KALANSEN 49
I ka denbaya be se ka kɛ hɛɛrɛ la cogo min na (Yɔrɔ fɔlɔ)
Furucɛ ni furumuso be ninsɔndiya min sɔrɔ u ka furusiri loon na, u jigi b’a la k’o bena mɛɛn fɔɔ abada. O be se ka kɛ wa? Kerecɛn minw furula kabi wagatijan ani u b’u jijara ka Bibulu ka ladiliw sira tagama, olu b’a lɔn k’o be se ka kɛ.
1. Bibulu ka ladili jumanw ɲɛsinna furucɛw ma?
Jehova ye denbaya kuntigiya kalifa furucɛ lo ma (Efɛzikaw 5:23 kalan). Jehova b’a ɲini a fɛ a ka desizɔnw ta minw bena denbaya mɔgɔw nafa. Bibulu b’a fɔ furucɛw ye k’u ka to k’u “musow kanu.” (Efɛzikaw 5:25). O kɔrɔ ko di? Cɛɛ min b’a muso kanu, a b’a minɛ ni ɲumanya ye jamayɔrɔ la ani fana n’u b’u kelen na. A b’a latanga ani a b’a seko bɛɛ kɛ k’a mako wasa farikolo ani dusukunnako ta fan fɛ (1 Timote 5:8). Min yɛrɛ kɔrɔtanin lo, o ye ko a b’a dɛmɛ ka jɛnɲɔgɔnya ɲuman kɛ ni Jehova ye (Matiyo 4:4). Misali la, a be se ka delili kɛ ani ka Bibulu kalan n’a muso ye.—1 Piyɛri 3:7 kalan.
2. Bibulu ka ladili jumanw ɲɛsinna furumusow ma?
Ala ka Kuma b’a fɔ ko “musow . . . k’u ka cɛɛw boɲa” kosɔbɛ (Efɛzikaw 5:33). Furumuso be se k’o kɛ cogo di? A cɛɛ be ni jogo ɲuman minw ye, a be se ka miiri o la. A cɛɛ be jijali minw kɛ walisa k’a janto ale n’u deenw na, a be se ka miiri o la fana. A b’a yira fana ko a b’a cɛɛ bonya n’a b’a dɛmɛ a ka desizɔnw na, n’a be kuma a fɛ ni ɲumanya ye, ani n’a b’a tɔgɔ ɲuman fɔ hali n’a tɛ Jehova bato.
3. Furuɲɔgɔnw be se k’u ka furu sabati cogo di?
Bibulu b’a fɔ ko ni cɛɛ ni muso furula, “u fila bɛɛ [be] jɛn ka kɛ kelen ye.” (Matiyo 19:5). O kɔrɔ ko koo o koo be se ka kɛ sababu ye k’u ka kanuya barika dɔgɔya, u ka ɲi ka banba k’u yɛrɛ tanga o ma. U be se k’o kɛ n’u be wagati kɛ ɲɔgɔn fɛ tuma o tuma, n’u b’u kɔnɔ gwɛ ɲɔgɔn ye, ani n’u b’u ka miiriya n’u dusukunnakow fɔ ɲɔgɔn ye ni kanuya ye. Ka Jehova niin bɔ a la, u man kan ka mɔgɔ si wala foyi kanu ka tɛmɛ u furuɲɔgɔn kan. U b’u janto kosɔbɛ u kana nɔrɔ kojugu mɔgɔ wɛrɛ la min t’u furuɲɔgɔn ye.
A ƝINI KA DƆ LƆN TUGUN
An k’a filɛ Bibulu ka sariyakolo minw be se k’i dɛmɛ k’i ka furu sabati.
4. Furucɛ: I muso kanu ani i janto a la
Bibulu b’a fɔ ko “cɛɛw ka kan k’u ka musow kanu i n’a fɔ u yɛrɛ farisogo.” (Efɛzikaw 5:28, 29). O kɔrɔ ko di? A’ ye VIDEWO filɛ. O kɔ, a’ ye ɲiningali nin kɛ ani ka baro kɛ o kan:
Cogo jumanw na furucɛ b’a yira ko a b’a muso kanu ani ko a b’a janto a la?
Kɔlɔsikaw 3:12 kalan. O kɔ, a’ ye ɲiningali nin kɛ ani ka baro kɛ o kan:
Furucɛ be se k’a muso minɛ ka kɛɲɛ n’o jogow ye cogo di?
5. Furumuso: I cɛɛ kanu ani a bonya
Bibulu be muso jija a k’a cɛɛ bonya hali n’a tɛ Jehova bato. 1 Piyɛri 3:1, 2 kalan. O kɔ, a’ ye ɲiningali nunu kɛ ani ka baro kɛ u kan:
N’i furucɛ tɛ Jehova Seere ye, siga t’a la, i b’a fɛ a ka kɛ Jehova sagokɛla ye. Ele ka miiri la, i be se k’a dɛmɛ cogo fisaman juman na? Ka to k’a waaju tuma bɛɛ wa? Wala, k’a yira i ka kɛwale ɲumanw fɛ ko i b’a bonya? Mun na i ko ten?
Tuma caaman na, cɛɛ n’a muso be jɛn ka desizɔn ɲumanw ta ɲɔgɔn fɛ. Nka tuma dɔw la, a be se ka kɛ ko cɛɛ ka desizɔn dɔw tɛ bɛn a muso ma. N’o lo, a be se k’a dusu suma k’a ka miiriya fɔ a cɛɛ ye ni bonya ye. Ani, a ka ɲi ka sɔn a ma ko Jehova lo ye kunkanbaara di cɛɛ ma a k’a latigɛ min ka fisa a ka denbaya ma. A ka ɲi k’a seko bɛɛ kɛ walisa a cɛɛ ka desizɔn ka ɲɛ. O cogo la, a be dɔ fara denbaya ka hɛɛrɛ kan. 1 Piyɛri 3:3-5 kalan. O kɔ, a’ ye ɲiningali nin kɛ ani ka baro kɛ o kan:
Ni muso b’a cɛɛ bonya, o be mun lo kɛ Jehova la?
6. I be se ka see sɔrɔ gwɛlɛyaw kan i ka furu kɔnɔ
Furu si tɛ yen min dafanin lo. O kama, furuɲɔgɔnw ka ɲi k’u jija k’u ka gwɛlɛyaw ɲɛnabɔ ɲɔgɔn fɛ. A’ ye VIDEWO filɛ. O kɔ, a’ ye ɲiningali nunu kɛ ani ka baro kɛ u kan:
Koo jumanw lo b’a yira ko furucɛ nin n’a muso tun b’u yɔrɔ janyana ɲɔgɔn na?
U ye mun ni mun lo kɛ walisa k’u ka furu sabati?
1 Korɛntikaw 10:24 ani Kɔlɔsikaw 3:13 kalan. Vɛrise kelen kelen bɛɛ kalannin kɔ, a’ ye ɲiningali nin kɛ ani ka baro kɛ o kan:
N’i b’o ladili sira tagama, o be se k’i ka furu sabati cogo di?
Bibulu b’a fɔ ko an ka ɲi ka ɲɔgɔn bonya. Ka mɔgɔ bonya, o kɔrɔ ko ka danbe la a kan ani k’a minɛ ni ɲumanya ye. Ɔrɔmukaw 12:10 kalan. O kɔ, a’ ye ɲiningali nunu kɛ ani ka baro kɛ u kan:
Furucɛ wala furumuso ka ɲi k’a jati ko a muso wala a cɛɛ lo ka ɲi k’ale bonya fɔlɔ wa? Mun na i ko ten?
NI MƆGƆ DƆ Y’A FƆ I YE KO: “Ne ni n’ furuɲɔgɔn nɔrɔnin tɛ ɲɔgɔn na ten tugun i ko fɔlɔ la.”
I be se k’a ɲɛfɔ a tigi ye cogo di ko Bibulu be se k’u dɛmɛ?
MIIRIYA JƆNJƆN
Furucɛ n’a muso be se ka hɛɛrɛ sɔrɔ u ka denbaya kɔnɔ n’u be ɲɔgɔn kanu, n’u be ɲɔgɔn bonya, ani n’u be Bibulu ka sariyakolow sira tagama.
I ye mun lo faamu?
Furucɛ be se ka mun lo kɛ walisa hɛɛrɛ ka kɛ a ka denbaya kɔnɔ?
Furumuso be se ka mun lo kɛ walisa hɛɛrɛ ka kɛ a ka denbaya kɔnɔ?
N’i furunin lo, Bibulu ka sariyakolo jumanw be se k’i dɛmɛ k’i ka furu sabati?
NUNU LAJƐ FANA
Ladili nafaman dɔw filɛ minw be se k’i dɛmɛ ka hɛɛrɛ sɔrɔ i ka denbaya kɔnɔ.
Videwo nin b’a yira an be duga min sɔrɔ n’an be Ala ka ladiliw sira tagama furu kɔnɔ.
K’i majigi cɛɛ ka kuntigiya kɔrɔ, o kɔrɔ ko di?
“Des femmes qui se soumettent à l’autorité” (Saan 2010, mɛkalo tile 15 ka Kɔrɔsili Sangaso)
Bibulu be ladili minw di furu koo la, a filɛ u barika ka bon cogo min na.