KALANSEN 38
Niin jati nilifɛn nafamanba ye
N’an be niin na, an be se ka koo diiman caaman diyabɔ. Hali ni gwɛlɛyaw b’an kan, an bele be se k’an ka ɲɛnamaya faan dɔw diyabɔ. Niin ye Ala ka nilifɛn ye. An be se k’a yira cogo di ko an b’o nilifɛn jati fɛɛnba ye? Ani kuun jɔnjɔn juman lo kama an ka ɲi ka niin jati fɛɛnba ye?
1. Mun na an ka ɲi ka niin jati fɛɛnba ye?
An ka ɲi ka niin jati fɛɛnba ye sabu niin ye an Faa kanutigi Jehova ka nilifɛn dɔ ye. “Mɔgɔ be nii na [ale] le sababu la.” Ale lo ye ninmanfɛnw bɛɛ Danbaga ye (Zaburuw 36:10). “Ale lo be nii, ani sii . . . di adamaden ma.” (Kɛwaliw 17:25, 28). An mako be min na walisa ka se ka balo, Jehova b’o di an ma. Nka, a tɛ dan o ma. A b’a kɛ an be se ka ɲɛnamaya diyabɔ fana.—Kɛwaliw 14:17 kalan.
2. An be se k’a yira Jehova la cogo di ko an be niin jati fɛɛnba ye?
Kabi an bamuso y’an kɔnɔ ta, Jehova b’a janto an na. Hakili senu barika la, Ala sagokɛla Dawuda y’a fɔ Ala ye ko: “I ɲɛɛw ye ne farikolo kuturuninlaman ye n’ bamuso kɔnɔ.” (Zaburuw 139:16, NW). I niin koo ka gwɛlɛ Jehova ma (Matiyo 10:29-31 kalan). Ni mɔgɔ dɔ y’a latigɛ k’a yɛrɛ niin bɔ wala ka mɔgɔ wɛrɛ niin bɔ, o be Jehova dusu kasi kosɔbɛa (Ɛkizɔdi 20:13). N’an be an niin bila farati la gwansan, wala n’an t’an janto ka tɔɔw niin latanga, o be Jehova dusu kasi fana. Niin ye Ala ka nilifɛn nafamanba ye. N’an b’an janto an niin na ani tɔɔw niin na fana, an b’a yira ko an b’o nilifɛn nafamanba jati fɛɛnba ye.
A ƝINI KA DƆ LƆN TUGUN
An k’a filɛ cogoya minw na an be se k’a yira ko an be niin jati nilifɛn nafamanba ye.
3. I janto i ka kɛnɛyakow la
Komi an y’an yɛrɛkun di Jehova ma, an be baara kɛ a ye n’an niin bɛɛ ye. A kɛra komi an b’an farikolo di Ala ma ka kɛ saraka ye. Ɔrɔmukaw 12:1, 2 kalan. O kɔ, a’ ye ɲiningali nunu kɛ ani ka baro kɛ u kan:
Mun lo ka ɲi k’i lasun i k’i janto i ka kɛnɛyakow la?
I be se k’o kɛ cogoya jumanw na?
4. I janto k’i niin latanga ani ka tɔɔw fana niin latanga
Koo o koo be se k’an niin wala mɔgɔ wɛrɛ niin bila farati la, Bibulu b’an jija an k’an yɛrɛ tanga o ma. A’ ye VIDEWO filɛ. O videwo b’a yira i be se ka min kɛ walisa i latanganin ka to.
Talenw 22:3 kalan. Ani, a’ ye baro kɛ k’a filɛ cogo minw na e ni tɔɔw latanganin be se ka to . . .
soo kɔnɔ,
baarakɛyɔrɔ la,
farikoloɲanagwɛ tuma na,
wala n’i be bolifɛn dɔ kɔnɔ.
5. Deen min b’a baa kɔnɔ, a niin jati fɛɛnba ye
Masacɛ Dawuda y’a ɲɛfɔ ko ka denɲɛnin to a bamuso kɔnɔ a be bonyana, Jehova b’a janto a niin koo la. Zaburuw 139:13-17 kalan. O kɔ, a’ ye ɲiningali nin kɛ ani ka baro kɛ o kan:
Jehova fɛ, mɔgɔ niin be daminɛ tuma juman le: a wolotuma na, wala tuma min na a bamuso y’a kɔnɔ ta?
Jehova tun ye sariya minw di Israɛl siya ma, o sariyaw tun be muso kɔnɔman n’a deen fana latanga. Ɛkizɔdi 21:22, 23 kalan. O kɔ, a’ ye ɲiningali nunu kɛ ani ka baro kɛ u kan:
Ka deen to a bamuso kɔnɔ, ni mɔgɔ dɔ tun kɛra sababu ye o deen sara nka a tigi ma tugu k’o kɛ, Jehova tun b’o tigi jati cogo di?
Nka n’o tigi tun tugura k’o kɛ, Jehova tun b’o koo ta cogo di?b
Ala b’o koo ta cogo min na, e be mun lo miiri o la?
Hali ni muso be niin jati fɛɛnba ye, n’a sɔrɔ tuma dɔw la a be se k’a miiri ko a bolomakotɛ k’a kɔnɔ tiɲɛ. Ezayi 41:10 kalan. O kɔ, a’ ye ɲiningali nunu kɛ ani ka baro kɛ u kan:
N’u b’a gwanna muso dɔ kun ko a k’a kɔnɔ tiɲɛ, a be se ka dɛmɛ sɔrɔ jɔn lo fɛ? Mun na i ko ten?
NI MƆGƆ DƆ Y’A FƆ I YE KO: “Joo be muso fɛ k’a kɔnɔ tiɲɛ sabu a fari y’a ta ye.”
Mun lo b’a to i lanin b’a la ko denɲɛnin min b’a bamuso kɔnɔ, Jehova b’o deen n’a bamuso niin jati fɛɛnba ye?
MIIRIYA JƆNJƆN
Bibulu b’a yira ko niin ye Jehova ka nilifɛn ye. O kama, an ka ɲi k’an niin ani mɔgɔ wɛrɛ niin jati fɛɛnba ye, ka bonya la a kan ani k’a latanga.
I ye mun lo faamu?
Mun na Jehova be adamaden niin jati fɛɛnba ye?
Ni mɔgɔ tugura k’a yɛrɛ niin wala mɔgɔ wɛrɛ niin bɔ, Jehova b’o koo ta cogo di?
Mun na i be Jehova waleɲuman lɔn o nilifɛn koo la?
NUNU LAJƐ FANA
Jehova lo ye niin di an ma. An be se ka barika la a ye cogo di?
Muso min y’a kɔnɔ tiɲɛ, Ala be se ka yafa a ma wa? O jaabili lajɛ.
“Bibulu be mun lo fɔ kɔnɔtiɲɛ koo la?” (A be sɔrɔ jw.org kan)
Ala be niin jati cogo min na, a filɛ o be se k’an dɛmɛ cogo min na k’an ka ɲɛnagwɛkow sugandi ka ɲɛ.
Ni yɛrɛfaga miiriya be mɔgɔ dɔ kɔnɔ: a filɛ Bibulu be se k’a tigi dɛmɛ cogo min na.
“Ni yɛrɛfaga miiriya be n’ kɔnɔ, Bibulu be se ka n’ dɛmɛ wa?” (A be sɔrɔ jw.org kan)
a Mɔgɔ minw dusu kasinin lo, Jehova b’a janto u la kosɔbɛ (Zaburuw 34:19). Yɛrɛfaga miiriya be mɔgɔ minw kɔnɔ, Jehova b’o tigilamɔgɔw faamu ani a b’a fɛ k’u dɛmɛ. A ka dɛmɛ be se ka mɔgɔ nafa cogo min na, o lajɛ barokun nin na: “Ni yɛrɛfaga miiriya be n’ kɔnɔ, Bibulu be se ka n’ dɛmɛ wa?” O barokun be sɔrɔ kalansen nin na, yɔrɔ nin jukɔrɔ: “Nunu lajɛ fana.”
b Mɔgɔ minw y’u kɔnɔ tiɲɛ, u man kan k’u yɛrɛ jalaki k’a dama tɛmɛ o kosɔn. Jehova be se ka yafa u ma. N’i be kunnafoni wɛrɛw fɛ o koo la, barokun nin lajɛ: “Bibulu be mun lo fɔ kɔnɔtiɲɛ koo la?” O barokun be sɔrɔ kalansen nin na, yɔrɔ nin jukɔrɔ: “Nunu lajɛ fana.”