LESSON 03
Mɔgɔ be se ka la Bibulu la wa?
Layidu kumaw ani ladili caaman be sɔrɔ Bibulu kɔnɔ. N’a sɔrɔ i b’a fɛ k’a lɔn min fɔra Bibulu kɔnɔ, nka i m’a lɔn n’a kɔnɔnakow ye tiɲɛn ye. Ladiliw ani layidu kuma minw be sɔrɔ o gafe kɔrɔ kɔnɔ, mɔgɔ be se ka la u la wa? Bibulu b’a fɔ ko mɔgɔ be se ka ɲɛnamaya kɛ hɛɛrɛ la kabini sisan ani sini ma. I be se ka la o la tiɲɛn tiɲɛn na wa? Mɔgɔ miliyɔn caaman lanin b’o la. An k’a filɛ ni ele fana be se ka la o la.
1. Tiɲɛnkow lo be sɔrɔ Bibulu kɔnɔ wala nsiirinw lo?
Bibulu yɛrɛ b’a fɔ ko a kɔnɔna kumaw ye “tiɲɛ kumaw” ye (Waajulikɛla 12:10, Bible senuma). Koo minw lakalila a kɔnɔ, u kɛra tiɲɛn tiɲɛn na ani mɔgɔ minw kofɔra a kɔnɔ, u ye ɲɛnamaya kɛ yɛrɛ yɛrɛ la (Luka 1:3; 3:1, 2 kalan). Tariki sɛbɛbagaw ani sɛgɛsɛgɛrikɛla caaman yɛrɛ y’a fɔ ko mɔgɔw, yɔrɔw, koow ani koow kɛlon minw kofɔra Bibulu kɔnɔ, u ye tiɲɛn ye.
2. Mun na an bele be se ka la Bibulu ka fɔta la?
Bibulu tun ye koo caaman fɔ galen. Kɔfɛ le mɔgɔw nana a ye k’u ye tiɲɛn ye. Misali la, a be koo caaman fɔ ka ɲɛsin lɔnnikow ma mɔgɔ caaman tun lanin tɛ minw na. Nka bi lɔnnikɛlaw y’a yira ko Bibulu tun kɔnna ka min fɔ, o ye tiɲɛn ye. “Mɔgɔ bɛ se ka la a ta . . . kumaw bɛɛ ra; a ta cifɔninw tɛ yɛlɛma ka ye.”—Zaburuw 111:7, 8, Biblu Ala ta Kuma.
3. Bibulu be min fɔ siniɲasigi koo la, mun na an be se ka la o la?
Kiraya kumawa be sɔrɔ Bibulu kɔnɔ. U ɲɛsinna koo dɔw ma ‘minw ma kɛ fɔlɔ.’ (Ezayi 46:10). Bibulu tun ye koo caaman kofɔ kabini wagatijan ani o koow dafara tigitigi. Koo minw be kɛra duniɲa kɔnɔ bi, Bibulu tun kɔnna k’u lakali ka gwɛ. An bena Bibulu ka kiraya kuma dɔw lajɛ kalansen nin na. U dafara cogo min na tigitigi, o be mɔgɔ kabakoya!
A ƝINI KA DƆ LƆN TUGUN
A filɛ cogo min na bi ka lɔnnikow be Bibulu ka tiɲɛntigiya yira, ani Bibulu ka kiraya kuma damanin lajɛ minw be mɔgɔ kabakoya.
4. Lɔnnikow be Bibulu ka tiɲɛntigiya yira
Fɔlɔfɔlɔ, mɔgɔw fanba tun b’a miiri ko dugukolo bilanin be fɛɛn dɔ kan. VIDEWO yira.
A filɛ Zɔbu ka kitabu ye min fɔ dugukolo koo la a saan 3500 ye nin ye. Zɔbu 26:7 kalan. O kɔ, a’ ye ɲiningali nin kɛ ani ka baro kɛ o kan:
A fɔra yen ko dugukolo “bilanin te foyi kan.” Mun na o kumaw b’an kabakoya?
Jii be yɛlɛma ka kɛ sisi ni sankaba ye ani ka tila kɛ jii ye cogo min na, lɔnnikɛlaw sera k’o faamu ka ɲɛ a saan 200 ɲɔgɔn ye nin ye. Nka a filɛ Bibulu tun kɔnna ka min fɔ o koo la a saan waa caaman ye nin ye. Zɔbu 36:27, 28 kalan. O kɔ, a’ ye ɲiningali nunu kɛ ani ka baro kɛ u kan:
Bibulu be min fɔ jii yɛlɛmacogo koo la, mun lo b’i kabakoya o la?
I ye vɛrise minw kalan, yala u b’i lasun ka la Bibulu la kosɔbɛ tugun wa?
5. Bibulu tun kɔnna ka kobaba dɔw kofɔ
Ezayi 44:27–45:2 kalan. O kɔ, a’ ye ɲiningali nin kɛ ani ka baro kɛ o kan:
U ye Babilɔni dugu minɛ cogo min na, saan 200 ka kɔn o koo ɲɛ, Bibulu tun kɔnna k’o fɔ gwɛ cogo di?
Tarikikow b’a yira ko Pɛrɛsi masacɛ Sirusi n’a ka kɛlɛbolo ye Babilɔni dugu minɛ saan 539 ka kɔn Krista tile ɲɛ. Baji min tun be dugu latanga, u y’o jisira yɛlɛma. Dugu dondaw yɛlɛnin tun tora minkɛ, u sera ka don ani ka dugu minɛ hali u yɛrɛ ma kɛlɛ kɛ. Bi bi nin na, saan 2500 ni kɔ o koo kɛnin kɔ, Babilɔni dugu lakolon lo. A filɛ Bibulu tun kɔnna ka min fɔ o koo la.
Ezayi 13:19, 20 kalan. O kɔ, a’ ye ɲiningali nin kɛ ani ka baro kɛ o kan:
O kiraya kuma dafara cogo di Babilɔni koo la?
Babilɔni dugu lakolon Irak jamana na
6. Koo minw be kɛra bi, Bibulu tun y’u kofɔ kabi wagatijan
An be wagati min na, Bibulu b’a fɔ k’o ye “laban tuma” lo ye (2 Timote 3:1). A filɛ Bibulu tun kɔnna ka min fɔ an ka wagati koo la:
Matiyo 24:6, 7 kalan. O kɔ, a’ ye ɲiningali nin kɛ ani ka baro kɛ o kan:
Bibulu tun kɔnna k’a fɔ ko kobaba jumanw lo bena kɛ laban tuma na?
Vɛrise nin kalan: 2 Timote 3:1-5 kalan. O kɔ, a’ ye ɲiningali nunu kɛ ani ka baro kɛ u kan:
Bibulu tun kɔnna k’a fɔ ko mɔgɔw sɔɔn tun bena kɛ cogo di laban tuma na?
I y’o sɔɔn jumanw lo ye mɔgɔw la?
NI MƆGƆ DƆ Y’A FƆ I YE KO: “Nsiirinw ni maanaw lo fanin be Bibulu kɔnɔ.”
Mun lo b’a to ele lanin b’a la tigitigi ko mɔgɔ be se ka la Bibulu la?
MIIRIYA JƆNJƆN
Tarikikow, lɔnnikow ani kiraya kumaw, u bɛɛ b’a yira ko i be se ka la Bibulu la.
I ye mun lo faamu?
Tiɲɛnkow lo be sɔrɔ Bibulu kɔnɔ wala nsiirinw lo?
Koo jumanw lo la lɔnnikow be Bibulu ka tiɲɛntigiya yira?
Ele ka miiri la, Bibulu tun kɔnna ka sinikow fɔ wa? Mun na i ko ten?
NUNU LAJƐ FANA
Yala fili dɔw be sɔrɔ Bibulu kɔnɔ lɔnniko ta fan fɛ wa?
“Lɔnnikow be Bibulu ka tiɲɛntigiya yira wa?” (A be sɔrɔ jw.org kan)
Mun lo b’a yira ko an be “laban tuma na”?
“Bibulu ka kiraya kuma 6 minw be dafara i ɲɛɛ na” (Saan 2011, mɛkalo tile fɔlɔ ka Kɔrɔsili Sangaso)
Kiraya kuma minw be sɔrɔ Bibulu kɔnɔ Grɛkiw ka masaya koo la, a filɛ u dafara cogo min na.
A filɛ cogo min na Bibulu ka kiraya kumaw ye cɛɛ dɔ lasun a y’a ka miiriya yɛlɛma Bibulu koo la.
“N’ tun b’a miiri ko Ala tɛ yen” (Saan 2017 ka Kɔrɔsili Sangaso No 5nan)
a N’u ko kiraya kuma, o ye Ala ka kuma dɔw ye minw ɲɛsinna koo nataw ma.