Ibuot 6
Eyen Un̄wọn̄ọ
UTU ke ndifiak nnyọn̄ Nazareth, Joseph ye Mary ẹsụhọ ke Bethlehem. Ndien ke ini Jesus edide usen itiaita ke emana, mmọ ẹnam ẹnịm enye mbobi, nte Ibet oro Abasi ọkọnọde Moses etemede. Nte an̄wan̄ade, edi ido n̄ko ndisio eyen erenowo enyịn̄ ke ọyọhọ usen itiaita. Mmọdo mmọ ẹsiode eyen mmọ enỵịn̄ oro, Jesus, nte angel Gabriel eketemede ke mbemiso.
Se ikande ọfiọn̄ kiet emebe, ndien Jesus edi usen 40 ke emana. M̀mọ̀n̄ ke ete ye eka esie ẹda enye ẹka idahaemi? Ẹka temple ke Jerusalem, emi odude itiat ifan̄ kpọt ọkpọn̄ ebiet oro mmọ ẹdụn̄de. Nte ekemde ye Ibet oro Abasi ọkọnọde Moses, usen 40 ke eyen erenowo ama akamana, eka ekenyene ndiwa uwa edinam asana ke temple.
Emi edi se Mary anamde. Nte enọ esie, enye amada n̄kpri inuen iba edi. Emi ayarade n̄kpọ aban̄a idaha uforo Joseph ye Mary. Ibet Moses owụt nte ke ẹkpenyene ndiwa ekpri eyenerọn̄ kiet, emi otịmde-tịm ọsọn̄ urua akan mme inuen. Edi edieke eka mîkemeke ndinọ emi, mbomon̄kụku m̀mê ibiom iba eyekem.
Ke esịt temple oro, akani eren kiet emen Jesus akama ke ubọk esie. Enyịn̄ esie edi Simeon. Abasi ama ayarade ọnọ enye nte ke enye idikpaha tutu enye okụt Christ, m̀mê Messsiah oro Jehovah ọkọn̄wọn̄ọde. Ke ini Simeon odụkde temple ke usen emi, edisana spirit ada enye okowụt eyen oro Joseph ye Mary ẹkamade.
Nte Simeon akamade Jesus enye ọkọm Abasi, ete: “Kemi, O Ọbọn̄, Afo ke ayak owo Fo ọnyọn̄ ke ifụre, nte Afo ọkọdọhọde; koro enyịn mi ẹmekụt edinyan̄a Fo, eke Afo okonịmde ke iso kpukpru mme idụt; ete, edi un̄wana eke ediyarade n̄kpọ ọnọ mme Gentile onyụn̄ edi ubọn̄ Fo Israel.”
Joseph ye Mary ẹdu ke n̄kpaidem ke ini mmọ ẹkopde emi. Ekem Simeon ọdiọn̄ mmọ onyụn̄ ọdọhọ Mary ete ke ẹnịm eyen esie “man ediwak owo ke Israel ẹduọn̄ọ ẹnyụn̄ ẹdaha ẹda” ye nte ke mfụhọ, ukem nte edisọp ofụt, eyekịm Mary ukpọn̄.
Owo oro odude ke edinam emi edi prọfet an̄wan oro edide isua 84 ke emana, emi ekerede Anna. Ke akpanikọ, enye isinanake ke temple. Kpa idaha oro enye odụk edi onyụn̄ ọtọn̄ọ ndinọ Abasi ekọm nnyụn̄ ntịn̄ nnọ kpukpru owo ẹmi ẹyomde ndikpan̄ utọn̄ mban̄a Jesus.
Joseph ye Mary ẹdat esịt ẹban̄a n̄kpọntịbe emi didie ntem ke temple! Ke akpanikọ, kpukpru ẹmi ẹsọn̄ọ ẹnọ mmọ nte ke eyen emi edi Enyeemi Abasi Ọkọn̄wọn̄ọde. Luke 2:21-38; Leviticus 12:1-8.
▪ Nte an̄wan̄ade, ini ewe ke ekedi ido ndisio eyeneren Israel enyịn̄?
▪ Nso ke ẹkeyom eka eyen Israel anam ke ini eyen esie ekedide usen 40 ke emana, ndien didie ke edinam se ẹyomde emi ayarade idaha uforo Mary?
▪ Mmanie ẹdiọn̄ọ enyeemi Jesus edide ke edinam emi, ndien didie ke mmọ ẹwụt emi?