Jehova Seerew fɛ, diinan kuntigiw tɛ yen minw be baara kɛ sara la. Nka, i ko a tun be kɛ kerecɛn kafo daminɛ na cogo min na, kɔrɔsibaga minw be saratiw dafa, olu sigira kafo kɔnɔ walisa “ka Ala ka [kafo] mara.” (Kɛwaliw 20:28, ABM ). O diinan mɔgɔkɔrɔw ye cɛɛ kɔgɔninw ye Alako ta fan fɛ. U be kafo ɲɛminɛ ani k’a mara. U t’o kɛ ni ‘diyagoya ye, nka u b’o kɛ ni diyanye ye. U t’o kɛ tɔnɔ jugu kosɔn, nka u b’o kɛ ni ŋaniya ɲuman ye.’ (1 Piyɛri 5:1-3). U be mun lo ɲɛ an ye?

U b’u janto an na ani u b’an tanga. Diinan mɔgɔkɔrɔw be kafo ɲɛminɛ ani k’a tanga Alako ta fan fɛ. Komi u b’a lɔn ko Ala lo y’o baaraba kalifa u ma, u tɛ koow waajibiya a ka mɔgɔw ma. Nka, u b’an dɛmɛ an ka to hɛɛrɛ ni ninsɔndiya la (2 Korɛntikaw 1:24). I ko sagadɛndɛla b’a janto a ka saga kelen kelen bɛɛ la ni sɔbɛ ye cogo min na, diinan mɔgɔkɔrɔw fana b’a ɲini ka kafoden kelen kelen bɛɛ lɔn.​—Talenw 27:23.

U b’an kalan Ala sago kɛli la. Lɔgɔkun o lɔgɔkun, u be kafo ka lajɛnw ɲɛminɛ walisa ka dɔ fara an ka limaniya barika kan (Kɛwaliw 15:32). O cɛɛ kantigiw be waajuli baara ɲɛminɛ fana. U be waajuli kɛ n’an ye ani u b’an degi waajuli baara faanw bɛɛ la.

U be jijali kumaw fɔ an ye an dan na. Walisa ka barika don an na Alako ta fan fɛ, diinan mɔgɔkɔrɔw be se ka na baro kɛ n’an ye an ka soo wala Masaya Boon na, k’an dɛmɛ ani k’an jigi tugu ni Bibulu ka kumaw ye.​—Zaki 5:14, 15.

Ka fara u ka baaraw kan kafo kɔnɔ, diinan mɔgɔkɔrɔw fanba be baloɲini baara la ani denbaya b’u fɛ. O kunkanbaaraw be u ka wagati ta fana ani u ka kan k’u janto u la. O balimacɛ minw b’u sɔbɛ don baara la, u ka kan n’an ka bonya ye.—1 Tesalonikaw 5:12, 13.

• Kafo ka diinan mɔgɔkɔrɔw ka baara ye mun lo ye?

• Diinan mɔgɔkɔrɔw b’a yira cogo di k’u be u mako don an na?

Bibulu b’a yira ko cɛɛ minw be kafo ka kunkanbaaraw dafa, u ye jɛnkulu fila ye: “Kɔrɔsibagaw ni kɔrɔsigi cidenw” (Filipikaw 1:1, NW). Kafo kelen kelen bɛɛ kɔnɔ, an ka teli k’o balima ɲɔgɔn caaman sɔrɔ. Kɔrɔsigi cidenw be mun lo ɲɛ an ye?

U be diinan mɔgɔkɔrɔw dɛmɛ. Kɔrɔsigi cidenw ye cɛɛw ye minw masirinin lo Ala la, mɔgɔ sɔbɛw lo ani u b’u timinandiya baara la. U dɔw ye kanbelew ye, u dɔw ye balikuw ye. U b’u janto bolo baaraw ni baara nafaman wɛrɛw la minw ka kan ka kɛ kafo kɔnɔ tuma o tuma. O b’a to diinan mɔgɔkɔrɔw be wagati caaman sɔrɔ k’u ka kalanw labɛn ani k’u balimaw dɛmɛ Alako ta fan fɛ.

U be baara nafamanw kɛ. Cii dira kɔrɔsigi ciden dɔw ma ka mɔgɔw bisimila kafo ka lajɛnw na. U dɔw be se ka baara wɛrɛw kɛ, i n’a fɔ: ka sonoko ɲɛnabɔ, ka gafew tilan kafodenw ye, ka kafo ka wariko jatiminɛ kɛ ani ka kiinw kartiw di kafodenw ma waajuli kama. U fana be dɛmɛ don Masaya Boon ladonko la. Diinan mɔgɔkɔrɔw be se k’a ɲini u fɛ u ka mɔgɔkɔrɔba dɔw dɛmɛ. Baara o baara mana kalifa kɔrɔsigi cidenw ma, a ka di u ye k’o kɛ ani kafo be bonya la u kan u ka yɛrɛsaraka hakili kosɔn.—1 Timote 3:13.

U ye ɲɛyirali ɲumanw ye kerecɛnya koow la. Minw be ni jogo ɲumanw ye Alako ta fan fɛ, olu lo be sugandi ka kɛ kɔrɔsigi cidenw ye. N’u be kalanw dira lajɛnw na, u be an ka limaniya barika bonya. N’u be bila ɲɛɛ waajuli baara la, u be kisɛya don an na o baara kama. Komi u ye dɛmɛbaga ɲumanw ye diinan mɔgɔkɔrɔw fɛ, o b’a to kafo kanbɛnnin lo ani ninsɔndiya b’a kɔnɔ (Efɛzikaw 4:16). Wagati dɔ bena se, u fana bena saratiw dafa ka se ka kɛ diinan mɔgɔkɔrɔw ye.

• Kɔrɔsigi cidenw ye mɔgɔ sifa jumanw lo ye?

• U be kafo dɛmɛ cogo di walisa a ka baaraw ka kɛ a ɲɛɛ ma?

Gɛrɛkikan sɛbɛninw be Barnabasi ni ciden Pol kofɔ siɲɛ caaman. Olu tun ye kɔrɔsibaga tagamakɛlaw ye minw tun be taga bɔ kafow ye. Mun na do? U tun be hami kosɔbɛ u balima kerecɛnw ka Alakow la. Pol ko ale b’a fɛ ka “taga bɔ . . . balimaw ye k’a filɛ u ka koo be cogo min na.” A tun labilanin lo ka kilomɛtɛrɛ kɛmɛ-kɛmɛ kɛ walisa ka taga o balimaw jija (Kɛwaliw 15:36). O miiriya kelen lo b’an ka kɔrɔsibaga tagamakɛlaw la bi.

U be na walisa k’an jija. Kafokulu kɔrɔsibaga kelen kelen bɛɛ be taga bɔ kafo 20 ɲɔgɔn ye ka lɔgɔkun kelen kɛ n’u kelen kelen bɛɛ ye siɲɛ fila saan kɔnɔ. An be se ka nafaba sɔrɔ o balimacɛw fɛ, ani u musow fɛ fana n’u furunin lo, sabu u be koo caaman lɔn. U b’u seko kɛ k’a ɲini ka denmisɛnw ni mɔgɔkɔrɔbaw lɔn, ani a ka di u ye kosɔbɛ k’an bila sira waajuli la, wala bibulukalanw na. U be diinan mɔgɔkɔrɔw bila sira ka taga bɔ balimaw ye, ani k’u jija Alako ta fan fɛ. U fana be barika don an na n’u ka kalan diimanw ye lajɛnw ni lajɛnbaw la.—Kɛwaliw 15:35.

U b’u mako don kafodenw bɛɛ la. Kafokulu kɔrɔsibagaw b’u janto kosɔbɛ kafow ka Alako la. U ni diinan mɔgɔkɔrɔw ni kɔrɔsigi cidenw be lajɛn walisa k’a filɛ ɲɛtaga minw kɛra kafo kɔnɔ. U be ladili nafamanw di u ma fana walisa u ka se k’u ka kunkanbaaraw dafa. U be piyɔniyew dɛmɛ u ka sanga sɔrɔ u ka cidenya baara la. A ka di u ye fana ka mɔgɔ kuraw lɔn ani k’a ye k’u be ɲɛtaga kɛra Alako ta fan fɛ. O balimaw kelen kelen b’u yɛrɛ di ka kɛ ‘baarakɛɲɔgɔn ye an kosɔn.’ (2 Korɛntikaw 8:23, ABM ). U limaniyanin lo ani u be kantigiya kɛ Ala ye. An ka kan k’u ladegi.—Eburuw 13:7.

• Kuun juman lo kama kafokulu kɔrɔsibagaw be taga bɔ kafow ye?

• N’u nana bɔ an ye, ele be se ka nafa sɔrɔ u fɛ cogo di?

Jehova Seerew be sin ka labɛn kɛ walisa ka dɛmɛ lase u balimaw ma ni balawo cunna u kan. O jijali ɲɔgɔn b’a yira ko an be ɲɔgɔn kanu kosɔbɛ (Zan 13:34, 35; 1 Zan 3:17, 18). An b’u dɛmɛ cogo di?

An be wari di k’u dɛmɛ. Tuma min na kɔngɔba kɛra Jude mara la, Antiose kerecɛnw ye wari ci u kerecɛnɲɔgɔnw ma (Kɛwaliw 11:27-30). O cogo kelen na, n’an y’a mɛn ko gwɛlɛya ye an balimaw sɔrɔ duniɲa faan dɔ la, u minw mako gwɛlɛ be dɛmɛ na, an be tɛmɛ an ka kafo fɛ ka wari ci walisa k’u dɛmɛ.​—2 Korɛntikaw 8:13-15.

An be koo tigitigi dɔw kɛ k’u dɛmɛ. Balawo kɛra yɔrɔ min na, o yɔrɔ diinan mɔgɔkɔrɔw b’u jija ka kafoden kelen kelen bɛɛ yɔrɔ yaala walisa k’a filɛ ni mɔgɔ si ma tunu, ani ni bɛɛ be hɛɛrɛ la. Balimaw mako be dumuni, jii minta, faniw, layɔrɔ ani furakɛli minw na, kɔmite dɔ be se ka sigi sen kan k’o koow ɲɛnabɔ. Jehova Seere minw be se baara tigitigi dɔw la, u caaman b’u yɛrɛ di ani u b’u ka taransipɔri sara u yɛrɛ ma ka taga dɛmɛ don. U dɔw be boonw ani Masaya Boon tiɲɛninw lalaga. An kanbɛnnin lo an ka jɛnkulu kɔnɔ, ani an be deli ka baara kɛ ɲɔgɔn fɛ. O b’a to an be wuli k’an balimaw dɛmɛ teliya la ni balawo cunna u dɔw kan. Tiɲɛn lo ko an be “an balima dannabaaw” dɛmɛ. Nka, an be mɔgɔ wɛrɛw dɛmɛ fana, u ka diinan mana kɛ min o min ye.​—Galatikaw 6:10, ABM.

An be mɔgɔw dusu saalo ni Bibulu kɔnɔ kumaw ye. Balawo ye mɔgɔ minw sɔrɔ, olu mako gwɛlɛ be dususalo la. O wagati ɲɔgɔn na, Jehova min ye “dusu saaloli bɛɛ tigi Ala ye,” ale lo be fanga don an na (2 Korɛntikaw 1:3, 4, ABM ). Mɔgɔ minw jigi tigɛnin lo, a ka di an ye ka Bibulu ka layidu kumaw lase olu ma ani k’u jigi sigi ko yanni dɔɔni, Ala ka Masaya bena tɔɔrɔw ni balawow bɛɛ ban.​—Yirali 21:4.

• Ni balawo kɛra, mun na Jehova Seerew be se ka na ni dɛmɛ ye joona joona?

• Minw kisira, an be olu dusu saalo ni Bibulu kɔnɔ kuma jumanw ye?

Wagati dɔɔni ka kɔn Yezu saya ɲɛ, a ye baro dɔ kɛ n’a ka kalanden naani nunu ye u dan na: Piyɛri ni Zaki ni Zan ani Andere. A y’a ɲɛfɔ u ye tagamasiɲɛ min bena a yira ko ale be Masaya la laban loonw na. Ani, a ye ɲiningaliba dɔ kɛ ko: “Jɔnkɛ dannamɔgɔ hakiliman min makɛ bɛ a bila jɔn tɔw kun na ka u ka dumuni ko ɲɛnabɔ a waati latigɛlen na, o ye jɔni ye?” (Matiyo 24:3, 45; Mariki 13:3, 4, ABM ). Yezu tun kaan tɛ dumuni yɛrɛyɛrɛ koo ma. Nka, a ye Ala lɔnniya lo suma ni dumuni ye. A tun b’a ka kalandenw jigi sigira ko laban loonw na, ale min ye u “makɛ” ye, a tun bena mɔgɔ dɔw sigi baara la walisa u ka to ka lɔnniya di a ka kalandenw ma Ala koo la. O jɔncɛ tun bena kɛ jɔn lo ye?

O jɔncɛ ye Yezu ka kalandenw jɛnkulu dennin dɔ ye minw mɔna hakili senu na. O ‘jɔncɛ’ ye Jehova Seerew ka koow ɲɛnabɔla jɛnkulu ye. A be lɔnniya di Ala koo la Jehova sagokɛla tɔɔw ma wagati bɛnnin na. An mako b’o jɔncɛ kantigiman na walisa a ka to ka an ka ‘dumuni di an ma a diwagati la.’—Luka 12:42.

A b’a janto Ala ka jama na. (1 Timote 3:15) Jehova ka ɔriganisasiyɔn faan min be dugukolo kan, Yezu y’o ka baaraba ɲɛnabɔko kalifa jɔncɛ kantigiman ma: k’a ka bololafɛnw mara, ka waajuliko ɲɛnabɔ ani k’an kalan an ka kafow kɔnɔ. O ye kunkanbaaraba ye a fɛ dɛ! An mako be Ala lɔnniya min na, Jɔncɛ kantigiman hakiliman b’o di an ma wagati bɛnnin na. An b’o lɔnniya sɔrɔ gafew kɔnɔ, a be minw di an ma waajuli kama. A b’o lɔnniya di an ma fana kalanw sababu fɛ lajɛnw ni lajɛnbaw la.

O jɔncɛ ye kantigi ye sabu a t’a mabɔ Bibulu ka tiɲɛn kumaw na. Cii min dira a ma ka kibaro diiman waaju, a b’o dafa ni kantigiya ye fana. A fana ye hakiliman ye sabu a b’a janto Yezu ka koow la dugukolo kan ni hakilitigiya ye (Kɛwaliw 10:42). Jehova b’o jɔncɛ ka baara duga ani a b’a dɛmɛ ka Ala lɔnniya yiriwa.—Ezayi 60:22; 65:13.

• Yezu ye jɔn lo sigi baara la walisa a ka Ala lɔnniya di a ka kalandenw ma?

• Mun lo b’a yira ko jɔncɛ ye kantigi ani hakiliman ye?

Saan kɛmɛkulu fɔlɔ la, “cidenw ni cɛkɔrɔbaw” minw tun be Jerusalɛm, olu kɛra koow ɲɛnabɔla jɛnkulu ye. U tun be koobaw latigɛ kerecɛn mɔlenw ka kafo kuru bɛɛ nafa kosɔn (Kɛwaliw 15:2). U tun be bɛn kelen ma sabu u tun b’u ka baro basigi Bibulu ka fɔta kan, ani u tun b’a to hakili senu k’u ɲɛminɛ (Kɛwaliw 15:25). Bi fana, koow ɲɛnabɔla jɛnkulu b’o kelen lo kɛ.

Ala be tɛmɛ o jɛnkulu fɛ k’a sago dafa. Koow Ɲɛnabɔla Jɛnkulu mɔgɔw ye kerecɛn mɔlenw ye. O balimacɛw b’u mako don kosɔbɛ Ala ka Kuma na. U fana be koo caaman lɔn Alakow la ani an ka baara ɲɛnabɔcogo koo la. U be lajɛn lɔgɔkun o lɔgɔkun walisa k’a filɛ an balimaw mako be min na duniɲa kuru bɛɛ kɔnɔ. I ko saan kɛmɛkulu fɔlɔ wagati la, u b’u basigi Bibulu kan ka cikanw di an ma lɛtɛrɛw kɔnɔ, kɔrɔsibaga tagamakɛlaw wala fɛɛrɛ wɛrɛw fɛ. O b’a to Ala ka jama be miiri ani u be koow kɛ cogo kelen na (Kɛwaliw 16:4, 5). An be kalan min sɔrɔ, Koow Ɲɛnabɔla Jɛnkulu be o labɛnko kɔrɔsi. A be bɛɛ jija waajuli baara la. Kunkanbaara be kalifa balimacɛ minw ma, ale lo b’o fana kɔrɔsi.

A b’a to Ala ka hakili senu k’a ɲɛminɛ. Koow Ɲɛnabɔla Jɛnkulu b’a ɲini duniɲa kuru bɛɛ Masaba Jehova fɛ ani kafo Kuntigi Yezu fɛ u k’olu ɲɛminɛ (1 Korɛntikaw 11:3; Efɛzikaw 5:23). O jɛnkulu mɔgɔw t’u yɛrɛ jati Ala ka jama kuntigiw ye. “Ni Sagaden [Yezu] tagara yɔrɔ o yɔrɔ, u be tugu a kɔ,” olu ni kerecɛn mɔlen tɔɔw bɛɛ (Yirali 14:4). N’an be delili kɛ Koow Ɲɛnabɔla Jɛnkulu ye, o ka di a ye kosɔbɛ.

• Jɔn ni jɔn lo tun ye Koow Ɲɛnabɔla Jɛnkulu mɔgɔw ye saan kɛmɛkulu fɔlɔ la?

• Bi, Koow Ɲɛnabɔla Jɛnkulu be Ala ka dɛmɛ ɲini cogo di?

Heburukan na, Betɛli kɔrɔ ko “Ala ka soo” (Zɛnɛsi 28:17, 19). O tɔgɔ bɛnnin lo Jehova Seerew ka baarakɛbonw ma. U y’o boonw lɔ duniɲa faan caaman na walisa ka dɛmɛ don waajuli baara la ani k’a ɲɛminɛ. Koow Ɲɛnabɔla Jɛnkulu be baara kɛ Jehova Seerew ka sigiyɔrɔsoba kɔnɔ Etazini, Niyɔriki mara la. A be to o yɔrɔ lo la ka tɔnbolow ka baara ɲɛminɛ jamana caaman kɔnɔ. Minw be baara kɛ Betɛliw la, u be weele ko Betɛli ka denbayamɔgɔw. U siginin be ɲɔgɔn fɛ, u be jɛn ka baara kɛ, ka dumuni kɛ ani ka Bibulu kalan ɲɔgɔn fɛ i ko denbayamɔgɔw b’a kɛ cogo min na.​—Zaburuw 133:1.

Betɛli yɔrɔ ɲɔgɔn tɛ yen, a ka denbayamɔgɔw be baara kɛ ni yɛrɛsaraka hakili ye. Kerecɛncɛw ni kerecɛnmuso minw be Betɛli kelen kelen bɛɛ kɔnɔ, u y’u yɛrɛ di walisa ka Ala sago kɛ ani ka Masayakow yiriwa kudayi (Matiyo 6:33). U si tɛ baara kɛ sara kama. Nka, siyɔrɔ ni dumuni ani wari dɔɔni be di u bɛɛ ma walisa k’u dɛmɛ k’u ka musakaw sara. Bɛɛ kelen kelen be baara tigitigi dɔ kɛ biro la, gwabugu la, wala dumunikɛ boon na. Dɔw ka baara ye ka sɛbɛw dilan, ka boonw saniya, ka faniw ko ani k’u pase, ka fɛɛnw lalaga wala ka koo wɛrɛ kɛ.

O yɔrɔ la, bɛɛ ɲɛɛ gwannin lo ka dɛmɛ don Masaya waajuli baara koo la. Betɛli kelen kelen bɛɛ ka baara kuun jɔnjɔn ye ka Bibulu ka tiɲɛn kuma lase mɔgɔ caamanba ma. Sɛbɛ min b’i bolo, o ye o dɔ ye. Koow Ɲɛnabɔla Jɛnkulu lo y’a sɛbɛko ɲɛminɛ. Ani, u tɛmɛna ɛntɛrɛnɛti fɛ k’a ci bayɛlɛmabagaw jɛnkulu caaman ma duniɲa kɔnɔ. O kɔ, Betɛli caaman na, balimaw y’a dilan ni mansin dɔw ye minw ka teli kosɔbɛ ani u y’a ci kafo 110 000 ni kɔ ma. Betɛli ka denbayamɔgɔw lo b’o baara faan kelen kelen bɛɛ ɲɛnabɔ walisa ka dɛmɛ don kibaro diiman waajuli baara la. Kɔrɔtɔ be o baara la ka tɛmɛ koo bɛɛ kan.— Mariki 13:10.

• Jɔn lo be baara kɛ Betɛli la, ani u makow be wasa cogo di?

• Betɛli kelen kelen bɛɛ be dɛmɛ don kɔrɔtɔ baara juman na?

Betɛli denbaya mɔgɔw be baara sifa caaman kɛ. U be waajuli baara koo ɲɛnabɔ jamana kelen wala jamana caaman kɔnɔ. U ka baara be se ka kɛ ka gafew bayɛlɛma, k’u dilan, k’u koow ɲɛnabɔ magazɛn kɔnɔ, ka fɛɛn lamɛntaw ni videwow dilan, wala ka baara wɛrɛ kɛ.

Tɔnbolo ka kɔmite mɔgɔw lo be baara ɲɛminɛ. Koow Ɲɛnabɔla Jɛnkulu ye tɔnbolo ka baaraw bɛɛ kalifa kɔmite dɔ ma. O kɔmite mɔgɔw ye diinan mɔgɔkɔrɔ setigi saba wala saba ni kɔ lo ye. Ɲɛtaga min kɛra waajuli baara la, ani gwɛlɛya o gwɛlɛya sɔrɔla tɔnbolo ka mara la, kɔmite mɔgɔw be o fɔ Koow Ɲɛnabɔla Jɛnkulu ye. O lakalitaw be Koow Ɲɛnabɔla Jɛnkulu dɛmɛ a k’a lɔn barokun minw ka kan ka lajɛ an ka gafew kɔnɔ, lajɛnw na ani lajɛnbaw la. Koow Ɲɛnabɔla Jɛnkulu be to k’a ka lasigiden dɔw ci ka taga tɔnbolow ka baara lajɛ. U be cikan dɔw di kɔmite mɔgɔw ma walisa k’u dɛmɛ k’u ka kunkanbaaraw dafa (Talenw 11:14). Porogramu kɛrɛnkɛrɛnnin dɔ be kɛ o lasigiden nali kosɔn. O porogramu na, a be kalan dɔ di walisa ka balimaw jija.

Tɔnbolo be kafow dɛmɛ u ka baara la. Cii dira balima minw ma tɔnbolo biro la, olu lo be sira di walisa kafo kuraw ka sigi. U be piyɔniyew, misɔndenw ni kafokulu kɔrɔsibagaw ka baara ɲɛminɛ tɔnbolo ka mara kɔnɔ. U fana be lajɛnbaw labɛn, ka Masaya Boon kuraw lɔli koo ɲɛnabɔ ani k’u janto ka gafew ci kafow ma walisa k’u mako wasa. Baara o baara be kɛ tɔnbolo biro la, o bɛɛ b’a to waajuli be kɛ cogo bɛnnin na.—1 Korɛntikaw 14:33, 40.

• Tɔnbolow ka kɔmite mɔgɔw be Koow Ɲɛnabɔla Jɛnkulu dɛmɛ cogo di?

• Baara jumanw lo be kɛ tɔnbolo biro la?

An be gafew sɛbɛ kaan 750 ni kɔ la walisa k’an seko bɛɛ kɛ ka “Kibaru Duman” fɔ “siyaw bɛɛ ni bɔnsɔnw bɛɛ ni kanw bɛɛ ani mɔgɔ sifaw bɛɛ” ye (Yirali 14:6, ABM ). An b’o baara gwɛlɛ kɛ cogo di? An be se k’o kɛ sabu an ka gafew sɛbɛbagaw be bɔ jamana caaman na, ani mɔgɔ dɔw b’u yɛrɛ di k’u bayɛlɛma kaan wɛrɛw la. U bɛɛ ye Jehova Seerew ye.

Gafew be sɛbɛ kaan fɔlɔ min na, o ye angilikan lo ye. Biro min be an ka gafew sɛbɛko kuun na Jehova Seerew ka sigiyɔrɔsoba la, Koow Ɲɛnabɔla Jɛnkulu lo b’ale ka baara kɔrɔsi. O biro lo be gafew sɛbɛbagaw ka baara ɲɛminɛ, minw be sigiyɔrɔsoba la ani tɔnbolo dɔw la. Komi minw b’an ka gafew sɛbɛ u bɔyɔrɔw tɛ kelen ye, o lo b’a to barokun sifa caaman be sɔrɔ u kɔnɔ ani u kalan ka di jamana caaman mɔgɔw ye.

Gafew kɔnɔkow be ci bayɛlɛmabagaw ma. Ni gafe sɛbɛra ka ban ani u sɔnna a la, u be tɛmɛ ɛntɛrɛnɛti fɛ k’a ci bayɛlɛmabagaw jɛnkuluw ma duniɲa kuru bɛɛ kɔnɔ. Olu b’a bayɛlɛma. U b’u jija ka kumaden bɛnnin dɔw sugandi walisa ka mɔgɔw dɛmɛ u ka angilikan miiriyaw bɛɛ faamu u ka kaan na.—Waajulikɛla 12:10.

Ɔridinatɛriw sababu fɛ, baara be teliya. Ɔridinatɛri tɛ se ka bila mɔgɔ nɔɔ na ka gafew sɛbɛ ani k’u bayɛlɛma. Nka a be se k’a to baara be teliya. Jehova Seerew ye ɔridinatɛri porogramu dɔ labɛn min tɔgɔ ko Système électronique d’édition multilingue (MEPS). O b’an dɛmɛ ka sɛbɛri kɛ kaan caaman na. Gafew kɔnɔko minw bayɛlɛmana kaan wɛrɛw la, u be jaaw fara olu kan ani k’u bɛɛ labɛn ka sɔrɔ k’u bɔ papiye kan.

Mun na an b’an jija ten ka gafew bayɛlɛma kaanw na, hali kaan minw fɔbagaw ye mɔgɔ waa damanin dɔrɔn lo ye? Sabu Jehova sago lo ko “mɔgɔ bɛɛ ka kisi ani ka se ka tiɲɛ lɔn.”—1 Timote 2:3, 4.

• An ka gafew be sɛbɛ cogo di?

• Mun na an b’an ka gafew bayɛlɛma kaan caaman na?

Saan o saan, an ka jɛnkulu be Bibuluw ani gafe miliyɔn caaman dilan ani k’u jɛnsɛn gwansan. An be Masaya Boonw ani tɔnbolo birow lɔ ani k’u ladon. An be Betɛlidenw ani misɔnden waa caaman dɛmɛ u ka baara la. An be mɔgɔw dɛmɛ balawo wagatiw la fana. N’a sɔrɔ i b’i yɛrɛ ɲininga ko: “O musakaw bɛɛ be sara cogo di do?”

An tɛ jaka minɛ ani an tɛ wari deli mɔgɔw fɛ. Tiɲɛn lo ko an ka waajuli baara musakaw ka ca, nka an tɛ wari deli mɔgɔw fɛ. A saan kɛmɛ ni kɔ ye nin ye, Kɔrɔsili Sangaso nimɔrɔ filanan tun y’a fɔ ko an lanin b’a la ko Jehova lo b’an dɛmɛ ani o kama an “tɛna mɔgɔw deli abada ko u k’an dɛmɛ.” An fana m’o kɛ ka ye!—Matiyo 10:8.

An ka baara musakaw be sara niliw sababu la. An be baara min kɛ ka mɔgɔw kalan Bibulu la, o ka di mɔgɔ caaman ye ani u be nili kɛ o baara kama. A ka di Jehova Seerew yɛrɛ ye k’u ka wagati n’u fanga n’u ka wari ani u ka bololafɛn wɛrɛw ta ka Ala sago kɛ duniɲa kuru bɛɛ kɔnɔ (1 Tilew Kibaru 29:9). Buwati dɔw be sɔrɔ Masaya Boon na ani an ka lajɛnbaw kɛyɔrɔ la, minw b’a fɛ ka nili kɛ, u be se k’o don yen. I be se ka tɛmɛ an ka site web jw.org fɛ fana ka nili kɛ. Mɔgɔ minw be nili kɛ, u fanba tɛ nafolotigiw ye. U be komi firiyamuso dɛsɛbagatɔ min ye tama fila don Alabatosoba kɛsu kɔnɔ, ani Yezu y’a tɔgɔ ɲuman fɔ o kosɔn (Luka 21:1-4). O la, bɛɛ be se ka “fɛɛn dɔ bɔ a ka sɔrɔta la k’o mara gɛrɛfɛ” ani k’o di “a yɛrɛ sago la.”​—1 Korɛntikaw 16:2; 2 Korɛntikaw 9:7.

Minw b’a fɛ ka Jehova ‘bonya n’u bolofɛnw ye,’ an lanin b’a la ko a bena to k’olu lasun u ka dɛmɛ don Masaya baara la walisa a sago ka dafa.—Talenw 3:9.

• Mun lo b’a to an ka jɛnkulu be dan na diinan tɔɔw la?

• Mɔgɔw be nili minw kɛ, baara juman lo be kɛ n’u ye?

Masaya Boon: O tɔgɔ b’a yira ko Bibulu kalan min be kɛ yen, o ɲɛsinna Ala ka Masaya koo lo ma. O Masaya lo tun ye Yezu ka waajuli barokun ye.—Luka 8:1.

U ye tiɲɛn batoli kɛyɔrɔw ye kiinw kɔnɔ. O yɔrɔw la, Jehova Seerew be Masaya waajuli baara koo labɛn (Matiyo 24:14). Masaya Boonw bonya n’u lɔcogow tɛ kelen ye, nka u lɔra cogo nɔgɔman na ani u caaman kɔnɔ, kafo kelen dɔrɔn tɛ lajɛnw kɛ yen. Saan tɛmɛninw na, an ye Masaya Boon kura waa caaman lɔ (looru ɲɔgɔn loon o loon) sabu kafow hakɛ cayara ani an mako tun be boon wɛrɛw la. An sera k’o kɛ cogo di?—Matiyo 19:26.

Nili minw be kɛ Masaya Boonw lɔli kama, u lɔra olu lo sababu la. O niliw be ci tɔnbolo ma walisa kafo minw b’a fɛ k’u ka Masaya Boon lɔ wala k’a lakuraya, olu ka se ka dɔ sɔrɔ o wari la.

Mɔgɔ sifaw bɛɛ lo b’u bolo don gwansan u lɔli baara la. Jamana caaman na, u ye Masaya Boonw lɔbagaw jɛnkuluw sigi sen kan. O jɛnkuluw be taga kafo ni kafo la jamana kɔnɔ ani hali yɔrɔjanw na walisa ka kafodenw dɛmɛ u ka Masaya Boon lɔli baara la. Jamana dɔw la, u ye Masaya Boonw lɔli wala u lakurayali koo kalifa balima setigi dɔw ma mara tigitigi dɔ la. O mara la, boon lɔbaga ŋanaw fana b’u yɛrɛ di ka baara kɛ gwansan. Masaya Boon kelen kelen bɛɛ lɔyɔrɔ la, minw b’u yɛrɛ di o baara kama gwansan, u fanba ye o yɔrɔ kafodenw lo ye. An sera k’o baara bɛɛ kɛ Jehova ka hakili senu ani a ka mɔgɔw ka jijaliba sababu fɛ.—Zaburuw 127:1; Kɔlɔsikaw 3:23.

• Mun na an ka batolikɛyɔrɔw be weele ko Masaya Boonw?

• Mun lo b’a to an be sera ka Masaya Boonw lɔ duniɲa faan bɛɛ la?

Ala tɔgɔ senuman be Jehova Seerew ka Masaya Boon kelen kelen bɛɛ kan. O kama, an b’a jati ko nɛɛma lo an fɛ ka Masaya Boon saniya ani k’a ladon ka ɲɛ. O fana ye an ka batoli senuman fanba dɔ ye. Bɛɛ be se k’a seen don o baara la.

Lajɛn bannin kɔ, a ɲini k’i seen don a saniyali koo la. Lajɛn kelen kelen bɛɛ bannin kɔ, a ka di balimaw ye ka Masaya Boon saniya dɔɔni ani k’a ladon. Siɲɛ kelen lɔgɔkun kɔnɔ, u b’a saniya bɛrɛbɛrɛ. Baara tigitigi minw ka kan ka kɛ k’a saniya, olu sɛbɛra ka bila. Diinan mɔgɔkɔrɔ wala kɔrɔsigi ciden dɔ lo b’a saniyako ɲɛminɛ ka kɛɲɛ n’o baara kɛtaw ye. Balimaw b’u yɛrɛ di ka baara dɔw kɛ, i n’a fɔ: ka boon filan, k’a jɔsi, ka gwangwan bɔ, ka ɲɛgɛnw ko ani ka fura don u la, ka finɛtiriw ni dugalenw jɔsi, ka ɲamaɲamaw bɔ ka taga u fili, ka boon kɛnɛmala filan wala ka zaradɛn ladon. Saan kɔnɔ, u be loon kelen ɲɔgɔn latigɛ ka taga a saniya mɛnɛmɛnɛ. N’an b’an deenw niin don o baara dɔw la, an b’u degi u ka bonya la an ka batolikɛyɔrɔ kan.—Waajulikɛla 4:17.

Dɛmɛ don k’a yɔrɔ tiɲɛninw lalaga. Saan o saan, an be Masaya Boon kɔnɔna n’a kɛnɛmala sɛgɛsɛgɛ koɲuman. O b’an dɛmɛ k’a yɔrɔ tiɲɛninw lalaga walisa a ka to cogoya ɲuman na. O la, a lalagari musakaw tɛna na caya gwansan kɔfɛ (2 Tilew Kibaru 24:13; 34:10). Ni Masaya Boon saniyanin lo ani a ladonnin lo ka ɲɛ, o be danbe la an ka Ala batoyɔrɔ kan. N’an b’an niin don o baara la, o b’a yira ko an be Jehova kanu kosɔbɛ ani ko an ka batolikɛyɔrɔ koo ka di an ye haali! (Zaburuw 122:1). O fana be kɛ tɔgɔ ɲuman ye an fɛ an sigida la.—2 Korɛntikaw 6:3.

• Mun na an man kan k’an mako bɔ an ka batolikɛyɔrɔ la?

• Labɛn jumanw lo kɛra walisa Masaya Boon saniyanin ka to?

Yala i b’a fɛ ka sɛgɛsɛgɛri kɛ walisa ka Bibulu faamu ka ɲɛ wa? Yala i b’a fɛ ka lɔnniya sɔrɔ vɛrise, mɔgɔ, yɔrɔ wala koo tigitigi dɔ la min kofɔra Bibulu kɔnɔ wa? Yala i delila k’i yɛrɛ ɲininga ni Ala ka Kuma be se k’i dɛmɛ k’i ka kunko dɔ ɲɛnabɔ wa? N’o lo, sɛgɛsɛgɛri kɛ Masaya Boon ka biblotɛki kɔnɔ.

Sɛgɛsɛgɛrikɛ minan nafamanw b’a kɔnɔ. N’a sɔrɔ Jehova Seerew ka gafew bɛɛ tɛ i fɛ i ka kaan na. Nka, biblotɛki min be Masaya Boon kɔnɔ, an ka gafe kuraw fanba b’a kɔnɔ. N’a sɔrɔ Bibulu bayɛlɛmani sifa caaman ani daɲɛgafe ɲuman ni lɔnniya gafe nafaman wɛrɛw b’a kɔnɔ fana. Sanni lajɛnw ka daminɛ, ani u banni kɔ, i be se ka biblotɛki kɔnɔ gafew lajɛ i sago la. Ni ɔridinatɛri be sɔrɔ Masaya Boon kɔnɔ, n’a sɔrɔ Watchtower Library b’a kɔnɔ. O ye ɔridinatɛri porogramu ye, an ka gafe caamanba be min kɔnɔ. A be se k’i dɛmɛ ka sɛgɛsɛgɛri kɛ cogo nɔgɔman na barokun, kumaden wala vɛrise dɔ koo la.

A be lakɔlidenw dɛmɛ k’u yɛrɛ labɛn Ɲɛnamaya ani Waajuli baara lajɛn kama. Masaya Boon ka biblotɛki be se k’i dɛmɛ k’i ka kalanw labɛn koɲuman. Ɲɛnamaya ani Waajuli baara lajɛn kɔrɔsibaga lo be biblotɛki koo kun na. Gafe kura minw bɔra, a b’a janto k’a filɛ n’u be sɔrɔ biblotɛki kɔnɔ ani n’a ladonnin lo ka ɲɛ. I mako be kunnafoni minw na, lakɔli kɔrɔsibaga wala i ka Bibulu kalanfa be se k’u sɔrɔcogo yira i la. Nka, biblotɛki ka gafe si man kan ka bɔ Masaya Boon kɔnɔ. Ka fara o kan, an ka kan ka gafew minɛ ka ɲɛ, ani an man kan ka sɛbɛri si kɛ u kɔnɔ.

Bibulu b’a ɲɛfɔ ko n’an b’a fɛ ka ‘Ala lɔnniya sɔrɔ,’ fɔɔ an ka sɔn k’a ɲini “nafolo dogonin wɔgɔbicogo la.” (Talenw 2:1-5). Masaya Boon ka biblotɛki be se k’i dɛmɛ i k’a daminɛ ka sɛgɛsɛgɛri kɛ.

• Sɛgɛsɛgɛrikɛ minan jumanw lo be sɔrɔ Masaya Boon ka biblotɛki kɔnɔ?

• Jɔn lo be se k’i dɛmɛ ka baara kɛ ni biblotɛki ye cogo fisaman na?

Yezu Krista tun y’a fɔ a ka kalandenw ye ko: “Aw ka kɛwaliɲumanw kɛ ka yeelen bɔ mɔgɔw ye ten, waasa u ka aw sankolo la Faa boɲa.” (Matiyo 5:16). O kama, an be baara ɲuman kɛra ni fɛɛrɛ kuraw ye i n’a fɔ ɛntɛrɛnɛti. Ɛntɛrɛnɛti kan, jw.org ye Jehova Seerew ka site Web ye. Kunnafoniw be sɔrɔ u ka lannakow n’u ka baaraw koo la o yɔrɔ lo la. Mun lo be sɔrɔ o site Web kan?

Mɔgɔw ka teli ka ɲiningali minw kɛ, u jaabiliw be sɔrɔ yen ka bɔ Bibulu kɔnɔ. Ɲiningaliba minw be mɔgɔ dabali ban kabi galen, i be se k’olu dɔw ka jaabiliw sɔrɔ yen. Ɲɛyirali fɛ, sɛbɛ nunu be sɔrɔ kaan 600 la an ka site web kan: Tɔɔrɔ bena ban loon dɔ wa? ani Suuw be se ka kunu tiɲɛn na wa? I be se ka Traduction du Monde Nouveau sɔrɔ kaan 130 ni kɔ la, ani gafe caaman minw be mɔgɔw dɛmɛ ka Bibulu kalan i n’a fɔ gafe Kalan tigitigi juman be Bibulu kɔnɔ? ani Kɔrɔsili Sangaso ni Réveillez-vous! kuramanw. I be se k’o gafe caaman kalan ɛntɛrɛnɛti kan, k’u kalan lamɛn wala k’u telesarse MP3, PDF ani EPUB cogo la. I yɛrɛ be se k’o gafew ɲɛɛ dɔw labɔ sɛbɛ kan walisa k’u di makodon mɔgɔ dɔ ma a ka kaan na. Videwow be sɔrɔ yen fana bobow ka kumacogo la kaan caaman na. Bibulu kalangwɛ min be kɛ maana lakali cogo la ani Bibulu ka maana minw be kɛ teyatiri cogo la, i be se k’olu ta yen. I be se ka dɔnkili diiman dɔw fana sɔrɔ yen minw be se k’i ɲɛnagwɛ lafiɲɛ tuma na.

A be kunnafoni sɔbɛw di Jehova Seerew koo la. I be se fana ka kunnafoni kuraw ni videwow sɔrɔ an ka baara koo la. Koo minw ye nɔɔ to Jehova Seerew kan, ani an be jijali min kɛ ka mɔgɔw dɛmɛ balawo wagati la, o be sɔrɔ yen fana. I be se ka kunnafoniw sɔrɔ lajɛnba nataw koo la ani ka tɔnbolo birow ka ladɛrɛsiw sɔrɔ yen.

O fɛɛrɛw b’an dɛmɛ ka yeelen bɔ tiɲɛn koo la fɔɔ ka taga se dugukolo logologow bɛɛ la. Mɔgɔw be nafa sɔrɔ o la yɔrɔ bɛɛ la, hali dugukolo galasiman yɔrɔ min be weele ko Antartiki. An be Jehova deli ko a “ka kuma ka se yɔrɔ bɛɛ teliya la” walisa ka nɔɔrɔ la a kan.—2 Tesalonikaw 3:1.

• Site Web www.pr2711.com be mɔgɔ caaman dɛmɛna cogo di ka Bibulu ka tiɲɛn kalan lɔn?

• I b’a fɛ ka mun lo lajɛ an ka site Web kan?