A to Jehova k’i ɲɛminɛ tuma bɛɛ

1. Misali dɔ fɔ min b’a yira fɛɛn min kama an ka ɲi k’a to Jehova k’an ɲɛminɛ.

MIIRI k’a filɛ ko i tununa tuuba dɔ kɔnɔ. Faratiw be yɔrɔ bɛɛ sabu waraw, saaw, bunteniw, bagayiriw, dingɛw ni kabakuruw fanin be yen. Mɔgɔ min b’o farati yɔrɔw lɔn ka ɲɛ ani a be se k’i dɛmɛ i b’i yɛrɛ tanga u ma, i ninsɔn bena diya yɛrɛ le a k’i bila sira. Bi duniɲa be i ko o tuu. Faratiw be yɔrɔ bɛɛ minw be se k’an ka Alakow nagasi. Nka an be ni ɲɛminɛbaga dafanin ye, o min ye Jehova ye. A b’an dɛmɛ an k’an yɛrɛ tanga faratiw ma ani a b’an bila sira fɔɔ ka taga see n’an ye ɲɛnamaya banbali la duniɲa kura kɔnɔ.

2. Jehova b’an ɲɛminɛ cogo di?

² Jehova b’an ɲɛminɛ cogo di? Tuma caaman na, a be tɛmɛ a ka kuma fɛ k’o kɛ o min ye Bibulu ye. Tuma dɔw la, a be tɛmɛ a ka lasigidenw fɛ k’an ɲɛminɛ. Misali la, a be tɛmɛ “jɔncɛ kantigiman hakiliman” fɛ ka sɛbɛw, videwow ni fɛɛn lamɛntaw di an ma, o minw b’an dɛmɛ ka desizɔn ɲumanw ta (Mat. 24:45, NW). Jehova be tɛmɛ balima setigi dɔw fɛ fana k’an ɲɛminɛ. Misali la, a be tɛmɛ kafokulu kɔrɔsibagaw ani kafo ka diinan mɔgɔkɔrɔw fɛ k’an jija ani ka cikanw d’an ma minw b’an dɛmɛ ka gwɛlɛyaw muɲu. An be Jehova waleɲuman lɔn kosɔbɛ sabu a b’an ɲɛminɛna laban loon gwɛlɛ nunu na! N’an be sɔn Jehova ka ɲɛminɛli ma, o b’a to an koo be diya a ye ani an be to ɲɛnamaya sira kan.

3. An bena mun lo lajɛ barokun nin na?

³ O bɛɛ n’a ta, tuma dɔw la a be se ka gwɛlɛya an ma ka tugu Jehova ka cikanw kɔ sanko n’a tɛmɛna adamaden dafabaliw fɛ k’u di an ma. Mun na do? Sabu a be se ka kɛ k’o ladiliw man di an ye. Wala an b’a miiri k’o cikanw tɛ hakilitigiyako ye ani an b’a fɔ ko u ma bɔ Jehova yɔrɔ. N’an b’a fɛ k’an yɛrɛ tanga o ma, an ka ɲi ka la a la kosɔbɛ ko Jehova lo b’a sagokɛlaw ɲɛminɛna ani ko n’an be sɔn a ka ɲɛminɛli ma o b’an nafa. Walisa k’an dɛmɛ o la, an bena koo nunu lajɛ barokun nin na: 1) Jehova tun b’a sagokɛlaw ɲɛminɛ cogo min na Bibulu sɛbɛwagati la, 2) a b’an ɲɛminɛ cogo min na bi, ani 3) n’an be sɔn a ka ɲɛminɛli ma, o b’an nafa cogo min na.

JEHOVA YE ISRAƐLIDENW ƝƐMINƐ COGO MIN NA

4-5. Jehova y’a yira cogo di ko a tun be tɛmɛ Musa fɛ ka Israɛldenw ɲɛminɛ? (jaa lajɛ ɲɛɛ fɔlɔ kan).

⁴ Jehovah ye Musa sugandi walisa a ka Israɛldenw ɲɛminɛ ka bɔ n’u ye Ezipiti. A y’a yira u la ka gwɛ ko a be tɛmɛna Musa lo fɛ k’u ɲɛminɛ. Misali la, a tun be tɛmɛ sankaba dɔ fɛ k’u ɲɛminɛ tilefɛ ani sufɛ, a tun b’u ɲɛminɛ ni tasuma ye (Ɛkiz. 13:21). Sankaba ye Musa ni Israɛldenw ɲɛminɛ ka taga n’u ye Kɔgɔji wulen daa la. Israɛldenw siranna kosɔbɛ tuma min na u y’a ye ko Ezipitikaw ka kɛlɛbolo be surunyana u la ani Kɔgɔji wulen be u ɲɛfɛ. U y’a miiri ko Musa filila sira ma le a kɛtɔ ka na n’u ye Kɔgɔji wulen daa la. Nka, a tun ma fili sira ma. Jehova lo tun y’a kɛ Musa nana n’u ye o yɔrɔ la (Ɛkiz. 14:2). O kɔ, a ye u kisi cogo kabakoman na.—Ɛkiz. 14:26-28.

⁵ Saan 40 minw tugura o kɔ, Jehova tora ka tɛmɛ sankaba fɛ ka Israɛldenw ɲɛminɛ kongokolon kɔnɔ ani Musa sɔnna o ma.a Wagati dɔ la, Jehova y’a to o sankaba lɔra Musa ka fanibugu sanfɛ walisa Israɛldenw bɛɛ k’a ye (Ɛkiz. 33:7, 9, 10). Jehova tun be to o sankaba kɔnɔ ka kuma Musa fɛ ani ale tun be Jehova ka cikanw lase jama ma (Zab. 99:7). O la, Israɛldenw tun be se k’a ye ka gwɛ ko Jehova lo tun be tɛmɛna Musa fɛ k’u ɲɛminɛ.

6. Israɛldenw ye Jehova ka cikanw ta cogo di? (Nɔnburuw 14:2, 10, 11).

⁶ Hali k’a sɔrɔ a tun gwɛnin lo ko Jehova be tɛmɛna Musa fɛ ka Israɛldenw ɲɛminɛ, u fanba ma sɔn a ma ko Jehova ka lasigiden lo (Nɔnburuw 14:2, 10, 11 kalan). Tuma caaman na, u ma sɔn a ma ko Jehova be tɛmɛna Musa fɛ k’u ɲɛminɛ. O kama, Jehova ma sɔn u ka don layidu jamana kɔnɔ.—Nɔnb. 14:30.

7. Mɔgɔ minw sɔnna Jehova ka cikanw ma, olu dɔw kofɔ (Nɔnburuw 14:24; jaa lajɛ fana).

⁷ Nka, Israɛlden dɔw sɔnna Jehova ka ɲɛminɛli ma. Misila la, Jehova y’a fɔ ko: “Kalɛbu ye . . . ne sago kɛ sɔbɛ la.” (Nɔnburuw 14:24 kalan). Ala ye Kalɛbu duga o kosɔn ani a yɛrɛ y’a to a y’a diyanye yɔrɔ sugandi layidu jamana kɔnɔ (Zozuwe 14:12-14). Israɛlden minw sara kongokolon kɔnɔ, olu deenw fana kɛra ɲɛyirali ɲumanw ye sabu u sɔnna Jehova ka ɲɛminɛli ma. Tuma min na Zozuwe sigira Israɛldenw kun na Musa nɔɔ na, “u tun sirann’a ɲa i n’a fɔ u tun be siran Musa ɲa cogo min na a sii bɛɛ la.” (Zozuwe 4:14). O kama, Jehova ye u duga a kɛtɔ k’a to u donna layidu jamana kɔnɔ.—Zozuwe 21:43, 44.

8. A ɲɛfɔ Jehova y’a ka jama ɲɛminɛ cogo min na masacɛw ka wagati la (jaa lajɛ fana).

⁸ Saan caaman o kɔ, Jehova tɛmɛna kititigɛla dɔw fɛ k’a ka jama ɲɛminɛ. O kɔ masacɛw ka wagati la, a tɛmɛna kiraw fɛ k’a sagokɛlaw ɲɛminɛ. Masacɛ kantigiw tun be tugu kiraw ka ladiliw kɔ. Misali la, tuma min na kira Natan ye masacɛ Dawuda kolo, a y’a majigi ka sɔn o ma (2 Sam. 12:7, 13; 1 Til. Kib. 17:3, 4). Masacɛ Zozafati sɔnna kira Yaaziyɛli ka cikanw ma ani a ye Zuda mara mɔgɔw jija ko: “Aw ka la [Ala] ka kiraw ka kuma na.” (2 Til. Kib. 20:14, 15, 20). Tuma min na masacɛ Ezekiyasi dusu tun kasinin lo, a ye dɛmɛ ɲini kira Ezayi fɛ (Ezayi 37:1-6). Masacɛ o masacɛ tun mana sɔn Jehova ka ɲɛminɛli ma, a tun b’a duga ani k’a ka jama latanga (2 Til. Kib. 20:29, 30; 32:22). A tun gwɛnin lo bɛɛ ɲɛɛ na ko Jehova tun be tɛmɛna a ka kiraw fɛ k’a sagokɛlaw ɲɛminɛ. Nka masacɛw ni jama fanba ma sɔn ka mɛnni kɛ Jehova ka kiraw fɛ.—Zer. 35:12-15.

JEHOVA YE KERECƐN FƆLƆW ƝƐMINƐ COGO MIN NA

9. Jehova tɛmɛna jɔnw lo fɛ ka kerecɛn fɔlɔw ɲɛminɛ? (jaa lajɛ fana).

⁹ Saan kɛmɛkulu fɔlɔ la, Jehova ye kerecɛn kafo juu sigi. A tun b’o kerecɛnw ɲɛminɛ cogo di? A ye Yezu kɛ kafo kuntigi ye (Efɛz. 5:23). Nka, Yezu yɛrɛ lo tun t’a fɔ a ka kalandenw kelen kelen ye u ka ɲi ka min kɛ. A tun be tɛmɛ a ka cidenw ni Zeruzalɛmu cɛkɔrɔba dɔw lo fɛ k’u ɲɛminɛ (Kɛw. 15:1, 2). A ye diinan mɔgɔkɔrɔw sigi fana walisa u ka kafow ɲɛminɛ.—1 Tes. 5:12; Titi 1:5.

10. a) Saan kɛmɛkulu fɔlɔ kerecɛnw tun be cikan minw sɔrɔ, u fanba tun b’o ta cogo di? (Kɛwaliw 15:30, 31). b) Bibulu sɛbɛwagati la, mun na mɔgɔ dɔw ma sɔn ka mɛnni kɛ Jehova ka lasigidenw fɛ? (koorilen nin lajɛ: “Mun na dɔw ma sɔn ka mɛnni kɛ Jehova ka lasigidenw fɛ?”).

¹⁰ Kerecɛn fɔlɔw tun be cikan minw sɔrɔ, u tun b’o ta cogo di? A tun ka di u fanba ye k’o cikanw labato. Cikan minw tun be di u ma, o tun be “u bɛɛ nisɔn diya ka jagwɛlɛya d’u ma.” (Kɛwaliw 15:30, 31 kalan). Nka bi, Jehova b’a sagokɛlaw ɲɛminɛ cogo di?

JEHOVA B’AN ƝƐMINƐ COGO MIN NA BI

11. Jehova ye minw sigi an kun na bi, misali dɔ fɔ min b’a yira ko Jehova lo b’u ɲɛminɛ.

¹¹ Bi, Jehova bele b’a sagokɛlaw ɲɛminɛna. A be tɛmɛ Bibulu lo fɛ k’o kɛ, ani a y’a Dencɛ min sigi kafo kun na. Bi, yala daliluw b’a yira ko Jehova bele be adamadenw kɛra a ka lasigidenw ye wa? Ɔnhɔn. Misali la, miiri k’a filɛ min kɛra saan 1870 kɔ. Charles Taze Russell n’a jɛnɲɔgɔnw y’a daminɛ k’a faamu ko saan 1914 tun bena kɛ saan kɛrɛnkɛrɛnnin ye Ala ka Masaya sigiko la (Dan. 4:22, 23). U ye sɛgɛsɛgɛri minw kɛ Bibulu ka kiraya kumaw koo la, o lo ye u dɛmɛ k’o faamu. Yala Jehova y’u ɲɛminɛ o sɛgɛsɛgɛriw kɛtɔ wa? Siga t’o la. Koo minw kɛra duniɲa kɔnɔ saan 1914, olu y’a yira ka gwɛ ko Ala ka Masaya sigira sen kan. Kɛlɛba fɔlɔ daminɛna ani o kɔ, koo nunu tugura: fɔɲɔbanaw, dugukolo yɛrɛyɛrɛw ani kɔngɔbaw (Luka 21:10, 11). Siga t’a la, Jehova tɛmɛna o cɛɛ kɔnɔgwɛw fɛ k’a sagokɛlaw ɲɛminɛ.

12-13. Balima minw tun b’an ka baara ɲɛminɛna, olu ye mun lo kɛ kɛlɛba filanan wagati la walisa ka dɔ fara waajuli baara kan?

¹² An k’a filɛ fana min kɛra kɛlɛba filanan wagati la. Balima minw tun b’an ka baara ɲɛminɛna an ka sigiyɔrɔsoba la, olu ye Yirali 17:8 kɔnɔkumaw sɛgɛsɛgɛ. U y’a faamu ko kɛlɛba filanan tɛna laban ni Arimagedɔn kɛlɛ ye. U y’a faamu fana ko Jehova Seerew bena se ka kibaro diiman lase mɔgɔ caamanba ma sabu mɔgɔw bena kɛ ɲɛsuma na wagati dɔ la kɛlɛ kɔ. O lo kama, Jehova ka ɔriganisasiyɔn ye Gilead lakɔli sigi sen kan, hali k’a sɔrɔ a tun be komi o wagati bɛnnin tɛ. O lakɔli kuun tun ye ka fɔrɔmasɔn di misɔndenw ma walisa u ka kibaro diiman fɔ ani ka mɔgɔw kalan jamana caaman kɔnɔ. U ye misɔndenw ci ka taga jamana dɔw la hali k’a sɔrɔ kɛlɛ tun ma ban fɔlɔ. Ka fara o kan, jɔncɛ kantigiman ye labɛnw kɛ walisa cidenya baara lakɔli ka kɛ kafow bɛɛ kɔnɔ ka balimaw dɛmɛ u ka se waajuli ani mɔgɔw kalancogo la koɲuman.b O cogo la, u tun be Ala sagokɛlaw labɛnna waajuli baaraba nata kama.

¹³ Bi, a gwɛnin lo an ɲɛɛ na ko Jehova tun b’a sagokɛlaw ɲɛminɛna o wagati gwɛlɛw na. Kabi kɛlɛba filanan wagati la, Jehova Seerew sera ka waajuli kɛ u sago la jamana caaman na. Tiɲɛn na, mɔgɔ caaman ye Jehova lɔn ani an be waajuli kɛra duniɲa faan bɛɛ la.

14. Jehova ka ɔriganisasiyɔn ani diinan mɔgɔkɔrɔw be cikan minw di, mun na an be se ka la u la? (Yirali 2:1; jaa lajɛ fana).

¹⁴ Bi fana, Koow Ɲɛnabɔla Jɛnkulu mɔgɔw b’a to Krista k’u ɲɛminɛ. U be cikan minw di an ma, u b’a fɛ o ka bɛn Jehova sago ma. U b’o cikanw di kafokulu kɔrɔsibagaw ni diinan mɔgɔkɔrɔw ma walisa olu k’o lase kafow ma.c Diinan mɔgɔkɔrɔ minw ye kerecɛn mɔlenw ye, olu ni diinan mɔgɔkɔrɔ tɔɔw be Krista “kinibolo la.” (Yirali 2:1 kalan). Tiɲɛn lo ko o balimaw si dafanin tɛ, u be fili tuma dɔw la. Musa, Zozuwe ani Yezu ka cidenw fana filila tuma dɔw la (Nɔnb. 20:12; Zozuwe 9:14, 15; Ɔrɔm. 3:23). Nka, a gwɛnin lo an ɲɛɛ na ko Krista be jɔncɛ kantigiman ni diinan mɔgɔkɔrɔw ɲɛminɛna. Ani, a bena to k’o kɛ “loon o loon fɔɔ ka taga diɲɛ wili.” (Mat. 28:20). O la, an ka ɲi ka la o cɛɛw la, Yezu be tɛmɛ minw fɛ k’an ɲɛminɛ.

N’AN BE SƆN JEHOVA KA ƝƐMINƐLI MA, O B’AN NAFA

15-16. Minw sɔnna Jehova ka ɲɛminɛli ma, i be kalan juman lo sɔrɔ u ka lakalitaw la?

¹⁵ N’an be sɔn Jehova ka ɲɛminɛli ma, o b’an nafa kabi sisan. Misali la, jɔncɛ kantigiman b’an jija ko an ka to ka ɲɛnamaya kɛ cogo nɔgɔman na. Andy ni Robyn y’o lo kɛ (Eburuw 13:5). O la, u sera k’u yɛrɛ di Masaya Boonw n’a ɲɔgɔnnaw lɔli baara la. Robyn ko: “Tuma dɔw, an tun be sii boon dennin dɔw lo kɔnɔ ani gwabugu tun tɛ yen. N’ ye n’ ka fotota minan caaman feere k’a sɔrɔ fotota ka di n’ ye kosɔbɛ. N’ kasira o kosɔn yɛrɛ. Nka i ko Ibrayima muso Sara, n’ tun jijanin lo ka n’ hakili bɔ koo tɛmɛninw na ani ka to ka miiri sinikow lo la.” (Eburuw 11:15). Andy ni Robyn y’a latigɛ k’u ka ɲɛnamaya kɛ cogo nɔgɔman na minkɛ, u ye nafa jumanw lo sɔrɔ o la? Robyn ko: “An ninsɔn ka di kosɔbɛ k’a lɔn ko an b’an seko bɛɛ kɛra Jehova ka baara la. N’an be Jehova ka baara kɛra, o b’a to an b’a ye ɲɛnamaya bena kɛ cogo min na duniɲa kura kɔnɔ.” Andy fana b’o lo miiri. A ko: “An ninsɔn ka di kosɔbɛ sabu an b’an fanga ani an ka wagati bɛɛ kɛra Jehova ka baara la.”

¹⁶ N’an be sɔn Jehova ka ɲɛminɛli ma, an be nafa wɛrɛ jumanw lo sɔrɔ o la? Marcia tilanin kɔ kalan na lise la, a y’a latigɛ ka kɛ kudayi cidenya baarakɛla ye, i ko Jehova ka ɔriganisasiyɔn b’an jija cogo min na (Mat. 6:33; Ɔrɔm. 12:11). A ko: “N’ tun ye sababu sɔrɔ ka kalan kɛ inivɛrisite la gwansan saan naani kɔnɔ. Nka, n’ tun b’a fɛ ka baara kɛ Jehova ye bɛrɛbɛrɛ. O kama, n’ y’a latigɛ ka baara dɔ degi lakɔliso dɔ la. O la, ni n’ tun nana n’ ka piyɔniye baara daminɛ, n’ tun bena se ka to ka n’ mako wasa. O kɛra n’ ka desizɔnw bɛɛ la fisaman dɔ ye. Sisan, n’ ye kudayi piyɔniye ye ani n’ ninsɔn ka di o baara la. Ne lo b’a latigɛ n’ bena baloɲini baara kɛ wagati hakɛ min na. O kama, n’ be sera ka dɛmɛ don Betɛli la ani ka nɛɛma baara wɛrɛw kɛ Jehova ka baara la.”

17. N’an be sɔn Jehova ka ɲɛminɛli ma, an be duga wɛrɛ jumanw lo sɔrɔ? (Ezayi 48:17, 18).

¹⁷ Tuma dɔw la, Jehova ka ɔriganisasiyɔn be ladili dɔw di an ma minw b’an latanga. Misali la, u b’an lasɔmi an k’an yɛrɛ tanga wari kanuya ani koo wɛrɛw ma, minw be se k’a to an be Ala ka sariyaw tiɲɛ. N’an be mɛnni kɛ Jehova fɛ o koow la fana, o b’an nafa. An be kɛ ni dusukun ɲuman ye ani an b’an yɛrɛ tanga hamikojugu ma (1 Tim. 6:9, 10). O la, an be se ka Jehova bato n’an dusu bɛɛ ye. O b’an lafiya yɛrɛ le! Foyi tɛ mɔgɔ ninsɔndiya ani ka mɔgɔ wasa ka se o ma.—Ezayi 48:17, 18 kalan.

18. Mun na i cɛsirinin lo k’a to Jehova k’i ɲɛminɛ tuma bɛɛ?

¹⁸ Siga t’a la, Jehova bena tɛmɛ adamadenw lo fɛ k’an ɲɛminɛ tɔɔrɔba wagati ani saan waa kelen mara tuma na (Zab. 45:17). Yala an bena to ka sɔn o ɲɛminɛli ma hali n’an ka ɲi k’an ɲɛnako dɔw ye k’u to yen wa? A bena nɔgɔya an ma k’o kɛ n’an be sɔn Jehova ka ɲɛminɛli ma kabi sisan. O la, an ka to ka sɔn Jehova n’a ka lasigidenw ka cikanw ma tuma bɛɛ (Ezayi 32:1, 2; Eburuw 13:17). N’an tora k’o kɛ, an bena sababuw sɔrɔ ka la kosɔbɛ an Ɲɛminɛbaga Jehova la. A b’an dɛmɛ an k’an yɛrɛ tanga faratiw ma Alako ta fan fɛ ani a bena an ɲɛminɛ ka se n’an ye duniɲa kura kɔnɔ, yɔrɔ min na an bena ɲɛnamaya kɛ fɔɔ abada!