E be mɔgɔ joli lɔn Jehova Seerew cɛ? N’a sɔrɔ an dɔw ye i sigiɲɔgɔnw, i baarakɛɲɔgɔnw, wala i lakɔli filankuruw ye. N’a sɔrɔ an dɔw yɛrɛ delila ka baro kɛ n’i ye Bibulu kɔnɔkow kan. An ye mɔgɔ sifa jumanw lo ye yɛrɛ yɛrɛ la, ani mun na an be an ka lannakow ɲɛfɔ mɔgɔw bɛɛ ye?

An ye mɔgɔ gwansanw ye. An siyaw n’an lɔyɔrɔw tɛ kelen ye. An dɔw tun be diinan dɔ wɛrɛ la ka kɔrɔ, an dɔw yɛrɛ tun lanin tɛ Ala la. Nka, sanni an ka kɛ Jehova Seerew ye, an bɛɛ ye wagati ta ka Bibulu ka kalanw sɛgɛsɛgɛ koɲuman (Kɛwaliw 17:11). An kalanna min na, an sɔnna o ma, ani an yɛrɛ lo y’a latigɛ ka Jehova Ala bato.

An ye nafa sɔrɔ Bibulu kalan na. I n’a fɔ mɔgɔ tɔɔw, gwɛlɛyaw b’an kan, ani an kelen kelen bɛɛ n’an ka barikantanya lo. Nka, an ka ɲɛnamaya kɛcogo fisayara kosɔbɛ sabu an b’an jija ka Bibulu ka sariyaw labato loon o loon (Zaburuw 128:1, 2). O lo kosɔn, an ye koo diiman minw kalan Bibulu kɔnɔ, an b’u ɲɛfɔ mɔgɔw ye.

An be ɲɛnamaya kɛ ka kɛɲɛ ni Ala ka fɔtaw ye. Ala ka fɔtaw be sɔrɔ Bibulu lo kɔnɔ. U b’an dɛmɛ an ka kɛ hɛɛrɛ la, ka mɔgɔw bonya, ka kɛ hɔɔrɔn ye ani ka koow kɛ ni ɲumanya ye. Ala ka fɔtaw be mɔgɔw dɛmɛ u ka kɛ kɛnɛya la, ani ka kɛ baarakɛlaw ye. U fana be denbaya mɔgɔw jija u k’u kaan bɛn ani u ka kɛ ni tagamacogo ɲuman ye. Komi an lanin b’a la ko “Ala te mɔgɔ bɔ mɔgɔ la,” hali n’an jɛnsɛnnin lo duniɲa kuru bɛɛ kɔnɔ, an b’a jati ko an bɛɛ ye balimaw ye. Siya woloma ani politikikow tɛ kɛ an cɛma. Hali n’an ye mɔgɔ gwansanw ye, an ka jamakulu kɔni ɲɔgɔn tɛ yen.—Kɛwaliw 4:13; 10:34, 35.

• Jehova Seerew ni mɔgɔ tɔɔw ye kelen ye koo jumanw na?

• Bibulukalan ye Jehova Seerew dɛmɛ ka kɛ ni jogo ɲuman jumanw ye?

Mɔgɔ caaman b’a miiri ko Jehova Seerew ye diinan kura dɔ tɔgɔ lo ye. Nka, a saan 2 700 ni kɔ ye nin ye, a fɔra tiɲɛn Ala kelenpe sagokɛlaw koo la ko u ye ale “seerew” ye (Ezayi 43:10-12). Fɔɔ ka na se saan 1931 ma, an tun be weele ko Bibulu Kalandenw. Mun na an ye tɔgɔ wɛrɛ ta ko Jehova Seerew?

An tɔgɔ b’a yira an ka Ala ye min ye. Ala tɔgɔ, Jehova, be sɔrɔ Bibulu ka kitabu kɔrɔ-kɔrɔw kɔnɔ siɲɛ waa caaman na. Bibulu bayɛlɛmanin caaman kɔnɔ, u ye Ala tɔgɔ bɔ yen ani ka bonyali tɔgɔ dɔw sɛbɛ a nɔɔ na i n’a fɔ Matigi wala Ala. Nka, tiɲɛn Ala y’a yɛrɛ yira Musa la a tɔgɔ yɛrɛ yɛrɛ, Jehova, lo fɛ k’a fɔ ko: “O ye ne tɔgɔ ye fɔɔ abada.” (Ɛkisɔdi 3:15, Bible Senuman, ABU 1961). O cogo la, a y’a yɛrɛ faranfasi ka bɔ ngalon alaw la. Kunkɔrɔta lo an fɛ ka weele Ala tɔgɔ senuman na.

An tɔgɔ b’a yira an ka baara ye min ye. Galen, k’a ta cɛɛ kantigi Abɛli ma, mɔgɔ caaman ye seereya kɛ ko u limaniyanin lo Jehova la. Saan kɛmɛ-kɛmɛ o kɔ, Nuhun, Ibrayima, Sara, Musa, Dawuda ani dɔ wɛrɛw y’u kaan fara o “seere jamaba” ta kan (Eburuw 11:4–12:1, ABM ). Mɔgɔ be se ka seereya kɛ kititigɛso la walisa ka tiɲɛn fɔ mɔgɔ jalakibali dɔ koo la. O cogo kelen na, an fana cɛsirinin lo ka mɔgɔw dɛmɛ u ka tiɲɛn lɔn an ka Ala koo la.

An be Yezu lo ladegira. Bibulu be Yezu weele ko “Seere tilennin tigitigi” (Yirali 3:14). Yezu yɛrɛ y’a fɔ ko ale ye Ala “tɔgɔ jira” ani a tora ka ‘tiɲɛ seereya kɛ’ Ala koo la (Zan 17:26; 18:37, ABM ). O kama, Jehova tɔgɔ ka kan ka kɛ Yezu ka kalanden sɔbɛw kan, ani u ka kan k’o tɔgɔ kofɔ mɔgɔw ye. Jehova Seerew b’u jijara k’o lo kɛ.

• Mun na Bibulu Kalandenw ye tɔgɔ la u yɛrɛ kan ko Jehova Seerew?

• Kabi tuma juman Jehova be ni seerew ye dugukolo kan?

• Jɔn lo ye Jehova Seerew bɛɛ la kɔrɔtaninba ye?

Bibulu tun kɔnna k’a fɔ ko Krista sanin kɔ, karamɔgɔ ngalontigɛlaw tun bena wuli kerecɛn fɔlɔw cɛma ka ngalon don Bibulu ka tiɲɛn kalan na (Kɛwaliw 20:29, 30). O lo nana kɛ tigitigi. U ye kafiriyakow ɲagami Yezu ka kalanw na ani ka kerecɛnya modɛli wɛrɛ sigi (2 Timote 4:3, 4). Bi, an be se ka la a la cogo di ko kalan tigitigi min be Bibulu kɔnɔ, an b’o faamu cogo ɲuman na?

Wagati tun sera Jehova fɛ ka tiɲɛn yira kɛnɛ kan. A tun kɔnna k’a fɔ ko ‘wagati latigɛnin na, lɔnniya [sɔbɛ] tun bena caya.’ (Daniyɛli 12:4, ABM ). Saan 1870 la, tiɲɛn ɲinilaw jɛnkuludennin dɔ y’a faamu ko legilizi caaman ka kalansiraw tɛ bɔ Bibulu kɔnɔ. O kama, u y’a daminɛ k’a ɲini ka Bibulu ka kalan lakikaw faamu, ani Jehova y’u dɛmɛ o la.

Cɛɛ kɔnɔgwɛw ye Bibulu sɛgɛsɛgɛ kosɔbɛ. O Bibulu kalanden sɔbɛ minw kɔnna an ɲɛ, olu tugura Bibulu kalankɛcogo dɔ kɔ. An fana be tugu o kalankɛcogo kelen lo kɔ bi. U tun be Bibulu ka barokunw ta kelen kelen ka baro kɛ u kan. U tun mana bɛn bibulusen dɔ ma min faamuyali ka gwɛlɛ, u tun b’a kɔrɔ ɲini vɛrise wɛrɛw kɔnɔ. U ka faamuyali tun mana laban min kan, n’o tun bɛnnin lo ni Bibulu yɔrɔ tɔɔw ye, u tun b’o sɛbɛ ka bila. O cogo la, u tun b’a to Bibulu yɛrɛ k’a kɔnɔkow ɲɛfɔ. O kɛra sababu ye tiɲɛn kalan nunu bɔra kɛnɛ kan kokura: Ala tɔgɔ n’a ka Masaya, a sago ye min ye adamadenw ni dugukolo koo la, suuw cogoya ani sukununi jigiya. U ye Bibulu sɛgɛsɛgɛ ka min faamuya, o ye u hɔɔrɔnya ka bɔ ngalon lannakow ani kɛcogo caaman na.—Zan 8:31, 32.

K’a ta saan 1879 ma, Bibulu Kalandenw y’a faamu ko wagati sera u fɛ ka tiɲɛn kalan jɛnsɛn yɔrɔ bɛɛ la. O kama, o saan na, u y’a daminɛ ka zurunali nin bɔ: Kɔrɔsili Sangaso be Jehova ka Masaya kofɔ. An bele b’a bɔra halibi. Sisan, an be Bibulu ka tiɲɛn kalan lasera mɔgɔw ma kaan 750 ɲɔgɔn na, jamana 240 kɔnɔ. Lɔnniya sɔbɛ ma deli ka caya nin cogo la fewu!

• Krista sanin kɔ, mun lo kɛra Bibulu ka tiɲɛn kalan na?

• Tiɲɛn kalan min be Ala ka Kuma kɔnɔ, mun lo y’an dɛmɛ k’o bɔ kɛnɛ kan kokura?

Saan caaman kɔnɔ, Jehova Seerew ye baara kɛ ni Bibulu bayɛlɛmani sifa caaman ye. U ye u dɔw kopi kɛ ani k’u jɛnsɛn fana. Nka, an y’a ye ko an mako b’a la ka Bibulu bayɛlɛmani kura dɔ bɔ min bena se ka mɔgɔw dɛmɛ bɛrɛbɛrɛ u ka “tiɲɛ [tigitigi] lɔn.” Ala b’a fɛ bɛɛ k’o tiɲɛn tigitigi lɔn (1 Timote 2:3, 4). O lo kama, saan 1950 la, an yɛrɛ y’a daminɛ ka Bibulu yɔrɔ dɔw bayɛlɛma kaanw na minw be fɔ bi tilew la. O Bibulu bayɛlɛmani tɔgɔ ko Traduction du monde nouveau. A bayɛlɛmana ni kantigiya ye kaan 130 ni kɔ la. A kɔnɔkow ni Bibulu kɔrɔkɔrɔw taw bɛɛ ye kelen ye.

An mako tun be Bibulu la min faamuli ka nɔgɔ. Ni wagati be tɛmɛ, kaanw be yɛlɛma fana. O lo kosɔn, Bibulu bayɛlɛmani caaman kɔnɔ, kumaden dɔw faamuli ka gwɛlɛ sabu u gwɛnin tɛ wala kuma kɔrɔkɔrɔw lo. Ka fara o kan, Bibulu bololasɛbɛni kɔrɔ dɔw bɔra kɛnɛ kan. U kɔnɔkow ye tiɲɛn ye, ani u ka surun kosɔbɛ Bibulu sɛbɛnin fɔlɔw la. O kɛra sababu ye, Bibulu sɛbɛra Heburukan, Aramekan ani Grɛkikan minw na, mɔgɔw sera k’o kaanw faamu bɛrɛbɛrɛ.

An mako tun be Bibulu bayɛlɛmani na Ala ka kuma tigitigi be min kɔnɔ. Ala ka kuma senuman min be sɛbɛnin fɔlɔw kɔnɔ, mɔgɔw ka kan k’u bayɛlɛma ni kantigiya ye sanni k’o baara kɛ u yɛrɛ sago la. Nka, Ala tɔgɔ min ko Jehova, o tɛ sɔrɔ Bibulu bayɛlɛmani caaman kɔnɔ.

An mako tun be Bibulu la min be bonya la Bibulu tigi yɛrɛ kan. (2 Samuyɛli 23:2) I ko a yirala jukɔrɔla jaa kan, Jehova tɔgɔ be sɔrɔ Bibulu bololasɛbɛni kɔrɔkɔrɔw kɔnɔ, ani o tɔgɔ bilara a nɔɔ na siɲɛ 7 000 ɲɔgɔn Traduction du monde nouveau kɔnɔ (Zaburuw 83:19, ABU, 1961). Sɛgɛsɛgɛri minw kɛra saan caaman kɔnɔ, o kɛra sababu ye o Bibulu kalan ka di sabu Ala ka miiriyaw gwɛnin lo a kɔnɔ. Hali ni Traduction du monde nouveau tɛ sɔrɔ i ka kaan na, an b’i jija i ka Jehova ka Kuma kalan loon o loon, ani i k’o kɛ i delinanko ye.—Zozuwe 1:8; Zaburuw 1:2, 3.

• Mun na an y’a latigɛ ka Bibulu bayɛlɛmani kura bɔ?

• Mɔgɔ o mɔgɔ b’a fɛ ka Ala sago lɔn, o tigi ka ɲi ka mun lo kɛ a delinanko ye loon o loon?