KALANSEN 10

I kumakan yɛlɛma yɛlɛma

Matiyo 20:31

MIIRIYA JƆNJƆN: Miiriyaw fɔ ka gwɛ ani a ɲini ka mɔgɔw dusu sɔrɔ nin cogo la: i kaan kɔrɔta wala a jigi, i kaan yɛlɛma, kuma joona joona wala dɔɔni dɔɔni.

A KƐCOGO:

I kaan kɔrɔta wala a jigi: I kaan kɔrɔta walisa ka miiriya jɔnjɔnw bɔ kɛnɛ kan, ka mɔgɔw lasun ka dɔ kɛ dɔ ye, wala n’i be kitiko dɔ kalanna Bibulu kɔnɔ. I kaan jigi walisa mɔgɔw k’u yɛrɛ ɲininga i bena na min fɔ, walisa k’a kɛ i n’a fɔ i sirannin lo wala ko i be hamina.

Kana i kaan kɔrɔta tuma bɛɛ, n’o tɛ i lamɛnbagaw bena a miiri ko i b’u sɔngɔra le. Kana i yɛrɛ yira i kɛtɔ ka kuma i n’a fɔ i be teyatiri lo kɛra.
I kaan yɛlɛma: I kaan yɛlɛma walisa ka se k’i ka dusukunnataw bɔ kɛnɛ kan i n’a fɔ dusudiya, hami, wala dusukasi.
Kuma joona joona wala dɔɔni dɔɔni: Kuma joona joona walisa k’a yira ko i ɲagalinin lo. Kuma dɔɔni dɔɔni n’i be hakilinata jɔnjɔn dɔw fɔra.

Kana bari ka kuma joona joona wala dɔɔni dɔɔni, n’o tɛ o be se k’i lamɛnbagaw kɔnɔ gwan. Kana kuma joona joona kojugu fɔɔ i ka kuma be fereke.