Ikpehe 11
Itiat Idakisọn̄ Obufa Ererimbot Oro Ẹsịnde Kemi
1, 2. Ke edisu oro prọfesi Bible osude, nso itịbe ke enyịn nnyịn?
SE IDIDE utịbe utịbe n̄ko edi akpanikọ oro nte ke ẹsịn itiat idakisọn̄ obufa ererimbot Abasi ke idem idahaemi, kpa ke ukem ini emi akani ererimbot Satan abiarade. Ke enyịn nnyịn, Abasi ke atan̄ mme owo ke kpukpru idụt obok onyụn̄ otịm mmọ esịn ke itiat idakisọn̄ obufa n̄kaowo eke isọn̄ oro edisọpde ndida itie ererimbot mfịn oro mîdianake kiet. Ke Bible, ke 2 Peter 3:13, ẹkot obufa n̄kaowo emi “obufa isọn̄.”
2 Prọfesi Bible ọdọhọ n̄ko ete: “Ama ekem ke utịt eyo [ini emi nnyịn idude uwem idahaemi] . . . , ediwak obio ẹyeka ẹkedọhọ, ẹte, Mbufo ẹdi, nnyịn idọk ke obot Jehovah [utuakibuot akpanikọ esie], . . . ndien enye eyekpep nnyịn ido esiemmọ, nnyịn iyenyụn̄ isan̄a ke usụn̄ esie.”—Isaiah 2:2, 3.
3. (a) Prọfesi Isaiah osu mmanie ke idem? (b) Didie ke akpatre n̄wed Bible etịn̄ n̄kpọ aban̄a emi?
3 Prọfesi oro ke osu idahaemi ke otu mbon oro ẹsụkde ibuot ẹnọ ‘ido Abasi, ẹnyụn̄ ẹsan̄ade ke usụn̄ esie.’ Akpatre n̄wed Bible etịn̄ aban̄a n̄kaowo ofụri ererimbot emi ẹmade emem mi nte “akwa otuowo . . . eke ẹtode ke kpukpru obio ye esien ye idụt ye usem,” kpa ata otu nditọete ofụri ererimbot ẹmi ẹnamde n̄kpọ Abasi ke edidianakiet. Ndien Bible ọdọhọ n̄ko ete: “Mmọ oro ẹdi mmọemi ẹketode ke akwa ukụt ẹwọn̄ọ.” Oro edi, mmọ ẹyebọhọ utịt idiọk editịm n̄kpọ emi.—Ediyarade 7:9, 14; Matthew 24:3.
Ata Otu Nditọete Ofụri Ererimbot
4, 5. Ntak emi otu nditọete ofụri ererimbot eke Mme Ntiense Jehovah ekemede ndidu?
4 Ediwak miliọn Mme Ntiense Jehovah ke esịt akpanikọ ẹdomo ndidu uwem ke n̄kemuyo ye mme item ye usụn̄ Abasi. Idotenyịn nsinsi uwem mmọ owụhọ ke obufa ererimbot Abasi. Ke ndidu uwem eke usen ke usen mmọ ke nsụkibuot nnọ ibet Abasi, mmọ ẹwụt enye unyịme emi mmọ ẹnyịmede ndisụk ibuot nnọ usụn̄ edikara esie idahaemi ye ke obufa ererimbot. Ke kpukpru ebiet, inamke n̄kpọ m̀mê mmọ ẹto idụt m̀mê orụk ewe, mmọ ẹkop uyo ẹnọ mme ukem edumbet—mmọ oro Abasi onịmde ke Ikọ esie. Oro edi ntak emi mmọ ẹdide ata otu nditọete ofụri ererimbot, kpa obufa n̄ka ererimbot emi Abasi anamde.—Isaiah 54:13; Matthew 22:37, 38; John 15:9, 14.
5 Mme Ntiense Jehovah ibọhọ itoro ida ke mmọ ndidi otu nditọete ofụri ereimbot ẹmi ẹnanade mbiet. Mmọ ẹmefiọk ẹte ke emi edi utịp okopodudu spirit Abasi emi anamde utom ke idem mme owo oro ẹsụkde ibuot ẹnọ ibet esie. (Utom 5:29, 32; Galatia 5:22, 23) Emi edi edinam Abasi. Nte Jesus ọkọdọhọde, “se isọn̄de ikan owo ikanke Abasi.” (Luke 18:27) Ntre Abasi oro akanamde ekondo ekeme ndidu ke nsinsi edi enyeoro anamde n̄ka obufa ererimbot n̄ko oro edidude ke nsinsi.
6. Ntak emi ẹkemede ndikot otu nditọete eke Mme Ntiense Jehovah utịben̄kpọ eyomfịn-e?
6 Ntem, ẹkeme ndikokụt usụn̄ edikara Jehovah ke obufa ererimbot ke se enye osion̄ode edi ke itiat idakisọn̄ oro ẹsịnde kemi ẹnọ obufa ererimbot oro. Ndien se enye anamde ye Mme Ntiense esie, ke usụn̄ifiọk kiet, edi utịben̄kpọ eyomfịn. Ntak-a? Koro enye ọmọbọp Mme Ntiense Jehovah esịn ke ata otu nditọete ofụri ererimbot, kpa kiet oro mme ubahade ubahade udọn̄ idụt, orụk, m̀mê ido ukpono mîdikemeke ndibiat tutu amama. Ke adan̄aemi Mme Ntiense ẹwakde ke mme itie miliọn ẹnyụn̄ ẹdụn̄de ke se iwakde ikan idụt 200, mmọ ẹdiana ọtọkiet nte owo kiet ke mbọbọ oro mîkemeke ndikịbe. Otu nditọete ofụri ererimbot emi, oro ananade mbiet ke kpukpru mbụk, ke akpanikọ edi utịben̄kpọ eyomfịn—se Abasi anamde.—Isaiah 43:10, 11, 21; Utom 10:34, 35; Galatia 3:28.
Ndidiọn̄ọ Ikọt Abasi
7. Jesus ọkọdọhọ ke ẹdisan̄a didie ẹdiọn̄ọ mme ata anditiene imọ?
7 Didie ke ẹkeme ndikaiso mbiere mbon oro Abasi adade nte itiat idakisọn̄ obufa ererimbot esie? Ọfọn, mmanie ẹsu mme ikọ Jesus ke John 13:34, 35? Enye ọkọdọhọ ete: “Mmọnọ mbufo obufa ibet nte, Mbufo ẹma kiet eken; nte, mbufo nde ẹma kiet eken kpa nte n̄kamade mbufo. Mbufo ẹma ẹma kiet eken, kpukpru owo ẹyeda oro ẹfiọk ẹte mbufo ẹdi mbet Mi.” Mme Ntiense Jehovah ẹnịm mme ikọ Jesus ke akpanikọ ẹnyụn̄ ẹnam mmọ. Nte Ikọ Abasi etemede, mmọ “enyene ufiop ufiop ima ke otu [idemmọ].” (1 Peter 4:8) Mmọ “ẹsịne ima, emi edide se ibọpde uwem adiana inam ọfọn ama.” (Colossae 3:14) Ntre ima nditọete edi “itai” oro omụmde mmọ adian ọtọkiet ke ofụri ererimbot.
8. Didie ke 1 John 3:10-12 akaiso anam ẹdiọn̄ọ ikọt Abasi?
8 N̄ko, 1 John 3:10-12 ọdọhọ ete: “Ẹda emi ẹyarade ẹfiọk nditọ Abasi ye nditọ Satan; baba owo kiet eke mînamke edinen ido idịghe eke Abasi, ndien edi ntre ye owo emi mîmaha eyenete esie. Koro emi edi etop emi mbufo ẹkekopde toto ke editọn̄ọ, ẹte, nnyịn ikpama kiet eken; ikûbiet Cain, emi ekedide eke andidiọk, onyụn̄ owotde eyenete esie.” Ntem, ikọt Abasi edi otu nditọete ofụri ererimbot, oro mîdịghe mbon afai.
N̄kpọ Efen Ndida Ndiọn̄ọ
9, 10. (a) Ewe utom ke ẹdida ẹdiọn̄ọ mme asan̄autom Abasi ke ukperedem ini? (b) Didie ke Mme Ntiense Jehovah ẹsu Matthew 24:14?
9 Usụn̄ efen odu ndida ndiọn̄ọ mme asan̄autom Abasi. Ke prọfesi esie oro aban̄ade utịt ererimbot, Jesus ama etịn̄ aban̄a ediwak n̄kpọ ẹmi ẹdinịmde ikpehe ini emi idiọn̄ọ nte ukperedem ini. (Se Ikpehe 9.) Ẹsiak akpan n̄kpọ kiet ke prọfesi emi ke mme ikọ esie ke Matthew 24:14 ẹte: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.”
10 Nte nnyịn imokụt prọfesi oro osude? Ih. Tọn̄ọ nte ukperedem ini ọkọtọn̄ọ ke 1914, Mme Ntiense Jehovah ẹmekwọrọ eti mbụk Obio Ubọn̄ Abasi ke ofụri ererimbot ke ido oro Jesus okowụkde, oro edi, ke mme ufọk owo. (Matthew 10:7, 12; Utom 20:20) Ediwak miliọn Mme Ntiense ẹsika ẹbịne mme owo ke kpukpru idụt man ẹketịn̄ ẹnọ mmọ ẹban̄a obufa ererimbot. Emi amada okosịm afo ndibọ ekpri n̄wed emi, sia utom Mme Ntiense Jehovah esịnede edimịn̄ ye edisuan ediwak biliọn n̄wed ẹban̄ade Obio Ubọn̄ Abasi. Nte afo ọmọfiọk aban̄a owo efen ekededi oro ọkwọrọde aban̄a Obio Ubọn̄ Abasi to ke ufọk sịm ufọk ke ofụri ererimbot? Ndien Mark 13:10 owụt ete ke ẹnyene “ndibemiso” nnam utom edikwọrọ ye edikpep owo n̄kpọ emi, mbemiso utịt edide.
Ndibọrọ Udiana Akwa Eneni
11. Nso efen ke Mme Ntiense Jehovah ẹnam ke ndisụk ibuot nnọ ukara Abasi?
11 Ke ndisụk ibuot nnọ ibet ye mme edumbet Abasi, Mme Ntiense Jehovah ẹmenam n̄kpọ efen. Mmọ ẹwụt ẹte ke Satan ekedi osu nsu ke ini enye ọkọdọhọde ete ke mme owo ikpekemeke ndinam akpanikọ nnọ Abasi ke idak idomo, ke ntem ẹbọrọde udiana akwa eneni oro, emi abuanade nsọn̄ọnda owo. (Job 2:1-5) Ke edide n̄ka emi ediwak miliọn owo oro ẹtode kpukpru idụt ẹnamde, Mme Ntiense ẹwụt edinam akpanikọ nnọ ukara Abasi, nte otu kiet. Okposụkedi mmọ ẹdide mme anana mfọnmma owo, mmọ ẹsọn̄ọ ẹda ke n̄kan̄ Abasi ke eneni itie edikara ofụri ekondo, kpa ye mfịghe otode Satan.
12. Ke mbuọtidem mmọ, mmanie ke Mme Ntiense ẹkpebe?
12 Mfịn, ediwak miliọn Mme Ntiense Jehovah ẹmi ẹdian ikọ ntiense mmọ ke eke anyan udịm mme ntiense eken ke ini edem oro ẹkenamde akpanikọ ẹnọ Abasi. Ndusụk ke otu mmọ ẹkedi Abel, Noah, Job, Abraham, Sarah, Isaac, Jacob, Deborah, Ruth, David, ye Daniel, ke ndisiak ifan̄ kpọt. (Mme Hebrew, ibuot 11) Nte Bible ọdọhọde, mmọ ẹdi ‘ediwak otu ntiense ẹmi ẹnamde akpanikọ.’ (Mme Hebrew 12:1) Mmọemi ye mbon efen esịnede mme mbet Jesus ẹma ẹmụm nsọn̄ọnda ke Abasi ẹkama. Ndien Jesus ke idemesie ama ọnọ akakan uwụtn̄kpọ ke ndimụm mfọnmma nsọn̄ọnda n̄kama.
13. Ewe ikọ Jesus ẹban̄ade Satan ẹdi akpanikọ?
13 Emi owụt ke se Jesus eketịn̄de aban̄a Satan ọnọ mme adaiso ido ukpono edi akpanikọ: “Edi kemi mbufo ẹyom Mi ndiwot, kpa owo emi n̄kasiande mbufo akpanikọ, eke n̄kokopde ke inua Abasi . . . Mbufo ẹdi nditọ ete mbufo, kpa Satan, ẹnyụn̄ ẹyom ndinam obukpo udọn̄ ete mbufo. Enye edi owotowo toto ke editọn̄ọ, ikonyụn̄ isọn̄ọke ida ke akpanikọ, koro enye mînyeneke akpanikọ ke esịt esie. Ke ini enye osude nsu, enye osio se idude ke esịt esie etịn̄: koro enye edi osu nsu, ye ete nsu.”—John 8:40, 44.
Ewe ke Afo Emek?
14. Nso itịbe inọ itiat idakisọn̄ obufa ererimbot idahaemi?
14 Itiat idakisọn̄ obufa ererimbot emi Abasi esịnde idahaemi ke n̄ka ofụri ererimbot eke Mme Ntiense Jehovah ke enen̄ede okop odudu akan. Ke isua kiet kiet ediwak tọsịn owo ke mme itie ikie, ọkọn̄ọde ke nnennen ifiọk, ke ẹda ifụre uduak mmo ẹnam n̄kpọ ke ndinyịme ukara Abasi. Mmọ ẹmekabade ẹdi ubak n̄ka obufa ererimbot, ẹsọn̄ọ ẹda ke n̄kan̄ Abasi ke eneni itie edikara ofụri ekondo, ẹnyụn̄ ẹwụt Satan nte osu nsu.
15. Ewe utom edibahade ke Jesus anam ke eyo nnyịn?
15 Ke ndimek ukara Abasi, mmọ ẹdot ndidu ke “ubọk nnasia” Christ nte enye abaharede “erọn̄” ye “ebot.” Ke prọfesi esie oro aban̄ade ukperedem ini, Jesus ama ebemiso etịn̄ ete: “Ẹyebon kpukpru mme idụt ke iso Esie: Enye eyenyụn̄ abahade mmọ kiet ye eken, nte emi ekpemerọn̄ abaharede erọn̄ ye ebot; ndien eyenịm erọn̄ ke ubọk nnasia Esie, ye ebot ke ufien.” Erọn̄ ẹdi mbon nsụhọdeidem oro ẹbuanade ye nditọete Christ ẹnyụn̄ ẹnọde mmọ ibetedem, ẹsụkde idem ẹnọ ukara Abasi. Ebot ẹdi mbon nsọn̄ibuot ẹmi ẹsịnde nditọete Christ mînyụn̄ inamke n̄kpọ ndomokiet ndinọ ukara Abasi ibetedem. Ye nso utịp? Jesus ọkọdọhọ ete (NW): “Mmọemi [ebot] ẹyedaha ẹkedụk ke nsinsi edisịbe mfep, edi ndinen owo [erọn̄] ẹdaha ẹkedụk ke nsinsi uwem.”—Matthew 25:31-46.
16. Nso ke ana afo anam edieke afo oyomde ndidu uwem ke Paradise oro edide?
16 Ke akpanikọ, Abasi ekere aban̄a nnyịn! Ke mîbịghike enye eyenọ inem inem paradise isọn̄. Nte afo omoyom ndidu uwem ke Paradise oro? Ke edide ntre, wụt esịtekọm fo ke enọ Jehovah ke ndikpep n̄kpọ mban̄a enye nnyụn̄ nnam se afo ekpepde. “Mbufo ẹyom Jehovah, ke ini ẹkemede ndikụt enye, ẹseme ẹkot enye, ke ini enye ekperede: yak idiọkowo ọkpọn̄ usụn̄ esie, yak oburobụt owo ọkpọn̄ ekikere esie: onyụn̄ afiak etiene Jehovah: ndien enye eyetua enye mbọm.”—Isaiah 55:6, 7.
17. Ntak emi ini mîdụhe ndibiat ke ndimek enyeemi afo edinamde n̄kpọ ọnọ?
17 Ini idụhe ndibiat. Utịt akani editịm n̄kpọ emi enen̄ede ekpere. Ikọ Abasi ọnọ owo item ete: “Ẹkûma ererimbot, ye se idude ke ererimbot. Edieke owo ekededi amade ererimbot, ima Ete idụhe enye ke esịt. . . . Ndien ererimbot ke ebebe efep, ye mbumek esie; edi owo eke anamde se Abasi amade ododu ke nsinsi.”—1 John 2:15-17.
18. Ewe usụn̄ edinam edin̄wam fi ndisak iso nse edidu uwem ke utịbe utibe obufa ererimbot Abasi ye mbuọtidem?
18 Ke ẹnọ ikọt Abasi ukpep idahaemi ẹben̄e nsinsi uwem ke obufa ererimbot. Mmọ ke ẹkpep mme usọ eke spirit ye mme usụn̄ usọ efen oro ẹyomde man ẹda ẹfori paradise. Nnyịn ikpak fi ite emek Abasi nte Andikara onyụn̄ ọnọ utom unyan̄a uwem oro enye oyomde ẹnam ke ofụri isọn̄ mfịn ibetedem. Kpep Bible ye Mme Ntiense Jehovah, nyụn̄ di difiọk Abasi oro enen̄erede ekere aban̄a fi oro edinyụn̄ adade utịt ọsọk ndutụhọ. Ke usụn̄ emi afo n̄ko emekeme ndikabade ndi ubak itiat idakisọn̄ obufa ererimbot. Adan̄aoro afo ke mbuọtidem emekeme ndisak iso nse edinyene mfọn Abasi ye edidu uwem ke nsinsi ke utịbe utịbe obufa ererimbot oro.
[Ndise ke page 31]
Mme Ntiense Jehovah ẹnyene ata otu nditọete ofụri ererimbot
[Ndise ke page 32]
Ke ẹsịn itiat idakisọn̄ obufa ererimbot Abasi kemi