‘Ke Isan̄ Idara Edikan’
ISAN̄ idara edikan ekesidi n̄wọrọnda usọrọ edikan oro ẹkande asua. N̄kpon n̄kan ukpono kiet oro Akwa Ufọkmbet Rome ekesinọde etubom ekọn̄ oro akande ekedi ndiyak enye adia idara edikan esie ye an̄wan̄wa, ọsọn̄urua akwa isan̄. Apostle Paul ama asiak isan̄ idara edikan oro ikaba ke uwetn̄kpọ esie. Mbemiso nnyịn ikerede iban̄a ikọ esie, nte ededi, domo ndida n̄kụt ke enyịn ikike utọ isan̄ oro. Kere nte otuowo ẹyịrede udịm ke efak nte mmọ ẹsan̄ade sụn̄sụn̄ ebe Via Triumphalis ẹnyụn̄ ẹdọkde n̄wan̄ade n̄wan̄ade usụn̄ oro akade temple Jupiter ke enyọn̄ Obot Capitoline Rome.
“Ufuọn̄ ufịk ẹtode mme ufuọn̄n̄kpọ ẹmi ẹfọpde ẹma ẹsisuana ẹyọhọ temple ye mme efak, anamde ofụm ọyọhọ ye ufuọn̄ mmọ,” ntre ke eyen ukpepn̄kpọ oro, James M. Freeman ekewet. “Mbon ufọkmbet ye ikpọ nditọisọn̄ obio ẹyedu ke isan̄ oro, emi edidu mmọ ke ntem ọnọde andikan oro ukpono. Ẹma ẹsimen mme ata ọsọn̄urua n̄kpọ mbụme, utọ nte gold, silver, nsio nsio orụk n̄kpọekọn̄, mme mbiet, ata nti ye mme ọsọn̄urua utom usọ, ye kpukpru n̄kpọ oro andikan m̀mê enyeoro ẹkande ẹbatde ke ata ọsọn̄urua n̄kpọ, ẹsan̄a man ofụri owo ẹkụt ke obio. Ẹma ẹsinyịk mbon-n̄kpọkọbi ekọn̄ n̄ko ndisan̄a ke isan̄ emi. Etubom ekọn̄, oro ẹnọde ukpono edikan mi, awat ke san̄asan̄a ukpatn̄kpọ emi enan̄-mbakara inan̄ ẹdụride. Ẹkesida gold ẹbana ọfọn̄idem esie, ẹnyụn̄ ẹda flawa ẹbana ibio ọfọn̄idem esie. N̄kọk eto laurel ama esidu ke ubọk nnasia esie, mmọnyọ onyụn̄ odu ke ufien esie; ke adan̄aemi enye ekesiyarade ekara flawa laurel eke mbon Delphi ke ọkpọiso esie. Ke ufọt mbonekọn̄ ẹmi ẹkpọkde ukịbe ye mbio obio oro ẹsiode n̄kpọ itoro mi, ẹma ẹsimen andikan emi ebe ke efak ẹka temple Jupiter, ke ebiet ẹkesifọpde mme uwa, ke oro ebede ẹma ẹsinam akwa usọrọ ke temple.”
Paul akada isan̄ idara edikan oro ke uwụtn̄kpọ ke ini enye ekewetde udiana n̄wed esie ọnọ mme Christian ke Corinth ke isua 55 eke Eyo Nnyịn. Enye ọkọdọhọ ete: “Ekọm enyene Abasi, emi adade nnyịn asan̄a ubọn̄ ubọn̄ ke Christ kpukpru ini, onyụn̄ adade nnyịn anam owo ẹkop ufịk ifiọk Esie ke kpukpru ebiet. Nnyịn itie nte edinem ufịk, emi Christ osion̄ode ọnọ Abasi, ye mmọemi ẹnyanyan̄a ye ye mmọemi ẹtatak; ye mmọemi, nte ufịk eke ọkọrọde n̄kpa ke n̄kpa, ye ye mmọ eken, nte ufịk eke ọkọrọde uwem ke uwem.”—2 Corinth 2:14-16.
Mi ẹwụt Paul ye mme Christian eken oro ẹyetde aran nte mbon oro ẹyakde idem ẹnọ Abasi “ke Christ.” Ẹwụt mmọ nte nditọ, mme adaidaha, ye mbonekọn̄ ẹmi ẹtienede ẹsan̄a ke udịm isan̄ Jehovah emi enye adade usụn̄ ke isan̄ idara edikan ke usụn̄ oro ẹsuande ufuọn̄. (Se Enyọn̄-Ukpeme eke July 15, 1990, page 10-15.) Uwụtn̄kpọ utọ isan̄ emi owụt n̄ko nte ke mmọ oro ẹsịnde eti mbụk Obio Ubọn̄ Abasi ẹnyene idotenyịn n̄kpa kpọt. Edi emi okpụhọde didie ntem ye mme anditiene Jesus oro ẹyetde aran! Mmọ ẹnyene idotenyịn edibọhọ ndụk uwem unana n̄kpa ke heaven ye Christ. Ndien nso kaban̄a mme anam-akpanikọ nsan̄a mmọ, ẹmi ẹyakde idem ẹnọ n̄ko? Mmọ ẹnyene idara idara idotenyịn edidu uwem ke paradise isọn̄, ke ebiet emi Abasi “[edi)kwọhọde kpukpru mmọneyet ke enyịn mmọ efep, n̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba.” (Ediyarade 21:1-4; Luke 23:43) Nte afo edi ubak idara idara otu emi?
Ẹwụt isio isio ndise ke Colossae 2:15 (NW), ke ebiet emi Paul ekewetde ete: “Ke onịmde mme andikara ye mme enyene-odudu iferi, [Abasi] owụt mmọ an̄wan̄wa nte se ẹkande, adade mmọ asan̄a ke isan̄ idara edikan ebe ke enye.” Ẹwụt mme andikara edide asua ye mme enyene-odudu ke idak Satan kpa Devil nte mbuotekọn̄ ye mbon-n̄kpọkọbi ke isan̄ idara edikan. Jehovah kpa Andikan onịm mmọ iferi onyụn̄ owụt mmọ an̄wan̄wa nte se ẹkande. Ẹkan mmọ “ebe ke enye,” oro edi, “eto ndutụhọ” Jesus. N̄kpa esie ke eto ama ọnọ isọn̄ kaban̄a edisio “n̄wed oro ẹkewetde ke ubọk” (kpa Ibet ediomi) mfep onyụn̄ anam mme Christian ekeme ndiwọrọ ufụn odudu ekịm Satan. (Colossae 2:13, 14, NW) Ikpowụt esịtekọm didie ntem iban̄a utọ uwọrọ ufụn Christian oro.