Samuyɛli tora ka koo ɲuman kɛ

Kabi a denmisɛn tuma, Samuyɛli tagara to Ala ka fanibugu la walisa ka baara kɛ yen. Mɔgɔw tun be to ka na Jehova bato o yɔrɔ lo la. I b’a lɔn fɛɛn min kama Samuyɛli tagara to o yɔrɔ la wa? An k’a ɲini ka Samuyɛli bamuso Anɛ lɔn fɔlɔ.

Anɛ tun b’a fɛ kosɔbɛ ka deen sɔrɔ, nka a ye wagatijan kɛ a ma se ka deen wolo. O kama, a ye Jehova deli ko a k’ale dɛmɛ. A y’a daa di Jehova ma ko ni a ye dencɛ sɔrɔ, a bena taga a bila Ala ka fanibugu la walisa a ka to o yɔrɔ la ka baara kɛ. Jehova ye a ka delili jaabi, a ye dencɛ sɔrɔ. A y’a tɔgɔ la ko Samuyɛli. I ko Anɛ tun y’a fɔ cogo min na, a tagara Samuyɛli bila Ala ka fanibugu la walisa a ka baara kɛ Ala ye. O tuma na, Samuyɛli tun be ni saan saba wala saan naani ye.

Minw tun be saraka lase Ala ma Ala ka fanibugu la, Eli tun ye olu kuntigiba ye. A dencɛ fila fana tun be baara kɛ o yɔrɔ la. I hakili to a la k’o fanibugu tun ye Ala batoyɔrɔ ye. Mɔgɔw tun ka ɲi ka koo ɲuman kɛ o yɔrɔ la. Nka Eli dencɛw tun be koo jugubaw lo kɛ. Samuyɛli ɲɛɛ tun be u ka kɛwalew la. Yala Samuyɛli tugura u kɔ wa?— Ayi. A tora ka koo ɲuman kɛ i ko a faa n’a baa tun y’a fɔ a ye cogo min na.

E ka miiri la, Eli tun ka kan ka mun lo kɛ a dencɛ fila nunu na do?— A tun ka kan k’u kolo. A tun man kan k’a to u ka baara kɛ tugun Ala batoso kɔnɔ. Nka Eli m’o kɛ. O kama Jehova dimina ale n’a dencɛ fila kɔrɔ. Jehova y’a latigɛ ko a bena u kolo bɛrɛbɛrɛ.

Loon dɔ sufɛ, ka Samuyɛli to sinɔgɔ la, a ye welekan dɔ mɛn ko: ‘Samuyɛli!’ A bolila ka taga Eli fɛ, nka Eli ko: ‘Ne ma i weele.’ O koo kɛra tugun siɲɛ fila. A siɲɛ sabanan na, Eli y’a fɔ Samuyɛli ye ko n’a tigi y’a weele tugun, a k’a fɔ ko: ‘Matigi Jehova, kuma, ne be mɛnni kɛra.’ Samuyɛli ye o lo kɛ, ani Jehova y’a fɔ a ye ko: ‘I k’a fɔ Eli ye ko ne bena a ka denbaya ɲɛɛ gwan u ka koo jugu kosɔn.’ E ka miiri la, a tun ka nɔgɔ Samuyɛli fɛ k’o kuma fɔ Eli ye wa?— Ayi, a tun man nɔgɔ dɛ! Hali ni siranya tun be Samuyɛli la, Jehova ko a ka min kɛ, a y’o lo kɛ. Jehova tun ye min fɔ, o lo kɛra. U ye Eli dencɛ fila faga, ani Eli fana sara.

An ka ɲi ka Samuyɛli ladegi sabu a ye koo ɲuman kɛ hali n’a ɲɛɛ tun b’a la ko mɔgɔw be koo jugu kɛra. Ele do? Yala i bena kɛ komi Samuyɛli ka to ka koo ɲuman kɛ wa? N’i y’o kɛ, Jehova n’i wolobagaw dusu bena diya.