KALANSEN 45
Kerecɛnw seen tɛ politikikow ni kɛlɛkow la
Yezu y’a fɔ ko a ka kalandenw man kan ka kɛ “diɲɛ ta ye.” (Zan 15:19). O kɔrɔ ko u man kan k’u seen don politikikow ni kɛlɛkow la. Nka ka tiɲɛn fɔ, o man nɔgɔ. Mɔgɔw be se k’an lɔgɔbɔ o kosɔn. An be se k’a yira cogo di ko an t’an seen don politikikow ni kɛlɛkow la? Ani an be se ka to kantigiya la Jehova Ala ye cogo di?
1. Kerecɛn sɔbɛw be adamadenw ka gofɛrɛnɛmanw jati cogo di?
Kerecɛnw be bonya la gofɛrɛnɛmanw kan. I ko Yezu y’a ɲini an fɛ cogo min na, ‘fɛɛn min ye masacɛ ta ye, an b’o di masacɛ ma, ka Ala ta di Ala ma.’ O kɔrɔ ko an be jamana ka sariyaw labato, i n’a fɔ ka lanpo sara (Mariki 12:17). Bibulu b’a fɔ ko adamadenw ka gofɛrɛnɛmanw siginin be yen sabu Jehova b’a to u ka kuntigiya kɛ (Ɔrɔmukaw 13:1). O b’an dɛmɛ k’a faamu ko Ala ka kuntigiya be adamadenw bɛɛ ta kun na. An jigi be Ala lo kan: a bena adamadenw ka gwɛlɛyaw bɛɛ ban a ka Masaya sababu fɛ.
2. An be se k’a yira cogo di ko an seen tɛ politikikow ni kɛlɛkow la?
An be Yezu ladegi: an t’an seen don politikikow la. Mɔgɔw ye Yezu ka kabako dɔ ye minkɛ, u y’a ɲini a fɛ a ka kɛ masacɛ ye u kun na. Nka a ma sɔn (Zan 6:15). Mun na do? A y’a ɲɛfɔ kɔfɛ ko: “Ne ka masaya te diɲɛ nin ta ye.” (Zan 18:36). An minw ye Yezu ka kalandenw ye, an b’a yira cogo caaman na ko an t’an seen don politikikow n’a ɲɔgɔnnakow la. Misali la, an tɛ taga kɛlɛ la (Mise 4:3 kalan). An be bonya la jamana ka tagamasiɲɛw kan, i n’a fɔ darapo. Nka an tɛ bonya la u kan cogo dɔ la i n’a fɔ an b’u batora le (1 Zan 5:21). Ani, an tɛ politiki jɛnkulu ni politikimɔgɔ si lafasa. An t’u kɛlɛ fana. O cogo la ani cogoya wɛrɛw la, an b’a yira ko an be kantigiya kɛ bɛrɛbɛrɛ Ala ka gofɛrɛnɛman ye, o min y’a ka Masaya ye.
A ƝINI KA DƆ LƆN TUGUN
An ka koo dɔw lajɛ o minw na a man nɔgɔ tuma dɔw la ka ban politikikow ni kɛlɛkow la. An k’a filɛ fana cogo min na an be se ka desizɔnw ta minw bena diya Jehova ye.
3. Kerecɛn sɔbɛw t’u seen don politikikow ni kɛlɛkow la
Yezu n’a ka kalandenw ka koo b’o lo yira. Ɔrɔmukaw 13:1, 5-7 ani 1 Piyɛri 2:13, 14 kalan. O kɔ, a’ ye VIDEWO filɛ. Ani, a’ ye ɲiningali nunu kɛ ani ka baro kɛ u kan:
Mun na an ka ɲi ka bonya la faamanw kan?
An b’a yira cogo jumanw na ko an be kolo u ye?
Kɛlɛ tuma na, jamana dɔw b’a fɔ k’olu seen t’o la. Nka u be kɛlɛkɛlaw dɛmɛ. Ka ban politikikow ni kɛlɛkow la, o kɔrɔ ko di tiɲɛn tiɲɛn na? Zan 17:16 kalan. O kɔ, a’ ye VIDEWO filɛ. Ani, a’ ye ɲiningali nin kɛ ani ka baro kɛ o kan:
Ka ban politikikow ni kɛlɛkow la, o kɔrɔ ko di?
Ni faamanw y’a ɲini i fɛ i ka koo dɔ kɛ min be Ala ka sariya kɛlɛ, i bena mun lo kɛ do? Kɛwaliw 5:28, 29 kalan. O kɔ, a’ ye VIDEWO filɛ. Ani, a’ ye ɲiningali nunu kɛ ani ka baro kɛ u kan:
Ni adamadenw ka sariyaw be Ala ta sɔsɔ, i ka ɲi ka sɔn jɔn ta lo ma?
E ka miiri la, kerecɛnw tɛna sɔn ka mɛnni kɛ faamanw fɛ koo jumanw lo la?
4. Ban politikikow ni kɛlɛkow la i ka miiriyaw la ani i ka kɛwalew fɛ
1 Zan 5:21 kalan. O kɔ, a’ ye VIDEWO filɛ. Ani, a’ ye ɲiningali nunu kɛ ani ka baro kɛ u kan:
Mun na Ayenge ma sɔn k’a niin don politikiko si la wala ka darapo fo?
Ele ka miiri la, a ye desizɔn ɲuman lo ta wa?
Koo wɛrɛ jumanw be se k’a to a be gwɛlɛya an ma ka ban politikikow ni kɛlɛkow la? A’ ye VIDEWO filɛ. O kɔ, a’ ye ɲiningali nunu kɛ ani ka baro kɛ u kan:
Ni farikoloɲanagwɛko dɔ be kɛra jamanaw cɛ, an be se k’a yira cogo di ko an tɛ jamana dɔ kɔ?
An be se k’a yira cogo di ko an niin tɛ politikikow ni kɛlɛkow la hali ni politiki ɲɛmɔgɔw ka desizɔnw be bɔnɛ lase an ma wala u b’an nafa?
N’an ka teli ka politikikow lamɛn wala ka baro kɛ o koo la ni mɔgɔw ye, o be se ka nɔɔ juman lo to an kan?
Koo jumanw na kerecɛn man ɲi k’a seen don politikikow ni kɛlɛkow la a ka miiriyaw la ani a ka kɛwalew fɛ?
NI MƆGƆ DƆ Y’I ƝININGA KO: “Mun na i tɛ darapo fo?” Wala “Mun na i tɛ faso fasa la?”
I bena a tigi jaabi cogo di?
MIIRIYA JƆNJƆN
Kerecɛnw b’u jija ka ban politikikow ni kɛlɛkow la u ka miiriyaw n’u ka kumaw na ani u ka kɛwalew fɛ.
I ye mun lo faamu?
Joo be gofɛrɛnɛmanw fɛ ka mun lo ɲini an fɛ?
Mun na an t’an seen don politikikow la?
Koo jumanw be se k’a to a be gwɛlɛya an ma ka ban politikikow ni kɛlɛkow la?
NUNU LAJƐ FANA
Kerecɛn labɛnnin lo ka ban mun lo la n’a t’a fɛ k’a seen don politikikow ni kɛlɛkow la?
Koo minw be se ka mɔgɔ lasun k’a seen don politikikow ni kɛlɛkow la, denbayamɔgɔw be se k’u yɛrɛ labɛn u kama cogo di?
Forobakow la, kana i seen don politikikow ni kɛlɛkow la (4:25)
Cɛɛ dɔ tun b’a miiri ko k’a ka jamana lafasa, o ye bonyaba ye min ɲɔgɔn tɛ yen. A ka maana lajɛ.
I be se k’a yira cogo min na ko i tɛ duniɲa ta ye n’i be desizɔn dɔ tara baara koo la.
“Chacun portera sa propre charge” (Saan 2006, marisikalo tile 15 ka Kɔrɔsili Sangaso)