KALANSEN 18
I be se ka kerecɛn sɔbɛw lɔn cogo di?
Mɔgɔ miliyari caaman b’a fɔ k’olu ye kerecɛnw ye. Nka, u ka lannakow tɛ kelen ye ani u tɛ sariya kelen lo labato tagamacogo ta fan fɛ. O la, mɔgɔ be se ka kerecɛn sɔbɛw lɔn cogo di?
1. N’u ko kerecɛn, o kɔrɔ ko di?
Kerecɛnw ye Yezu Krista ka kalandenw lo ye (Kɛwaliw 11:26 kalan). U b’a yira cogo di ko u ye Yezu ka kalandenw ye? Yezu y’a fɔ ko: “N’aw ye ne ka kuma bato, aw be kɛ n ka kalandenw ye tiɲɛ na.” (Zan 8:31). O kɔrɔ ko kerecɛn sɔbɛw ka ɲi ka Yezu ka kalanw bɛɛ sira tagama. Yezu tun b’a ka kalanw basigi Bibulu lo kan. O cogo kelen na, kerecɛn sɔbɛw ka lannakow ka ɲi ka basigi Bibulu lo kan.—Luka 24:27 kalan.
2. Kerecɛn sɔbɛw b’a yira cogo di ko u be ɲɔgɔn kanu?
Yezu y’a fɔ a ka kalandenw ye ko: “Aw ka ɲɔgɔn kanu i n’a fɔ ne y’aw kanu cogo min na.” (Zan 15:12). Yezu y’a yira cogo di ko a b’a ka kalandenw kanu? A tun be wagati kɛ n’u ye, a tun be u jija, ani a tun be u dɛmɛ. A yɛrɛ y’a niin di u kosɔn (1 Zan 3:16). O cogo kelen na, kerecɛn sɔbɛw ka kanuya tɛ dalakuma dama ye. U b’a yira u ka kumaw n’u ka kɛwalew fɛ k’u be ɲɔgɔn kanu.
3. Kerecɛn sɔbɛw jijanin lo baara juman lo la?
Yezu ye baara dɔ kalifa a ka kalandenw ma. “A ye u ci ka taga Ala ka masaya koo fɔ.” (Luka 9:2). Kerecɛn fɔlɔw tun be waajuli kɛ u ka batolikɛyɔrɔw la. Nka o dɔrɔn tɛ, u tun be waajuli kɛ fana jamayɔrɔw la ani mɔgɔw ka soo (Kɛwaliw 5:42; 17:17 kalan). O cogo kelen na bi, kerecɛn sɔbɛw be Bibulu ka tiɲɛnkalanw fɔ yɔrɔ bɛɛ. U be u mɔgɔɲɔgɔnw kanu. O kama, jigiya kumaw ani dususalo kuma minw be Bibulu kɔnɔ, u b’u kofɔ mɔgɔw ye. A ka di u ye k’u ka wagati n’u fanga kɛ o baara la.—Mariki 12:31.
A ƝINI KA DƆ LƆN TUGUN
Mɔgɔ minw tɛ Yezu ka kalanw sira tagama ani u t’a ladegi, a filɛ i be se ka kerecɛn sɔbɛw faranfasi ka bɔ olu la cogo min na.
4. U be tiɲɛn ɲini Bibulu kɔnɔ
Kerecɛn fɔlɔw tun be bonya la Ala ka Kuma kan
Kerecɛnw bɛɛ tɛ Bibulu ka tiɲɛnkalanw jati cogo kelen na. A’ ye VIDEWO filɛ. O kɔ, a’ ye ɲiningali nunu kɛ ani ka baro kɛ u kan:
Kerecɛn tɔgɔtigiw ka legiliziw ye mun lo kɛ walisa ka mɔgɔw bali ka Yezu ka kalanw lɔn?
Tiɲɛnkalan min be sɔrɔ Ala ka Kuma kɔnɔ, Yezu ye mɔgɔw kalan o la. Zan 18:37 kalan. O kɔ, a’ ye ɲiningali nin kɛ ani ka baro kɛ a kan:
Ka kɛɲɛ ni Yezu ka kumaw ye, mɔgɔ minw “lɔnin be tiɲɛ kan,” an be se k’olu lɔn cogo di?
5. U be waajuli kɛ ka Bibulu ka tiɲɛnkalanw kofɔ mɔgɔw ye
Kerecɛn fɔlɔw tun be mɔgɔw waaju.
Sanni Yezu ka taga sankolo la, a ye baara dɔ kalifa a ka kalandenw ma min bele be sen kan bi. Matiyo 28:19, 20 ani Kɛwaliw 1:8 kalan. O kɔ, a’ ye ɲiningali nin kɛ ani ka baro kɛ a kan:
Waajuli baara tun bena kɛ ka se fɔɔ yɔrɔ juman ani tuma juman?
6. U be mɔgɔw kalan min na, u yɛrɛ b’o sira tagama
Mun lo y’a to Tom lara a la ko a ye kerecɛn sɔbɛw sɔrɔ? A’ ye VIDEWO filɛ. O kɔ, a’ ye ɲiningali nunu kɛ ani ka baro kɛ u kan:
Mun lo y’a to Tom banna diinan na?
Mun lo y’a to a lara a la ko a ye tiɲɛn diinan sɔrɔ?
An ye mɔgɔ min ye, an ka kɛwalew b’o yira ka tɛmɛ an ka kumaw kan. Matiyo 7:21 kalan. O kɔ, a’ ye ɲiningali nin kɛ ani ka baro kɛ o kan:
Yezu fɛ, mun lo kɔrɔtanin lo: an k’a fɔ ko an lanin be Ala la, wala an k’an ka lanaya yira kɛwalew fɛ?
7. U be ɲɔgɔn kanu
Kerecɛn fɔlɔw tun be ɲɔgɔn kanu.
Yala kerecɛn dɔw delila k’u niin bila farati la u kerecɛnɲɔgɔn dɔw kosɔn wa? A’ ye VIDEWO filɛ. O kɔ, a’ ye ɲiningali nunu kɛ ani ka baro kɛ u kan:
Mun lo ye Lloyd lasun a y’a niin bila farati la balimacɛ Johansson kosɔn?
Kerecɛn sɔbɛ ka ɲi ka min kɛ, ele fɛ, a y’o lo kɛ wa?
Zan 13:34, 35 kalan. O kɔ, a’ ye ɲiningali nunu kɛ ani ka baro kɛ u kan:
Yezu ka kalandenw (kerecɛn sɔbɛw) be siya wala jamana wɛrɛ mɔgɔw minɛ cogo di?
U b’o mɔgɔw minɛ cogo di marifakɛlɛ tuma na?
NI MƆGƆ DƆ Y’A FƆ I YE KO: “Kerecɛnw ye kojugubaw kɛ, u ka diinan be se ka kɛ tiɲɛn diinan ye cogo di?”
I bena vɛrise juman lo kalan walisa k’a yira mɔgɔ be se ka kerecɛn sɔbɛw lɔn cogo min na?
MIIRIYA JƆNJƆN
Kerecɛn sɔbɛw be Bibulu ka kalanw sira tagama, u be ɲɔgɔn kanu sɔbɛ la, ani u be waajuli kɛ ka Bibulu ka tiɲɛnkalanw kofɔ mɔgɔw ye.
I ye mun lo faamu?
Kerecɛn sɔbɛw ka lannakow basiginin be mun lo kan?
Kerecɛn sɔbɛw be lɔn jogo juman lo fɛ?
Kerecɛn sɔbɛw be baara juman lo kɛ?
NUNU LAJƐ FANA
Mɔgɔ minw b’u jijara ka Yezu ka kalanw sira tagama ani k’a ladegi, a ɲini ka dɔ lɔn u koo la.
A filɛ fɛɛn min ye masɛrimuso dɔ lasun ka “denbaya sɔbɛ dɔ ɲini Alako ta fan fɛ.”
A filɛ kerecɛn sɔbɛw be u ka kanuya yira cogo min na n’u kerecɛnɲɔgɔnw mako be dɛmɛ na.
Yezu ye sarati dɔw fɔ minw be mɔgɔ dɛmɛ k’ale ka kalandenw lɔn. A filɛ cogo min na kerecɛn fɔlɔw ani bi kerecɛn sɔbɛw b’o saratiw dafa.