Teri ɲumanw tun be Zoziyasi fɛ

E ka miiri la, a ka gwɛlɛ ka koo ɲuman kɛ wa?— Mɔgɔ caaman b’a miiri ko a ka gwɛlɛ. Bibulu b’a fɔ ko a tun ka gwɛlɛ kosɔbɛ cɛdennin dɔ fɛ ka koo ɲuman kɛ. A tɔgɔ ko Zoziyasi. Nka teri ɲumanw tun b’a fɛ minw y’a dɛmɛ. An k’a ɲini ka Zoziyasi n’a teriw lɔn.

Zoziyasi facɛ tɔgɔ tun ko Amɔn, Juda masacɛ dɔ tun lo. A tun ka jugu kosɔbɛ ani a tun be joow bato. A sanin kɔ, a dencɛ Zoziyasi kɛra Juda masacɛ ye. Nka, a tun be ni saan seegi dɔrɔn lo ye! E ka miiri la, a tun ka jugu komi a facɛ wa?— Ayi, a tun man jugu!

Hali k’a sɔrɔ Zoziyasi tun ye denmisɛn ye, a tun b’a fɛ ka mɛnni kɛ Jehova fɛ. O lo kama, minw tun be Jehova kanu, a ye olu dɔrɔn lo kɛ a teriw ye. Olu y’a dɛmɛ ka koo ɲuman kɛ. Jɔn ni jɔn lo tun ye Zoziyasi teriw ye do?

Sofoni tun ye Zoziyasi tericɛ dɔ ye. Ale tun ye kira ye. A ye Juda mɔgɔw lasɔmi ko koo jugu bena u sɔrɔ n’u ye joow bato. Zoziyasi ye mɛnni kɛ Sofoni fɛ: a ye Jehova bato ka joow to yen.

Zeremi tun ye Zoziyasi tericɛ wɛrɛ ye. U tun ye filankuruw ye ani u bonyana ɲɔgɔn fɛ. U tun ye teri sɔbɛw ye fɔɔ Zoziyasi sanin kɔ, Zeremi ye dusukasi dɔnkili dɔ sɛbɛ k’a yira ko Zoziyasi ɲɛnafin be ale la kosɔbɛ. Zeremi ni Zoziyasi ye ɲɔgɔn dɛmɛ ka koo ɲuman kɛ ani ka Jehova sago kɛ.

Zoziyasi ka koo be i dɛmɛ ka mun lo faamu?— Hali k’a sɔrɔ Zoziyasi tun ye denmisɛn ye, a tun b’a fɛ ka koo ɲuman kɛ. A y’a faamu ko minw be Jehova kanu, a ka ɲi ka olu dɔrɔn lo kɛ a teriw ye. Minw be Jehova kanu ani u be se k’i dɛmɛ ka koo ɲuman kɛ, i janto ka olu dɔrɔn kɛ i teriw ye!