KALANSEN 17

Yezu ye mɔgɔ sugu juman lo ye?

Édition imprimée

Yezu ye min fɔ, ani a ye min kɛ tuma min na a tun be dugukolo kan, n’an y’o kalan, an b’a ye jogo minw b’a la. O jogow b’an lasun k’an magwɛrɛ a la ani a Faa Jehova la. O jogo dɔw ye jumanw ye? Ani, an be se ka Yezu ladegi cogo di?

1. Mun na an be se k’a fɔ ko Yezu be i n’a fɔ a Faa?

Sankolo la, Yezu y’a Faa ka kokɛcogo kɔrɔsi saan miliyari caaman na. Ani, a ye koo caaman degi a Faa fɛ. O y’a to a be miiri, a be koow jati, ani a be koow kɛ tigitigi i n’a fɔ a Faa (Zan 5:19 kalan). Tiɲɛn na, Yezu b’a Faa ka jogow ladegi koɲuman fɔɔ a y’a fɔ ko: “Ni mɔgɔ min ɲaa lara ne kan, o tigi ye n Faa fana ye.” (Zan 14:9). N’i tora ka dɔ lɔn Yezu jogow koo la, o bena i dɛmɛ ka Jehova lɔn koɲuman. Yezu b’a janto mɔgɔw la cogo min na, o b’a yira Jehova be min miiri i koo la.

2. Yezu y’a yira cogo di ko a be Jehova kanu?

Yezu y’a fɔ ko: “Diɲɛ mɔgɔw ka kan k’a lɔn ko ne be n Faa kanu, o la, a ye min fɔ ne ye, ne b’o le kɛ.” (Zan 14:31). Ka Yezu to dugukolo kan, a ye mɛnni kɛ a Faa fɛ hali n’a tun ka gwɛlɛ a ma k’o kɛ. O cogo la, a y’a yira ko a b’a Faa kanu kosɔbɛ. A tun ka di Yezu ye ka kuma a Faa koo la ani ka mɔgɔw dɛmɛ u ka teriya kɛ n’a Faa ye.—Zan 14:23.

3. Yezu y’a yira cogo di ko a be mɔgɔw kanu?

Bibulu b’a fɔ ko “adamadenw koo ka gwɛlɛ” Yezu ma (Talenw 8:31, NW). Kanuya y’a lasun ka mɔgɔw jija ani k’u dɛmɛ gwansan. A ye kabako minw kɛ, u b’a yira ko see b’a ye ani ko a be hinɛ mɔgɔw la (Mariki 1:40-42). A tun be bɛɛ minɛ ni ɲumanya ye, ani a tun tɛ mɔgɔ bɔ mɔgɔ la. Minw bɛɛ tun b’u kɔnɔ gwɛ k’a lamɛn, a ka kumaw tun b’u dusu saalo ani k’u jigi tugu. Kanuya kosɔn, a sɔnna ka tɔɔrɔ ani ka sa adamadenw kosɔn. Nka minw b’a ka kalanw sira tagama, olu lo koo ka gwɛlɛ a ma kosɔbɛ.—Zan 15:13, 14 kalan.

A ƝINI KA DƆ LƆN TUGUN

An k’a ɲini ka dɔ lɔn tugun Yezu jogow koo la. A tun be mɔgɔw kanu ani k’u sɔn cogo min na, an k’a filɛ cogo min na an be se k’a ladegi o la.

4. Yezu b’a Faa kanu

An be se k’a yira cogo di ko an be Ala kanu? Yezu y’o ɲɛyira an na. Luka 6:12 ani Zan 15:10; 17:26 kalan. Vɛrise kelen kelen bɛɛ kalannin kɔ, a’ ye ɲiningali nin kɛ ani ka baro kɛ o kan:

An be se ka Yezu ladegi cogo di ani k’a yira ko an be Jehova kanu?

Yezu be delili kɛra. — Yezu tun b’a sankolola Faa kanu, ani tuma caaman na, a tun be kuma a fɛ delili la.

5. Yezu b’a janto mɔgɔw la

Yezu tun be mɔgɔw ka hɛɛrɛko bila a yɛrɛ ta ɲɛ. Hali n’a tun sɛgɛnnin lo, a tun b’a ka wagati n’a ka fanga kɛ ka tɔɔw dɛmɛ. Mariki 6:30-44 kalan. O kɔ, a’ ye ɲiningali nunu kɛ ani ka baro kɛ u kan:

Yezu y’a yira cogo di ko a b’a janto mɔgɔw la?—Vɛrise 31, 34, 41, ani 42 lajɛ.
Mun lo tun be Yezu lasun ka mɔgɔw dɛmɛ?—Vɛrise 34 lajɛ.
Komi Yezu tun be Jehova lo ladegira, a ye min kɛ, o be mun lo yira an na Jehova koo la?
Yezu y’a mako don mɔgɔw la cogo min na, an be se k’a ladegi cogo di o la?

Yezu ye kabako dɔ kɛ ka mɔgɔ waa caaman balo ni buru deen duuru ani jɛgɛmisɛn deen fila ye. A ka kalandenw y’o dumuni tilan ka di cɛɛw, musow ani denmisɛnw ma.

6. Yezu b’a tɛgɛ labila ka mɔgɔw sɔn

Fɛɛn bɛrɛ tun tɛ Yezu fɛ. Nka a bolo tun labilanin lo ka mɔgɔw sɔn. A y’an jija an k’o ɲɔgɔn kɛ fana. Kɛwaliw 20:35 kalan. O kɔ, a’ ye ɲiningali nin kɛ ani ka baro kɛ o kan:

Yezu ka fɔta la, mun lo b’a to an be ninsɔndiya sɔrɔ?

A’ ye VIDEWO filɛ. Ani, a’ ye ɲiningali kɛ ani ka baro kɛ o kan:

VIDEWO: “Nisɔndiya be mɔgɔ sɔnni na ka tɛmɛ sɔrɔli kan”—A yɔrɔ dennin dɔ (4:00)

Hali ni fɛɛn bɛrɛ t’an fɛ, an be se ka mɔgɔw sɔn cogo di?

I b’a lɔn wa?

Bibulu b’a fɔ ko an ka ɲi ka Jehova deli Yezu tɔgɔ la (Zan 16:23, 24 kalan). N’an be delili kɛ o cogo la, an b’a yira ko an sɔnna a ma ko Yezu barika la le an be se ka teriya kɛ ni Jehova ye.

NI MƆGƆ DƆ Y’A FƆ I YE KO: “An ka tɔɔrɔkow ye Ala ka latigɛ lo ye.”