Unọ Ukpep Gilead ke Edisana Mbuọtidem
“ẸMENỌ nditọ ufọkn̄wed nnyịn ukpep ke edisana mbuọtidem.” Mmọemi ẹkedi mme ikọ oro ẹkedade ẹberede ndutịm ukụre ukpep ọyọhọ otu 95 eke Watchtower Bible School of Gilead, oro ẹkenịmde ke Sunday, September 12, 1993. Ke usenubọk oro Brọda George Gangas ama ada isenowo ye mbonufọk Bethel owo 4,614 oro ẹkesopde idem ke Ufọk Mbono Jersey City usụn̄ ke akam. Brọda Gangas edi owo ufọk Bethel ke isua 65 ndien ke edide isua 97 ke emana edi owo Otu Ukara oro ọsọn̄de akan.
Albert Schroeder, emi n̄ko edide owo Otu Ukara ye etieibuot okpokoro ndutịm oro, ama ọdọhọ ete: “Ke ọfiọn̄ ition ukpepn̄kpọ Gilead ọkọkọn̄ọ ke edisana mbuọtidem.” Edi nso idi “edisana mbuọtidem”? Enye ama anam an̄wan̄a ete ke “edisana mbuọtidem” emi, oro ẹtịn̄de ẹban̄a ke Jude 20, edi ofụri udịm udịm akpanikọ Bible. Ntre ukpepn̄kpọ Gilead ọkọn̄ọ ke Ikọ Jehovah, kpa Bible, emi edide akpan n̄wed ukpepn̄kpọ.
Nditọ Ufọkn̄wed Ẹbọ Item Efen Efen
Akpa etịn̄ikọ ekedi John Stuefloten eke Kọmiti In̄wan̄ Enyọn̄-Ukpeme, emi eketịn̄de ikọ ke ibuotikọ oro “Ndibọ Ufọn Nto Odudu Mme Enyene-Ibuot Owo.” Bible ọdọhọ ete ke mmọ eke ‘ẹsan̄ade ye mme enyene-ibuot ẹyenyene ibuot.’ (Mme N̄ke 13:20) Ke ini ukpepn̄kpọ Gilead oro, nditọ ufọkn̄wed oro ẹma ẹbiat se ikande hour 900 ndikpep Bible. Brọda Stuefloten ama obụp nditọ ufọkn̄wed oro ete: “Didie ke odudu Jehovah editụk mbufo ke ini iso? Mbufo ẹdika idụt 18 ẹmi ẹnyenede n̄kpọ nte owo miliọn 170 ke ẹtan̄de ẹdian kiet. Ntre didie ke mbufo ẹdinyene odudu ke idem mme owo oro?” Ke ndiwụt eti ibuot oro otode Jehovah, mbufa isụn̄utom ẹmi ẹyekeme ndin̄wam mbon efen ndikabade ndi mme andituak ibuot nnọ Jehovah, kpa Ebiet emi eti ibuot oro mînyeneke utịt otode.
“Ndikabade Ndi Kpukpru N̄kpọ Nnọ Kpukpru Owo” ekedi ibuotikọ utịn̄ikọ efen, oro Lloyd Barry eke Otu Ukara ọkọnọde. (1 Corinth 9:22, King James Version) Ke n̄kpọ nte isua 45 ẹmi ẹkebede, Brọda Barry ke idemesie ekedi eyen ufọkn̄wed ke ọyọhọ otu 11 eke Gilead. Idahaemi ọyọhọ otu 95 ẹma ẹdara ndibọ ata eti item nto akani isụn̄utom emi ama ekenyene ediwak isua ifiọkutom ke esenidụt. Enye ama esịn udọn̄ ọnọ nditọ ufọkn̄wed ndisọsọp mmehe ye mme owo ke efakutom esenidụt mmọ ebe ke ndidiọn̄ọ ido edinam n̄kann̄kụk ye ke ndikpep usem n̄kann̄kụk oro. Enye ama ọdọhọ ete ke mfọnn̄kan usụn̄ ndinam emi edi ke ndibuaha nnyụn̄ nnam utom ọtọkiet ye mbon n̄kann̄kụk oro ọkọrọ ye ke ndikpep ido mmọ nnyụn̄ nda mmọ ndu uwem ke ini ekededi oro odotde.
Ekem, Dean Songer eke Kọmiti Ufọk Umịn̄n̄wed ama etịn̄ ikọ ke ibuotikọ oro ekedemerede owo udọn̄ “Ẹbọhọ Ufụn Utom.” Ke ama okodu ke utom uyọhọ-ini ke se ikande isua 35, Brọda Songer ọfiọk se ọwọrọde ndidu uwem oro ẹsede n̄kpọ kiet, mmemmem uwem, oro ẹwụkde ntịn̄enyịn ke utom oro ẹkamade ke ubọk, ẹbọhọde mme udọn̄ n̄kpọ obụkidem. Ndien oro edi se item emi enye ọkọnọde nditọ ufọkn̄wed oro ọkọwọrọde. Mme ọkwọ ikwọ ke temple Jehovah ikesinamke utom oro mme Levite eken ẹkesinamde man ẹyak idemmọ ẹsịn ọyọhọ ọyọhọ ke akpan utom mmọ. (1 Chronicles 9:33) Ukem ntre, mme isụn̄utom Gilead ẹmebọhọ mme utọ ọsọ n̄kpọ nte utom idịbi udia man mmọ ẹkeme ndiwụk ntịn̄enyịn ke akpan utom mmọ. Brọda Songer ama eberi ye ikọ item emi: “Ẹnam ekikere mbufo ese n̄kpọ kiet ẹnyụn̄ ẹnam uwem mbufo edi mmemmem. Mbiomo mbufo nte mbon oro ẹbọhọde ufụn utom edi ndinam utom uwemeyo ye okoneyo, ẹtorode Jehovah.”
Daniel Sydlik owo Otu Ukara ama adiana ye ibuotikọ oro “Ndikpep Mbon Efen Nte Ẹkemede Ndinyene Se Ifọnde Ikan ke Uwem.” Enye ama esịn udọn̄ ọnọ nditọ ufọkn̄wed “ndikpep idịghe ukpepn̄kpọ ido ukpono kpọt edi ndinyene uko oro ekemde ndiwụt mme owo se anade mmọ ẹnam man ẹnam uwem mmọ odu ke n̄kemuyo ye uduak Abasi.” Ana nti mme andikpep ẹdemede owo udọn̄ ẹnyụn̄ ẹnụk owo ndinam n̄kpọ. Enye ama ọdọhọ ete, “Ẹdu ke edidemede ndikpep mme owo ẹkọri nti edu Christian utu ke ndikpep sụk mme mbet ye mme ewụhọ,” onyụn̄ adian do ke utịtikọ ete: “Akan kpukpru n̄kpọ, ndima nditọete, ẹkpep idem mbufo ẹnyụn̄ ẹkpep mmọ en̄wen nte ẹwụtde ima, koro enye edide mfọnmma mbọbọ edidianakiet.”—1 Corinth 13:1-3; Colossae 3:14.
Ke ediwak ọfiọn̄ unọ ukpep ẹma ẹkebe, nditọ ufọkn̄wed oro ẹma ẹnen̄ede ẹma mme andikpep Gilead mmọ iba. Jack Redford, akani isụn̄utom ke idemesie, ekebem iso etịn̄ ikọ, ke ibuotikọ oro “Mbufo Ẹmemek Eti N̄kpọ.” Ke ererimbot mme Jew eset, mbemiso akakabarede edi apostle Christian, Paul ama enyene itie, ukpono, odudu, ye okụk. Edi ke N̄wed Mbon Philippi 3:8, Paul eketịn̄ aban̄a kpukpru ẹmi nte “mbio,” m̀mê “ndek,” nte ekemde ye edikabade Phillips. Esịt esie okodu ke utom, ndien enye ama emek eti n̄kpọ. Ke edide isio ye oro, ediwak ke otu ubonowo mfịn ẹwụt ebe ke se mmọ ẹmekde ke uwem ẹte ke mmimọ ida inyene obụkidem mmimọ nte ata akpan n̄kpọ ikan nsinsi uwem. Mme isụn̄utom Gilead ẹmemek eti n̄kpọ. Jack Redford ama eberi ke ndidọhọ: “Idụhe n̄kpọ ndomokiet oro ererimbot Devil ekemede ndinọ mbufo oro ẹkemede ndimen ndomo ye utom isụn̄utom. Ẹtịm ẹkpeme ọsọn̄urua ifetutom oro, ẹnyụn̄ ẹyak ererimbot ese aban̄a ndek esie!”
Ke isua 32 ẹmi ẹkebede, Ulysses Glass edi andikpep ke Gilead. Enye ama ọnọ nditọ ufọkn̄wed oro item unyọn̄ ke ibuotikọ oro “Abasi Ikpọn̄îkpọn̄ Ekeme Ndinam Eto,” ọkọn̄de utịn̄ikọ esie ke Psalm 1:3. Ifiọk ubotn̄kpọ eyomfịn akananam ikemeke ndikpebe ndibot eto, oro Abasi okobotde. Ke usụn̄ifiọk kiet, mme ata Christian ẹtie nte mme eto, oro Jehovah ọtọde onyụn̄ ọduọkde mmọn̄. Brọda Glass ama owụt ete ke ọfiọn̄ ition, “ẹma ẹda ọnọ-uwem idịm mmọn̄ ke Ikọ Abasi ẹduọk” nditọ ufọkn̄wed, nte mme eto ẹmi ẹdude ke ọtọwọk m̀mê paradise eke spirit. Edi, nte mme isụn̄utom, ana mmọ ẹkpeme “mbak n̄kpọ ekededi edibiat ndutịm orụn̄ eke spirit” mmọ. Ẹma ẹteme mmọ ‘ndikaiso n̄n̄wọn̄ mmọn̄ uwem otode Jehovah koro Abasi ikpọn̄îkpọn̄ ekeme ndinam eto.’
Edi owo Otu Ukara, Brọda Carey Barber ọkọnọ akpatre utịn̄ikọ. Ke ama akanam utom uyọhọ-ini isua 70, Brọda Barber ama ekeme nditịn̄ ikọ ye mbuọtidem ke ibuot nneme oro “Ẹnọ Jehovah San̄asan̄a Utuakibuot.” Ata ediwak ke otu ubonowo inọhọ Jehovah san̄asan̄a utuakibuot. (Deuteronomy 5:9) Nte ededi, nte Brọda Barber okowụtde, kpa ye unana mfọnmma nnyịn, “ẹkeme ndiyak idem ofụri ofụri nnọ Abasi.” Enye ama adian do ete: “Owo ndomokiet ikemede ndinen̄ede ndọhọ: ‘Devil akanam mi nnam enye.’” Edi Devil ekeme ndikan nnyịn edieke nnyịn itrede ndibiọn̄ọ enye. (James 4:7) Ndiyọhọ ke utom Jehovah edi mfọnn̄kan usụn̄ ndibiọn̄ọ Satan ye ererimbot esie nnyụn̄ nnọ Jehovah san̄asan̄a utuakibuot.
Ẹmemek Nte Mme Isụn̄utom
Ẹma ẹberi ndutịm usenubọk oro ye edinam edimek kpukpru nditọ ufọkn̄wed 46 oro nte mme isụn̄utom. Mme ọdọndọ 23 oro ẹma ẹbọ n̄weditoro oro ọdọhọde ubak ubak ete ke mme andikụre ukpep oro “ẹdot akpan akpan ndibuana ke utom unọ ukpep, ndimenede eti uduak ke enyọn̄ ndinyụn̄ nnam utom kaban̄a nsinsi emem ye ibet mfọnmma ndutịm ye edinen ido ke otu mme owo.” Ọyọhọ otu 95 eke Gilead oro ke akpanikọ eyedomo ndinam ubọn̄ ubọn̄ utom emi ke idụt 18 emi ẹnọde mmọ ẹka. Utom oro okpon ke ererimbot onyụn̄ esịne mme idụt ke Asia, Africa, Europe, Latin America, ye Caribbean.
Ke uwemeyo, ke ibio ibio Ukpepn̄kpọ Enyọn̄-Ukpeme oro Charles Woody eke Kọmiti Utịm Utom okonịmde ama okokụre, mbufa mme andikụre ukpep ke Gilead oro ẹma ẹwụt ndutịm nditọ ufọkn̄wed, ke ibuotikọ oro “Gilead Otịm Nnyịn Idem Ndinọ Ukpep Nte Mme Isụn̄utom.” Ikpehe edinam oro ama etre ye drama oro “Mme Edimek Oro Nnyịn Isakde Iso Ise.”
Ke aduai-owo idem ndutịm emi ama okokụre, mbufa isụn̄utom ẹmi ẹma ẹben̄e idem ndidi se ẹnọde ẹka n̄kan̄ isọn̄ mbinan̄ ndibuana “edisana mbuọtidem” ye mbon en̄wen.
[Ekebe ke page 26]
Ibat Otu Nditọ Ufọkn̄wed
Ibat idụt ẹtode: 7
Ibat idụt ẹnọde ẹka: 18
Ibat nditọ ufọkn̄wed: 46
Ibat mme ọdọ ndọ: 23
Isua emana ke ẹbaharede ukem ukem: 30.06
Isua ẹdude ke akpanikọ ke ẹbaharede ukem ukem 12.92
Isua ẹdude ke utom uyọhọ-ini ke ẹbaharede ukem ukem: 9.4
[Ndise ke page 26]
Mme Andikụre Ufọkn̄wed Ọyọhọ Otu 95 eke Watchtower Bible School of Gilead
Ke udịm enyịn̄ etienede mi, ẹtọn̄ọ ke udịm iso ẹnọ nọmba ẹka edem, ẹnyịn̄ ẹnyụn̄ ẹtọn̄ọ ke ufien ẹka nnasia ke udịm kiet kiet.
(1) Buelow, D.; Donzé, V.; Innes, S.; Fulk, N.; Billingsby, M.; Hoddinott, L.; Nygren, B.; Eriksson, L. (2) Boker, J.; Thomas, M.; Stedman, S.; Billingsby, D.; Waugh, I.; Purves, M.; Luttrell, M. (3) Jacobsen, T.; Boker, J.; Martínez, L.; Nilsson, E.; Purves, P.; Holt, L.; Larsen, M.; Jones, L. (4) Numminen, P.; Numminen, H.; Buelow, M.; Olson, W.; Holt, S.; Donzé, G.; DesJardins, C.; DesJardins, D. (5) Larsen, K.; Martínez, D.; Nygren, P.; Waugh, P.; Jones, D.; Hoddinott, J.; Thomas, G. (6) Innes, B.; Fulk, R.; Eriksson, A.; Nilsson, S.; Stedman, J.; Olson, K.; Jacobsen, F.; Luttrell, J.