Ala ye sankolo ni dugukolo dan

Jehova ye an Danbaga ye. Ale lo ye fɛɛn bɛɛ dan: an be se ka minw ye ani an tɛ se ka minw ye. An be se ka fɛɛn minw ye, sanni a k’olu dan, a kɔnna ka mɛlɛkɛ caaman dan. I be mɛlɛkɛw lɔn wa? Mɛlɛkɛw ye Jehova ka baarakɛlaw ye. U be komi ale. An tɛ se k’u ye, i ko an tɛ se ka Ala ye cogo min na. Jehova ye mɛlɛkɛ fɔlɔ min dan, ale ye Jehova dɛmɛ tuma min na a tun be lolow ni fɛɛn tɔɔw bɛɛ danna, i n’a fɔ dugukolo. Dugukolo ye sigiyɔrɔ cɛɲumanba ye an fɛ.

O kɔ, Jehova ye dugukolo labɛn walisa kongosogow, bɛgɛnw ani adamadenw ka sigi a kan. A y’a kɛ tile yeelen bɔra dugukolo kan. A ye kuluw, bajiw ani kɔɔw kɛ dugukolo kan.

Mun lo kɛra o kɔ? Jehova ko: ‘Ne ben’a kɛ biin ni yiriw ka falen.’ Yiridenw, nanfulaburuw ani filɛru sifa caaman daminɛna ka falen. O kɔ, Jehova ye kongosogow ni bɛgɛnw bɛɛ dan: minw be van, minw be jii kɔnɔ ani minw be fofo. U dɔw ka dɔgɔ i n’a fɔ ɲinanw, u dɔw ka bon i n’a fɔ samaw. U bɛɛ cɛma, juman lo koo ka di i ye?

O kɔ, Jehova y’a fɔ mɛlɛkɛ fɔlɔ ye ko: “An ka mɔgɔ dan.” Mɔgɔw tun bena kɛ dan na ni bɛgɛnw ye. U tun bena se ka miiri ka fɛɛnw dilan. U tun bena se ka kuma, ka yɛlɛko, ani ka Ala deli. U tun bena u janto dugukolo, kongosogow ani bɛgɛnw na. I b’a lɔn jɔn lo kɛra mɔgɔ fɔlɔ ye wa? An k’o lajɛ.