KALANSEN 19

Jehova Seerew lo ye kerecɛn sɔbɛw ye wa?

Édition imprimée

Jehova Seerew lanin b’a la k’olu lo ye kerecɛn sɔbɛw ye. Mun na do? An lanin b’o la kuun jɔnjɔn saba kama: an ka lannakow basiginin lo min kan, tɔgɔ min b’an kɛ dan na tɔɔw la, ani kanuya min be an ni ɲɔgɔn cɛ.

1. Jehova Seerew ka lannakow basiginin lo mun lo kan?

Yezu ko: “[Ala] ka kuma le ye tiɲɛ ye.” (Zan 17:17). I ko Yezu, Jehova Seerew b’u ka lannakow basigi tuma bɛɛ Ala ka Kuma lo kan. A filɛ min kɛra saan kɛmɛkulu 19nan laban fan fɛ. Saan 1870 fan fɛ, jɛnkulumɔgɔ dɔw y’a daminɛ ka Bibulu sɛgɛsɛgɛ koɲuman. U ye u ka lannakow basigi Bibulu kan, hali n’o lannakow tun be dan na ni legiliziw taw ye. O kɔ, u y’a daminɛ k’o Bibulu ka tiɲɛnkalanw fɔ mɔgɔ wɛrɛw ye.a

2. Mun na u b’an weele ko Jehova Seerew?

Jehova b’a sagokɛlaw weele ko a seerew sabu u be tiɲɛn fɔ mɔgɔw ye ale koo la (Eburuw 11:4–12:1). Misali la, Ala y’a fɔ a sagokɛlaw ye galen ko: “Ne seere ye aw le ye.” (Ezayi 43:10 kalan). Yezu be weele ko “seeresɔbɛ” (Yirali 1:5). O lo kama saan 1931 na, an y’an tɔgɔ la ko Jehova Seerew. A ka di an ye ka weele o tɔgɔ la.

3. Jehova Seerew be Yezu ka kanuya ladegi cogo di?

Yezu tun b’a ka kalandenw kanu fɔɔ a tun b’u jati i ko a somɔgɔw (Mariki 3:35 kalan). O cogo kelen na, Jehova Seerew kaan bɛnnin lo. U ye denbaya kelen ye duniɲa kuru bɛɛ kɔnɔ. O lo kama, an be ɲɔgɔn weele balimacɛ wala balimamuso (Filemɔn 1, 2). An be cikan nin fana labato: “Aw ye aw balemaw kanu.” (1 Piyɛri 2:17, Biblu Ala ta Kuma). An b’o kanuya yira cogo caaman na. Misali la, gwɛlɛyaw mana kɛ an balimaw kan yɔrɔ o yɔrɔ duniɲa kɔnɔ, an b’u dɛmɛ.

A ƝINI KA DƆ LƆN TUGUN

An ka Jehova Seerew ka tarikikow lajɛ, ani an ka dalilu wɛrɛw lajɛ minw b’a yira ko an ye kerecɛn sɔbɛw ye.

Jaaw: Jehova Seerew be waajuli kɛra. Jaa fɔlɔ: Balimamuso dɔ ye vɛrise dɔ kalan ani a be baro kɛra a kan ni muso dɔ ye. Jaa 2nan: Balimacɛ dɔ be waajuli kɛra forobayɔrɔ la ni wotoro ye ani a be baro kɛra ni cɛɛ dɔ ye. — Kerecɛn sɔbɛw ka lannakow basiginin lo Bibulu kan ani u be u kofɔ tɔɔw ye.

4. An ka lannakow basiginin be Bibulu lo kan

Jehova tun kɔnna k’a fɔ ko mɔgɔw bena Bibulu ka tiɲɛnkalan faamu ka ɲɛ. Daniyɛli 12:4 kalan. O kɔ, a’ ye ɲiningali nin kɛ ani ka baro kɛ o kan:

Ala sagokɛlaw kɛtɔ ka Bibulu sɛgɛsɛgɛ, u tun bena mun lo sɔrɔ caaman?

A filɛ Bibulu kalandenw jɛnkulu dɔ ye Bibulu sɛgɛsɛgɛ cogo min na. Charles Russell tun ye o jɛnkulu mɔgɔ dɔ ye. A’ ye VIDEWO filɛ. O kɔ, a’ ye ɲiningali nin kɛ ani ka baro kɛ o kan:

VIDEWO: U ye Bibulu ka tiɲɛnkalanw faamu (7:45)

Charles Russell n’a jɛnɲɔgɔnw ye Bibulu sɛgɛsɛgɛ cogo di?

I b’a lɔn wa?

Tuma dɔw la, an ka lannako dɔw yɛlɛmana. Mun na do? Tile bɔtɔ, kɛnɛ be ci dɔɔni dɔɔni ani o b’a to an be yeli kɛ ka ɲɛ. O cogo kelen na, Ala b’an dɛmɛ k’a ka Kuma faamu dɔɔni dɔɔni le (Talenw 4:18 kalan). Bibulu kɔni tɛ yɛlɛma. Nka, n’an ka Bibulu faamucogo fisayara, an ka lannakow be yɛlɛma ka kɛɲɛ n’o ye.

5. An be koow kɛ ka kɛɲɛ n’an tɔgɔ ye

Mun na an y’an tɔgɔ la ko Jehova Seerew? A’ ye VIDEWO filɛ. O kɔ, a’ ye ɲiningali nin kɛ ani ka baro kɛ o kan:

VIDEWO: Tɔgɔ min b’a yira an ye mɔgɔ minw ye (2:40)

Mun na a bɛnnin lo u k’an weele ko Jehova Seerew?

Mun na Jehova ye mɔgɔ dɔw sugandi k’u kɛ a seerew ye? Walisa u k’a fɔ tɔɔw ye ko ale lo ye tiɲɛn Ala ye, ani ngalon minw jɛnsɛnna a koo la, u k’o bɔ kɛnɛ kan. An k’o ngalon kalanw la fila dɔrɔn lajɛ.

Diinan dɔw b’a fɔ mɔgɔw ye ko Ala b’a fɛ an ka tɛmɛ jaaw fɛ k’ale bato. O ye tiɲɛn ye wa? Levitiki 26:1 kalan. O kɔ, a’ ye ɲiningali nin kɛ ani ka baro kɛ o kan:

Ka tɛmɛ jaaw fɛ ka Ala bato, Jehova be mun lo miiri o koo la?

Diinan kuntigi dɔw b’a fɔ ko Yezu ye Ala ye. Zan 20:17 kalan. O kɔ, a’ ye ɲiningali nunu kɛ ani ka baro kɛ u kan:

Ala ni Yezu ye mɔgɔ kelen ye tiɲɛn tiɲɛn na wa?
K’a lɔn ko Jehova y’a Seerew ci u ka waajuli kɛ ka mɔgɔw dɛmɛ u ka tiɲɛn lɔn ale ni Yezu koo la, o be mun lo kɛ i la do?

6. An be ɲɔgɔn kanu

Bibulu be kerecɛnw suman ni farikolo yɔrɔw ye. 1 Korɛntikaw 12:25, 26 kalan. O kɔ, a’ ye ɲiningali nunu kɛ ani ka baro kɛ u kan:

Kerecɛn sɔbɛw be mun lo kɛ n’u kerecɛnɲɔgɔnw be tɔɔrɔla?
Kanuya min be Jehova Seerew ni ɲɔgɔn cɛ, i ye mun lo kɔrɔsi o koo la?

Ni Jehova Seerew be tɔɔrɔla duniɲa faan dɔ la, u kerecɛnɲɔgɔnw be sin ka dɔ kɛ dɔ ye duniɲa kuru bɛɛ kɔnɔ walisa k’u dɛmɛ. A’ ye VIDEWO filɛ. O kɔ, a’ ye ɲiningali nin kɛ ani ka baro kɛ o kan:

VIDEWO: Sanfɔɲɔba Matiyo ye tiɲɛni kɛ Hayiti jamana na (5:29)

Jehova Seerew kɛtɔ ka taga dɛmɛ lase u balimaw ma, o be mun lo yira u koo la?

Kasara dɔ ye muso dɔ n’a deen sɔrɔ ani Jehova Seere fila b’u dɛmɛna. Seerew be birifani birila u kan ani u be jii minta saniyanin dira u ma. — Kanuya be kerecɛn sɔbɛw lasun ka sɛgɛnbagatɔw dɛmɛ.

NI MƆGƆ DƆ Y’A FƆ I YE KO: “Jehova Seerew ka diinan ye diinan kura lo ye.”

Kabi tuma juman na le Jehova b’a batobagaw weele ko ale “Seerew”?

MIIRIYA JƆNJƆN

Jehova Seerew ye kerecɛn sɔbɛw lo ye. An ye denbaya kelen ye, o min mɔgɔw jɛnsɛnnin lo duniɲa kuru bɛɛ kɔnɔ. An ka lannakow basiginin lo Bibulu kan ani an be tiɲɛn kofɔ mɔgɔw ye Jehova koo la.