Labɛn minw kɛra walisa tile saba lajɛnba ka bɔ arajo ni telewisɔn na

Saan 2020 ka tile saba lajɛnba ɲɔgɔn tun ma deli ka kɛ ka ye. An siɲɛ fɔlɔ lo tun ka tile saba lajɛnba anrezistreman kɛ ani k’o bila ɛntɛrɛnɛti kan bɛɛ ye! Nka, Malawi ni Mozanbiki jamana na, an balima caaman ye o tile saba lajɛnba diyabɔ hali ni ɛntɛrɛnɛti tun t’u fɛ. U y’a kɛ cogo di do?

Kɔrdinatɛriw ka kɔmite ani Kalanko ɲɛnabɔbagaw ka kɔmite ye sira di ko an ka o lajɛnba bɔ arajo ni telewisɔn na Malawi ni Mozanbiki jamanaw na. Mun na u y’o desizɔn kɛrɛnkɛrɛnnin ta do? U ye o desizɔn ta sabu Malawi jamana na, ɛntɛrɛnɛti sɔngɔ ka gwɛlɛ kojugu ani o kama, balima caaman tun tɛ se ka konɛkte. William Chumbi ye Malawi Betɛli ka kɔmite mɔgɔ dɔ ye. Ale y’a fɔ ko: “An tun be se ka tɛmɛ arajo ni telewisɔn dɔrɔn lo fɛ walisa balimaw ka se k’o lajɛnba lamɛn.” Luka Sibeko fana ye Malawi Betɛli ka kɔmite mɔgɔ dɔ ye. Ale y’a fara a kan ko: “N’o lajɛnba tun ma bɔ telewisɔn ni arajo la, balima damanin dɔrɔn lo tun bena se k’o diyabɔ.” Mozanbiki jamana na fana, see tun be balima damanin dɔrɔn lo ye ka telefɔni ɲanaman san, ɛntɛrɛnɛti yɛrɛ kuma tɛ fɔ.

Labɛn minw kɛra

COVID-19 fɔɲɔbana kosɔn, an ka lajɛnw tun be bɔ arajo ni telewisɔn dɔw la ka ban.a Balimaw y’a ɲini o arajobonw ni o telewisɔnbonw fɛ u ka wagati wɛrɛw di u ma walisa u ka se ka tile saba lajɛnba porogramu bɔ mɔgɔw ye.

Malawi jamana na an balimaw ye gwɛlɛya dɔ sɔrɔ. Minw b’a fɛ ka emisɔn dɔ bɔ telewisɔn wala arajo la, arajo ni telewisɔn mɔgɔw m’an teli ka wagati di o ma min tɛmɛna lɛri kelen kan. U be siran ko ni porogramu dɔ ka jan kojugu, mɔgɔw bena u mako bɔ a la. Nka, balimaw y’a ɲɛfɔ u ye ko an ka ɔriganisasiyɔn be baara kɛra ka mɔgɔw bɛɛ lo dɛmɛ. Balimaw y’a fɔ u ye fana ko hali kɔnfineman tuma na, dusu saalo kuma minw be sɔrɔ Bibulu kɔnɔ, an be o labila mɔgɔw bɛɛ ye. O be se ka mɔgɔw dɛmɛ u ka kɛ jamanaden ɲumanw ye ani ka hɛɛrɛ sɔrɔ u ka denbaya kɔnɔ. Tuma min na arajo ni telewisɔn ɲɛmɔgɔw ye o mɛn, u hakili sigira ani u sɔnna ka wagati caaman d’an ma.

Malawi jamana na, telewisɔnbon kelen dɔ ani arajobon dɔ ye tile saba lajɛnba bɔ ani mɔgɔ miliyɔn caaman tun be se k’o lamɛn jamana kuru bɛɛ la. Mozanbiki jamana na, telewisɔnbon kelen ni arajobon 85 lo ye an ka tile saba lajɛnba bɔ.

O jamana fila nunu na, an ye dolari 28 227b lo bɔ (miliyɔn 17 ɲɔgɔn Cfa wari la) ka se ka lajɛnba porogramu bɔ telewisɔn na ani dolari 20 000 ka se k’a bɔ arajo la (miliyɔn 12 ɲɔgɔn Cfa wari la). Ka se ka porogramu dɔ bɔ arajo la, o musakaw tun be daminɛ dolari 15 la (wala miliyɔn 9 ɲɔgɔn Cfa wari la ni arajobon dennin lo) ka taga se dolari 2 777 ma (wala miliyɔn kelen ni kɔ ɲɔgɔn ni arajobonba lo).

An balimaw ye jijaliba yɛrɛ lo kɛ ka se ka baara kɛ ni niliw ye hakilitigiya la. Misali la, Malawi jamana na, balimaw ye baro kɛ ni arajo ani telewisɔn ɲɛmɔgɔw ye walisa u ka sɔngɔw nɔgɔya an ma. O y’a to kɛmɛ fila kan, u sɔnna ka biwɔɔrɔ bɔ. O kama, an sera ka dolari 1 711 lo mara (miliyɔn kelen ni kɔ Cfa wari la). Mozanbiki jamana na, arajobonw ni telewisɔnbon dɔw sɔnna ka sɔngɔw nɔgɔya an ma sabu an be ni tɔgɔ ɲuman ye, an ye mɔgɔ hɔɔrɔnw ye ani u ko an b’an ka dajuruw dafa.

Balimaw y’u ka waleɲumanlɔn yira

A diyara an balimaw ye kosɔbɛ ka tile saba lajɛnba lamɛn arajo ni telewisɔn na. Patrick ye diinan mɔgɔkɔrɔ dɔ ye ani a be bɔ Malawi jamana na. A ko: “An be Koow Ɲɛnabɔla Jɛnkulu balimaw fo sabu u y’u janto an na kosɔbɛ fɔɲɔbana tuma na.” Isaac fana be bɔ Malawi jamana na ani a ko: “Komi arajo dɔrɔn lo b’an bolo, an be Jehova ka ɔriganisasiyɔn fo kosɔbɛ sabu a ye labɛn kɛrɛnkɛrɛnnin dɔ sigi sen kan walisa an ka se ka tile saba lajɛnba lamɛn arajo la. O labɛn sababu la, ne ni n’ ka denbayamɔgɔw bɛɛ sera ka tile saba lajɛnba diyabɔ. An y’a ye o sen fɛ ko Jehova b’a sagokɛlaw kanu.”

Weleweledala dɔ be bɔ Mozanbiki ani a ye lajɛnba fɔlɔ min kɛ, o kɛra saan 2020 ka tile saba lajɛnba ye. A ko: “Labɛn min kɛra walisa an ka se ka tile saba lajɛnba filɛ telewisɔn na, o ye n’ hakili jigi ko Jehova ye sebagayabɛɛtigi Ala ye. Fɔɲɔbana nin yɛrɛ ma se k’a bali ka dumuni di an ma Alako ta fan fɛ ani a yɛrɛ y’o dumuni di n’ ma n’ ka salɔn na le. Ne fɛ, o b’a yira ka gwɛ ko Jehova sagokɛlaw be ɲɔgɔn kanu. N’ lanin b’a la ko n’ be tiɲɛn diinan lo la.”

Diinan mɔgɔkɔrɔ dɔ tɔgɔ ko Wyson. Ale y’a fɔ ko: “N’ b’a fɛ ka jɔncɛ kantigiman fo ni n’ dusu bɛɛ ye sabu a y’a janto an na ni kanuya ye fɔɲɔbana nin tuma na. An be jamana min na, fantanya ka jugu yɛrɛ le. O la, labɛn min kɛra walisa an ka se ka tile saba lajɛnba sɔrɔ arajo ni telewisɔn na, o ye an caaman dɛmɛ ka lajɛnba diyabɔ sabu see t’an ye k’a filɛ ɛntɛrɛnɛti kan.”

Kɔrdinatɛriw ka kɔmite ani Kalanko ɲɛnabɔbagaw ka kɔmite ye sira di walisa saan 2021 ka tile saba lajɛnba fana ka bɔ arajo ani telewisɔn na dugu dɔw la. An ye wari sɔrɔ cogo di ka se ka o musakaw sara? Nili minw be kɛ waajuli baara kama duniɲa kuru bɛɛ kɔnɔ, o lo sababu la an sera ka o musakaw sara. O niliw caaman be kɛ ɛntɛrɛnɛti kan yɔrɔ nin na: donate.jw.org. Aw ni ce kosɔbɛ sabu aw y’aw tɛgɛ labila ka niliw kɛ.