KALANSEN 4

Vɛrisew dadon ka ɲɛ

Matiyo 22:41-45

MIIRIYA JƆNJƆN: N’i b’a fɛ ka vɛrise dɔ kalan, kuma dɔw fɔ fɔlɔ walisa k’i lamɛnbagaw lasun u k’u janto o vɛrise kɔnɔnakumaw na.

E yɛrɛ ka ɲi k’a lɔn fɛɛn min kama i b’a fɛ k’o vɛrise kalan: I b’a fɛ ka vɛrise minw kalan, u kelen kelen bɛɛ dadon cogo dɔ la walisa i lamɛnbagaw k’a faamu i b’a fɛ ka miiriya jɔnjɔn min bɔ kɛnɛ kan o vɛrise kɔnɔ.

O vɛrise sɛbɛra koo minw sen fɛ, i janto o la. N’i be vɛrise dɔ dadonna, mɔgɔ min y’o vɛrise kɔnɔ kumaw fɔ ani mɔgɔ min y’o Bibulu kitabu sɛbɛ, i janto, kana fili u ma.
I ka kuma basigi Bibulu kan: N’i be kumana ni mɔgɔ dɔw ye minw lanin be Ala la, a yira u la ko Bibulu ye Ala ka Kuma lo ye. O la, u bena a faamu ko hakilitigiya min be sɔrɔ Bibulu kɔnɔ, o ɲɔgɔn tɛ yen.
I lamɛnbagaw lasun u k’u mako don o vɛrise kalan na: Ɲiningali dɔ kɛ min jaabili be sɔrɔ o vɛrise kɔnɔ. Gwɛlɛya dɔ fɔ min ɲɛnabɔcogo ɲɛfɔra o vɛrise kɔnɔ. Wala sariyakolo dɔ kofɔ, Bibulu ka maana bena i lamɛnbagaw dɛmɛ ka min faamu.

I lamɛnbagaw be min lɔn ka ban o barokun wala o vɛrise koo la, i janto o la. Hali u be vɛrise min lɔn, i be se k’o dadon cogo dɔ la walisa k’u lasun u k’a ɲini ka dɔ lɔn tugun o vɛrise koo la.