• Ala ka Masaya ye mun lo ye?
    Ɲɛnamaya kɛ hɛɛrɛ la fɔɔ abada!—Nafa sɔrɔ bibulukalan na
    • Kalansen 31nan. Yezu Krista, sankolo la: Masafugulan b’a kun na ani Jehova ka yeelen nɔɔrɔman b’a kan.

      KALANSEN 31

      Ala ka Masaya ye mun lo ye?

      Bibulu ka barokun jɔnjɔn ɲɛsinna Ala ka Masaya koo lo ma. Jehova bena tɛmɛ o Masaya lo fɛ k’a sagonata dafa dugukolo koo la. Ala ka Masaya ye mun lo ye? An b’a lɔn cogo di ko a be sen kan? O Masaya ye mun lo kɛ ka ban, ani a bena mun lo kɛ sini ma? An bena o ɲiningaliw jaabiliw sɔrɔ kalansen nin na ani kalansen fila nataw la.

      1. Ala ka Masaya ye mun lo ye, ani jɔn lo ye a Masa ye?

      Ala ka Masaya ye gofɛrɛnɛman dɔ lo ye, Jehova Ala yɛrɛ ye min sigi sen kan. Yezu lo ye o Masaya Masacɛ ye. A be kuntigiya kɛra k’a to sankolo la (Matiyo 4:17; Zan 18:36). Bibulu b’a fɔ Yezu koo la ko: “A bena sigi masaya la . . . fɔɔ tuma bɛɛ.” (Luka 1:32, 33). A bena a ka kuntigiya kɛ dugukolo mɔgɔw bɛɛ kan.

      2. Jɔn lo bena kuntigiya kɛ ni Yezu ye?

      Yezu tɛ kuntigiya kɛ a kelen. Bibulu b’a fɔ ko mɔgɔ dɔw bena “sigi masaya la n’a ye.” (Yirali 20:6). Ala y’o mɔgɔw sugandi ka bɔ jamanaw bɛɛ la. U ye mɔgɔ joli lo ye? Kabi Yezu nana dugukolo kan, mɔgɔ miliyɔn caaman lo kɛra a ka kalandenw ye. Nka, mɔgɔ 144000 dɔrɔn lo ka ɲi ka taga sankolo la ka kuntigiya kɛ ni Yezu ye (Yirali 14:1-4 kalan). Kerecɛn tɔɔw bɛɛ bena kɛ Ala ka Masaya marakɔnɔmɔgɔw ye dugukolo kan.—Zaburuw 37:29.

      3. Mun lo b’a yira ko Ala ka Masaya ka fisa ni adamadenw ka gofɛrɛnɛmanw ye?

      Hali ni adamadenw ka kuntigiw b’a ɲini ka koo ɲuman kɛ, see t’u ye k’u ka laɲinitaw bɛɛ dafa. A mɛɛn o mɛɛn, kuntigi wɛrɛw be wuli u nɔɔ na minw tɛ ni ŋaniya ɲumanw ye tuma bɛɛ. Nka, Yezu min ye Ala ka Masaya Kuntigi ye, mɔgɔ wɛrɛ tɛna wuli ale nɔɔ na. Ala ka “masaya tena nagasi abada.” (Daniyɛli 2:44). Yezu bena kuntigiya kɛ dugukolo kuru bɛɛ kun na, ani a tɛna mɔgɔ bɔ mɔgɔ la. Kanuya b’a la, a ka ɲi, a tilennin lo, ani a bena mɔgɔw dɛmɛ u ka ɲɔgɔn minɛ fana ni kanuya ni ɲumanya ni tilenninya ye.—Ezayi 11:9 kalan.

      A ƝINI KA DƆ LƆN TUGUN

      An k’a filɛ fɛɛn min kama Ala ka Masaya ka fisa ni adamadenw ka gofɛrɛnɛmanw bɛɛ ye.

      Yezu Krista: a siginin be masasigilan kan sankolo la ani a be kuntigiya kɛra dugukolo kun na. Mɔgɔ 144 000 minw be kuntigiya kɛ n’a ye, olu siginin b’a kɔfɛ. Yeelenba dɔ bɔra Jehova yɔrɔ ka kɛ u kan.

      4. Gofɛrɛnɛman barikaman dugukolo bɛɛ kun na

      Adamadenw ka kuntigi si ka setigiya ma se Yezu Krista ta ma. Matiyo 28:18 kalan. O kɔ, a’ ye ɲiningali nin kɛ ani ka baro kɛ o kan:

      • Faranfasi juman lo be yen Yezu ka kuntigiya ni adamadenw ta cɛ?

      Adamadenw ka gofɛrɛnɛmanw ka teli ka yɛlɛma, ani u be kuntigiya kɛ dugukolo yɔrɔdennin dɔrɔn lo kan. Nka Ala ka Masaya do? Daniyɛli 7:14 kalan. O kɔ, a’ ye ɲiningali nunu kɛ ani ka baro kɛ u kan:

      • Ala ka Masaya ‘tɛna ban abada.’ O nafa ye mun lo ye?

      • Ala ka Masaya bena dugukolo bɛɛ mara. O nafa ye mun lo ye?

      5. Adamadenw ka kuntigiya dɛsɛra

      Mun na Ala ka Masaya ka kan ka sigi adamadenw ka kuntigiya nɔɔ na? A’ ye VIDEWO filɛ. Ani, a’ ye ɲiningali kɛ ani ka baro kɛ o kan:

      VIDEWO: Ala ka Masaya ye mun lo ye?—A yɔrɔ dennin dɔ (1:41)

      • Mun lo sɔrɔla adamadenw ka kuntigiya la?

      Waajulikɛla 8:9 kalan. O kɔ, a’ ye ɲiningali nunu kɛ ani ka baro kɛ u kan:

      • E ka miiri la, Ala ka Masaya ka kan ka sigi adamadenw ka gofɛrɛnɛmanw nɔɔ na wa? Mun na i ko ten?

      6. Ala ka Masaya kuntigiw b’an ka koow faamu

      Komi an ka Masacɛ Yezu ye ɲɛnamaya kɛ adamaden cogoya la, a be se “k’an faamu an ka dɛsɛyɔrɔ la.” (Eburuw 4:15). Cɛɛw ani muso kantigi 144000 minw bena kuntigiya kɛ ni Yezu ye, Jehova y’u sugandi “ka bɔ siyaw bɛɛ cɛma, ani jamanaw bɛɛ la.”—Yirali 5:9.

      • Yezu n’a ka marakɛɲɔgɔnw b’an ka koow cogoya faamu sabu u ye ɲɛnamaya kɛ adamaden cogoya la. O tɛ i hakili sigi wa? Mun na i ko ten?

      Kerecɛn mɔlenw (cɛɛw ni musow), u tɛ siya kelen na ani u tɛ wagati kelen mɔgɔw ye.

      Jehova ye cɛɛw ni musow sugandi minw siyaw n’u bɔyɔrɔw tɛ kelen ye ani a y’u kɛ Yezu marakɛɲɔgɔnw ye.

      7. Ala ka Masaya ka sariyaw ɲɔgɔn tɛ yen

      Gofɛrɛnɛmanw be sariyaw sigi u ka jamanadenw ɲɛ kama. Ala ka Masaya fana ye sariyaw sigi a ka marakɔnɔmɔgɔw ye. Vɛrise nunu kalan: 1 Korɛntikaw 6:9-11. O kɔ, a’ ye ɲiningali nunu kɛ ani ka baro kɛ u kan:

      • E ka miiri la, duniɲa tun bena kɛ cogo di ni bɛɛ tun be Ala ka sariyaw labato?a

      • E ka miiri la, a bɛnnin lo Jehova k’a ɲini a ka Masaya marakɔnɔmɔgɔw fɛ u k’o sariyaw labato wa? Mun na i ko ten?

      • Mɔgɔ minw t’o sariyaw sira tagamana, mun lo b’a yira k’u be se ka yɛlɛma?—Vɛrise 11 lajɛ.

      Sennatigiw tɛmɛyɔrɔ dɔ la, polisicɛ dɔ ye mobilitigi dɔ lalɔ walisa bamusoman dɔ n’a denmuso ani musokɔrɔba dɔ ka se ka tɛmɛ.

      Gofɛrɛnɛmanw be sariyaw sigi u ka jamanadenw ɲɛ kama. Ala ka Masaya fana ye sariyaw sigi a ka marakɔnɔmɔgɔw ɲɛ kama. O sariyaw ɲɔgɔn tɛ yen.

      NI MƆGƆ DƆ Y’I ƝININGA KO: “Ala ka Masaya ye mun lo ye?”

      • I bena a tigi jaabi cogo di?

      MIIRIYA JƆNJƆN

      Ala ka Masaya ye gofɛrɛnɛman yɛrɛ yɛrɛ ye. A be sankolo la, ani a bena dugukolo kuru bɛɛ mara.

      I ye mun lo faamu?

      • Jɔn ni jɔn lo ye Ala ka Masaya kuntigiw ye?

      • Mun lo b’a yira ko Ala ka Masaya ka fisa ni adamadenw ka gofɛrɛnɛmanw bɛɛ ye?

      • Jehova b’a ɲini a ka Masaya marakɔnɔmɔgɔw fɛ u ka sariya minw labato, u la dɔw ye jumanw ye?

      I ka laɲinita

      NUNU LAJƐ FANA

      Yezu y’a fɔ ko Ala ka Masaya be an kelen kelen bɛɛ dusukun na le wa?

      “Yala Ala ka Masaya be i dusukun na le wa?” (A be sɔrɔ jw.org kan)

      Mun na Jehova Seerew b’a latigɛ ka kantigiya kɛ Ala ka Masaya ye sanni ka kantigiya kɛ adamadenw ka kuntigiya ye?

      U masirinin tora Ala ka Masaya la (1:43)

      Jehova ye mɔgɔ 144000 minw sugandi walisa u ka kuntigiya kɛ ni Yezu ye, a filɛ Bibulu be min fɔ u koo la.

      “Jɔn lo be taga sankolo la?” (A be sɔrɔ jw.org kan)

      A filɛ fɛɛn min kama kasoden dɔ lara a la ko Ala kelenpe lo be se ka tilenninya sigi duniɲa kɔnɔ?

      “J’ai découvert la solution à l’injustice” (Saan 2011, novanburukalo ka Réveillez-vous !)

      a An bena kuma o sariya dɔw koo la gafe nin tilanyɔrɔ 3nan na.

  • Ala ka Masaya be sen kan!
    Ɲɛnamaya kɛ hɛɛrɛ la fɔɔ abada!—Nafa sɔrɔ bibulukalan na
    • Kalansen 32nan. Sankolo la, masabere be Masacɛ Yezu Krista bolo ani a be dugukolo marala.

      KALANSEN 32

      Ala ka Masaya be sen kan!

      Ala ka Masaya y’a ka mara daminɛ sankolo la saan 1914. Kabi o wagati la, adamadenw ka kuntigiya laban loonw daminɛna. Mun na an b’o fɔ? An ka Bibulu ka kiraya kumaw lajɛ, ani an k’a filɛ duniɲa ka koow be cogo min na kabi saan 1914.

      1. Bibulu ka kiraya kumaw be mun lo yira an na?

      Daniyɛli ka kitabu b’a yira ko Ala ka Masaya tun ben’a ka mara daminɛ wagati dɔ bannin kɔ min tun bena mɛɛn “saan wolonwula” (Daniyɛli 4:13, 14). Saan kɛmɛkulu caaman o kɔ, Yezu kumana o wagati kelen nin koo la ani a ko o wagati tun ma se a daan ma fɔlɔ. A y’o wagati kofɔ ko “siya wɛrɛ mɔgɔw . . . ta wagati.” (Luka 21:24, Biblu Ala ta Kuma). I ko an ben’a ye cogo min na, o wagati banna saan 1914 la.

      2. Duniɲa ka koow be cogo di kabi saan 1914?

      Yezu ka kalandenw y’a ɲininga ko: “Koo nunu bena kɛ tuma jumɛn? Taamasiɲɛ jumɛn bena i nako, ni diɲɛ laban koo yira?” (Matiyo 24:3). Yezu y’u jaabi ko ale siginin kɔ a ka Masaya la sankolo la, koo caaman tun bena kɛ dugukolo kan, i n’a fɔ marifakɛlɛw, kɔngɔ, ani dugukoloyɛrɛyɛrɛw (Matiyo 24:7 kalan). Bibulu tun kɔnna k’a fɔ fana ko “laban tuma na,” mɔgɔw ka kɛcogow tun ben’a to ‘waati be gwɛlɛya’ kosɔbɛ (2 Timote 3:1-5). An ɲɛɛ b’o lo la kabi saan 1914.

      3. Mun na duniɲa ka koow be juguyara ten kabi Ala ka Masaya sigira sen kan?

      Yezu siginin kɔ a ka Masaya la dɔrɔn, a wulila Sutana n’a ka jinaw kama sankolo la. A ye see sɔrɔ u kan. Bibulu b’a fɔ ko Yezu ye Sutana “n’a kɔmɔgɔw [jinaw] gwɛn ka jigi dugukolo kan.” (Yirali 12:9, 12). Sutana dimininba lo sabu a b’a lɔn ko a bena halaki. O kama, a be bɔnɛ ni tɔɔrɔ caaman lase adamadenw ma dugukolo kan. O lo y’a to duniɲa ka koow ɲagaminin lo ten! Ala ka Masaya bena o gwɛlɛyaw bɛɛ ban.

      A ƝINI KA DƆ LƆN TUGUN

      An k’a filɛ fɛɛn min b’a yira ko Ala ka Masaya sigira sen kan saan 1914 la, ani o koo ɲɛsinna an ma cogo min na.

      4. Daniyɛli ka kiraya kuma ɲɛsinna saan 1914 lo ma

      A’ ye VIDEWO filɛ.

      VIDEWO: Ala ka Masaya sigira sen kan saan 1914 (5:02)

      Ala y’a kɛ Babilɔni ka masacɛ Nebukadnezar ye siko dɔ kɛ min ɲɛsinna sinikow ma. Kira Daniyɛli y’o siko kɔrɔ ɲɛfɔ. A y’a yira k’o siko ɲɛsinna masacɛ Nebukadnezar ani Ala ka Masaya lo ma.—Daniyɛli 4:14 kalan.a

      Daniyɛli 4:17-23 kalan. O kɔ, a’ ye basigi koorilen nin kan ka ɲiningali nunu jaabi:

      • A) Masacɛ Nebukadnezar ye mun lo ye a ka siko la?—Vɛrise 17 ani 18 lajɛ.

      • B) Mun lo tun bena yiri nin sɔrɔ?—Vɛrise 20 lajɛ.

      • C) Mun lo tun bena kɛ “saan wolonwula” nunu bannin kɔ?—Vɛrise 23 lajɛ.

      Yiri nin koo ɲɛsinna Ala ka Masaya ma cogo min na

      O KIRAYA KUMA (Daniyɛli 4:17-33)

      Masaya

      A) Yiri jamanjanba

      Yiri jamanjanba dɔ.

      Masaya lalɔra

      B) “Aw ka yiri nin ben,” ani “a ka to ten fɔɔ saan wolonwula”

      Yiriju dɔ, nɛgɛjɔrɔkɔ ni zirajɔrɔkɔ kɛra ka min siri.

      Masaya sigira kokura

      C) ‘I bena kɔsegi i ka masaya la’

      Yiri jamanjanba dɔ.

      O kiraya kuma dafara siɲɛ fɔlɔ min na . . .

      • D) O yiri tun ɲɛsinna jɔn lo ma?—Vɛrise 19 lajɛ.

      • E) A ka kuntigiya lalɔra wagati dɔ la cogo di?—Daniyɛli 4:26-30 kalan.

      • F) Nebukadnezar ka koo kɛra cogo di “saan wolonwula” nunu tɛmɛnin kɔ?—Daniyɛli 4:31-33 kalan.

      O KIRAYA KUMA DAFARA SIƝƐ FƆLƆ MIN NA

      Masaya

      D) Nebukadnezar, Babilɔni masacɛ

      Masacɛ Nebukadnezar lɔnin, a fanin kuncɛbaya la.

      Masaya lalɔra

      E) Saan 606 ka kɔn Krista tile ɲɛ (K.T.Ɲ.): o saan kɔ, Nebukadnezar fatɔyara. A ma se ka kuntigiya kɛ tugun fɔɔ saan 7

      Nebukadnezar be ŋunumana kongo kɔnɔ ani a be biin ɲimina i ko kongosogo.

      Masaya sigira kokura

      F) Nebukadnezar kɛnɛyara ani a kɔsegira a ka masaya la

      Masacɛ Nebukadnezar y’a bolow kɔrɔta ani a be Jehova tandora.

      O kiraya kuma dafara siɲɛ 2nan min na . . .

      • H) U ka masaya lalɔra cogo di? An b’a lɔn cogo di ko Yezu ka wagati la, mɔgɔ si bele tun t’o masaya kun na?—Luka 21:24 kalan.

      • I) Wagati juman na ani yɔrɔ juman na o masaya sigira kokura?

      • (I) When and where was this rulership restored?

      O KIRAYA KUMA DAFARA SIƝƐ 2NAN MIN NA

      Masaya

      G) Israɛl ka masacɛw, u minw tun ye Ala ka masaya lasigidenw ye

      Israɛl ka masacɛ dɔw. Yeelen dɔ bɔra sankolo la ka jigi u kan.

      Masaya lalɔra

      Zeruzalɛmu halakira: Israɛl kɔmɔgɔw ka masaya lalɔra saan 2520 kɔnɔ

      Tasuma ye Zeruzalɛmu dugu halaki saan 607 ka kɔn Krista tile ɲɛ. O kɔ, saan 2 520 tɛmɛna.

      Masaya sigira kokura

      I) Yezu kɛra Ala ka Masaya Masacɛ ye sankolo la

      Kabi saan 1914, ka Yezu siginin to a ka masasigilan kan sankolo la, a be dugukolo marala. Yeelen be bɔra a ka masasigilan yɔrɔ ka yɛrɛkɛ yɔrɔ bɛɛ.

      O saan wolonwula nunu ka ɲi ka jati cogo di

      Bibulu yɔrɔ dɔw b’an dɛmɛ k’a yɔrɔ wɛrɛw faamu. Misali la, Yirali ka kitabu b’a fɔ ko saan saba ni tilan be bɛn tile 1260 ma (Yirali 12:6, 14). O kɔrɔ ko Bibulu ka kiraya kuma kɔnɔ, saan kelen be bɛn tile 360 ma. O la, “saan wolonwula” nunu be bɛn tile 2 520 lo ma. Tuma dɔw la Bibulu kɔnɔ, tile kelen be jati saan kelen.—Ezekiyɛli 4:6.

      5. Duniɲa ka koow yɛlɛmana kabi saan 1914

      A’ ye VIDEWO fil.

      VIDEWO: Duniɲa ka koow yɛlɛmana kabi saan 1914 (1:10)

      Yezu tun kɔnna k’a fɔ duniɲa ka koow bena kɛ cogo min na ale siginin kɔ masaya la. Luka 21:9-11 kalan. O kɔ, a’ ye ɲiningali nin kɛ ani ka baro kɛ o kan:

      • Koo minw kofɔra o vɛrisew kɔnɔ, u la jumanw lo be dafara i ɲɛɛ na?

      Ciden Pol tun kɔnna k’a fɔ mɔgɔw sɔɔn bena kɛ cogo min na adamadenw ka kuntigiya laban wagati la. 2 Timote 3:1-5 kalan. O kɔ, a’ ye ɲiningali nin kɛ ani ka baro kɛ o kan:

      • I y’o sɔɔn jumanw lo kɔrɔsi mɔgɔw la bi bi nin na?

      Jaaw: Koo dɔw, minw be kɛra duniɲa laban loonw na. Jaa fɔlɔ: Sɔrɔdasi kuntigi dɔ lɔnin be tintin dɔ kan, a y’a bolo wuli sanfɛ n’a be pɛrɛnna. Jaa 2nan : Dugukoloyɛrɛyɛrɛ ye boon dɔw ben ben. Jaa 3nan: Kɛlɛkɛ awiyɔnw. Jaa 4nan: Mɔgɔ dɔw be tagamana, u ye cache-nez don walisa k’u yɛrɛ latanga. Jaa 5nan: Niyɔriki dugu la, sangaso jamanjanba fila ye tasuma ta benkanniko dɔ sen fɛ. Jaa 6nan: Cɛɛ dɔ be dɔrɔgi tara: A b’a yɛrɛ sɔgɔra ni biɲɛ ye. Jaa 7nan: Cɛɛ dɔ b’a muso bugɔra ani a be pɛrɛnna a kun na. Jaa 8nan: Dɔrɔ buteliw ani dɔrɔgi sifa caaman bila bilanin be tabali kan. Jaa 9nan: Muso fila dɔw be foto tara ɲɔgɔn fɛ: u ye faniw don minw be sanga la ani u ka masirifɛnw be mɔgɔ ɲɛɛ sama. Jaa 10nan: Dɔnkililabaga dɔ be mɔgɔw ɲɛnagwɛra kɔnsɛri dɔ la. Jaa 11nan: Mɔgɔ murutinin dɔ be fɛɛn tasumaman dɔ filila walisa ka tiɲɛni kɛ.

      6. A yira ko i lanin b’a la ko Ala ka Masaya be sen kan

      Matiyo 24:3, 14 kalan. O kɔ, a’ ye ɲiningali nunu kɛ ani ka baro kɛ u kan:

      • Baaraba juman lo be kɛra min b’a yira ko Ala ka Masaya be sen kan?

      • I be se k’i seen don o baara la cogo di?

      Ala ka Masaya y’a ka mara daminɛ ka ban, ani yanni dɔɔni a bena dugukolo kuru bɛɛ mara. Eburuw 10:24, 25 kalan. O kɔ, a’ ye ɲiningali nin kɛ ani ka baro kɛ o kan:

      • Komi an “yɛrɛ ɲaa b’a la ko Matigi ka loon surunyana ka ban,” an ka ɲi ka mun lo kɛ?

      Jaaw: Jaa fɔlɔ: Bibulu kalanden dɔ be lajɛn kɛra ni Jehova Seerew ye. Jaa 2nan: O Bibulu kalanden kelen nin b’a lɔnbaga dɔ waajura.

      N’i be koo dɔ kala ma min be se ka mɔgɔw dɛmɛ ani k’u niin kisi, i bena mun lo kɛ do?

      NI MƆGƆ DƆ Y’I ƝININGA KO: “Mun na Jehova Seerew b’a fɔ ko saan 1914 kɔrɔtanin lo kosɔbɛ?”

      • I bena mun lo fɔ?

      MIIRIYA JƆNJƆN

      Bibulu ka kiraya kumaw ani duniɲa ka koow cogoya b’a yira ko Ala ka Masaya be sen kan. An b’a yira ko an lanin b’o la n’an b’an seen don waajuli baara la ani n’an be taga lajɛnw na.

      I ye mun lo faamu?

      • Saan wolonwula minw kofɔra Daniyɛli ka kitabu kɔnɔ, mun lo kɛra o saanw bannin kɔ?

      • Mun lo b’a to i lanin b’a la ko Ala ka Masaya y’a ka mara daminɛ saan 1914 la?

      • I be se ka mun lo kɛ min b’a yira ko i lanin b’a la ko Ala ka Masaya be sen kan?

      Goal

      NUNU LAJƐ FANA

      Tariki sɛbɛbagaw ani lɔnnikɛla wɛrɛw b’a ɲɛfɔ duniɲa ka koow yɛlɛmana cogo min na kabi saan 1914.

      “Depuis quand ce déclin brutal ?” (Saan 2007, awirilikalo ka Réveillez-vous !)

      Kiraya kuma min be sɔrɔ Matiyo 24:14 na, a filɛ o ye cɛɛ dɔ lasun cogo min na k’a ka ɲɛnamaya kɛcogo yɛlɛma.

      “J’aimais le baseball plus que tout au monde !” (Saan 2017 ka Kɔrɔsili Sangaso No 3)

      Kiraya kuma min be sɔrɔ Daniyɛli sapitiri 4nan na, an b’a lɔn cogo di k’o ɲɛsinna Ala ka Masaya koo ma?

      “Quand le Royaume de Dieu a-t-il commencé à régner ? (1re partie)” (Saan 2014, ɔkutɔburukalo tile fɔlɔ ka Kɔrɔsili Sangaso)

      “Saan wolonwula” minw kofɔra Daniyɛli sapitiri 4nan na, mun lo b’a yira k’o wagati banna 1914 saan na?

      “Quand le Royaume de Dieu a-t-il commencé à régner ? (2e partie)” (Saan 2014, novanburukalo tile fɔlɔ ka Kɔrɔsili Sangaso)

      a Barokun 3nan ani 4nan minw be kalansen nin laban yɔrɔ la, olu lajɛ . U be sɔrɔ yɔrɔ nin na: “Nunu lajɛ fana.”

  • Ala ka Masaya bena min kɛ sini ma
    Ɲɛnamaya kɛ hɛɛrɛ la fɔɔ abada!—Nafa sɔrɔ bibulukalan na
    • Kalansen 33nan. Mɔgɔ dɔw be ɲɛnamaya kɛra alijɛnɛ kɔnɔ dugukolo kan.

      KALANSEN 33

      Ala ka Masaya bena min kɛ sini ma

      Ala ka Masaya be sen kan ka ban. Yanni dɔɔni, a bena yɛlɛmanibaw kɛ duniɲa kɔnɔ. An k’a filɛ a bena koo diiman minw kɛ.

      1. Cogo juman na Ala ka Masaya ben’a kɛ hɛɛrɛ ni tilenninya be sigi kokura dugukolo kan?

      Yezu min ye Ala ka Masaya Masacɛ ye, a bena mɔgɔ juguw ani adamadenw ka gofɛrɛnɛmanw bɛɛ halaki Arimagedɔn kɛlɛ la (Yirali 16:14, 16). O wagati la, Bibulu ka kiraya kuma nin bena dafa bɛrɛbɛrɛ: “Yanni dɔɔni, mɔgɔjugu bena tunu. E ben’a ɲini, i ten’a ye tugu.” (Zaburuw 37:10). Ala ka Masaya barika la, Yezu bena hɛɛrɛ ni tilenninya sigi dugukolo kuru bɛɛ kan.—Ezayi 11:4 kalan.

      2. Ɲɛnamaya bena kɛ cogo di ni Ala sago nana kɛ dugukolo kan?

      Ala ka Masaya mara tuma na, “mɔgɔtilenninw le bena jamana nin tigiya kɛ, u bena to yen kudayi.” (Zaburuw 37:29). Miiri k’a filɛ! Bɛɛ bena koo ɲuman kɛ, ani u bena Jehova n’u mɔgɔɲɔgɔnw kanu! Mɔgɔ si tɛna bana, ani bɛɛ bena ɲɛnamaya kɛ fɔɔ abada.

      3. Mɔgɔ juguw halakinin kɔ, Ala ka Masaya bena mun lo kɛ?

      Mɔgɔ juguw halakinin kɔ, Yezu bena kuntigiya kɛ saan 1 000 kɔnɔ. O wagati la, Yezu n’a marakɛɲɔgɔnw mɔgɔ 144 000 bena adamadenw dɛmɛ u ka kɛ mɔgɔ dafaninw ye. O saan 1 000 laban tuma na, dugukolo kuru bɛɛ bena kɛ alijɛnɛ cɛɲumanba ye. Ani, mɔgɔw bɛɛ ninsɔndiyanin bena kɛ sabu u be Jehova ka sariyaw labatora. O kɔ, Yezu bena Masaya kɔsegi a Faa Jehova ma. O la, Jehova “tɔgɔ [bena] saniya” o wagati la ka tɛmɛ sanga ni wagati bɛɛ kan (Matiyo 6:9, 10, Bible Senuma). Bɛɛ ben’a ye ko Jehova ye Kuntigi ɲuman ye min b’a janto a sagokɛlaw la. Jehova bena Sutana ni jinaw halaki. Ani, mɔgɔ fɛɛn o fɛɛn be muruti a ka kuntigiya ma, a bena o halaki fana (Yirali 20:7-10). Ala ka Masaya bena koo dafanin minw kɛ, o nafa bena mɛɛn fɔɔ abada.

      A ƝINI KA DƆ LƆN TUGUN

      Bibulu be min fɔ siniɲasigi koo la, an k’a filɛ fɛɛn min kama an be se ka la a la ko Ala bena o dafa a ka Masaya sababu fɛ.

      4. Ala ka Masaya bena daan sigi adamadenw ka gofɛrɛnɛmanw bɛɛ la

      “Adamaden le be kuntigiya kɛ a tɔɲɔgɔn kan k’a tɔɔrɔ.” (Waajulikɛla 8:9). Jehova bena o tilenbaliyako ɲɛnabɔ a ka Masaya sababu la.

      Daniyɛli 2:44 ani 2 Tesalonikaw 1:6-8 kalan. O kɔ, a’ ye ɲiningali nunu kɛ ani ka baro kɛ u kan:

      • Jehova n’a Dencɛ bena mun lo kɛ adamadenw ka gofɛrɛnɛmanw n’u kɔmɔgɔw la?

      • I ye min kalan Jehova ni Yezu koo la, mun na o b’a to i lanin b’a la ko u bena min kɛ, o tilennin lo?

      Masacɛ Yezu sankolo la: a be dugukolo marala, o min kɛra alijɛnɛ ye.

      5. Yezu masacɛ ɲuman ɲɔgɔn tɛ yen

      Yezu bena koo ɲuman caaman kɛ Ala ka Masaya marakɔnɔmɔgɔw ye. A’ ye VIDEWO filɛ. O videwo b’a yira ko Yezu b’a fɛ ka adamadenw dɛmɛ ani ko Ala ye see di a ma k’o kɛ.

      VIDEWO: Yezu y’a yira Ala ka Masaya bena min kɛ (1:13)

      Ka Yezu to dugukolo kan, a ye min kɛ, o b’a yira Ala ka Masaya bena min kɛ sini ma. Koo minw kofɔra jukɔrɔ, i kɔrɔtɔnin lo jumanw ka dafa fɔlɔ? Vɛrise minw ɲɛsinna o koow kelen kelen bɛɛ ma, a’ y’o vɛrisew kalan.

      KA YEZU TO DUGUKOLO KAN, . . .

      KA YEZU TO SANKOLO LA, . . .

      • a ye fɔɲɔba mala.—Mariki 4:36-41.

      • a bena dugukolo nagasikow ɲɛnabɔ.—Ezayi 35:1, 2.

      • a bena kɔngɔ ban.—Zaburuw 72:16.

      • a ye mɔgɔ caaman kɛnɛya.—Luka 18:35-43.

      • a bena bɛɛ dɛmɛ ka kɛnɛya dafanin sɔrɔ.—Ezayi 33:24.

      • a ye suuw kunu.—Luka 8:49-55.

      • a bena saya nɔfɛkow bɛɛ ban.—Yirali 21:3, 4.

      6. Siniɲasigi ɲumanba Ala ka Masaya sababu la

      Ala sagonata tun ye min ye adamadenw koo la, Ala ka Masaya bena o dafa. U bena ɲɛnamaya kɛ fɔɔ abada alijɛnɛ kɔnɔ dugukolo kan. A’ ye VIDEWO filɛ. A b’a yira cogo min na Jehova b’a sagonata dafara Yezu barika la.

      VIDEWO: Siniɲasigi ɲuman min maranin be an ye (4:38)

      Zaburuw 145:16 kalan. O kɔ, a’ ye ɲiningali nin kɛ ani ka baro kɛ o kan:

      • K’a lɔn ko Jehova bena “nimanfɛnw bɛɛ wasa,” o be mun lo kɛ i la?

      NI MƆGƆ DƆ Y’A FƆ I YE KO: “N’an bɛɛ jɛnna ka koow kɛ, an bena se ka duniɲa ka gwɛlɛyaw ɲɛnabɔ.”

      • Ala ka Masaya bena gwɛlɛya jumanw ɲɛnabɔ adamadenw ka gofɛrɛnɛmanw ma se ka minw ɲɛnabɔ?

      MIIRIYA JƆNJƆN

      Ala ka Masaya sigira kuun min kama, a bena o dafa. A bena dugukolo bɛɛ yɛlɛma k’a kɛ alijɛnɛ ye, ani Jehova sagokɛlaw bena ɲɛnamaya kɛ a kɔnɔ fɔɔ abada.

      I ye mun lo faamu?

      • Ala ka Masaya bena Ala tɔgɔ saniya cogo di do?

      • Bibulu ye min fɔ siniɲasigi koo la, mun na an lanin b’a la k’o bena dafa Ala ka Masaya sababu la?

      • Ala ka Masaya bena min bɛɛ kɛ, i kɔrɔtɔnin lo juman ka dafa fɔlɔ?

      I ka laɲinita

      NUNU LAJƐ FANA

      A filɛ Arimagedɔn kɔrɔ ye min ye.

      “Arimagedɔn kɛlɛ ye mun lo ye?” (A be sɔrɔ jw.org kan)

      A filɛ min bena kɛ Yezu ka saan 1 000 mara tuma na ani o bannin kɔ.

      “Tɔɔrɔba min kofɔra Bibulu kɔnɔ, o ye mun lo ye?” (A be sɔrɔ jw.org kan)

      Denbayamɔgɔ dɔw be miirila k’a filɛ ko u be alijɛnɛ kɔnɔ. O videwo lajɛ.

      Miiri k’a filɛ ko i be alijɛnɛ kɔnɔ (1:50)

      Politikimɔgɔ dɔ y’a ka ɲiningaliw jaabili sɔrɔ cogo min na, o lajɛ barokun nin na: “J’étais tourmenté par de nombreuses questions.”

      “La Bible transforme des vies” (Saan 2012, zanwiyekalo tile fɔlɔ ka Kɔrɔsili Sangaso)