Kalanbagaw ka ɲiningaliw

Ciden Pol tun b’a fɛ ka mun lo fɔ, tuma min na a ko: “Sariya faan fɛ ne sanin lo ale sariya yɛrɛ sababu la”?—Gal. 2:19.

Pol y’a sɛbɛ ko: “Sariya faan fɛ ne sanin lo ale sariya yɛrɛ sababu la, waasa ne ka kɛ mɔgɔ ɲanaman ye Ala faan fɛ.”—Gal. 2:19.

Pol ye min sɛbɛ, o ni a ka bataki miiriya jɔnjɔn tun be taga ɲɔgɔn fɛ. A tun y’o bataki sɛbɛ balimaw lo ma Galati mara la, o min tun ye Ɔrɔmu mara dɔ ye. O yɔrɔ la, kalanfa minw be ngalonkalanw kɛ, olu tun be kerecɛn dɔw lafilila. O kalanfaw tun b’a fɔ ko walisa mɔgɔ ka kisi, fɔɔ a ka Musa ka sariya labato, sanko min fɔra kɛnɛkɛnɛli koo la. Nka, Pol tun b’a lɔn ko Ala tɛ kɛnɛkɛnɛli waajibiya tugun a sagokɛlaw ma. Pol ye balimaw dɛmɛ koɲuman u y’a faamu ko o kalanw tɛ tiɲɛn ye. A y’u ka limaniya sabati fana Yezu Krista ka kunmabɔ saraka koo la.—Gal. 2:4; 5:2.

Bibulu b’a yira ka gwɛ ko mɔgɔ minw sara, olu tɛ foyi kala ma (Waaj. 9:5). Tuma min na Pol ko ‘sariya faan fɛ ale sanin lo,’ a tun b’a fɛ k’a fɔ le ko ale tɛ Musa ka sariya kɔrɔ tugun. Nka, a tun lanin b’a la ko komi ale limaniyanin lo kunmabɔsara koo la, a ye “ɲanaman ye Ala faan fɛ.”

Musa ka sariya lo y’a to Pol ka koo yɛlɛmana. Cogo di do? Pol tun y’a ɲɛfɔ ko: “Mɔgɔ si te se ka jati mɔgɔtilennin ye sariya batoli fɛ, nga fɔɔ ni min lara Yezu Krista la.” (Gal. 2:16). Siga t’a la, sariya ye koo kɔrɔtaninba dɔ dafa. Pol y’a ɲɛfɔ Galatikaw ye ko: “[Sariya] sigira janko filiw ka lɔn, yanni Ibrayima Kɔmɔgɔ ka na. Dadili tun kɛra min ye.” (Gal. 3:19). Tiɲɛn na, sariya y’a yira ka gwɛ ko adamaden dafabali jurumutɔ tɛ se ka sariya labato cogo dafanin na. A y’a yira fana ko adamadenw mako tun be saraka dafanin dɔ la. O la, sariya ye mɔgɔw dɛmɛ k’a faamu ko “Kɔmɔgɔ” min tun kofɔra, o ye Yezu lo ye. Ni mɔgɔ limaniyara Yezu Krista la, Ala be se k’a jati mɔgɔ tilennin ye (Gal. 3:24). Pol y’o faamu sabu sariya sababu la, a sɔnna ani a limaniyara Yezu la. O cogo la, a tun sanin lo “sariya yɛrɛ sababu la” ani a kɛra “mɔgɔ ɲanaman ye Ala faan fɛ.” Musa ka sariya lo tun tɛ Pol ɲɛminɛna tugun, nka Ala lo tun b’a ɲɛminɛna.

Pol y’o kumaw ɲɔgɔn fɔ a ka bataki kɔnɔ Ɔrɔmukaw ma. A ko: “N balimaw, aw fana be ten, aw y’aw yɛrɛ sɔrɔ ka bɔ sariya kɔrɔ bari aw ye Krista farisogo yɔrɔ dɔw ye . . . Fɛɛn min tun y’an kɛ jɔɔn ye, an hɔrɔnyara ka bɔ ale bolo.” (Ɔrɔm. 7:4, 6). O vɛrise ani Galatikaw 2:19 b’a yira ko Pol tun t’a fɔra ko ale sara i ko jalaki benna jurumukɛla min kan sariya kɔrɔ. Nka, a tun b’a fɔra le ko ale hɔɔrɔnyara ka bɔ sariya bolo. Ale ni Ala sagokɛla tɔɔw tun tɛ sariya kɔrɔ tugun. U tun hɔɔrɔnyara Krista ka kunmabɔsara barika la.