Mɔgɔ caaman y’u seen tigɛ Alabatoyɔrɔ la sabu u mako be dususalo ani jaabili minw na, u m’u sɔrɔ yen. N’o lo, mun na i ka kan ka taga Jehova Seerew ka lajɛnw na do? I bena mun lo ye yen?

I ninsɔn bena diya ka kɛ mɔgɔw cɛma minw be ɲɔgɔn kanu ani u b’u janto mɔgɔw la. Kerecɛn fɔlɔw tun labɛnnin lo kafow kɔnɔ. U tun be ɲɔgɔn lajɛn walisa ka Ala bato, ka Bibulu kalan ani ka ɲɔgɔn jija (Eburuw 10:24, 25). Komi kanuya tun be yen u ka lajɛnw na, u tun b’a ye k’u be teri sɔbɛw cɛma: u balima kerecɛnw (2 Tesalonikaw 1:3; 3 Zan 14, 15). An fana b’o kelen lo kɛ bi, ani an b’o ninsɔndiya ɲɔgɔn lo sɔrɔ fana

I bena a ye ko nafa b’a la k’i yɛrɛ degi Bibulu ka sariyaw sira tagamacogo la. Cɛɛw, musow ani deenw be ɲɔgɔn lajɛn i ko a tun be kɛ Bibulu sɛbɛ wagati la cogo min na. Karamɔgɔ setigiw be baara kɛ ni Bibulu ye k’an dɛmɛ an k’a lɔn cogo min na an be se ka Bibulu ka sariyaw sira tagama loon o loon (Deteronɔmu 31:12; Neemi 8:8). Mɔgɔw bɛɛ be se k’u daa don baro la ani ka dɔnkili la. O ye sababu ye an fɛ k’an ka kerecɛnya jigiya kofɔ.—Eburuw 10:23.

I ka limaniya bena barika sɔrɔ Ala koo la. Ciden Pol ka wagati la, a y’a fɔ kafo dɔ ye ko: “Ne b’a fɛ kosɛbɛ ka aw ye, walisa . . . an ka ɲɔgɔn jija dannaya la, aw ka dannaya ni ne ta.” (Ɔrɔmukaw 1:11, 12, ABM ). N’an be to ka jɛn n’an balimaw ye tuma o tuma lajɛnw na, an ka limaniya be barika sɔrɔ ani o b’an dɛmɛ an k’an cɛsiri ka kerecɛnya sira tagama.

An b’a ɲini i fɛ i ka taga an ka lajɛn nata la walisa k’o koow lajɛ i yɛrɛ ma. An bena i bisimila ni dusudiya ye. Mɔgɔw be don gwansan an ka lajɛnw bɛɛ la ani lajɛnw tuma na, wari tɛ deli mɔgɔ fɛ.

• An ka kafo ka lajɛnw be kɛ ka tugu modɛli juman lo kɔ?

• N’an be taga Jehova Seerew ka lajɛnw na, o b’an nafa cogo di?

Hali ni wagati ɲɛɛ man ɲi, wala an ka kan ka tuba dɔ cɛtigɛ, an kɔni tɛ fɔn an ka kafo ka lajɛnw na. Mun na Jehova Seerew be banba ten ka taga lajɛn kɛ n’u kerecɛnɲɔgɔnw ye hali ni gwɛlɛyaw b’u kan, wala u sɛgɛnnin lo baara bannin kɔ?

An ka hɛɛrɛ be bɔ o la. An be lajɛn kɛ ni mɔgɔ minw ye kafo kɔnɔ, Pol y’a fɔ olu koo la ko: “An ka an janto ɲɔgɔn na.” (Eburuw 10:24, ABM). O kumaw kɔrɔ ko “ka miiri koɲuman ɲɔgɔn koo la,” wala k’a ɲini ka ɲɔgɔn lɔn. O la, ciden Pol b’an jija ko an k’an mako don ɲɔgɔn na. N’an b’a ɲini ka kerecɛn denbayaw lɔn, an bena a ye ko u dɔw ye see sɔrɔ an ka gwɛlɛya ɲɔgɔnw kan ani u be se k’an dɛmɛ an fana ka see sɔrɔ.

An be teri sɔbɛw sɔrɔ. An be ɲɔgɔn lajɛn ni mɔgɔ minw ye, u tɛ an lɔnbaga gwansanw ye, nka an teri sɔbɛw lo fana. An fana be ɲɛnagwɛ ɲumanw kɛ n’u ye sababu wɛrɛw sen fɛ. O jɛnɲɔgɔnya be nɔɔ ɲuman juman to an kan do? O b’a to an koo be diya ɲɔgɔn ye tugun, ani an ka kanuya be barika sɔrɔ. O la, ni gwɛlɛya dɔ be an balimaw kan, an be teliya k’u dɛmɛ sabu teriya sɔbɛ be an ni ɲɔgɔn cɛ (Talenw 17:17). N’an be jɛn n’an ka kafodenw bɛɛ ye, an b’a yira o cogo la ko an ‘kelen kelen bɛɛ b’an janto ɲɔgɔn na.’—1 Korɛntikaw 12:25, 26.

An b’i jija i k’i teriw sugandi Ala sagokɛlaw cɛma. I bena o teri ɲɔgɔnw sɔrɔ Jehova Seerew cɛma. I kana a to foyi k’i bali ka jɛn n’an ye.

• N’an be jɛn n’an balimaw ye lajɛnw na, mun na o b’an yɛrɛ lo nafa?

• I bena na bɔ an ye loon juman na an ka kafo kɔnɔ?

Kerecɛn fɔlɔw tun be koo minw kɛ u ka lajɛnw na, o fanba tun ye ka dɔnkili la, ka delili kɛ, ka Bibulu kalan ani ka baro kɛ a kan. Landako si tun tɛ kɛ yen (1 Korɛntikaw 14:26). An ka lajɛnw na, i bena a ye ko an be koow kɛ o cogo kelen lo la.

Kalan nafaman lo min basiginin be Bibulu kan. Wikɛni na, kafo kelen kelen bɛɛ be lajɛn ka Forobakalan dɔ lamɛn miniti 30 kɔnɔ. O kalan b’a yira cogo min na Bibulu ka kiraya kuma be dafara bi tilew la ani cogo min na Bibulu be se k’an dɛmɛ an ka ɲɛnamaya kɔnɔ. A ɲininin lo an bɛɛ fɛ an ka tugu kalan kɔ an yɛrɛ ka Bibulu kɔnɔ. Forobakalan bannin kɔ, “Kɔrɔsili Sangaso” kalan be kɛ lɛri kelen kɔnɔ. U b’a ɲini kafodenw fɛ u k’u daa don baro la. Barokun be sɔrɔ Kɔrɔsili Sangaso kɔnɔ min sɛbɛra kalan kama kafo kɔnɔ. O baro b’an dɛmɛ ka Bibulu ka ladiliw sira tagama an ka ɲɛnamaya kɔnɔ. O kalan kelen lo be kɛ an ka kafo 110 000 ni kɔ kelen kelen bɛɛ kɔnɔ duniɲa kuru bɛɛ la.

An be dɛmɛ sɔrɔ k’an ka kalan kɛcogo fisaya. Lɔgɔkun kɔnɔ, an be ɲɔgɔn lajɛn fana ka porogramu saba lajɛ. O lajɛn tɔgɔ ko Kerecɛnw ka ɲɛnamaya n’u ka waajuli baara. Kalan minw be kɛ, u be sɔrɔ Lajɛnsɛbɛ kɔnɔ. Porogramu yɔrɔ fɔlɔ barokun ko: “Nafolofɛnw Ala ka Kuma kɔnɔ.” A b’an dɛmɛ ka Bibulu ka sapitiri damanin faamu ka ɲɛ, kafodenw kɔnna ka minw kalan. Yɔrɔ filanan barokun ko “I sɔbɛ don waajuli baara la.” Ɲɛyirali dɔw be kɛ k’a yira an ka ɲi ka baro kɛ ni mɔgɔw ye Bibulu kan cogo min na. Ladili dibaga dɔ be ladiliw di walisa k’an dɛmɛ ka kalangwɛ kɛcogo ani kumacogo fisaya (1 Timote 4:13). Porogramu yɔrɔ laban barokun ko: “Kerecɛnw ka ɲɛnamaya.” O b’an dɛmɛ k’a faamu an be se ka Bibulu ka sariyakolow sira tagama cogo min na loon o loon. A faan dɔ la, ɲiningaliw be kɛ jama ye ani u be jaabili di. O b’an dɛmɛ ka Bibulu faamu ka ɲɛ.

N’i tagara an ka lajɛnw na, siga si t’a la, i bena kabakoya k’a ye ko i be kalan min sɔrɔla ka bɔ Bibulu kɔnɔ, a nafa ka bon haali!—Ezayi 54:13.

• N’i tagara Jehova Seerew ka lajɛnw na, i bena mun lo mɛn yen?

• I b’a fɛ ka taga an ka lajɛn nata juman na?

I m’a kɔrɔsi sɛbɛ nin ka jaaw kan ko Jehova Seerew ka faniw doncogo ka ɲi n’u be taga kafo ka lajɛnw na wa? Mun na an b’an janto kosɔbɛ an ka fani doncogo n’an sawura koo la?

O be bonya la an ka Ala kan. Tiɲɛn lo ko Ala tɛ mɔgɔ sawura dɔrɔn filɛ (1 Samuyɛli 16:7). O bɛɛ n’a ta, n’an lajɛnna walisa k’a bato, an b’a fɛ sɔbɛ la k’a yira ko an be bonya la ale Ala kan ani an kerecɛnɲɔgɔnw fana kan. N’an ka kan ka taga bɔ masa wala peresidan dɔ ye, yala an tɛna an janto an sawura cogoya la a ka lɔyɔrɔ kosɔn wa? O cogo kelen na, an be fani don cogo min na ka taga an ka lajɛnw na, o b’a yira ko an be “waati bɛɛ Masa [Jehova] Ala” bonya ani ko an be bonya la a batoyɔrɔ fana kan.—1 Timote 1:17.

An b’o kɛ k’a yira an be tugu miiriya minw kɔ. Bibulu be kerecɛnw jija ko “u k’u yɛrɛ masiri cogo bɛnnin na, ka fani don minw b’u sutara” i n’a fɔ mɔgɔ “minw ko u be siran Ala ɲa.” (1 Timote 2:9, 10). K’an “masiri cogo bɛnnin na,” o kɔrɔ ko an tɛ faniw don k’an yɛrɛ yira, ka mɔgɔw darabɔ wala k’an farikolo cogoya yira. O cogo kelen na fana, n’an b’a fɛ ka ‘faniw don minw b’an sutara’ an bena faniw sugandi minw filɛ ka di, u dama kɛɲɛnin lo ani u ferekenin tɛ. Nka, o dantigɛli be sira di an ma ka sugandili caaman kɛ fani doncogo ta fan fɛ. An sawura ɲuman be se ka “an Kisibaa Ala ka kalan bonya” ani ka “Ala tanu” hali k’a sɔrɔ an tɛ fɛɛn fɔ (Tite 2:10, ABM; 1 Piyɛri 2:12). N’an ka fani doncogo ka ɲi an ka lajɛnw na, o b’a to mɔgɔw be Jehova ka batoli filɛ ni ɲɛɛ ɲuman ye.

Hali ni fani ɲanamanw t’i fɛ, kana a to o k’i bali ka na lajɛnw na Masaya Boon na. An be se ka fani don cogo bɛnnin na ani k’an sawura saniya hali ni fani sɔngɔ gwɛlɛw wala fani cɛɲumanbaw t’an fɛ.

• An be fani don cogo min na ka Ala bato, mun na o kɔrɔtanin lo?

• N’an b’a fɛ ka fani don wala k’an masiri cogo dɔ la, an be tugu miiriya jumanw lo kɔ?

N’i be Bibulu kalanna ni Jehova Seere dɔ ye, n’a sɔrɔ i be kɔn ka kalan kelen kelen bɛɛ lajɛ. A ka ɲi i k’o ɲɔgɔn kɛ sanni ka taga kafo ka lajɛn na. O la, i bena nafaba sɔrɔ lajɛn na. N’i ye porogramu ɲuman sigi o kama, i bena nafa sɔrɔ a la bɛrɛbɛrɛ.

I k’a latigɛ i bena kalan kɛ yɔrɔ min na ani tuma min na. Tuma juman na i hakili siginin lo koɲuman? Sɔgɔmada joona lo sanni i k’i ka baara daminɛ? Wala sufɛ lo, denmisɛnw lanin kɔ? Hali n’i tɛ se ka kalan kɛ ka mɛɛn, i k’a latigɛ i bena wagati minw kɛ kalan na ani i jija foyi kana i bali o wagatiw la. I ka sigi yɔrɔ dɔ la, mankan tɛ yɔrɔ min na. I ka arajo, telewisɔn, ani selilɛri faga walisa foyi kana i hakili ɲagami. N’i be delili kɛ ka sɔrɔ ka kalan daminɛ, o bena i dɛmɛ k’i haminankow bila gɛrɛfɛ walisa i ka se k’i hakili sigi Ala ka Kuma kan.—Filipikaw 4:6, 7.

Tagamasiɲɛ dɔw kɛ kalan yɔrɔ jɔnjɔnw na, ani i yɛrɛ labɛn k’i daa don baro la kafo kɔnɔ. A daminɛ k’a filɛ hakilinata kunbaba minw be sɔrɔ kalan kuru bɛɛ kɔnɔ. I ka miiri kalansen tɔgɔ kan. A filɛ cogo min na cɛtigɛw ɲɛsinna kalan barokun ma. Jaaw lajɛ fana. Ɲiningali minw latigɛra segikanni kama walisa ka kalan miiriya jɔnjɔnw bɔ kɛnɛ kan, i k’olu fana lajɛ. O kɔ, i ka dakun kelen kelen kalan ani i k’u ka ɲiningaliw jaabili ɲini. Vɛrise minw kofɔra, i k’olu ɲini k’u kalan, ani i k’a filɛ cogo min na u ɲɛsinna dakun ka miiriyaw ma (Kɛwaliw 17:11). N’i ye ɲiningali dɔ ka jaabili sɔrɔ, i k’a kumaden jɔnjɔnw kɔrɔ ci wala i k’u yira ka gwɛ cogo dɔ la walisa i hakili ka jigi u la lajɛn tuma na. Lajɛn tuma na, n’i b’a fɛ, i be se k’i bolo wuli ani ka lakalita surun dɔ kɛ i yɛrɛ kumacogo la.

Kalan minw be kɛ lajɛnw na lɔgɔkun o lɔgɔkun, n’i b’u lajɛ, i bena hakilinata kuraw fara i ka Bibulu lɔnniya “nafolo” kan.—Matiyo 13:51, 52.

• I be se ka porogramu juman kɛ walisa k’i yɛrɛ labɛn lajɛnw kama?

• I be se k’i yɛrɛ labɛn cogo di ka lakalitaw kɛ lajɛn na?

Kabi galen, Jehova tun b’a fɛ ko gwa kelen kelen bɛɛ kɔnɔ, denbayamɔgɔw ka wagati kɛ ɲɔgɔn fɛ walisa ka barika don u ka Alakow la ani k’u ka jɛnɲɔgɔnya sabati (Deteronɔmu 6:6, 7). O lo y’a to Jehova Seerew fɛ, gwamɔgɔw ye wagati dɔ latigɛ walisa ka batoli kɛ ɲɔgɔn fɛ lɔgɔkun o lɔgɔkun: u be baro kɛ dusudiya la Alako dɔw kan ka kɛɲɛ n’u makoya ye. Hali n’i kelen lo, i be se ka barokun dɔw sugandi Bibulu kɔnɔ ka kalan kɛ walisa k’i ka jɛnɲɔgɔnya sabati ni Ala ye fana.

A be sababu di an ma an k’an magwɛrɛ Jehova la kosɔbɛ. “Aw ye gwɛrɛ Ala la, ale fana bena gwɛrɛ aw la.” (Zaki 4:8). An bena Jehova lɔn ka ɲɛ n’an b’a ɲini k’a jogow n’a ka kɛwalew faamu bɛrɛbɛrɛ a ka Kuma sɛbɛnin kɔnɔ min ye Bibulu ye. Gwa kɔnɔ batoli daminɛcogo nɔgɔman dɔ filɛ nin ye: a’ ye wagati dɔ ta ka Bibulu kalangwɛ kɛ ni kaanba ye. Aw be se k’o kɛ ka kɛɲɛ ni lajɛnsɛbɛ porogramu ye. Aw bena Bibulu yɔrɔ min kalan, a’ y’o tilantilan ka di bɛɛ ma. Kalan kɔ, bɛɛ kelen kelen ye min faamu, aw be se ka baro kɛ o kan.

A be sababu di gwamɔgɔw ma u ka magwɛrɛ ɲɔgɔn na kosɔbɛ. Furucɛw n’u musow, ani bangebagaw n’u deenw b’u ka jɛnɲɔgɔnya sabati n’u be Bibulu kalan ɲɔgɔn fɛ gwa kɔnɔ. O ka kan ka kɛ hɛɛrɛ ni ninsɔndiya wagati ye, bɛɛ be min makɔnɔ ni kɔrɔtɔ ye. Ka kɛɲɛ n’u deenw sanda ye, bangebagaw be se ka barokun nafaman dɔw sugandi Kɔrɔsili Sangaso ni Réveillez-vous ! kɔnɔ, wala an ka site web jw.org kan. I deenw be gwɛlɛya minw sɔrɔ lakɔli la, aw be se ka baro kɛ o kan k’o ɲɛnabɔcogo yira u la. Aw be se ka JW telewisɔn (tv.jw.org) ka porogramu dɔ filɛ ɲɔgɔn fɛ ani ka baro kɛ o kan. Dɔnkili minw bena la lajɛnw na, aw be se k’olu degi. Gwa kɔnɔ batoli bannin kɔ, aw be se ka minnifɛn wala dumunifɛn dɔ tilan ɲɔgɔn cɛ fana.

Aw b’o wagati kɛrɛnkɛrɛnnin min kɛ ka Jehova bato lɔgɔkun o lɔgɔkun, o bena a to Ala ka Kuma kalan bena diya gwamɔgɔw bɛɛ ye. Ani, Jehova bena aw duga kosɔbɛ aw ka jijali kosɔn.—Zaburuw 1:1-3.

• Mun na an be wagati dɔ latigɛ batoli kama gwa kɔnɔ?

• Bangebagaw be se ka mun lo kɛ walisa gwa kɔnɔ batoli ka kɛ wagati diiman ye bɛɛ fɛ denbaya kɔnɔ?

Mun na mɔgɔ nunu ninsɔndiyanin lo ten? U be an ka lajɛnba dɔ lo la. Galen, Ala tun ye cii di a sagokɛlaw ma k’u ka ɲɔgɔn lajɛn siɲɛ saba saan kɔnɔ. Bi, an fana kɔrɔtɔnin lo ka ɲɔgɔn lajɛn an ka lajɛnbaw la (Deteronɔmu 16:16). Saan o saan, an be lajɛnba saba kɛ: kafokulu ka lajɛnbaw (minw be kɛ tile kelen, siɲɛ fila saan kɔnɔ) ani mara ka lajɛnba (min be kɛ tile saba). An be nafa juman lo sɔrɔ o lajɛnbaw la?

U b’a to an ka kerecɛn balimaya barika be bonya. Israɛldenw tun be ɲagali ka Jehova tando “jama cɛma.” (Zaburuw 26:12; 111:1) A ka di an fana ye k’a bato ɲɔgɔn fɛ o wagati kɛrɛnkɛrɛnninw na. O lajɛnbaw be sababu di an ma ka jɛn ni Seere wɛrɛw ye minw bɔra kafo wɛrɛw la wala jamana wɛrɛw yɛrɛ la. An be an ka tilera dumu ɲɔgɔn fɛ lajɛnba kɛyɔrɔ la, o be dɔ fara an ka teriya diya kan (Kɛwaliw 2:42). Kanuya min be an “balimaw” bɛɛ kɛ jɛnkulu kelen ye duniɲa kɔnɔ, an b’o ye an ɲɛɛ na o lajɛnbaw la.—1 Piyɛri 2:17.

U b’an dɛmɛ an ka taga ɲɛ Alako ta fan fɛ. U tun be Ala ka kuma min kalan k’a ɲɛfɔ Israɛldenw ye, o faamuli tun b’u nafa fana (Neemi 8:8, 12). An fana be kalan min sɔrɔ ka bɔ Bibulu kɔnɔ an ka lajɛnbaw la, an b’o jati fɛɛnba ye. Porogramu kelen kelen bɛɛ basiginin lo Bibulu kɔnɔ barokun dɔ lo kan. Kalan diimanw be kɛ ani u be wale dɔw kɛcogo ɲɛyira walisa k’an dɛmɛ ka Ala sago kɛcogo lɔn an ka ɲɛnamaya kɔnɔ. Nin wagati gwɛlɛw na, balima dɔw be gwɛlɛyaw sɔrɔ u ka kerecɛnya kosɔn. Minw ye see sɔrɔ o gwɛlɛya ɲɔgɔnw kan, n’an b’u ka walew lakalili lamɛn, o b’an jija. Mara ka lajɛnbaw la, u be Bibulu kɔnɔko dɔw kɛ i ko teyatiri walisa ka kalan nafamanw di an ma. Lajɛnba kelen kelen bɛɛ la, mɔgɔ minw b’a fɛ k’a yira k’u ye u yɛrɛkun di Ala ma, olu be batize.

• Mun na lajɛnbaw ye ninsɔndiya sababu ye an fɛ?

• N’i tagara an ka lajɛnba dɔ la, i bena nafa juman lo sɔrɔ o la?

Wagati dɔɔni ka kɔn a ka saya ɲɛ, Yezu y’a fɔ ko: “Nin Kibaru Duman waajuli na kɛ diɲɛ yɔrɔw bɛɛ la sankolo masaya ko la ka kɛ siyaw bɛɛ seere ye. O kɔ, a laban na se.” (Matiyo 24:14, ABM). Nka, o waajuli baara tun bena kɛ cogo di duniɲa kuru bɛɛ kɔnɔ? Walisa k’o kɛ, an be tugu Yezu ka ɲɛyirali kɔ, a ye min to an ye tuma min na a tun be dugukolo kan.—Luka 8:1.

An b’an jija ka taga bɔ mɔgɔw ye u ka soo. Yezu y’a ka kalandenw degi kibaro diiman waajuli kɛcogo la soo ni soo (Matiyo 10:11-13; Kɛwaliw 5:42; 20:20). Waajuli kɛyɔrɔ tigitigi dɔw tun kalifara o kalanden fɔlɔw ma (Matiyo 10:5, 6; 2 Korɛntikaw 10:13). O cogo kelen na bi, an ka waajuli baara labɛnnin lo ka ɲɛ. Waajuli kɛyɔrɔ dɔ kalifara kafo kelen kelen bɛɛ ma. O b’a to an be Yezu ka cii dafa, o min ye ka “mɔgɔw waaju” ani ka seereya kɛ k’a dafa.— Kɛwaliw 10:42.

Mɔgɔw be sɔrɔ yɔrɔ o yɔrɔ, an b’an jija ka taga kuma u fɛ yen. Yezu ye ɲɛyirali wɛrɛ di an ma: a ye mɔgɔw waaju foroba yɔrɔw la, i n’a fɔ kɔgɔjida la ani dugu kɔlɔnda la (Mariki 4:1; Zan 4:5-15). An fana be mɔgɔw sɔrɔ yɔrɔ o yɔrɔ, an be baro kɛ n’u ye Bibulu kan: siradaw la, jagokɛyɔrɔw la, zaradɛnw na, wala telefɔni fɛ. N’an ye sababu ɲuman sɔrɔ, an fana be seereya kɛ an sigiɲɔgɔnw ye, baarakɛɲɔgɔnw, lakɔli filankuruw ani an somɔgɔw ye. O jijaliw bɛɛ kɛra sababu ye mɔgɔ miliyɔn caaman sera ka “kisili koo” mɛn duniɲa kuru bɛɛ kɔnɔ.—Zaburuw 96:2.

Yala i ɲɛɛ be mɔgɔ dɔw la i b’a fɛ ka Ala ka Masaya kibaro diiman fɔ minw ye, ani k’a yira cogo min na o kibaro ɲɛsinna u ka siniɲasigi koo ma wa? Kana o jigiya kuma kɛ i kelen dɔrɔn ta ye. Teliya k’a ɲɛfɔ o mɔgɔw ye!

• “Kibaru Duman” juman lo ka kan ka waaju?

• Jehova Seerew be Yezu ka waajuli kɛcogo ladegi cogo di?

N’u ko “piyɔniye,” o kumaden ɲɛsinna mɔgɔw ma minw be bila ɲɛ ka sira labɛn tɔɔw ye. Yezu tun kɛra i ko piyɔniye. A cira ka na baara dɔ kɛ dugukolo kan min sababu fɛ mɔgɔw be se ka ɲɛnamaya sɔrɔ ani a ye kisili sira yɛlɛ mɔgɔw ye (Matiyo 20:28). Bi, a ka kalandenw b’a ladegira: u be wagati caaman kɛ k’a ɲini ka ‘mɔgɔw kɛ kalandenw ye’ (Matiyo 28:19, 20). Dɔw sera k’u seen don baara dɔ la an be min weele ko piyɔniye baara.

Piyɔniye ye kudayi waajulikɛla ye. Jehova Seerew bɛɛ ye kibaro diiman weleweledalaw ye. Nka, u dɔw y’u yɛrɛ labɛn walisa ka waajuli kɛ i ko kudayi piyɔniyew: u be lɛri 70 kɛ waajuli la kalo o kalo. Walisa ka se k’o kɛ, u caaman b’u ka baloɲini baara kɛ tuma kelen kelen na dɔrɔn. Dɔw be sugandi k’u kɛ dan na piyɔniyew ye ani k’u ci yɔrɔ minw na Masaya weleweledalaw man ca. Olu be lɛri 130 wala 130 ni kɔ kɛ waajuli la kalo o kalo. Piyɔniyew be sɔn k’u ka ɲɛnamaya kɛ cogo nɔgɔman na. U jigi b’a la ko Jehova bena balo ni fɛɛrɛbɔ n’a ɲɔgɔnna fɛɛnw di u ma (Matiyo 6:31-33; 1 Timote 6:6-8). Minw tɛ se ka kɛ piyɔniyew ye tuma bɛɛ, olu be kɛ piyɔniye kɔrɔsigiw ye n’u be se. O cogo la, u be lɛri 30 wala lɛri 50 kɛ kalo kɔnɔ walisa ka dɔ fara u ka waajuli baara kan.

Ala ni mɔgɔw kanuya lo be piyɔniye lasun a ka baara la. I ko Yezu, an b’a ye ko mɔgɔ caaman jigi tigɛnin lo Alako ta fan fɛ bi (Mariki 6:34). Nka, an be ni lɔnniya ye min be se k’u dɛmɛ hali sisan yɛrɛ ani ka jigiya sɔbɛ di u ma siniɲasigi koo la. Piyɔniye b’a mɔgɔɲɔgɔnw kanu, o lo b’a lasun k’a ka wagati caaman ta ani k’a seko kɛ ka mɔgɔw dɛmɛ Alako ta fan fɛ (Matiyo 22:39; 1 Tesalonikaw 2:8). Ni piyɔniye y’o kɛ, a ka limaniya be barika sɔrɔ, a b’a magwɛrɛ Ala la ani a be ninsɔndiya kosɔbɛ.—Kɛwaliw 20:35.

• Jɔn lo be weele ko piyɔniye?

• Mun lo be mɔgɔ dɔw lasun u ka kɛ piyɔniyew ye tuma bɛɛ?

Kabi wagatijan, a lɔnnin lo ko Jehova Seerew be kalan sɔrɔ ka bɔ Ala yɔrɔ. Balima dɔw b’u yɛrɛ don Masaya waajuli baara la kudayi. Lakɔli kɛrɛnkɛrɛnnin dɔw labɛnna olu ye walisa k’u dɛmɛ u ka se k’u “ka baara kɛ ka ɲa.”—2 Timote 4:5.

Piyɔniyew ka lakɔli. Ni piyɔniye ye saan kelen kuru bɛɛ kɛ kudayi cidenya baara la, a be se ka piyɔniyew ka lakɔli kɛ tile wɔɔrɔ kɔnɔ. O lakɔli be kɛ Masaya Boon dɔ kɔnɔ a sigida la. O lakɔli kuun ye ka piyɔniye dɛmɛ a k’a magwɛrɛ kosɔbɛ Jehova la, a ka se ka waajuli baara faan bɛɛ kɛ bɛrɛbɛrɛ ani a ka taga ɲɛ n’a ka baara ye kantigiya la.

Masaya waajulikɛlaw ka lakɔli. O lakɔli be kɛ kalo fila kɔnɔ. A kuun ye ka fɔrɔmasɔn di piyɔniye kolɔnbagaw ma minw be sɔn ka bɔ u sigida la ka taga yɔrɔ min na u mako be u ka dɛmɛ na. A be komi u b’a fɔ ko: “Ne filɛ nin ye. Ne ci.” O cogo la, u be Masaya waajulikɛlaba Yezu Krista ladegi o min ɲɔgɔn ma ye dugukolo kan (Ezayi 6:8; Zan 7:29). Ka bɔ i sigida la ka taga yɔrɔ wɛrɛ, tuma dɔ la i ka ɲi k’i yɛrɛ degi ɲɛnamaya kɛcogo nɔgɔman dɔ la. O yɔrɔ mɔgɔw ka landaw, u ka wagati cogoya n’u ka dumuni be se ka kɛ dan na pewu n’i bɔyɔrɔ taw ye. N’a sɔrɔ i ka kan k’o yɔrɔ mɔgɔw ka kaan degi. Balima minw sii hakɛ be saan 23 ka taga se saan 65 ma, o lakɔli labɛnna olu kama: cɛgwanaw, musogwanaw ani mɔgɔ furuninw. O lakɔli b’u dɛmɛ ka kɛ ni kerecɛn jogow ye u mako bena kɛ minw na k’u ka cii dafa. U fana be fɔrɔmasɔn dɔ sɔrɔ min b’u dɛmɛ ka baara kɛ bɛrɛbɛrɛ Jehova n’a ka ɔriganisasiyɔn ye.

Gilead ka Bibuluko lakɔli. Heburukan na, “Gilead” kɔrɔ ko “seereya tonnin.” Kabi saan 1943, misɔnden 8 000 ni kɔ ye fɔrɔmasɔn sɔrɔ Gilead lakɔli la. U cira ka taga seereya kɛ “fɔɔ diɲɛ daan na.” (Kɛwaliw 13:47). Nafa sɔrɔla o la bɛrɛbɛrɛ. Ɲɛyirali fɛ, an ka misɔndenw sera tuma min na Peru, kafo si tun tɛ yen. Nka sisan, kafo 1 000 ni kɔ lo be yen. An ka misɔndenw sera Zapɔn tuma min na, Seerew tun ma se mɔgɔ tan ma o jamana kɔnɔ. Nka sisan, Seere 200 000 ni kɔ lo be Zapɔn. Gilead lakɔli be mɛɛn kalo duuru minw kɔnɔ, lakɔlidenw be Bibulu sɛgɛsɛgɛ koɲuman. Dan na piyɔniyew, misɔndenw, betɛlidenw ani kafokulu kɔrɔsibagaw n’u musow lo be weele o lakɔli la. U be fɔrɔmasɔn sɔrɔ bɛrɛbɛrɛ walisa waajuli baara min be kɛ duniɲa kuru bɛɛ kɔnɔ, o ka se ka labɛn ani ka sabati.

• Piyɔniyew ka lakɔli kuun ye mun lo ye?

• Masaya waajulikɛlaw ka lakɔli labɛnna jɔn lo kama?