I be se k’i ka deliliw fisaya cogo min na

1-2. a) Mun lo be se k’an bali k’an dusukunnakow bɛɛ fɔ Jehova ye? b) An b’a lɔn cogo di ko Jehova b’a tulo malɔ k’an ka deliliw lamɛn?

YALA tuma dɔw la a b’i ɲɛɛ na ko i be segi kuma kelen nunu lo kan i ka deliliw la wala ko i be delili kɛ sanfɛ sanfɛ wa? N’o lo, e kelen tɛ. An bolo degunnin lo kosɔbɛ minkɛ, an ka teli ka delili surunw dɔrɔn lo kɛ. Wala n’a sɔrɔ a ka gwɛlɛ an ma k’an dusukunnakow bɛɛ fɔ Jehova ye sabu an b’a miiri ko ka kuma n’a ye, an man kan n’o ye.

² Ka se kumacogo la an ka deliliw la, Bibulu b’an hakili sigi ko o lo kɔrɔtanin tɛ Jehova fɛ. Nga min kɔrɔtanin lo a fɛ, o ye ko an k’an majigi k’an dusukunnakow fɔ a ye. A “be dɛsɛbagatɔw [wala mɔgɔ majigininw] ka daalili lamɛn.” (Zab. 10:17). A b’a tulo malɔ k’an ka kuma kelen kelen bɛɛ lamɛn sabu a b’a mako don an na sɔbɛ la.—Zab. 139:1-3.

3. An bena ɲiningali jumanw lo lajɛ barokun nin na?

³ An be se k’an yɛrɛ ɲininga ko: Mun na an be se ka Jehova deli ni hakilisigi ye? An be se ka mun lo kɛ walisa an ka deliliw k’an magwɛrɛ kosɔbɛ Jehova la? Jehova sagokɛlaw dɔw ye delili kɛ n’u dusu bɛɛ ye ani u ka deliliw kofɔra Bibulu kɔnɔ. N’an b’o deliliw lajɛ, o be se k’an dɛmɛ cogo di k’an ka deliliw fisaya? An be se ka mun lo kɛ n’an dusu kasinin lo kojugu fɔɔ a ka gwɛlɛ an ma k’an dusukunnakow fɔ Jehova ye delili la? An k’o ɲiningaliw jaabili lajɛ.

JEHOVA DELI NI HAKILISIGI YE

4. Mun lo be se k’an dɛmɛ an ka Jehova deli ni hakilisigi ye? (Zaburuw 119:145).

⁴ N’an y’a faamu ko Jehova ye teri kantigi ye min b’an nafa lo ɲinina, an bena a deli ni hakilisigi ye. Zaburuw 119 sɛbɛbaga y’a jija k’o teriya sɔbɛ ɲɔgɔn lo kɛ ni Jehova ye. A ye gwɛlɛyaw sɔrɔ a ka ɲɛnamaya kɔnɔ. Misali la, mɔgɔ jugu dɔw ye ngalon tigɛ ka la a kan (Zab. 119:23, 69, 78). A tun ka ɲi fana k’a ka dafabaliyakow muɲu (Zab. 119:5). O bɛɛ n’a ta, a tun tɛ siga k’a dusukunnakow bɛɛ fɔ Jehova ye.—Zaburuw 119:145 kalan.

5. Mun na an man ɲi k’a to miiriya juguw k’an bali ka Jehova deli? Misali dɔ fɔ.

⁵ Hali minw ye jurumubaw kɛ, Jehova b’a ɲini u fɛ u k’ale deli (Ezayi 55:6, 7). O la, an man ɲi k’a to miiriya juguw k’an bali k’a deli. Misali la, awiyɔn bolibaga b’a lɔn ko a be se ka kumaɲɔgɔnya kɛ ni awiyɔnso mɔgɔw ye n’a mako be u ka dɛmɛ na. Nga n’a tununa wala a ye fili dɔ kɛ, yala o maloya ka ɲi k’a to a be siga ka kuma u fɛ wa? Ayi dɛ! O cogo kelen na, hali ni tuma dɔw la an t’a lɔn an bena min kɛ wala an ye jurumu dɔ kɛ, an man ɲi ka sigasiga ka Jehova deli.—Zab. 119:25, 176.

AN KA DELILIW BE SE K’AN MAGWƐRƐ JEHOVA LA KOSƆBƐ COGO DI?

6-7. N’an be to ka miiri Jehova ka jogow koo la, o b’an dɛmɛ cogo di k’an magwɛrɛ a la kosɔbɛ? Misali dɔ fɔ (jukɔrɔla kunnafoni fana lajɛ).

⁶ N’an b’an kɔnɔ gwɛ k’an dusukunnakow n’an ka miiriyaw bɛɛ fɔ Jehova ye, o be kɛ sababu ye an b’an magwɛrɛ a la kosɔbɛ. O la, mun lo be se k’an dɛmɛ ka delili kɛ ka dunya?

⁷ Miiri Jehova ka jogow koo la.a N’an tora ka miiri a ka jogow koo la, a bena nɔgɔya an ma k’an dusukunnakow fɔ a ye (Zab. 145:8, 9, 18). An ka balimamuso dɔ ka koo lajɛ. A tɔgɔ ko Kristine ani a facɛ tun ka fari. A ko: “Ka Jehova jati n’ Faa ye ani ka kuma a fɛ, o tun man nɔgɔ n’ ma. N’ tun b’a miiri ko a bena n’ to yen n’ ka filiw kosɔn.” Jehova ka jogo juman lo ye Kristine dɛmɛ? A ko: “Jehova ka kanuya kantigiman y’a to n’ y’a ye ko n’ latanganin lo. N’ b’a lɔn ko a tɛna n’ bolo bila. Hali ni n’ benna, a bena n’ kɔrɔta ni kanuya ye. O ye n’ dɛmɛ ka n’ ka ninsɔndiyakow ni n’ ka dusukasikow bɛɛ fɔ a ye.”

8-9. An b’a fɛ ka min fɔ delili la, n’an be kɔn ka miiri o la, nafa jumanw lo b’o la? Misali dɔ fɔ.

⁸ I bena min fɔ, kɔn ka miiri o la. Yanni i ka delili kɛ, i be se k’i yɛrɛ ɲininga ko: “Gwɛlɛya jumanw lo be n’ kan sisan? N’ ka ɲi ka yafa mɔgɔ dɔ ma wa? Yala yɛlɛmani dɔ kɛra n’ ka ɲɛnamaya la kɔsa la ani n’ mako be Jehova ka dɛmɛ na o koo la wa?” (2 Mas. 19:15-19). Ka fara o kan, Yezu ye delili modɛli min yira an na, an ka ɲi ka tugu o kɔ ani ka miiri an be se ka min deli Jehova fɛ ka ɲɛsin a tɔgɔ, a ka Masaya ani a sagonata koo ma.—Mat. 6:9, 10.

⁹ Balimamuso dɔ tɔgɔ ko Aliska. Tuma min na dɔgɔtɔrɔw y’a fɔ a ye ko kansɛri bana b’a cɛɛ la ani ko a bena sa yanni dɔɔni, a tun ka gwɛlɛ a ma ka delili kɛ. A ko: “N’ dusu tun kasinin lo kosɔbɛ fɔɔ, n’ tun tɛ se ka n’ hakili sigi ka delili kɛ.” Mun lo y’a dɛmɛ do? A ko: “Yanni n’ ka delili kɛ, n’ be se ka min fɔ Jehova ye, n’ be wagati damanin ta ka miiri o la. O cogo la, n’ tɛ sinsin n’ yɛrɛ dama kan. O ye n’ dɛmɛ ka n’ hakili sigi ani ka koo wɛrɛw fɔ Jehova ye n’ ka deliliw la.”

10. Mun na an ka ɲi ka wagati ta ka delili kɛ? (jaaw lajɛ fana).

¹⁰ Kana kɔrɔtɔ n’i be delili kɛra. Tiɲɛn lo ko hali delili surunw b’a to an b’an magwɛrɛ Jehova la. Nga n’an be wagati ta ka delili kɛ, an bena se k’an dusukunnakow bɛɛ fɔ Jehova ye.b Aliska cɛɛ Elijah ko: “N’ be banba ka delili kɛ siɲɛ caaman tile kɔnɔ. Ani komi n’ be wagati ta ka delili kɛ, o y’a to n’ ye n’ magwɛrɛ Jehova la kosɔbɛ. Ni n’ be delili kɛra, Jehova kɔrɔtɔnin tɛ n’ ka tila joona joona. O la, n’ be se ka n’ ka wagati ta ka delili kɛ.” Nin kɛ k’a filɛ: I be se ka delili kɛ ɲɛsuma na wagati ani yɔrɔ min na, o sugandi. N’a sɔrɔ i yɛrɛ be se ka delili kɛ ni kaanba ye. Ani a kɛ i delinanko ye ka delilijan kɛ.

DELILI MINW KOFƆRA BIBULU KƆNƆ, MIIRI U LA

11. Delili minw kofɔra Bibulu kɔnɔ, n’i miirila u la, o be se k’i nafa cogo di? (koorilen nin fana lajɛ: “I ka koow bɔnin be u ta ma wa?”)

¹¹ Deliliw ni tandoli dɔnkili minw kofɔra Bibulu kɔnɔ, n’i miirila u la, o be se k’i nafa. N’i y’a kɔrɔsi Jehova sagokɛlaw y’u dusukunnakow bɛɛ fɔ a ye cogo min na, o bena ele fana jija i k’i dusukunnakow fɔ a ye. N’a sɔrɔ i bena tandoli kuma dɔw lɔn i bena se ka minw fɔ i ka deliliw la. I bena delili dɔw sɔrɔ fana minw bɛnnin be i ka koow cogoya ani i dusukunnakow ma.

12. N’an be miirila delili dɔ kɔnɔnakumaw na, an be se k’an yɛrɛ ɲininga mun lo la?

¹² Delili minw be sɔrɔ Bibulu kɔnɔ, n’i be miirila u dɔ la, i yɛrɛ ɲininga ko: “Jɔn lo ye o kumaw fɔ ani a y’u fɔ koo jumanw lo sen fɛ? A ka koo bɔnin be n’ ta ma wa? N’ be kalan jumanw lo sɔrɔ a ka delili la?” N’a sɔrɔ i ka ɲi ka sɛgɛsɛgɛri kɛ walisa k’o ɲiningaliw jaabili sɔrɔ. Nga kuun b’a la i k’o kɛ. An ka misali damanin lajɛ.

13. An be kalan minw sɔrɔ Anɛ ka delili la, u dɔ ye juman ye? (1 Samuyɛli 1:10, 11; jaa lajɛ fana kan).

¹³ Vɛrise nunu kalan: 1 Samuyɛli 1:10, 11. Tuma min na Anɛ y’o delili kɛ, gwɛlɛyaba fila dɔw lo tun b’a kan. A tun tɛ se ka deen wolo ani a sinamuso tun b’a niin tɔɔrɔ (1 Sam. 1:4-7). N’i be gwɛlɛya dɔ muɲuna kabi wagatijan, i be se ka kalan juman lo sɔrɔ Anɛ ka delili la? A ye delilijan dɔ kɛ k’a dusukunnakow bɛɛ fɔ Ala ye ani o kɔ a dusu lafiyara (1 Sam. 1:12, 18). An fana be se ka lafiya sɔrɔ, n’an b’an ka “koow to Masaba [Jehova] bolo.” Gwɛlɛya minw b’an kan, an k’a fɔ a ye o be min kɛra an na tigitigi.—Zab. 55:23.

14. a) An be kalan wɛrɛ juman lo sɔrɔ Anɛ ka koo la? b) N’an be miiri Ala ka Kuma kan, o be se k’an dɛmɛ cogo di k’an ka deliliw fisaya? (jukɔrɔla kunnafoni lajɛ).

¹⁴ Saan damanin Anɛ jiginin kɔ a dencɛ Samuyɛli la, a tagara a yira sarakalasebagaw kuntigi Eli la (1 Sam. 1:24-28). A ye delili dɔ kɛ n’a dusu bɛɛ ye k’a fɔ Jehova ye ko ale lanin b’a la ko a b’a sagokɛla kantigiw latanga ani k’a janto u lac (1 Sam. 2:1, 8, 9). Tiɲɛn lo ko Anɛ ka gwɛlɛyaw ma ban. Nga Jehova y’a duga cogo minw na, a tora ka miiri o lo la. An be kalan juman lo sɔrɔ o la? Ni gwɛlɛya dɔ b’an kan kabi wagatijan, an bena se k’a muɲu n’an be miiri k’a filɛ Jehova b’an dɛmɛna cogo minw na fɔɔ ka na se sisan ma.

15. N’u be tilenbaliyako kɛra an na, Zeremi ye delili min kɛ, an be kalan juman lo sɔrɔ o la? (Zeremi 12:1).

¹⁵ Zeremi 12:1 kalan. Tuma min na kira Zeremi y’a ye ko mɔgɔ juguw ka koow be ɲɛna u bolo, o y’a hakili ɲagami. Israɛlden tɔɔw tun b’a minɛ cogo min na, o y’a fari faga fana (Zer. 20:7, 8). N’an y’a ye ko nanbaramɔgɔw ka koow be ɲɛna u bolo wala ni mɔgɔw b’an lɔgɔbɔ, o be se k’a to an be Zeremi dusukunnakow faamu. Hali n’o koo ye Zeremi kɔnɔ gwan, a m’a fɔ ko Ala ye koo tilenbali kɛ. Minw tun murutira Jehova ma, Zeremi kɛtɔ k’a ye Jehova y’u kolo cogo min na, o y’a to a lara Ala ka tilenninya la kosɔbɛ (Zer. 32:19). Koo o koo b’an tɔɔrɔ, an fana be se k’o bɛɛ fɔ Jehova ye delili la. An ka la a la ko a bena tilenbaliya sifa bɛɛ ban a ka wagati latigɛnin na.

16. An be kalan juman lo sɔrɔ Levite dɔ ka delili la? (Zaburuw 42:2-5; jaaw lajɛ fana).

¹⁶ Zaburuw 42:2-5 kalan. Levite dɔ lo y’o Zaburu sɛbɛ. A tun be jɔnya la ani a tun tɛ se ka jɛn ni Ala sagokɛla tɔɔw ye k’a bato. O zaburu b’a yira a dusukunnakow tun ye min ye. N’an tɛ se ka bɔ an ka soo wala n’u y’an datugu kaso la an ka limaniya kosɔn, an be se ka kɛ n’o Levite dusukunnakow ɲɔgɔn ye. N’a sɔrɔ tuma dɔw la an dusu ka di ani tuma dɔw la fana an dusu man di. Nga an dusukunnakow mana kɛ min o min ye, a ka ɲi an k’o fɔ Jehova ye. O be se k’an dɛmɛ k’an ka miiriyaw sɛgɛsɛgɛ ani ka koow filɛ ni ɲɛɛ ɲuman ye. Misali la, o Levite y’a faamu ko a tun bena sababu wɛrɛw sɔrɔ ka Jehova tando (Zab. 42:6). Jehova tun b’a janto a la cogo minw na, a miirila o la fana (Zab. 42:9). N’an b’an kɔnɔ gwɛ ka Ala deli, o bena an dɛmɛ k’an ka miiriyaw sɛgɛsɛgɛ, k’an hakili sigi ani ka fanga sɔrɔ ka muɲuli kɛ.

17. a) An be kalan juman lo sɔrɔ kira Zonasi ka delili la? (Zonasi 2:2, 3). b) Zaburu kɔnɔnakuma dɔw be se k’an dɛmɛ cogo di gwɛlɛyaw tuma na? (jukɔrɔla kunnafoni lajɛ).

¹⁷ Zonasi 2:2, 3 kalan. Kira Zonasi y’o delili kɛ tuma min na a tun be jɛgɛba dɔ kɔnɔ. Hali k’a sɔrɔ a ma mɛnni kɛ Jehova fɛ, a tun lanin b’a la ko a bena a ka delili lamɛn. A ka delili la, a ye kumaden caaman fɔ minw be sɔrɔ Zaburuw kɔnɔ.d A be komi Zonasi tun b’o Zaburu kɔnɔnakumaw lɔn ka ɲɛ. A kɛtɔ ka miiri o kumaw kan, o y’a hakili sigi ko Jehova bena a dɛmɛ. O cogo kelen na, an ka vɛrise dɔw to an hakili la. O la, n’an ye Jehova deli gwɛlɛyaw wagati la, a bena an hakili jigi o vɛrisew la ani k’an hakili sigi.

TO K’I MAGWƐRƐ JEHOVA LA DELILI LA

18-19. N’a ka gwɛlɛ an ma tuma dɔw la k’an dusukunnakow fɔ Jehova ye delili la, Ɔrɔmukaw 8:26, 27 b’an hakili sigi mun lo la? Misali dɔ fɔ.

¹⁸ Ɔrɔmukaw 8:26, 27 kalan. N’a sɔrɔ tuma dɔw la an hakili ɲagaminin lo fɔɔ a ka gwɛlɛ an ma k’an dusukunnakow fɔ delili la. Nga, Jehova t’an to an kelen. O wagatiw la, Ala ka hakili senu be “daalili kɛ an nɔɔ na.” Kɔrɔ juman na do? Jehova y’a kɛ u ye delili caaman sɛbɛ a ka Kuma kɔnɔ hakili senu barika la. N’an tɛ sera k’an ka miiriyaw bɛɛ fɔ, Jehova be se k’a jati ko an ka miiriyaw bɛnnin lo o deliliw dɔ kɔnɔnakumaw ma ani a b’o jaabi.

¹⁹ O miiriya ye balimamuso dɔ dusu saalo. A tɔgɔ ko Yelena ani a be bɔ Irisi jamana na. Polisiw y’a minɛ sabu a tun ye delili kɛ ani ka Bibulu kalan. Yelena hakili ɲagamina kosɔbɛ fɔɔ a tun ka gwɛlɛ a ma ka delili kɛ. A ko: “N’ hakili jigira ko ni n’ hakili ɲagaminin lo ani n’ t’a lɔn n’ bena min fɔ Jehova ye delili la, a sagokɛla minw ka deliliw be sɔrɔ Bibulu kɔnɔ, a b’u ka deliliw jati n’ ka deliliw ye. O tun be n’ dusu saalo kosɔbɛ o wagati gwɛlɛnw na.”

20. N’an hakili ɲagaminin lo, mun lo be se k’an dɛmɛ k’an hakili sigi ka sɔrɔ ka delili kɛ?

²⁰ N’an hakili ɲagaminin lo, tuma dɔw la a be se ka gwɛlɛya an ma k’an hakili sigi n’an be delili kɛra. Walisa k’an hakili sigi, an be se ka Zaburuw kalan ni kaanba ye. I ko masacɛ Dawuda, an be se k’an dusukunnakow sɛbɛ fana (Zab. 18, 34, 142). An be se k’an yɛrɛ labɛn cogo min na walisa ka delili kɛ, sariya tigitigi dɔw tɛ yen o koo la (Zab. 141:2). Min ka fisa ele ma, i k’o kɛ.

21. Mun na an be se k’an kɔnɔ gwɛ ka Jehova deli?

²¹ K’a lɔn ko yanni an yɛrɛ k’an dusukunnakow fɔ Jehova ye, a b’u faamu, o b’an dusu saalo yɛrɛ le (Zab. 139:4). Nga, n’an b’an dusukunnakow fɔ a ye ani k’a yira a la ko an lanin b’a la, o ka di a ye. O la, kana sigasiga k’i sankolola Faa deli. Delili minw sɛbɛra a ka Kuma kɔnɔ, i be se k’u kɔnɔnakuma dɔw fɔ i ka deliliw la. Delili kɛ ni kɔnɔgwɛ ye. I ka ninsɔndiyakow n’i ka dusukasikow fɔ Jehova ye. A y’i teri sɔbɛ ye ani a tɛna i to yen abada!