KALANSEN 39
Ala be joli jati cogo min na
Mɔgɔ si tɛ se ka to niin na ni joli t’a fari la. Komi Ala lo ye Danbaga ye, joo b’a fɛ k’a latigɛ baara ka ɲi ka kɛ ni joli ye cogo min na. A ye mun lo fɔ joli koo la? An be se ka joli dumu wala k’a don an fari la wa? I be se ka desizɔn ɲumanw ta cogo di o koo la?
1. Ala be joli jati cogo di?
Galen, Jehova tun y’a fɔ a sagokɛlaw ye ko: “Danfɛn bɛɛ nii y’a joli ye.” (Levitiki 17:14). Jehova fɛ, joli be jati niin ye. Niin ye fɛɛn senuman ye sabu Ala ka nilifɛn lo. O kama, joli fana ye fɛɛn senuman ye.
2. Ala t’a fɛ baara juman ka kɛ ni joli ye?
Ka kɔn Krista tile ɲɛ, Jehova tun y’a fɔ a sagokɛlaw ye ko u kana joli dumu (Zɛnɛzi 9:4 ani Levitiki 17:10 kalan). A segira k’o cikan di kerecɛnw ma tuma min na Koow Ɲɛnabɔla Jɛnkulu y’a fɔ u ye ko u “kana . . . joli dumu.”—Kɛwaliw 15:28, 29 kalan.
K’i yɛrɛ tanga joli ma, o kɔrɔ ko di? Ni dɔgɔtɔrɔ ko i k’i yɛrɛ tanga dɔrɔ ma, o kɔrɔ ko i man kan k’a min. Nka, i bena sɔn ka fɛɛn dɔw dumu dɔrɔ be minw na wa? Wala, i bena a don i fari la jolisiraw fɛ wa? Ayi dɛ! O cogo kelen na, Ala ka cikan ko an k’an yɛrɛ tanga joli ma. O kɔrɔ ko an man kan ka joli dumu wala ka fɛɛn dɔ sogo ɲimi n’u m’a kaan tigɛ. An man kan fana ka fɛɛn si dumu joli be min na.
Nka dɔgɔtɔrɔw be baara min kɛ ni joli ye do? Furakɛcogo dɔw be yen, a gwɛnin lo k’u bɛnnin tɛ ni Ala ka sariya ye, i n’a fɔ ka joli wala joli kɔnɔfɛn kunbaba nunu don mɔgɔ fari la: jolikisɛwulenw, jolikisɛgwɛw, plakɛtiw, ani joliji. Nka furakɛcogo dɔw be yen, a gwɛnin tɛ n’u bɛnnin lo wala n’u bɛnnin tɛ ni Ala ka sariya ye, i n’a fɔ ka mɔgɔ fura kɛ ni joli kɔnɔfɛn misɛnmanw ye. Furakɛcogo dɔ wɛrɛw be yen o minw na u be baara kɛ ni banabagatɔ yɛrɛ joli ye. O koow kelen kelen bɛɛ la, bɛɛ lo b’a latigɛ a bena min kɛ.a—Galatikaw 6:5.
A ƝINI KA DƆ LƆN TUGUN
Furakɛcogo minw ɲɛsinna joli koo ma, an k’a filɛ an be se ka desizɔnw ta o koo la cogo min na.
3. A ɲini ka Jehova ninsɔndiya n’i be desizɔnw tara furakɛli koo la
I ka desizɔnw fɛ, i be se k’a yira cogo di ko i be ni Jehova ka miiriya ye joli koo la? A’ ye VIDEWO filɛ, ani a’ ye baro kɛ k’a yira fɛɛn min kama a kɔrɔtanin lo ka ladili nunu sira tagama.
Delili kɛ walisa ka hakilitigiya sɔrɔ. —Zaki 1:5.
A filɛ Bibulu ka sariyakolo minw ɲɛsinna i ka koo ma.—Talenw 13:16.
A ɲini k’a lɔn furakɛcogo fɛɛrɛ minw be sɔrɔ i ka mara la.
A ɲini k’a lɔn furakɛcogo minw bɛnnin tɛ i ma.
I janto ko i bena desizɔn min ta, i dusukun tɛna i kɛlɛ o kosɔn.—Kɛwaliw 24:16.b
An ka ɲi ka desizɔn minw ta ka kɛɲɛ n’an dusukun ye, a to i hakili la ko mɔgɔ si, hali i furuɲɔgɔn, diinan mɔgɔkɔrɔ dɔ wala i kalanfa man kan k’a fɔ i ye i ka ɲi ka min kɛ o koo la.—Ɔrɔmukaw 14:12.
I ye desizɔn min ta, o sɛbɛ ka bila.
4. Jehova Seerew be furakɛcogo ɲumanw ɲini
An be se ka Ala ka sariya labato joli koo la ani ka furakɛcogo ɲuman dɔw sɔrɔ. A’ ye VIDEWO filɛ.
Titi 3:2 kalan. O kɔ, a’ ye ɲiningali nin kɛ ani ka baro kɛ o kan:
N’an be kumana ni dɔgɔtɔrɔw ye, mun na an ka ɲi k’an majigi ani k’u bonya?
Kerecɛn tɛ sɔn u la |
Kerecɛn lo b’a latigɛ n’a bena sɔn |
|---|---|
A. Joliji |
Joliji kɔnɔfɛn misɛnmanw |
B. Jolikisɛgwɛw |
Jolikisɛgwɛw kɔnɔfɛn misɛnmanw |
C. Plakɛtiw |
Plakɛtiw kɔnɔfɛn misɛnmanw |
D. Jolikisɛwulenw |
Jolikisɛwulenw kɔnɔfɛn misɛnmanw |
5. Joli kɔnɔfɛn misɛnmanw
Joli kɔnɔfɛn kunbabaw ye fɛɛn naani nunu ye: jolikisɛwulenw, jolikisɛgwɛw, plakɛtiw ani joliji. Fɛɛn misɛnman dɔw be sɔrɔ o fɛɛn kunbabaw kɔnɔ, minw be weele ko joli kɔnɔfɛn misɛnmanw.c Dɔgɔtɔrɔw be baara kɛ n’o fɛɛn misɛnman dɔw ye walisa ka banakisɛw kɛlɛ wala ka jolibɔn lalɔ.
Joli kɔnɔfɛn misɛnmanw koo ta fan fɛ, kerecɛn kelen kelen bɛɛ lo ka ɲi ka basigi Bibulu kan k’a dusukun kolo ani ka desizɔn ta a yɛrɛ ye. N’a sɔrɔ dɔw bena ban fura dɔw la wala furakɛcogo dɔw la minw na u be baara kɛ ni joli kɔnɔfɛn misɛnmanw ye. Nka dɔw bena a latigɛ ka sɔn u la.
Sanni i ka desizɔn ta o koo la, i yɛrɛ ɲininga ko:
N’ ben’a ɲɛfɔ dɔgɔtɔrɔ ye cogo di fɛɛn min kama n’ be sɔn wala n’ be ban joli kɔnɔfɛn misɛnman dɔw la?
NI MƆGƆ DƆ Y’I ƝININGA KO: “Ka joli don mɔgɔ fari la, basi juman b’o la?”
I bena a tigi jaabi cogo di?
MIIRIYA JƆNJƆN
Jehova t’a fɛ an ka baara jugu kɛ ni joli ye.
I ye mun lo faamu?
Mun na Jehova be joli jati fɛɛn senuman ye?
Ala ka sariya ko an k’an yɛrɛ tanga joli ma. An b’a lɔn cogo di ko ka joli don mɔgɔ fari la, o sariya ɲɛsinnin be o koo ma fana?
Dɔgɔtɔrɔw be baara min kɛ ni mɔgɔ joli ye, mun lo bena i dɛmɛ ka desizɔn ɲuman ta o koo la?
NUNU LAJƐ FANA
Ni dɔgɔtɔrɔw ka ɲi ka baara kɛ ni e yɛrɛ ka joli ye, mun lo ka ɲi k’i lasun ka sɔn wala ka ban o la?
“Questions des lecteurs” (Saan 2000, ɔkutɔburukalo tile 15 ka Kɔrɔsili Sangaso)
N’i b’a latigɛra n’i bena sɔn wala n’i tɛna sɔn joli kɔnɔfɛn misɛnmanw na, i ka ɲi k’i janto mun lo la?
“Questions des lecteurs” (Saan 2004, zuwɛnkalo tile 15 ka Kɔrɔsili Sangaso)
Mun lo y’a to dɔgɔtɔrɔ dɔ sɔnna a ma ko Jehova ye min fɔ joli koo la, o bɛnnin lo?
Kɔmite minw be balimaw dɛmɛ jolintanya furakɛli koo la, a filɛ u be baaraba min kɛ.
a Yɔrɔ Kalansen 35nan nin lajɛ: “An be se ka desizɔn ɲumanw ta cogo min na.”
b Yɔrɔ 5nan nin lajɛ: “Joli kɔnɔfɛn misɛnmanw.” Kunnafoni wɛrɛw no 3 nin lajɛ fana: “Furakɛcogo dɔw, minw ɲɛsinna joli koo ma.”
c Dɔgɔtɔrɔ dɔw b’a jati ko joli kɔnɔfɛn kunbabaw ye fɛɛn misɛnmanw lo ye. O kama, n’a sɔrɔ i ka ɲi k’a ɲɛfɔ i ka dɔgɔtɔrɔ ye fɛɛn min kama i tɛ sɔn u ka joli kuturu wala jolikisɛwulenw, jolikisɛgwɛw, plakɛtiw ani joliji don i fari la.