“Ebe Mme Adan̄a Eti Ibuot”

“SIA ekọn̄ ẹsitọn̄ọde ke esịt mme owo, edi ke esịt mme owo ke nnyịn inyene ndiwụk adaha emem.” (N̄wedibet Esop EM Esede Aban̄a Ukpepn̄wed, Ifiọk Ntaifiọk, ye Ido Edinam) Ye ikọ emi ke ekikere, ke 1993 se iwakde ikan ntaifiọk 500 ẹmi ẹkedụkde mbono uduọn̄ọ n̄kpọekọn̄ EM ẹma ẹkere ẹban̄a udeme oro ido ukpono enyenede ke ndibọp mme utọ adaha oro.

Jonathan Granoff, adade ke ibuot N̄ka Mme Ekpeibet Kaban̄a Ifụre Ererimbot, akada usụn̄ ke mbono oro. Enye ama ọdọhọ ete: “Udomo en̄wan ido ukpono ye eke ekpụk eyomfịn ebe mme adan̄a edu ntatenyịn, iso-ọfọn ebe mme adan̄a eti ibuot.” Ẹma ẹkot ẹto ikọ John Kenneth Galbraith in̄wan̄în̄wan̄ ke ini mbono oro ẹte: “Ẹmewot ata ekese owo ke enyịn̄ ido ukpono ẹkan nte ẹwotde ke kpukpru ekọn̄ ye oto-obot afanikọn̄ ke ẹtan̄de ẹdian ọtọkiet.”

Dr. Seshagiri Rao ama ọdọhọ ete: “Mbiaibọk usọbọ ẹkpenyene ndikọkọk idịghe ndinam mme udọn̄ọ ẹtara. Mme edinam ido ukpono ikpenyeneke ndinam usua ye afai afai en̄wan ẹtara ẹsịm kiet eken. Ẹkenam mmọ ndidi odudu ndinam n̄kemuyo odu. Ke ataata usụn̄, nte ededi, mmọ ẹsiwak ndinam n̄kpọ ke ẹnyụn̄ ẹsụk ẹnanam n̄kpọ nte odudu oro ọtọde ubahade.”

Ke ndusụk isua ẹmi ẹkebede, Catholic Herald eke London ama etịn̄ ete ke ẹkpekeme ndinyene emem “edieke mme ufọkabasi mfịn ẹkpediande uyo kiet ẹbiom ekọn̄ ikpe.” Nte ededi, n̄wedmbụk n̄kpọntịbe oro ama adian ete: “Nnyịn imọfiọk ite ke emi iditịbeke tutu amama.” Owo n̄ka nun Catholic kiet ọkọdọhọ ete: “Didie ke ererimbot okpokpụhọde ntem edieke kpukpru nnyịn ikpedemerede idap usenubọk kiet inyụn̄ inen̄ede ibiere ite ke nnyịn idikamake aba n̄kpọekọn̄, . . . ukem nte Mme Ntiense Jehovah!”

[Ebiet Ẹdade Ndise Ẹto ke page 32]

Tom Haley/Sipa Press