KALANSEN 43
Kerecɛnw ka ɲi ka kɛ ni miiriya juman lo ye dɔrɔ koo la?
Duniɲa yɔrɔ caaman na, mɔgɔw tɛ ni miiriya kelen ye dɔrɔ koo la. A ka di dɔw ye ka dɔrɔ dɔɔni min n’u teriw ye tuma dɔw la. Dɔw b’a latigɛ ka ban dɔrɔ la pewu! Nka, dɔw b’a min fɔɔ ka su. Bibulu be mun lo fɔ dɔrɔ koo la?
1. Koo jugu lo ka dɔrɔ min wa?
Bibulu t’a fɔ ko koo jugu lo ka dɔrɔ min. A yɛrɛ b’a fɔ ko Ala ye fɛɛn minw di an ma ka kɛ “adamaden nisɔndiyafɛn” ye, u la dɔ ye duvɛn ye (Zaburuw 104:14, 15). Cɛɛw ani muso kantigi minw kofɔra Bibulu kɔnɔ, u dɔw tun be dɔrɔ min.—1 Timote 5:23.
2. Minw y’a latigɛ ka dɔrɔ min, Bibulu be ladili jumanw lo di u ma?
Jehova be dɔrɔminkojugu ni dɔrɔtɔya haramuya (Galatikaw 5:21). A ka kuma kɔnɔ, a fɔra ko: “Kana taama ni dɔrɔtɔw ye dɛ!” (Talenw 23:20). O kama, n’an y’a latigɛ ka dɔrɔ min an kelen n’an kelen, wala n’an be ni mɔgɔw ye, an man kan k’a min fɔɔ ka su, wala k’a min k’an ka kɛnɛyako bila farati la. N’an tɛ sera k’an yɛrɛ minɛ dɔrɔmin koo la, a ka fisa an k’a dabila pewu.
3. I janto tɔɔw ka desizɔn na dɔrɔmin koo la: cogo di do?
Bɛɛ lo b’a latigɛ n’a bena dɔrɔ min wala n’a tɛna a min. Ni mɔgɔ dɔ y’a latigɛ ka dɔrɔ min k’a dama kɛɲɛ, an man kan k’a kiti o kosɔn. Nka, ni mɔgɔ dɔ ko a tɛ dɔrɔ fɛ, an man kan k’a lasun a ka dɔ min (Ɔrɔmukaw 14:10). N’an y’a latigɛ ka dɔrɔ min nka o bena kɛ sababu ka dɔ kunnatiɲɛ, a ka fisa an kana a min (Ɔrɔmukaw 14:21 kalan). An t’an “yɛrɛ nafa ɲini, nka [an b’an] tɔɲɔgɔn ta le ɲini.”—1 Korɛntikaw 10:23, 24 kalan.
A ƝINI KA DƆ LƆN TUGUN
An ka Bibulu ka sariyakolo dɔw lajɛ minw bena i dɛmɛ k’a latigɛ n’i bena dɔrɔ min, ani i man kan ka minni kɛ ka tɛmɛ hakɛ min kan. An k’a filɛ fana i be se ka min kɛ ni gwɛlɛya dɔw b’i kan dɔrɔmin kosɔn.
4. A latigɛ n’i bena dɔrɔ min wala n’i tɛna a min
Yezu tun be mun lo miiri dɔrɔ koo la? Walisa k’o jaabili lɔn, an k’a filɛ a ye kabako fɔlɔ min kɛ. Zan 2:1-11 kalan. O kɔ, a’ ye ɲiningali nunu kɛ ani ka baro kɛ u kan:
Yezu be min miiri dɔrɔ koo la, kabako nin b’o yira cogo di? Ani, minw be dɔrɔ min, a be mun lo miiri olu koo la?
Komi Yezu ma dɔrɔmin haramuya, ni mɔgɔ dɔ y’a latigɛ ka dɔrɔ min, kerecɛn ka ɲi k’a tigi jati cogo di?
Nka, hali ni dɔrɔmin ma haramuya kerecɛn fɛ, tuma dɔw la a ka fisa a kana a min. Talenw 22:3 kalan. O kɔ, a’ y’a filɛ aw be se k’o vɛrise sira tagama cogo min na koo nunu na:
N’i ka ɲi ka bolifɛn dɔ boli wala ka baara kɛ ni mansin dɔ ye.
N’i kɔnɔman lo.
Ni dɔgɔtɔrɔ ko i kana dɔrɔ min.
I be dɔrɔ hakɛ min min, n’a ka gwɛlɛ i ma k’o dama kɛɲɛ.
N’a daganin tɛ sariya sira fɛ i ka dɔrɔ min.
N’i be ni mɔgɔ dɔ ye min y’a latigɛ ko a tɛna dɔrɔ min tugun sabu a ye gwɛlɛya dɔw sɔrɔ dɔrɔmin kosɔn.
Yala i ka ɲi ka dɔrɔ di mɔgɔw ma fɛtiw la, i n’a fɔ kɔɲɔya la wa? Videwo nin be se k’i dɛmɛ ka desizɔn ta o koo la. A’ ye VIDEWO filɛ.
Ɔrɔmukaw 13:13 ani 1 Korɛntikaw 10:31, 32 kalan. Vɛrise kelen kelen bɛɛ kalannin kɔ, a’ ye ɲiningali nin kɛ ani ka baro kɛ o kan:
O sariyakolo be se k’i dɛmɛ cogo di ka desizɔn dɔ ta min bena diya Jehova ye?
Kerecɛn kelen kelen bɛɛ lo b’a latigɛ n’a bena dɔrɔ min wala n’a tɛna a min. Hali n’a b’a min, tuma dɔw la a be se k’a latigɛ ka ban a la.
5. A latigɛ i bena dan dɔrɔ hakɛ min ma
N’i y’a latigɛ ka dɔrɔ min, nin to i hakili la: Hali ni Jehova tɛ dɔrɔmin haramuya, dɔrɔminkojugu man di a ye. Mun na do? Oze 4:11, 18 kalan. O kɔ, a’ ye ɲiningali nin kɛ ani ka baro kɛ o kan:
Ni mɔgɔ dɔ be dɔrɔ min kojugu, mun lo be se k’a sɔrɔ?
Mun lo be se k’an dɛmɛ an kana dɔrɔ min k’a dama tɛmɛ? An ka ɲi k’an yɛrɛ lɔn ani k’a lɔn an man kan ka tɛmɛ dɔrɔ hakɛ min kan. Talenw 11:2 kalan. O kɔ, a’ ye ɲiningali nin kɛ ani ka baro kɛ o kan:
Mun na a ka ɲi i k’a latigɛ i man kan ka minni kɛ ka tɛmɛ hakɛ min kan?
6. Dɔrɔtɔya dabilacogo
A filɛ fɛɛn min ye cɛɛ dɔ dɛmɛ ka dɔrɔtɔya dabila. A’ ye VIDEWO filɛ. O kɔ, a’ ye ɲiningali nunu kɛ ani ka baro kɛ u kan:
Videwo nin na, dɔrɔmin tun be Dmitry bila koo jumanw na?
A sera ka dɔrɔmin dabila yɔrɔnin kelen wa?
Mun lo y’a dɛmɛ ka dɔrɔminkojugu dabila?
1 Korɛntikaw 6:10, 11 kalan. O kɔ, a’ ye ɲiningali nunu kɛ ani ka baro kɛ u kan:
Dɔrɔminkojugu nɔfɛkow be se ka kɛ mun lo ye?
Mun lo b’a yira ko dɔrɔtɔ be se ka yɛlɛma?
Matiyo 5:30 kalan. O kɔ, a’ ye ɲiningali nin kɛ ani ka baro kɛ o kan:
K’i bolo “tigɛ k’a fili,” o kuma kɔrɔ ko an ka ɲi ka jijaliba lo kɛ walisa k’an koo diya Jehova ye. I be se ka mun lo kɛ n’i be bondori kɛra walisa ka dɔrɔminkojugu dabila?a
1 Korɛntikaw 15:33 kalan. O kɔ, a’ ye ɲiningali nin kɛ ani ka baro kɛ o kan:
I be dɔrɔ hakɛ min min, o be se ka bɔ i teriw la. Cogo di do?
NI MƆGƆ DƆ Y’I ƝININGA KO: “Koo jugu lo ka dɔrɔ min wa?”
I bena a tigi jaabi cogo di?
MIIRIYA JƆNJƆN
Jehova ye dɔrɔ di an ma k’a kɛ ninsɔndiyafɛn ye. Nka, a be dɔrɔminkojugu ani dɔrɔtɔya haramuya.
I ye mun lo faamu?
Bibulu be mun lo fɔ dɔrɔ koo la?
Ka dɔrɔ min kojugu, farati juman lo b’o la?
Mɔgɔw be desizɔn minw ta dɔrɔmin koo la, an b’a yira cogo di ko an t’o sɔsɔ?
NUNU LAJƐ FANA
Kanbelew ni sunguruw be se ka desizɔn ɲuman jumanw lo ta dɔrɔmin koo la?
Ladili ɲuman dɔw, minw be se ka mɔgɔ dɛmɛ ka see sɔrɔ dɔrɔminkojugu kan.
Ka vɛriw wuli ani ka minni kɛ mɔgɔ dɔ ka hɛɛrɛ kosɔn, kerecɛn ka ɲi k’o kɛ wa?
“Questions des lecteurs” (Saan 2007, feburukalo tile 15 ka Kɔrɔsili Sangaso)
Fɛɛn min ye cɛɛ dɔ dɛmɛ ka dɔrɔtɔya dabila. A ka maana lajɛ barokun nin na: “J’étais une barrique sans fond.”
“La Bible transforme des vies” (Saan 2012, mɛkalo tile fɔlɔ ka Kɔrɔsili Sangaso)
a Mɔgɔ min b’a fɛ ka dɔrɔtɔya dabila, n’a sɔrɔ a tigi mako bena kɛ dɔgɔtɔrɔ wala a ɲɔgɔnna mɔgɔ dɔ ka dɛmɛ na. Dɔgɔtɔrɔ caaman b’a fɔ ko minw ye gwɛlɛyaw sɔrɔ dɔrɔmin kosɔn, a ka fisa u ka dɔrɔmin dabila pewu le.