Masaya min bena dugukolo bɛɛ mara

I b’a lɔn an be kumana Masaya min koo la wa?— Tiɲɛn na, Ala ka Masaya lo. O Masaya lo bena dugukolo yɛlɛma k’a kɛ alijɛnɛ ye. I b’a fɛ ka dɔ lɔn o Masaya koo la wa?—

Masa dɔ be masaya kelen kelen bɛɛ kun na. A b’a ka jamana mɔgɔw mara. I b’a lɔn mɔgɔ min ye Ala ka Masaya Masacɛ ye wa?— Yezu Krista lo. A be sankolo la. Yanni dɔɔni, a bena kɛ mɔgɔw bɛɛ ka Masacɛ ye dugukolo kan! E ka miiri la, ni Yezu nana kɛ Masacɛ ye dugukolo bɛɛ kun na, an bena kɛ hɛɛrɛ la wa?—

O bena kɛ hɛɛrɛba ye an fɛ! Alijɛnɛ kɔnɔ, mɔgɔw tɛna ɲɔgɔn bugɔ ani u tɛna marifakɛlɛ kɛ tugun. Mɔgɔw bɛɛ bena ɲɔgɔn kanu. Mɔgɔ si tɛna bana wala ka sa. Fiyentɔw bena yeli kɛ ani tulogwerenw bena mɛnni kɛ. Minw tɛ se ka tagama, u bena se ka boli ani ka panpan. Bɛɛ bena dumuni kɛ ka fa. Bɛgɛnw ni kongosogow bena tulon kɛ ɲɔgɔn fɛ ani an fana bena se ka tulon kɛ n’u ye. Mɔgɔ minw tun sara, u bena kunu. An kumana cɛɛw ni muso minw koo la kitabu nin kɔnɔ, i n’a fɔ Erebɛka, Rahab, Dawuda ani Eli, u caaman bena kunu fana! I b’a fɛ k’u ye n’u nana kunu wa?—

I koo ka di Jehova ye, ani a b’a fɛ i ka kɛ hɛɛrɛ la. N’i tora k’a ɲini ka Jehova lɔn ani ka mɛnni kɛ a fɛ, i bena kɛ alijɛnɛ cɛɲumanba kɔnɔ fɔɔ abada! I tɛ o lo fɛ wa?—