I labɛnnin lo ka ‘dugukolo tigiya kɛ’ wa?

I LABƐNNIN LO KA DƐMƐ DON KA DUGUKOLO KƐ ALIJƐNƐ YE WA?

Tuma min na Jehova ye cii di Adama ni Awa ma ko u “ka dugukolo fa k’a kolo,” a tun b’a yirala le ko a laban, dugukolo kuru bɛɛ bena kɛ alijɛnɛ ye (Zɛnɛzi 1:28). Minw bena ɲɛnamaya kɛ fɔɔ abada dugukolo kan, olu fana ka ɲi k’o cii labato. A daminɛ na, dugukolo tɛna sin ka kɛ alijɛnɛ ye sabu Edɛn nankɔ tɛ yen tugun. O kɔrɔ ko Arimagedɔn kɛlɛ kɔ, dugukolo faan minw halakinin lo sisan, an bena u lalaga ani k’u saniya. O bena kɛ baaraba yɛrɛ lo ye!

O b’an hakili jigi Israɛldenw ye baara min kɛ tuma min na u bɔra Babilɔni ka kɔsegi u ka jamana na. O jamana lakolon tun tora saan 70 kɔnɔ. Nka kira Ezayi tun kɔnna k’a fɔ ko Jehova ka dɛmɛ barika la, u bena se k’o jamana lɔ kokura. A fɔra o kiraya kuma kɔnɔ ko: “A bena yɔrɔlakolon nin yɛlɛma k’a kɛ i ko Edɛn, yɔrɔɲuman. A bena yɔrɔ janin nin yɛlɛma k’a kɛ i ko ale Masaba ka yɔrɔ.” (Ezayi 51:3). Tiɲɛn na, Israɛldenw sera k’o kɛ. O cogo kelen na, minw bena ɲɛnamaya kɛ dugukolo kan, olu bena se ka dugukolo kɛ alijɛnɛ cɛɲumanba ye Jehova ka dɛmɛ barika la. Ani kabi sisan yɛrɛ, i be se k’a yira ko i b’a fɛ k’i seen don o baara la.

I be se k’o kɛ cogo minw na, u la dɔ ye k’i sigiyɔrɔ saniya ani k’a ladon koɲuman. I be se k’o kɛ hali n’i sigiɲɔgɔnw saniyanin tɛ. I be se ka dɛmɛ don k’i ka Masaya Boon ni lajɛnba kɛyɔrɔ saniya ani k’u ladon. Ni balawoko dɔ kɛra i ka mara la, i be se k’i yɛrɛ di fana ka dɛmɛ don. O bena a yira ko i b’a fɛ k’i balimaw dɛmɛ n’u mako be dɛmɛ na. I yɛrɛ ɲininga ko: “Yala n’ be se ka baara dɔw degi minw bena n’ nafa ni Jehova y’a to n’ donna duniɲa kura kɔnɔ wa?”

MINW SUU BENA KUNU, I LABƐNNIN LO K’U LADON WA?

Tuma min na Yezu ye Zayirisi denmuso suu kunu, a sinna k’a fɔ ko u ka dumuni di a ma (Mariki 5:42, 43). N’a sɔrɔ a ma gwɛlɛya u ma k’u janto o saan 12 sungurunin na. Nka miiri k’a filɛ an bena baaraba min kɛ tuma min na Yezu bena a ka layidu nin dafa: “Suuw bena ne kaan mɛn. U bena kunun.” (Zan 5:28, 29). Tiɲɛn lo ko Bibulu ma kunnafoniw bɛɛ di o koo la, nka an b’a lɔn ko minw suu bena kunu, u mako bena kɛ dumuni, siyɔrɔ ani faniw na. I be se k’a yira kabini sisan yɛrɛ ko i labɛnnin lo k’u dɛmɛ. An k’a filɛ i be se k’o kɛ cogo minw na.

N’u y’a fɔ ko kafokulu kɔrɔsibaga be nana bɔ aw ka kafo ye, yala i b’i tɔgɔ di walisa a ka na dumuni kɛ i ka soo wa? N’a ɲinina betɛliden dɔ fɛ ko a ka kɛ piyɔniye ye wala ni kafokulu kɔrɔsibaga dɔ y’a ka baara lalɔ, yala i be se k’u dɛmɛ ka boon sɔrɔ wa? Ni tile saba lajɛnba wala lajɛnba kɛrɛnkɛrɛnnin dɔ be kɛra aw ka mara la, i be se k’i yɛrɛ di ka baara kɛ ka kɔn lajɛnba ɲɛ wala a kɔ wa? Wala balima minw bɔra yɔrɔ wɛrɛ la ka na o lajɛnba la, i be se k’i yɛrɛ di k’u bisimila wa?

MINW SUU BENA KUNU, I LABENNIN LO K’U KALAN WA?

Ka kɛɲɛ ni Kɛwaliw 24:15 ye, mɔgɔ miliyari caaman suu bena kunu. U fanba tun ma sababu sɔrɔ ka Jehova lɔn ka sɔrɔ ka sa. Nka, u kununin kɔ ka bɔ saya la, u bena o sababu sɔrɔ.a O la, Ala sagokɛla kantigi minw ye kolɔnbagaw ye, olu lo bena u kalan (Ezayi 11:9). Charlotte ye waajuli kɛ Erɔpu, Ameriki worodugu fan fɛ ani Afiriki. A kɔrɔtɔnin lo o wagati ka se. A y’a fɔ ni ninsɔndiya ye ko: “Minw suu bena kunu, n’ kɔrɔtɔnin lo yɛrɛ le k’u kalan. Ni n’ be mɔgɔ dɔ ka maana kalanna min ye ɲɛnamaya kɛ galen, tuma caaman n’ be miiri ko: ‘N’a tigi tun ye Jehova lɔn, a ka ɲɛnamaya tun tɛna kɛ o cogo la.’ Minw suu bena kunu, n’ kɔrɔtɔnin lo kosɔbɛ ka Jehova kofɔ u ye ani k’a yira u la ko n’u y’a sago kɛ, u bena ɲɛnamaya kɛ cogo fisaman na.”

Hali Jehova sagokɛla kantigi minw ye ɲɛnamaya kɛ ka kɔn Krista tile ɲɛ, n’u suu kununa, u bena fɛɛn caaman kalan Jehova koo la. Daniyɛli ye kiraya kuma minw sɛbɛ, a tun tɛ u bɛɛ kɔrɔ faamu (Dan. 12:8). Miiri k’a filɛ i bena ninsɔndiya ni nɛɛma min sɔrɔ k’a ɲɛfɔ a ye o kiraya kumaw dafara cogo min na. Miiri fana k’a filɛ i ninsɔn bena diya cogo min na k’a fɔ Uruti ni Nawomi ye ko u bɔnsɔn dɔ kɛra Masiya ye. A bena kɛ ninsɔndiyaba yɛrɛ lo ye ka mɔgɔw kalan duniɲa kuru bɛɛ la! O wagati la, Sutana ka duniɲa tɛna nɔɔ to an kan tugun.

Minw suu bena kunu, i be se ka mun lo kɛ kabi sisan walisa i labɛnnin ka to k’u kalan? I be se ka koo minw kɛ, u la dɔ ye k’i ka mɔgɔw kalancogo fisaya ani ka waajuli kɛ tuma o tuma (Mat. 24:14). N’a sɔrɔ i tɛ se ka bɛrɛ kɛ waajuli baara la i sanda wala koo wɛrɛw kosɔn. Nka n’i b’i seko bɛɛ kɛ o baara la, i b’a yira ko minw suu bena kunu, i b’a fɛ k’u kalan.

O la, a kɔrɔtanin lo i k’i yɛrɛ ɲininga ko: Yala n’ b’a fɛ sɔbɛ la ka ɲɛnamaya kɛ dugukolo kan fɔɔ abada wa? N’ kɔrɔtɔnin lo ka dɛmɛ don ka dugukolo kɛ alijɛnɛ ye wa? Minw suu bena kunu, n’ kɔrɔtɔnin lo k’u ladon ani k’u kalan wa? An bena baara minw kɛ duniɲa kura kɔnɔ, u bɔnin be bi ka baara dɔw ma. An be se k’a yira ko an labɛnnin lo ka ɲɛnamaya kɛ fɔɔ abada, an kɛtɔ ka tɛmɛ sababuw bɛɛ fɛ kabi sisan k’an seen don o baaraw ɲɔgɔn na!