Mun lo bena diinanw sɔrɔ?

1. Yala diinanw bɛɛ ka ɲi wa?

Mɔgɔ sɔbɛw be sɔrɔ diinanw bɛɛ la. Kibaro diiman lo k’a lɔn ko Ala ɲɛɛ be o mɔgɔw la ani a b’a janto u la. A fɔ man di, nka kojugu caaman kɛra diinanko sababu la (2 Korɛntikaw 4:3, 4; 11:13-15). Koow b’a yira ko diinan kuntigi dɔw yɛrɛ seen be benkannikow, siyakɛlɛ ni marifakɛlɛw la ani u be kakalayakow kɛ ni denmisɛnw ye. Minw lanin be Ala la sɔbɛ la, o koow b’u dusu kasi tiɲɛn na!​—Matiyo 24:3-5, 11, 12 kalan.

Tiɲɛn diinan be nɔɔrɔ la Ala kan, nka ngalon diinan koo ka gwo Ala ye. Ngalon diinan ka kalanw tɛ bɔ Bibulu kɔnɔ. A be min fɔ Ala ni mɔgɔ saninw koo la, o fana ye ngalon ye. Nka, Jehova b’a fɛ mɔgɔw ka tiɲɛn lɔn ale koo la.​—Waajulikɛla 9:5, 10; 1 Timote 2:3-5 kalan.

2. Mun lo bena diinanw sɔrɔ?

Diinan minw b’a fɔ k’u be Ala kanu k’a sɔrɔ Sutana ka duniɲa koo lo ka di u ye, Ala tɛ fili olu ma (Zaki 4:4). Ala ka Kuma be ngalon diinanw bɛɛ weele ko “Babilonɛba.” Sanjiba tɛmɛnin kɔ Nuhun tile la, ngalon diinan ka koo daminɛna Babilonɛ dugu lo kɔnɔ. Diinan minw be adamadenw lafili ani k’u niin tɔɔrɔ, Ala bena bari k’olu halaki yanni dɔɔni.​—Yirali 17:1, 2, 5, 16, 17; 18:8 (ABM) kalan.

Mɔgɔ kɔnɔgwɛ minw jɛnsɛnnin be ngalon diinanw na duniɲa kuru bɛɛ kɔnɔ, Jehova ma ɲinɛ u kɔ. A b’o mɔgɔw kalanna tiɲɛn koo la walisa k’u kɛ jamakulu kelen ye.​—Mise 4:2, 5 kalan.

3. Mɔgɔ kɔnɔgwɛw ka kan ka mun lo kɛ?

Mɔgɔ minw b’a fɛ ka tiɲɛn lɔn ani ka koo ɲuman kɛ, Jehova b’a janto olu la. A b’a fɔ u ye k’u ka bɔ joona joona ngalon diinan na. Mɔgɔ minw be Ala kanu, a ka di olu ye k’u sɔɔn yɛlɛma walisa k’u koo diya Ala ye.​—Yirali 18:4 (ABM) kalan.

Saan kɛmɛkulu fɔlɔ wagati la, mɔgɔ kɔnɔgwɛw ye kibaro diiman mɛn Yezu ka cidenw fɛ tuma min na, u sɔnna a la ni ninsɔndiya ye. Jehova y’u degi ɲɛnamaya kɛcogo kura la kuun be min na ani hɛɛrɛ ni jigiya be sɔrɔ o la fana. U ye ɲɛyirali ɲuman ye an fɛ sabu u sɔnna kibaro diiman na ani u ye Jehova batoli kɛ u ɲɛnako fɔlɔ ye.​—1 Tesalonikaw 1:8, 9; 2:13 kalan.

Mɔgɔ minw be bɔ ngalon diinan na ani ka na Jehova batobagaw cɛma, a b’olu bisimila. Jehova be welekan lase i ma ni dusudiya ye. N’i sɔnna o la, i bena kɛ a teri ye ani ka balima kuraw sɔrɔ minw be Jehova bato ani u b’i kanu. Ka fara o kan, i bena ɲɛnamaya banbali fana sɔrɔ.​—Mariki 10:29, 30; 2 Korɛntikaw 6:17, 18 kalan.

4. Ala bena mɔgɔw dusu diya dugukolo yɔrɔ bɛɛ la cogo di?

Kibaro diiman lo k’a lɔn ko kiti bena tigɛ ngalon diinan kan. O bena kɛ sababu ye tɔɔrɔw be ban dugukolo kan. Ngalon diinan tɛna kɛ yen tugun ka mɔgɔw lafili ani k’u bila ɲɔgɔn na. Mɔgɔ minw bena kɛ yen o wagati la, u bɛɛ bena tiɲɛn Ala kelenpe lo bato ni kaan kelen ye.​—Yirali 18:20, 21 (ABM); 21:3, 4 kalan.