KALANSEN 2

Kuma barokɛcogo la

2 Korɛntikaw 2:17

MIIRIYA JƆNJƆN: I kɔnɔ gwɛ ka kuma i yɛrɛ kumacogo la walisa i lamɛnbagaw k’a lɔn ele yɛrɛ be min miiri i ka barokun koo la ani olu yɛrɛ koo la.

I yɛrɛ labɛn ka ɲɛ ani delili kɛ: Jehova deli walisa a k’i dɛmɛ i k’i hakili sigi i ka kalan na ani i kana jɔrɔ i yɛrɛ koo la. I bena miiriya jɔnjɔn minw walawala i ka barokun na, u to i hakili la. Kuma i yɛrɛ kumacogo la, kana dan ka kumadenw kalan tigitigi i ko u sɛbɛnin be gafe dɔ kɔnɔ cogo min na.

N’i ka ɲi ka Bibulu wala gafe yɔrɔ dɔ kalan, kɔn k’i yɛrɛ degi a kalan na walisa a ka nɔgɔya i daa. N’i ka ɲi ka mɔgɔ dɔw ka kumaw kalan, u kalan n’i dusu bɛɛ ye, nka i janto i kana o kɛ teyatiri ye.
Kuma n’i dusu bɛɛ ye: Miiri k’a filɛ fɛɛn min kama i lamɛnbagaw mako b’a la k’i ka kumaw lamɛn. Miiri i lamɛnbagaw la. O la, i lɔcogo, i fari lamagacogo, ani i ɲɛda cogoya bena a yira u la ko i dusu ka di u kɔrɔ, i kɔnɔ gwɛnin lo ani ko i be kumana u fɛ teriya la.

Ka kuma i yɛrɛ kumacogo la, o kɔrɔ tɛ ka koow dama tɛmɛ ka mɔgɔw dɔgɔya. I be min fɔra, o fɔ ni danbe ye. Cogo di do? A to i ka kumaw ka gwɛ ani u fɔ cogo bɛnnin na.
I lamɛnbagaw filɛ: N’a bɛnnin lo mɔgɔw fɛ i sigiyɔrɔ la, i be se k’i lamɛnbagaw ɲɛda filɛ n’i be kumana. N’i be kalan dira, sanni i ka to k’i ɲɛɛ munumunu jama bɛɛ kan, i ɲɛɛ lɔ mɔgɔ kelen kan k’a filɛ wagati dɔɔni kɔnɔ.