Kunmabɔsara barika la, suuw bena kunu

An bena duga minw sɔrɔ kunmabɔsara barika la, Hakilijigi lajɛn be sababu di an ma an ka miiri u koo la. O duga dɔ ye sukununi ye. Jehova tun t’a fɛ abada adamadenw ka sa. O lo y’a to n’an ka mɔgɔ sɔbɛ dɔ sara, o b’an dusu kasi kosɔbɛ ka tɛmɛ koo caaman kan (1 Kor. 15:26). Yezu y’a ye ko a ka kalandenw be Lazari suu kasira minkɛ a dusu kasira sabu u makari y’a minɛ (Zan 11:33-35). Yezu do bɔnin be a Faa ma tigitigi. O kama, an lanin b’a la ko Jehova mana a ye ko an dusu kasinin lo an ka mɔgɔ sɔbɛ dɔ saya kosɔn, o koo be ale fana dusu kasi (Zan 14:7). Jehova bena a sagokɛlaw kunu ka bɔ saya la wagati min na, a kɔrɔtɔnin lo o wagati ka se. An fana kɔrɔtɔnin lo o wagati ka se.—Zɔbu 14:14, 15.

Komi Jehova tɛ koo ferekenin tigi ye, a bɛnnin lo an k’a miiri ko sukununi bena kɛ cogo tilennin na (1 Kor. 14:33, 40). Sanni mɔgɔw ka ɲɔgɔn lajɛn sutarali kama, minw suu kununa, mɔgɔw bena ɲɔgɔn lajɛn ka olu bisimila. Yala i be wagati ta ka miiri sukununi koo la sanko n’i ka mɔgɔ dɔ sara wa? (2 Kor. 4:17, 18). Jehova ye kunmabɔsara di ani a y’a fɔ an ye Bibulu kɔnɔ ko suuw bena kunu.Yala i b’a waleɲuman lɔn o kosɔn wa?—Kɔlɔs. 3:15.

• I kɔrɔtɔnin lo kosɔbɛ ka i teri wala i somɔgɔ jumanw lo ye ni u suu kununa?

• Mɔgɔ minw kofɔra Bibulu kɔnɔ, i b’a fɛ kosɔbɛ k’u la jumanw lo ye ani ka kuma n’u ye?