ. O cogo kelen na, n’an be miiri an ka fili tɛmɛninw na tuma kelen kelen, an be se ka hakili sɔrɔ u la, ani o be se k’an dɛmɛ an kana segi k’u kɛ tugun. Nga n’an be to ka miiri an ka fili tɛmɛninw na tuma bɛɛ, an bena to k’an yɛrɛ jalaki kojugu ani o bena an bali ka baara kɛ Ala ye bɛrɛbɛrɛ. Min ka fisa, o ye ko an k’an hakili bɛɛ to Jehova sago kɛli la ani an ka to ka miiri duniɲa kura koo la, miiri jugu si tɛna kɛ yɔrɔ min na. Jehova y’o layidu lo ta ko: “Mɔgɔw tena miiri koo tɛmɛninw na tugu.”—Ezayi 65:17; Talenw 4:25.

LA A LA KOSƆBƐ KO JEHOVA B’I KANU ANI KO A YAFARA I MA

17. Mun na an ka ɲi k’an jija walisa ka la a la kosɔbɛ ko Jehova b’an kanu ani ko a yafara an ma?

¹⁷ An ka ɲi k’an jija walisa ka la a la kosɔbɛ ko Jehova b’an kanu ani ko a yafara an ma (1 Zan 3:19). Mun na do? Sabu Sutana bena to k’a seko bɛɛ kɛ k’an lasun an k’a miiri ko Jehova t’an kanu wala ko a tɛna yafa an ma. A mana kɛ min o min ye, a ka laɲinita ye k’an lasun an ka Jehova sago kɛli dabila. An b’a lɔn ko Sutana bena to k’a jija kosɔbɛ o la sabu a b’a lɔn ko wagati caaman t’a fɛ tugun (Yir. 12:12). Nga an ma ɲi k’a to a ka se an kɔrɔ!

18. I be se ka mun lo kɛ walisa ka la a la ko Jehova b’i kanu ani ko a yafara i ma?

¹⁸ Walisa ka la a la kosɔbɛ ko Jehova b’i kanu, barokun tɛmɛnin ka ladiliw sira tagama. Walisa ka la a la ko Jehova yafara i ma, a ye min fɔ a yɛrɛ koo la, miiri o la. A y’a kɛ Bibulu sɛbɛbagaw ye min fɔ a ka yafali koo la, miiri o fana na. Kana ɲinɛ ko a b’a kala ma ko i ye jurumutɔ ye ani ko a bena makari i la. A to i hakili la ko ni Jehova y’an ka jurumu yafa, a be yafa pewu pewu le. O la, i ko Dawuda, i bena la a la ko Jehova bena makari i la ani i bena se k’a fɔ ko: “I ni ce Jehova sabu ‘E ye ne ka kojugu kunko bɔ ne kan’!”—Zab. 32:5.