KALANSEN 53

Ɲɛnagwɛkow sugandi minw ka di Jehova ye

Édition imprimée

Jehova ye “ninsɔndiyatigi Ala” ye (1 Timote 1:11, NW). A b’a fɛ an ka ninsɔndiya ani ka ɲɛnamaya diyabɔ. N’an be wagati ta ka lafiɲɛ ani ka ɲɛnagwɛ, o ka di a ye. Kalansen nin na, an bena a ye an be se ka min kɛ walisa an ka lafiɲɛwagati k’an nafa, ani o ka diya Jehova ye.

1. An ka ɲi ka mun lo to an hakili la n’an be ɲɛnagwɛkow sugandira?

I ka teli ka mun lo kɛ i ka lafiɲɛwagati la? A ka di dɔw ye ka sigi soo ka lafiɲɛ: u be sɛbɛw kalan, ka miziki lamɛn, ka filimu filɛ wala ka taga ɛntɛrɛnɛti kan. A ka di dɔ wɛrɛw ye k’u yɛrɛ ɲɛnagwɛ n’u teriw ye: u be taga yɔrɔ dɔw filɛ, u be taga ko kɔɔ la, wala u be tulonko dɔ kɛ. An mana a latigɛ ka min o min kɛ, an ka ɲi k’an janto k’o “ka di Matigi ye.” (Efɛzikaw 5:10). A kɔrɔtanin lo an k’o faamu sabu ɲɛnagwɛko caaman fanin be koo dɔw la Jehova be minw kɔniya, i n’a fɔ: fariyakow, kakalayakow wala jinamoriyakow (Zaburuw 11:5 kalan). Mun lo bena an dɛmɛ an ka ɲɛnagwɛkow sugandi ni hakilitigiya ye?

N’an teriw be Jehova kanu, u bena nɔɔ ɲuman to an kan ani u bena an lasun ka ɲɛnagwɛko ɲumanw sugandi. I ko an y’a ye cogo min na kalansen tɛmɛnin dɔ la, “mɔgɔ min be taama ni lɔnnikɛla [wala hakilitigi] ye, o tigi bena koo lɔn.” Nka mɔgɔ minw tɛ Ala ka sariyakolow labato, n’an be tagama n’olu ye, an bena an “yɛrɛ cɛn le,” o kɔrɔ, an bena kunkow sɔrɔ le.—Talenw 13:20.

2. An be wagati hakɛ min kɛ ɲɛnagwɛkow la, mun na an ka ɲi k’an janto o la?

Hali n’an ye ɲɛnagwɛko dɔ sugandi min ka ɲi, an ka ɲi k’an janto a kana an ka wagati ta kojugu. N’o tɛ, wagati caaman tɛna kɛ an fɛ tugun ka koo kɔrɔtaninw kɛ. O lo kama Bibulu b’an jija ko “waati min b’[an] bolo, [an] ka banba ka koɲuman kɛ” n’o ye.—Efɛzikaw 5:15, 16 kalan.

A ƝINI KA DƆ LƆN TUGUN

An k’a filɛ an be se ka ɲɛnagwɛkow sugandi ka ɲɛ cogo min na.

3. I yɛrɛ tanga ɲɛnagwɛko kunntanw ma

Mun na an ka ɲi ka ɲɛnagwɛkow sugandi koɲuman? A’ ye VIDEWO filɛ. O kɔ, a’ ye ɲiningali nunu kɛ ani ka baro kɛ u kan:

VIDEWO: N’ ka ɲi ka ɲɛnagwɛko juman lo sugandi? (4:39)

An ka wagati la ɲɛnagwɛko dɔw bɔnin be Ɔrɔmukaw ta ma cogo di?
Videwo nin na, Danny ye mun lo faamu ɲɛnagwɛkow la?

Ɔrɔmukaw 12:9 kalan. O kɔ, a’ ye ɲiningali nin kɛ ani ka baro kɛ o kan:

O vɛrise be se k’i dɛmɛ cogo di ka ɲɛnagwɛko dɔw sugandi minw ka ɲi?

Koo jumanw lo ka gwo Jehova ye? Talenw 6:16, 17 ani Galatikaw 5:19-21 kalan. Vɛrise kelen kelen bɛɛ kalannin kɔ, a’ ye ɲiningali nin kɛ ani ka baro kɛ o kan:

Koo minw kofɔra vɛrise nunu na, u jumanw lo be sɔrɔ ɲɛnagwɛkow la bi?

Sanni i ka ɲɛnagwɛko dɔ sugandi . . .

i yɛrɛ ɲininga ko:

Mun? Koo dɔw b’a kɔnɔ minw ka gwo Jehova ye wa?
Tuma juman? A be n’ bali ka koo kɔrɔtaninw kɛ wa?
Mɔgɔ jumanw? A b’a to n’ be jɛn ni mɔgɔ dɔw ye minw tɛ Jehova kanu wa?

Walisa i latanganin ka to, i ka ɲi k’i yɔrɔ janya farati la. O kama, n’a b’an ɲɛɛ na ko ɲɛnagwɛko dɔw man ɲi, an ka ɲi k’an yɔrɔ janya u la.

Mobili dɔ be bolila sirada la, kulu gɛrɛn na. O mobili kɔfɛyɔrɔ y’a daminɛ ka sira bila.

4. Baara kɛ n’i ka wagati ye hakilitigiya la

A’ ye VIDEWO filɛ. O kɔ, a’ ye ɲiningali nin kɛ ani ka baro kɛ o kan:

VIDEWO: Mun lo b’i ka wagati fanba bɛɛ ta? (2:45)

Hali ni balimacɛ nin tun t’a yɛrɛ ɲɛnagwɛ ni koo nɔgɔninw ye, a tun b’a ka lafiɲɛwagati kɛ cogo min na, mun na o tun man fisa?

Filipikaw 1:10 kalan. O kɔ, a’ ye ɲiningali nin kɛ ani ka baro kɛ o kan:

O vɛrise be se k’an dɛmɛ cogo di k’a latigɛ an bena wagati hakɛ min kɛ ɲɛnagwɛkow la?

5. Ɲɛnagwɛko ɲumanw sugandi

Tiɲɛn lo ko ɲɛnagwɛko dɔw be yen minw ka gwo Jehova ye. Nka caaman be yen minw ka di a ye. Waajulikɛla 8:15 ani Filipikaw 4:8 kalan. O kɔ, a’ ye ɲiningali nin kɛ ani ka baro kɛ o kan: