KALANSEN 51
Cogo juman na i be se k’i koo diya Jehova ye i kumacogo fɛ?
Jehova ye adamaden dan ka see di a ma a ka kuma. O ye nilifɛn nafamanba yɛrɛ lo ye! An be baara kɛ n’o nilifɛn ye cogo min na, o kɔrɔtanin lo Jehova fɛ wa? Siga t’o la! (Zaki 1:26 kalan). O la do, cogo juman na an be se k’an koo diya Jehova ye an kumacogo fɛ?
1. Jehova ye see min di an ma ka kuma, an ka ɲi ka baara kɛ n’o ye cogo di?
Bibulu b’an jija ko an ka to “ka ɲɔgɔn jigi tugu, ani ka ɲɔgɔn dɛmɛ.” (1 Tesalonikaw 5:11). I be mɔgɔ dɔ lɔn min dusu man di wa? I be se ka mun lo kɛ k’a jija? A fɔ a ye ko a koo ka gwɛlɛ i ma. Min ka di i ye a tigi fɛ, i be se k’o fɔ a ye. Vɛrise dɔ b’i kun na min be se ka mɔgɔ dɔw jija wa? O ɲɔgɔnna vɛrisew ka ca. Kana ɲinɛ fana ko an be se ka mɔgɔw jija kosɔbɛ an kumacogo fɛ. O kama, banba ka kuma mɔgɔw fɛ ni dususuman ye ani ɲumanya ye.—Talenw 15:1.
2. Kuma sugu jumanw man kan ka bɔ an daa la?
Bibulu b’a fɔ ko: “Kumajugu kana bɔ aw si daa la.” (Efɛzikaw 4:29 kalan). O kɔrɔ ko an man kan ka kuma kunntanw fɔ wala ka kuma dɔ fɔ min be mɔgɔ dusu tiɲɛ. An man kan fana ka mɔgɔ kɔrɔfɔ wala ka nafigiya kɛ.—Talenw 16:28 kalan.
3. Mun lo bena an dɛmɛ ka jijali kumaw fɔ?
An be min fɔ, tuma caaman na o b’a yira min b’an kɔnɔ (Luka 6:45). O kama, a kɔrɔtanin lo an k’an jija ka miiri koo ɲumanw lo la, i n’a fɔ: koo tilenninw, koo gwɛninw, koo diimanw, ani koo minw ka kan ni tandoli ye (Filipikaw 4:8). Ka se ka miiri o koow la, fɔɔ an k’an ka ɲɛnagwɛkow n’an teriw sugandi ni hakilitigiya ye (Talenw 13:20). Ani fana, a ka ɲi an ka wagati ta ka miiri koɲuman ka sɔrɔ ka kuma. An ka miiri k’a filɛ an ka kumaw bena min kɛ mɔgɔw la. Bibulu b’a fɔ ko: “Mɔgɔ min be kuma a kunfɛ, a be digi mɔgɔ la i ko murujan. Nga lɔnnikɛla [hakilitigi] ka kuma be mɔgɔ dusu suma.”—Talenw 12:18.
A ƝINI KA DƆ LƆN TUGUN
An k’a filɛ cogo min na an be se k’an koo diya Jehova ye an kumacogo fɛ ani fana ka tɔɔw jija.
4. I kumacogo kɔrɔsi
Tuma dɔw la, an be kuma dɔ fɔ, ani kɔfɛ an be nimisa o la (Zaki 3:2). Galatikaw 5:22, 23 kalan. O kɔ, a’ ye ɲiningali nunu kɛ ani ka baro kɛ u kan:
Jogo minw kofɔra, i b’a fɛ Jehova k’i dɛmɛ ka kɛ ni jumanw lo ye walisa i ka se k’i kumacogo kɔrɔsi? O jogow be se k’i dɛmɛ cogo di?
1 Korɛntikaw 15:33 kalan. O kɔ, a’ ye ɲiningali nin kɛ ani ka baro kɛ o kan:
I teriw ani i ka ɲɛnagwɛkow be se k’i lasun ka kuma cogo di?
Mun lo be se k’a to i be kuma cogo dɔ la?
Waajulikɛla 3:1, 7 kalan. O kɔ, a’ ye ɲiningali nin kɛ ani ka baro kɛ o kan:
Koo jumanw lo la a ka ɲi an ka je, wala an ka wagati bɛnnin kɔnɔ ka sɔrɔ ka kuma?
5. Kuma ɲuman fɔ tɔɔw koo la
An be se ka mun lo kɛ walisa an kana kuma juguw wala kuma gomanw fɔ tɔɔw koo la? A’ ye VIDEWO filɛ. O kɔ, a’ ye ɲiningali nunu kɛ ani ka baro kɛ u kan:
Mun na balimacɛ nin tun b’a fɛ k’a kumacogo yɛlɛma?
A sera k’o yɛlɛmani kɛ cogo di?
Waajulikɛla 7:16 kalan. O kɔ, a’ ye ɲiningali nin kɛ ani ka baro kɛ o kan:
N’an b’a fɛ ka kumajugu fɔ mɔgɔ dɔ koo la, an ka ɲi ka mun lo to an hakili la?
Waajulikɛla 7:21, 22 kalan. O kɔ, a’ ye ɲiningali nin kɛ ani ka baro kɛ o kan:
O vɛrisew be se k’i dɛmɛ cogo di i kana dimi ni dɔ ye kumajugu fɔ i koo la?
6. Kuma i ka denbayamɔgɔw fɛ ni ɲumanya ye
Jehova b’a fɛ denbayamɔgɔw ka kuma ɲɔgɔnw fɛ ni ɲumanya ani kanuya ye. A’ ye VIDEWO filɛ. O kɔ, a’ ye ɲiningali nin kɛ ani ka baro kɛ o kan:
Mun lo bena i dɛmɛ i ka kuma ni ɲumanya ye i ka denbayamɔgɔw fɛ?
Efɛzikaw 4:31, 32 kalan. O kɔ, a’ ye ɲiningali nin kɛ ani ka baro kɛ o kan:
Kuma sugu jumanw lo be denbayamɔgɔw barika bonya?
Jehova ye kuma diimanw fɔ a Dencɛ Yezu koo la. Matiyo 17:5 kalan. O kɔ, a’ ye ɲiningali nin kɛ ani ka baro kɛ o kan:
I be se ka Jehova ladegi cogo di n’i be kumana n’i ka denbayamɔgɔw ye?
Sababuw ɲini ka mɔgɔw tando
NI MƆGƆ DƆ Y’A FƆ I YE KO: “Min be n’ kɔnɔ, n’ b’o le fɔ. N’o ma diya mɔgɔ min ye, o y’a tigi ka koo ye.”
E sɔnna o la wa? Mun na i ko ten?
MIIRIYA JƆNJƆN
An ka kumaw be se ka tɔɔw nafa wala ka digi u la. O kama, an b’a fɛ ka min fɔ, an bena o fɔ cogo min na ani wagati min na, an ka miiri o la fɔlɔ.
I ye mun lo faamu?
Cogo jumanw na i be se ka tɔɔw jija i ka kumaw fɛ?
I t’a fɛ kuma sugu jumanw lo ka bɔ i daa la?
Mun lo be se k’an dɛmɛ ka kuma ni ɲumanya ye ani ka tɔɔw jija an ka kumaw fɛ?
NUNU LAJƐ FANA
Mun lo be se k’i dɛmɛ walisa i ka kumaw ka tɔɔw jija?
A filɛ min be se k’i dɛmɛ kumajugu kana bɔ i daa la.
“Est-ce vraiment mal d’être grossier ?” (A be sɔrɔ jw.org kan)
A filɛ min be se k’i dɛmɛ walisa i kana mɔgɔ kɔrɔfɔ.
N’ be se ka mun lo kɛ walisa nafigiya kumaw kana jɛnsɛn? (2:36)
A filɛ Jehova ye cɛɛ dɔ dɛmɛ cogo min na ka kumajugufɔ dabila.