KALANSEN 28
Jehova ni Yezu ye min kɛ i ye, u waleɲuman lɔn o kosɔn
N’i teri dɔ ye kado ɲuman di i ma, o be mun lo kɛ i la do? Siga t’a la, o be diya i ye kosɔbɛ, ani i b’a ɲini k’i teri waleɲuman lɔn o kosɔn. Jehova ni Yezu ye nilifɛnw bɛɛ la nafaman lo di an ma: o ye kunmabɔsara ye. An be se k’a yira cogo di ko an b’u waleɲuman lɔn?
1. Ala ni Krista ye min kɛ an ye, an be se k’a yira cogo di ko an b’u waleɲuman lɔn o kosɔn?
A fɔra Bibulu kɔnɔ ko “mɔgɔ o mɔgɔ ka la [Yezu] ra,” o tigi be se ka ɲɛnamaya banbali sɔrɔ (Zan 3:16, Biblu Ala ta Kuma). An be se k’a yira cogo di ko an lanin lo Yezu la, o kɔrɔ, an limaniyanin lo a la? An be se k’o yira an ka desizɔnw n’an ka kɛwalew fɛ (Zaki 2:17). N’an b’a yira an ka kɛwalew n’an ka kumaw fɛ ko an limaniyanin lo, teriya min be an ni Yezu cɛ ani an ni Yezu Faa Jehova cɛ, o be barika sɔrɔ.—Zan 14:21 kalan.
2. Jehova ni Yezu ye min kɛ an ye, koo kɛrɛnkɛrɛnnin juman be sababu di an ma k’a yira ko an b’u waleɲuman lɔn o kosɔn?
Yezu ye suu laban min kɛ n’a ka kalandenw ye, a y’a yira u la cogoya wɛrɛ min na u be se k’u ka waleɲumanlɔn yira ale ka saraka kosɔn. A ye koo kɛrɛnkɛrɛnnin dɔ sigi sen kan, Bibulu be min weele ko “Matigi ka surafana,” wala Krista saya Hakilijigi lajɛn (1 Korɛntikaw 11:20, NW). Yezu y’o koo sigi sen kan walisa a ka cidenw ani kerecɛn sɔbɛ tɔɔw bɛɛ k’u hakili to a la ko a y’a niin di an kosɔn. A ye cii di ko: “Aw ye to ka nin kɛ k’aw hakili to ne la.” (Luka 22:19). N’i tagara Krista saya Hakilijigi lajɛn na, i ben’a yira o sen fɛ ko i be Jehova ni Yezu waleɲuman lɔn u ka kanuyaba kosɔn.
A ƝINI KA DƆ LƆN TUGUN
An k’a filɛ cogoya wɛrɛ minw na i be se k’a yira ko i be Jehova ni Yezu waleɲuman lɔn u ka kanuyaba kosɔn. Ani, an k’a filɛ fɛɛn min kama Krista saya Hakilijigi lajɛn kɔrɔtanin lo kosɔbɛ.
3. Waleɲumanlɔn be yira kɛwalew fɛ
Miiri k’a filɛ ko jii ye i ta, nka mɔgɔ dɔ ye i niin kisi. O tigi ye min kɛ i ye, i bena ɲinɛ o kɔ wa? Wala, i bena cogoya ɲini k’a yira a la ko i b’a waleɲuman lɔn?
Jehova y’an niin kisi a kɛtɔ k’a Dencɛ saraka an kosɔn. 1 Zan 4:8-10 kalan. O kɔ, a’ ye ɲiningali nunu kɛ ani ka baro kɛ u kan:
Mun na Yezu ka kunmabɔ saraka ye nilifɛn kɛrɛnkɛrɛnnin ye?
Jehova ni Yezu ye min kɛ i ye, n’i miirila o la, o be mun lo kɛ i la?
An be se k’a yira cogo di ko an be Jehova ni Yezu waleɲuman lɔn kunmabɔsara kosɔn? 2 Korɛntikaw 5:15; 1 Zan 4:11; 5:3 kalan. Vɛrise kelen kelen bɛɛ kalannin kɔ, a’ ye ɲiningali nin kɛ ani ka baro kɛ o kan:
Ka kɛɲɛ n’o vɛrise ye, an be se k’an ka waleɲumanlɔn yira cogo di?
4. Yezu ladegi
Cogoya wɛrɛ min na i be se k’i ka waleɲumanlɔn yira, o ye ka Yezu ladegi. 1 Piyɛri 2:21 kalan. O kɔ, a’ ye ɲiningali nin kɛ ani ka baro kɛ o kan:
Cogo jumanw na i be se ka tugu Yezu sennɔ kɔ koɲuman?
Ala ka Kuma koo tun ka di Yezu ye, a tun be kibaro diiman fɔ, ani a tun be mɔgɔw dɛmɛ.
5. Taga Krista saya Hakilijigi lajɛn na
Luka 22:14, 19, 20 kalan walisa k’a lɔn Matigi ka surafana koo sigira sen kan cogo min na. O kɔ, a’ ye ɲiningali nunu kɛ ani ka baro kɛ u kan:
Mun lo kɛra Matigi ka surafana tuma na?
Buru ni diwɛn ye mun ni mun lo tagamasiɲɛ ye?—Vɛrise 19, 20 lajɛ.
Yezu tun b’a fɛ a ka kalandenw k’ale saya Hakilijigi lajɛn kɛ siɲɛ kelen saan o saan, a ka saya sanyɛlɛmalon na. O lo kama, Jehova Seerew be ɲɔgɔn lajɛn saan o saan walisa k’u hakili jigi Krista saya koo la. U b’o kɛ i ko Yezu y’a ɲini u fɛ cogo min na. A’ ye VIDEWO filɛ walisa ka kunnafoni wɛrɛw sɔrɔ o lajɛn koo la. O kɔ, a’ ye ɲiningali nin kɛ ani ka baro kɛ o kan:
Krista saya Hakilijigi lajɛn be kɛ cogo di?
Buru ye Yezu farikolo dafanin tagamasiɲɛ lo ye, a y’o min saraka an kosɔn. Diwɛn y’a joli tagamasiɲɛ lo ye.
NI MƆGƆ DƆ Y’A FƆ I YE KO: “N’i b’a fɛ ka kisi, a daan ye ka la Yezu la dɔrɔn.”
I be se ka baara kɛ ni Zan 3:16 ani Zaki 2:17 ye cogo di k’a yira k’o dama tɛ bɔri kɛ?
MIIRIYA JƆNJƆN
Yezu ye min kɛ an ye, an b’a yira ko an b’a waleɲuman lɔn o kosɔn n’an limaniyanin lo a la, ani n’an be taga a ka saya Hakilijigi lajɛn na.
I ye mun lo faamu?
Ka limaniya Yezu la, o kɔrɔ ko di?
Jehova ni Yezu ye min kɛ i ye, i be se ka mun lo kɛ k’a yira ko i b’u waleɲuman lɔn o kosɔn?
Mun na a kɔrɔtanin lo kosɔbɛ ka taga Krista saya Hakilijigi lajɛn na?
NUNU LAJƐ FANA
Krista sara an kosɔn, o b’an lasun ka mun lo kɛ?
Limaniya ye mun lo ye, ani an b’a yira cogo di ko an limaniyanin lo?
“Exerce ta foi dans les promesses de Jéhovah” (Saan 2016, ɔkutɔburukalo ka Kɔrɔsili Sangaso)
Muso dɔ kɛtɔ ka miiri kunmabɔsara koo la, a tun be ni miiriya min ye a yɛrɛ koo la, o yɛlɛmana. A ka maana lajɛ barokun nin na: “Je me sens pure et j’aime la vie.”
“La Bible transforme des vies” (Saan 2011, utikalo tile fɔlɔ ka Kɔrɔsili Sangaso)
A filɛ fɛɛn min kama mɔgɔ damanin dɔrɔn be dɔ ta buru ni diwɛn na Hakilijigi lajɛn na.