I be se ka waajuli kɛ dimansi loonw na wa?

1. Pol n’a tagamaɲɔgɔnw ye min kɛ Filipe dugu kɔnɔ, an be kalan juman sɔrɔ o la?

¹ Lafiɲɛlon tun lo. Filipe dugu kɔnɔ, Yahutuw fanba tun tɛ baara kɛ o loon na. U ka cidenya baara sen fɛ, Pol n’a tagamaɲɔgɔnw tun tagara bɔ o dugu kɔnɔ. Joo tun b’u fɛ ka lafiɲɛ fana u ka cidenya baara la o loon na, ani mɔgɔ si tun tɛna u kɔrɔfɔ o kosɔn. Nka komi u tun b’a lɔn ko Yahutuw lajɛnnin lo ka delili kɛ dugu kɔfɛ, o kama u y’a latigɛ ka taga u waaju yen. Lidi ye u ka kuma lamɛn ani ale n’a somɔgɔw bɛɛ batisera. O kɛra ninsɔndiyaba sababu ye Pol n’a tagamaɲɔgɔnw fɛ! (Kɛw. 16:13-15). Bi, komi mɔgɔ caaman be lafiɲɛ dimansi loon na, mun na an tɛ wagati dɔ ta o loon ka waajuli kɛ?

2. Jehova sagokɛlaw ye see sɔrɔ gwɛlɛya jumanw lo kan walisa ka se ka waajuli kɛ ɲɛsuma na dimansi loonw na?

² Bondori min kɛra walisa waajuli ka se ka kɛ dimansi loon na: Saan 1927 wagati la, u ye Jehova sagokɛlaw jija ko u ka wagati dɔ ta dimansi loonw bɛɛ ka waajuli kɛ. O kosɔn, u juguw sinna ka wuli u kama. Etazini jamana na, faamanw ye balima caaman minɛ ko u be lafiɲɛlon sariyaw tiɲɛna, k’u be dugu ɲagamina ani k’u be feereli kɛra k’a sɔrɔ patanti t’u bolo. Nka Jehova sagokɛlaw ma waajuli dabila. Saan 1930 wagati la, u ye waajuli kanpaɲiba dɔw labɛn minw sen fɛ dafɛla kafow tun be ɲɔgɔnw kunbɛn walisa ka waajuli kɛ kiin dɔ kɔnɔ k’a bɛɛ yaala. Faamanw tun be weleweledala minw minɛ o sen fɛ, u tun ka ca fɔɔ faamanw yɛrɛ tun b’u yɛrɛ ɲini u bolo. O balimaw y’u yɛrɛ saraka ka min kɛ walisa an ka se ka waajuli kɛ ɲɛsuma na dimansi loonw na, yala e b’u waleɲuman lɔn o kosɔn wa?

3. Mun na dimansi loon ye waajulikɛlon ɲuman ye?

³ Waajulikɛlon ɲuman lo: Dimansi loon na, mɔgɔ caaman be sɔrɔ soo sabu u tɛ taga baara la. U degunnin tɛ i n’a fɔ loon tɔɔw la. O loon na, legilizi tagabaga dɔw ka teli ka sɔn ka baro kɛ Alakow kan. N’an ka kafo ka lajɛn be kɛ dimansi loon na, an ka fanidoncogo bɛnnin lo ka ban waajuli baara kama. O la do, mun na an t’a ɲini ka waajuli kɛ sanni lajɛn ka daminɛ wala lajɛn banni kɔ? N’i mako bena kɛ dumuni na, i ka dumunifɛn dɔɔni ta i kun.

4. N’an be wagati dɔ ta dimansi loon na ka waajuli kɛ, an bena ninsɔndiya juman sɔrɔ o la?

⁴ N’an be wagati dɔ ta dimansi loon na ka waajuli kɛ, an bele bena wagati sɔrɔ an yɛrɛ ye ka lafiɲɛ. Ka fara o lafiɲɛ kan, an bena wasa sabu an sera ka baara senuman kɛ (Ntal. 19:23). N’a sɔrɔ an yɛrɛ bena ninsɔndiya ka Lidi ɲɔgɔnna mɔgɔ dɔ sɔrɔ!