KALANSEN 47
I labɛnnin lo batɛmu kama wa?
I ka bibulukalan y’i dɛmɛ ka fɛɛn caaman lɔn Jehova koo la. I be min kalanna, n’a sɔrɔ i ye yɛlɛmani dɔw kɛ walisa k’o sira tagama. Nka, a be se ka kɛ ko fɛɛn dɔ b’i balila k’i yɛrɛkun di Jehova ma ani ka batize. Kalansen nin na, an ben’a ye fɛɛn min kama mɔgɔ caaman tun be sigasigara ka batize, ani u ye see sɔrɔ u ka sigasigali miiriya kan cogo min na.
1. I ka ɲi ka Bibulu kɔnɔkow bɛɛ lɔn fɔlɔ ka sɔrɔ ka batize wa?
Walisa ka batize, i ka ɲi ka “tiɲɛ [tigitigi] lɔn.” (1 Timote 2:4). O kɔrɔ tɛ ko i ka ɲi ka Bibulu kɔnɔkow bɛɛ lɔn fɔlɔ ka sɔrɔ ka batize. Hali kerecɛn minw batizera kabi wagatijan, u bele be dɔ farala u ka lɔnniya kan (Kɔlɔsikaw 1:9, 10). Nka i ka ɲi ka Bibulu ka kalan jɔnjɔnw faamu. Kafo ka diinan mɔgɔkɔrɔw bena i dɛmɛ k’a lɔn n’i be Bibulu ka kalan jɔnjɔnw faamu ka ɲɛ.
2. I ka ɲi ka sarati jumanw lo dafa batɛmu kama?
Walisa ka batize, i ka ɲi ka “nimisa . . . ani ka segi Ala ma.” (Kɛwaliw 3:19 kalan). O kɔrɔ ko i ye koo jugu minw kɛ, o tun-k’a-lɔn b’i sɔrɔ, ani i be Jehova deli a ka yafa i ma. Min ka gwo Ala ye, i b’i jija k’o dabila ani min ka di a ye, i be banba k’o lo kɛ. Ka fara o kan, i ka ɲi ka taga kafo ka lajɛnw na ani k’a daminɛ ka waajuli kɛ ni kafo ye.
3. Mun na i man kan k’a to siranya k’i bali ka batize?
Dɔw be siran ko u ye layidu min ta Jehova ye, ko u tɛna se k’o dafa. Tiɲɛn lo ko tuma dɔw la i bena fili. Hali cɛɛw ni muso kantigiman minw kofɔra Bibulu kɔnɔ, olu fana filila. Nka Jehova t’a ɲini a sagokɛlaw fɛ u ka kɛ mɔgɔ dafaninw ye (Zaburuw 103:13, 14 kalan). Min kɔrɔtanin lo a fɛ, o ye ko i k’i seko bɛɛ kɛ ani ale bena i dɛmɛ! Tiɲɛn na, Jehova b’an hakili sigi ko foyi “tɛna se ka an fara ka bɔ [ale] ka kanuya la.”—Ɔrɔmukaw 8:38, 39 kalan.
A ƝINI KA DƆ LƆN TUGUN
Fɛɛn dɔw be se k’i bali ka batize. N’i b’a ɲini ka Jehova lɔn ka ɲɛ ani n’i be sɔn a ka dɛmɛ na, i bena see sɔrɔ u kan. Cogo di do? An k’o lajɛ.
4. A ɲini ka Jehova lɔn ka ɲɛ
I ka ɲi ka Jehova lɔn fɔɔ ka se hakɛ juman ma ka sɔrɔ ka batize? I ka kan ka Jehova lɔn koɲuman fɔɔ o b’i lasun k’a kanu ani k’a ɲini k’i koo diya a ye. A’ ye VIDEWO filɛ walisa k’a lɔn Bibulu kalanden caaman sera k’o kɛ cogo min na duniɲa kuru bɛɛ kɔnɔ. O kɔ, a’ ye ɲiningali nin kɛ ani ka baro kɛ o kan:
Videwo nin na, mun lo ye balima dɔw dɛmɛ u sera k’u yɛrɛ labɛn batɛmu kama?
Ɔrɔmukaw 12:2 kalan. O kɔ, a’ ye ɲiningali nunu kɛ ani ka baro kɛ u kan:
Yala i be sigasigara Bibulu ka kalan dɔw la wa? Wala i b’i yɛrɛ ɲiningara ni Jehova Seerew be mɔgɔw kalan tiɲɛn koo la tiɲɛn tiɲɛn na wa?
N’o lo, i be se ka mun lo kɛ?
5. Fɛɛn minw b’i balila ka batize, i be se ka see sɔrɔ u kan
Minw b’a latigɛ k’u yɛrɛkun di Jehova ma ani ka batize, u ka teli ka gwɛlɛya dɔw sɔrɔ. A’ ye VIDEWO filɛ o koo la. O kɔ, a’ ye ɲiningali nunu kɛ ani ka baro kɛ u kan:
Balimamuso Narangerel ye see sɔrɔ kɔrɔbɔli jumanw lo kan walisa ka se ka batize?
A be ni kanuya min ye Jehova koo la, o y’a dɛmɛ cogo di a m’a fari faga?
Talenw 29:25 ani 2 Timote 1:7 kalan. O kɔ, a’ ye ɲiningali nin kɛ ani ka baro kɛ o kan:
Mun lo b’an dɛmɛ ka jagwɛlɛya sɔrɔ walisa ka see sɔrɔ kɔrɔbɔliw kan?
6. I jigi la Jehova kan
Jehova bena i dɛmɛ k’a sago kɛ. A’ ye VIDEWO filɛ. Ani a’ ye ɲiningali nunu kɛ ka baro kɛ u kan:
Bibulu kalanden min kofɔra videwo la, mun na a tun be siranna ka batize?
Mun lo y’a dɛmɛ a y’a jigi la Jehova kan kosɔbɛ?
Ezayi 41:10, 13 kalan. O kɔ, a’ ye ɲiningali nin kɛ ani ka baro kɛ o kan:
Tuma min na i bena i yɛrɛkun di a ma, i bena layidu min ta Jehova ye, mun na i be se ka la a la ko i bena se k’o dafa?
7. I be ni waleɲumanlɔn min ye Jehova ka kanuya koo la, a ɲini k’o barika bonya
Jehova b’i kanu cogo min na, n’i tora ka miiri o la, o ben’a to i b’a waleɲuman lɔn o kosɔn. Ani, a bena diya i ye ka baara kɛ a ye fɔɔ abada. Zaburuw 40:6 kalan. O kɔ, a’ ye ɲiningali nin kɛ ani ka baro kɛ o kan:
Jehova ye koo ɲuman minw bɛɛ kɛ an ye, u la jumanw lo diyara i ye kosɔbɛ?
Kira Zeremi tun be Jehova kanu ani a ka kuma tun ka di a ye. Ka fara o kan, a y’a jati ko nɛɛmaba lo ale fɛ Jehova tɔgɔ ka la ale kan. A y’a fɔ ko: “I ka kuma . . . be nisɔndiya di ne ma, ka ne dagamu. Bari, ne y’i ta ye, Masaba, Setigi Ala.” (Zeremi 15:16). A’ ye ɲiningali nunu jaabi:
Ka kɛ Jehova Seere ye, mun na o ye nɛɛmaba lo ye?
I b’a fɛ ka batize ka kɛ Jehova Seere ye wa?
Koo dɔ b’i balila o la wa?
Ele ka miiri la, i ka ɲi ka mun lo kɛ ka se ka batɛmu saratiw dafa?
NI MƆGƆ DƆ Y’A FƆ I YE KO: “Ni n’ ye layidu ta Ala ye ani ka batize, n’ be siranna ko n’ tɛna se k’o layidu dafa.”
I fana b’o lo miiri wa?
MIIRIYA JƆNJƆN
Fɛɛn o fɛɛn be se k’i bali ka batize, i be se ka see sɔrɔ o kan Jehova ka dɛmɛ barika la.
I ye mun lo faamu?
I ka ɲi ka lɔnniya sɔrɔ Bibulu koo la fɔɔ ka se hakɛ juman ma ka sɔrɔ ka batize?
N’a sɔrɔ i ka ɲi ka yɛlɛmani jumanw lo kɛ ka sɔrɔ ka batize?
Mun na i man kan k’a to siranya k’i bali ka batize?
NUNU LAJƐ FANA
A filɛ fɛɛn min ka ɲi k’i lasun k’a latigɛ ka batize.
“I labɛnnin lo batɛmu kama wa?” (Saan 2020, marisikalo ka Kɔrɔsili Sangaso)
Fɛɛn minw b’i bali ka batize, a filɛ i be se ka see sɔrɔ u kan cogo min na.
“Mun lo be n’ bali ka batize?” (Saan 2019, marisikalo ka Kɔrɔsili Sangaso)
A filɛ cɛɛ dɔ ye see sɔrɔ gwɛlɛyaba dɔw kan cogo min na walisa ka se ka batize.
A daminɛ na, cɛɛ dɔ tun be sigasigara ka batize. A filɛ fɛɛn min y’a lasun k’o desizɔnba ta.