KALANSEN 27
An be se ka kisi cogo di Yezu saya barika la?
Cɛɛ fɔlɔ Adama n’a muso Awa ka murutili kosɔn, an be jurumu kɛ, an be tɔɔrɔ, ani an be sa.a Nka, a ma kɛ komi jigiya foyi t’an na. Jehova ye labɛn kɛ walisa k’an kisi ka bɔ jurumu ni saya bolo a Dencɛ Yezu Krista sababu fɛ. Bibulu b’a fɔ ko Yezu saya kɛra kunmabɔsara ye an kosɔn. Kunmabɔsara ye fɛɛn dɔ ye min be sara walisa ka mɔgɔ dɔ hɔɔrɔnya. Yezu y’a ka adamadenya niin dafanin lo di k’o kɛ kunmabɔsara ye (Matiyo 20:28 kalan). A tun be se ka ɲɛnamaya kɛ fɔɔ abada dugukolo kan. Nka, a karila o nɛɛma kɔ walisa Adama ni Awa bɔnɛna min bɛɛ la, an ka se k’o sɔrɔ. Yezu y’a yira fana ale ni Jehova b’an kanu kosɔbɛ cogo min na. Kalansen nin bena i dɛmɛ i ka Jehova ni Yezu waleɲuman lɔn kosɔbɛ Yezu saya kosɔn.
1. An be se ka nafa juman sɔrɔ Yezu saya koo la kabini sisan?
Komi an ye jurumutɔw ye, an ka teli ka koo dɔw kɛ minw man di Jehova ye. Nka, an be se ka teriya sɔbɛ kɛ ni Ala ye n’an nimisara an ka jurumuw na sɔbɛ la, n’an y’a ɲini Jehova fɛ a ka yafa an ma Yezu Krista sababu la, ani n’an b’an seko bɛɛ kɛ walisa an kana o jurumuw kɛ tugun (1 Zan 2:1). Bibulu b’a fɔ ko: “Krista sara adamadenw ka hakɛw kosɔn siɲɛ kelenpe, a banna. Ale mɔgɔtilennin sara mɔgɔ tilenbaliw kosɔn, waasa k’aw kɛ Ala taw ye.”—1 Piyɛri 3:18.
2. An bena se ka nafa juman sɔrɔ Yezu saya koo la sini ma?
Jehova ye Yezu ci ka na dugukolo kan walisa a k’a niin dafanin saraka. O la, “ni mɔgɔ min y’a jigi la [Yezu] kan, o tigi kana halaki, nga o ka nii banbali sɔrɔ.” (Zan 3:16). Yezu saya barika la, Jehova bena Adama ka murutili nɔfɛkow bɛɛ lalaga yanni dɔɔni. O kɔrɔ ko n’an limaniyanin lo Yezu ka kunmabɔ saraka koo la, an bena sababu sɔrɔ ka ɲɛnamaya kɛ fɔɔ abada alijɛnɛ kɔnɔ dugukolo kan!—Ezayi 65:21-23.
A ƝINI KA DƆ LƆN TUGUN
An ka kunnafoni wɛrɛw lajɛ minw b’a yira fɛɛn min kama Yezu y’a niin saraka, ani o koo ɲɛsinna e ma cogo min na.
3. Yezu saya b’an hɔɔrɔnya ka bɔ jurumu ni saya la
A’ ye VIDEWO filɛ. O kɔ, a’ ye ɲiningali nin kɛ ani ka baro kɛ o kan:
Adama ka murutili kosɔn, a bɔnɛna mun lo la?
Ɔrɔmukaw 5:12 kalan. O kɔ, a’ ye ɲiningali nin kɛ ani ka baro kɛ o kan:
Adama ka jurumu nɔfɛkow kɛra mun lo ye e ma?
Zan 3:16 kalan. O kɔ, a’ ye ɲiningali nin kɛ ani ka baro kɛ o kan:
Mun na Jehova y’a Dencɛ ci ka na dugukolo kan?
Adama tun ye mɔgɔ dafanin ye, nka a ma mɛnni kɛ Ala fɛ. O kosɔn, an bɛɛ kɛra jurumutɔw ye ani an be sa.
Yezu tun ye mɔgɔ dafanin ye ani a tun be mɛnni kɛ Ala fɛ. O sababu la, an be se ka kɛ mɔgɔ dafaninw ye ani ka ɲɛnamaya kɛ fɔɔ abada.
4. Bɛɛ be se ka nafa sɔrɔ Yezu saya koo la
A’ ye VIDEWO filɛ. O kɔ, a’ ye ɲiningali nin kɛ ani ka baro kɛ o kan:
Mɔgɔ kelen saya be se ka mɔgɔ bɛɛ nafa cogo di?
Vɛrise nunu kalan: 1 Timote 2:5, 6 kalan. O kɔ, a’ ye ɲiningali nin kɛ ani ka baro kɛ o kan:
Adama tun ye mɔgɔ dafanin ye. Nka, a ka jurumu kosɔn, an bɛɛ kɛra jurumutɔw ye ani an be sa. Yezu fana tun ye mɔgɔ dafanin ye. Mun na a be se ka fɔ ko a ka saraka tun ye “kunmabɔsara dama kɛɲɛnin ye”? (NW)
5. Kunmabɔsara ye nilifɛn ye Jehova ye min di e kosɔn
Jehova teriw b’a jati ko kunmabɔsara ye nilifɛn ye Jehova ye min di u kelen kelen bɛɛ kosɔn. Galatikaw 2:20 kalan. O kɔ, a’ ye ɲiningali nin kɛ ani ka baro kɛ o kan:
Ciden Pol y’a yira cogo di ko a be kunmabɔsara jati nilifɛn ye min dira ale kosɔn?
Adama ka jurumu kosɔn, saya jalaki benna ale n’a kɔmɔgɔw bɛɛ kan. Nka Jehova y’a Dencɛ di k’a kɛ kunmabɔsara ye walisa i ka se ka ɲɛnamaya kɛ fɔɔ abada.
Vɛrise nunu kalantɔ, miiri k’a filɛ Jehova dusu kasira cogo min na k’a Dencɛ ye a be tɔɔrɔla. Zan 19:1-7, 16-18 kalan. O kɔ, a’ ye ɲiningali nin kɛ ani ka baro kɛ o kan:
Jehova ni Yezu ye min kɛ i ye, n’i miirila o la, o be mun lo kɛ i la?
NI MƆGƆ DƆ Y’I ƝININGA KO: “Mɔgɔ kelen saya be se ka kɛ sababu ye ka bɛɛ kisi cogo di?”
I bena a tigi jaabi cogo di?
MIIRIYA JƆNJƆN
Yezu saya sababu la, Jehova be se k’an ka jurumuw yafa an ma, ani an be se ka ɲɛnamaya kɛ fɔɔ abada.
I ye mun lo faamu?
Mun na Yezu sara?
Mun na a fɔra ko Yezu ka adamadenya niin dafanin ye “kunmabɔsara dama kɛɲɛnin” ye?
I be se ka nafa juman sɔrɔ Yezu saya koo la?
NUNU LAJƐ FANA
Mun na a fɔra ko Yezu ka adamadenya niin dafanin ye kunmabɔsara ye?
“Mun na a fɔra ko Yezu ka saraka ye ‘mɔgɔ caaman kunmabɔsara’ ye?” (A be sɔrɔ jw.org kan)
A filɛ an ka ɲi ka min kɛ walisa ka se ka kisi.
Jehova be sɔn ka jurumubaw fana yafa wa?
“Ɲiningali dɔw ka jaabili Bibulu koo la” (Saan 2013, mɛkalo tile fɔlɔ ka Kɔrɔsili Sangaso)
A filɛ cogo min na Krista ka saraka ye cɛɛ dɔ dɛmɛ min hakili tun ɲagaminin lo koo tɛmɛnin dɔw kosɔn.
a N’u ko jurumu, o tɛ kojugukɛ dama ye. Nka o ɲɛsinna fana an ka dafabaliya koo ma, an y’o min sɔrɔ cɛɛn ye.