KALANSEN 44
Fɛtiw bɛɛ lo ka di Ala ye wa?
Jehova b’a fɛ an ka ɲɛnamaya diyabɔ ani k’an ɲɛnagwɛ yɛrɛ tuma dɔw la. Nka, fɛtiw bɛɛ lo ka di a ye wa? An be se k’a yira cogo di ko an be Ala kanu fɛtiw koo la?
1. Mun na fɛti caaman ka gwo Jehova ye?
N’a sɔrɔ a bena bari i la k’a mɛn ko fɛti caaman basiginin tɛ Bibulu kan wala k’u bɔra kafiriyakow lo la. O fɛtiw ɲɛsinna jinakow lo ma ani u basiginin be miiriya min kan, o ye ko mɔgɔ sanin kɔ, fɛɛn dɔ be bɔ a tigi la ka to niin na. O fɛti dɔw basiginin be ngalon lannakow lo kan, wala kunnadiyako lo kan (Ezayi 65:11). Jehova b’a sagokɛlaw lasɔmi ko: “Aw ye bɔ u cɛma . . . aw kana maga fɛɛn nɔgɔnin si la.”—2 Korɛntikaw 6:17.a
2. Fɛti minw be bonya la adamaden kan k’a sɔrɔ o man kan, Jehova be mun lo miiri o fɛtiw koo la?
Jehova b’an lasɔmi ko farati b’a la an k’an “jigi la adamaden ka fanga kan.” (Zeremi 17:5 kalan). Fɛti dɔw kuun ye ka bonya la jamana kuntigiw wala sɔrɔdasi dɔw kan. U dɔw kuun ye ka bonya la jamana ka tagamasiɲɛw kan wala ka jamana ka ɛndepandansi kɛ (1 Zan 5:21). U dɔ wɛrɛw ɲɛsinna politikikow wala jɛnkulu dɔw ka koow ma. Jehova bena mun lo miiri n’an y’an seen don fɛti dɔ la walisa ka bonya la adamaden wala jɛnkulu dɔ kan k’a sɔrɔ u ka laɲinitaw bɛnnin tɛ ale sagonata ma?
3. Kɛcogo jumanw be se k’a to fɛti dɔ bɛnnin tɛ?
Bibulu b’a yira ko Ala be “dɔrɔtɔya, nugubatɔya [ani] dɔrɔminkojugu” haramuya (1 Piyɛri 4:3). Fɛti dɔw la, mɔgɔw t’u yɛrɛ minɛ ani u be kakalayakow kɛ. An ka ɲi k’an yɔrɔ janya o koo nɔgɔninw ɲɔgɔn na walisa ka to teriya la ni Jehova ye.
A ƝINI KA DƆ LƆN TUGUN
An k’a filɛ an be se ka desizɔn ɲumanw ta cogo min na fɛtiw koo la walisa ka Jehova ninsɔndiya.
4. Fɛti minw tɛ bonya la Jehova kan, ban u la
Efɛzikaw 5:10 kalan. O kɔ, a’ ye ɲiningali nunu kɛ ani ka baro kɛ u kan:
Sanni an k’an seen don fɛti dɔ la, an ka ɲi k’a ɲini ka mun lo lɔn fɔlɔ?
Mɔgɔw ka teli ka fɛti jumanw lo kɛ i ka mara la?
E ka miiri la, o fɛtiw ka di Jehova ye wa?
I delila k’i yɛrɛ ɲininga Ala be min miiri wololon sanyɛlɛma fɛtiw koo la wa? Jehova sagokɛla si koo ma fɔ Bibulu kɔnɔ min y’a wololon sanyɛlɛma fɛti kɛ. Nka, mɔgɔ fila kofɔra minw y’u ta kɛ. Olu tun tɛ Jehova batobagaw ye. Zɛnɛzi 40:20-22 ani Matiyo 14:6-10 kalan. O kɔ, a’ ye ɲiningali nunu kɛ ani ka baro kɛ u kan:
Koo juman lo kɛra o wololon sanyɛlɛma fɛti fila bɛɛ la?
Jehova be min miiri wololon sanyɛlɛma fɛtiw koo la, vɛrise nunu b’o yira cogo di?
O bɛɛ n’a ta, n’a sɔrɔ i b’i yɛrɛ ɲiningara ko: “Yala koo jugu lo Jehova ɲɛɛ kɔrɔ ka fɛti dɔw kɛ minw basiginin tɛ Bibulu kan wa?” Ɛkizɔdi 32:1-8 kalan. O kɔ, a’ ye VIDEWO filɛ. Ani, a’ ye ɲiningali nunu kɛ ani ka baro kɛ u kan:
Mun na an ka ɲi k’a ɲini k’a lɔn ni fɛti dɔ ka di Jehova ye?
An be se k’o kɛ cogo di?
An be se k’a lɔn cogo di ni fɛti dɔ ka di Ala ye?
Kɔni a basiginin tɛ miiriya dɔw kan minw tɛ bɔ Bibulu kɔnɔ? Sɛgɛsɛgɛri kɛ k’a filɛ o koo la.
Kɔni a kuun tɛ ka bonya la adamadenw, jɛnkuluw, wala jamana ka tagamasiɲɛw kan k’a sɔrɔ o man kan? An be Jehova lo bonya ka tɛmɛ fɛɛn bɛɛ kan. Ani, an jigi lanin be ale lo kan ko a bena duniɲa ka gwɛlɛyaw bɛɛ ɲɛnabɔ.
Landakow ani koo wɛrɛ minw be kɛ o fɛti la, kɔni u tɛ Bibulu ka fɔta sɔsɔ? An saniyanin ka ɲi ka to an ka kɛtaw bɛɛ la.
5. Tɔɔw dɛmɛ u k’i ka lannakow ta sɔbɛ la
A be se ka kɛ ko i sigiɲɔgɔnw b’i ɲɛɛ gwanna ko i k’i seen don fɛtiko dɔw la minw man di Jehova ye. Muɲu u kɔrɔ, ani i ka desizɔn ɲɛfɔ u ye nɛmɛnɛmɛ. Videwo nin filɛ walisa k’a lɔn i be se k’o kɛ cogo min na:
Matiyo 7:12 kalan. O kɔ, a’ ye ɲiningali nunu kɛ ani ka baro kɛ u kan:
Ka kɛɲɛ n’o vɛrise ye, a bɛnnin lo i k’a fɔ i somɔgɔ dannabaliw ye k’u man kan ka fɛti dɔ kɛ wa?
I be se k’i somɔgɔw hakili sigi cogo di ko i bele b’u kanu ani ko i b’u bonya hali n’i tɛ jɛn n’u ye tugun ka fɛti dɔw kɛ?
6. Jehova b’a fɛ an ka ninsɔndiya
Jehova b’a fɛ an ka wagati diiman kɛ n’an somɔgɔw ani an teriw ye. Waajulikɛla 8:15 kalan. O kɔ, a’ ye ɲiningali nin kɛ ani ka baro kɛ o kan:
O vɛrise b’a yira cogo di ko Jehova b’a fɛ an ka ninsɔndiya?
Jehova b’a fɛ a sagokɛlaw ka ɲɛnagwɛ ani ka wagati diiman kɛ ɲɔgɔn fɛ. A’ ye VIDEWO filɛ. O videwo b’a yira cogo min na o koo gwɛnin lo an ka lajɛnbaw la minw labɛnna jamana caaman kama.
Galatikaw 6:10 kalan. O kɔ, a’ ye ɲiningali nunu kɛ ani ka baro kɛ u kan:
Ka se ka ‘koo ɲuman kɛ’ tɔɔw ye, waajibi lo an k’an seen don fɛti dɔw la bɛɛ be minw kɛ wa?
Mun lo bena i ninsɔndiya kosɔbɛ: n’i waajibiyanin lo ka kado di mɔgɔw ma fɛti dɔ sen fɛ, wala n’i be kado di sabu e yɛrɛ lo b’a fɛ k’a di?
Jehova Seere caaman be ɲɛnagwɛkow labɛn u deenw ye, ani tuma dɔw la, u be bari u la ni kadow ye. Ni deenw b’i fɛ, i be se ka mun lo kɛ u ye k’u ninsɔndiya?
NI MƆGƆ DƆ Y’A FƆ I YE KO: “Fɛti jujɔn mana kɛ min o min ye, o lo kɔrɔtanin tɛ. Min kɔrɔtanin lo, o ye ka wagati diiman kɛ n’i somɔgɔw n’i teriw ye.”
I bena a tigi jaabi cogo di?
MIIRIYA JƆNJƆN
Jehova b’a fɛ an ka wagati diiman kɛ n’an somɔgɔw n’an teriw ye. Nka fɛti minw man di a ye, a t’a fɛ an k’u kɛ.
I ye mun lo faamu?
N’an b’a fɛ k’a lɔn ni fɛti dɔ ka di Jehova ye, an be se k’an yɛrɛ ɲininga mun lo la?
An ye desizɔn minw ta fɛti dɔw koo la, an be se k’an somɔgɔw n’an teriw dɛmɛ cogo di u k’o faamu?
Mun lo b’a yira ko Jehova b’a fɛ an ka ninsɔndiya ani ka ɲɛnagwɛ?
NUNU LAJƐ FANA
Fɛti dɔw, kerecɛnw tɛ minw kɛ.
“Mun na Jehova Seerew tɛ fɛti dɔw kɛ?” (A be sɔrɔ jw.org kan)
A filɛ fɛɛn naani minw kama wololon sanyɛlɛma fɛtiw koo man di Ala ye.
“Mun na Jehova Seerew tɛ wololon sanyɛlɛma fɛtiw kɛ?” (A be sɔrɔ jw.org kan)
Denmisɛn minw be Jehova kanu, a filɛ cogo min na u be se ka Jehova ninsɔndiya fɛtiw tuma na.
Kerecɛn miliyɔn caaman y’a latigɛ k’u tɛ nowɛli fɛti kɛ. U be mun lo miiri u ka desizɔn koo la?
“Ils ont trouvé mieux” (Saan 2012, desanburukalo tile fɔlɔ ka Kɔrɔsili)
a Kunnafoni wɛrɛw no 5 lajɛ k’a lɔn i be se ka min kɛ fɛti dɔw koo la.