Mɔgɔ seegi kisira

Nuhun, a somɔgɔw ani bɛgɛnw ni kongosogow donna kurun kɔnɔ. Jehova ye kurun daa tugu ani sanji y’a daminɛ ka ben. Sanji benna caaman fɔɔ ka kurun kɔrɔta. Jii nana laban ka dugukolo yɔrɔ bɛɛ datugu. Mɔgɔ juguw tun tɛ kurun kɔnɔ, olu bɛɛ sara. Nka Nuhun n’a somɔgɔw kisira kurun kɔnɔ. Miiri k’a filɛ u ninsɔndiyara cogo min na sabu u ye mɛnni kɛ Jehova fɛ.

Sanji benna tile 40 ani suu 40. Dɔɔni dɔɔni, jii jigira. A laban, kurun tagara lɔ kuluw kan. Nka jii bele tun ka ca yɔrɔ bɛɛ. O kama, Nuhun n’a somɔgɔw tun tɛ se ka bɔ kurun kɔnɔ fɔlɔ.

Jii jara dɔɔni dɔɔni. Nuhun n’a somɔgɔw tora kurun kɔnɔ saan kelen ni kɔ ɲɔgɔn. O kɔ, Jehova y’a fɔ u ye ko u be se ka bɔ kurun kɔnɔ ka sigi dugukolo kan mɔgɔ juguw tɛ min kan tugun. U ye Jehova waleɲuman lɔn kosɔbɛ sabu a ye u kisi. O kosɔn, u ye saraka dɔ bɔ Jehova ye.

O saraka diyara Jehova ye. A ye layidu ta ko a tɛna dugukolo kan fɛɛnw bɛɛ halaki ni sanjiba ye tugun abada. A y’a kɛ sanmuru fɔlɔ bɔra sankolo la ka kɛ o layidu tagamasiɲɛ ye. I delila ka sanmuru ye wa?

O kɔ, Jehova y’a fɔ Nuhun n’a somɔgɔw ye ko u ka deenw wolo ka dugukolo fa.