Ndọn̄esịt Ẹnọde Mbon Oro ‘Spirit Obụn̄ọde’

MFỊN, ererimbot Satan ‘odoro ufiọn.’ (Ephesus 4:19; 1 John 5:19) Efịbe ye use ẹdu ntatara ntatara. Ke ediwak idụt mbahade 50 eke ikie m̀mê akande oro ke otu ndọ ẹsisụn̄ọ ke usiondọ. Ẹnyịme idan̄ ukemuduot ntatara ntatara. Afai afai idan̄—idan̄ n̄kanubọk—esiwak ndidu ke mbụk n̄kpọntịbe. Ndise idan̄ edi mbubehe emi akpade ediwak biliọn naira.—Rome 1:26, 27.

Ke otu ndiọk-n̄kan mbukpo edinam edi usabade nditọwọn̄ ẹmi mîduehe ke idan̄. Nte ọniọn̄ eke ererimbot Satan, usabade eyenọwọn̄ ke idan̄ “oto mme demon.” (James 3:15) Ke United States ikpọn̄, magazine Time ọdọhọ ete, “mme andikpep ye mme dọkta ẹsisịn ntọt en̄wan idan̄ emi awakde ebe 400,000 ẹmi ẹsọn̄ọde nte edide akpanikọ ke n̄wed ukara kpukpru isua.” Ke ini emi mbon unọmọ ẹsabarede mi ẹkponide ẹkabade ikpọ owo, ediwak ẹsisụk ẹnyenyene ubiak ubiak unan, ndien mme unan oro ẹsinen̄erede ẹtụk mmọ! Bible ọdọhọ ete: “Spirit [ntụhọ ekikere, ntụk esịtidem ye mme ekikere] owo ekeme ndibiom udọn̄ọ esie: edi ama edi spirit eke obụn̄ọde [enyenede unan, ubiak], anie ekeme ndiyọ enye?”—Mme N̄ke 18:14.

Eti mbụk Obio Ubọn̄ Abasi edemede udọn̄ kpukpru orụk owo, esịnede “mmọ eke esịt mmọ obụn̄ọde” ye mbon “n̄kpa-esịt.” (Isaiah 61:1-4) Idịghe n̄kpọ n̄kpaidem, ediwak owo ẹmi ẹkopde ubiak eke ntụk ẹyerede ikot emi: “Owo eke itọn̄ asatde, yak enye edi. Owo eke amade, yak edi edibọ mmọn̄ uwem ke ikpîkpu.” (Ediyarade 22:17) Esop Christian ekeme ndidi ebiet ndọn̄esịt ọnọ mmọemi. Mmọ ẹkop idatesịt ndifiọk nte ke ibịghike ndutụhọ edidi n̄kpọ eset. (Isaiah 65:17) Tutu osịm ini oro, nte ededi, mmọ ẹkeme ndiyom ‘ndọn̄esịt’ ẹnyụn̄ ẹyom ẹte ‘ẹbọp’ unan mmọ. Nte odotde Paul ama ọnọ mme Christian item ete: “Ẹsọn̄ọ mbon iduọ-esịt idem, ẹkama mbon mmem-idem, ẹnyene anyan ime ye kpukpru owo.”—1 Thessalonica 5:14.

“Mme Ekikere Ẹmi Ẹsopde”

Ke mme isua ndondo emi ‘esịt omobụn̄ọ’ ndusụk owo ndien edi ọkpọsọn̄ n̄kpọ ọnọ mmọ en̄wen ndifiọk ntak. Mmọ ẹdi ikpọ owo ẹmi, otode ke se mmọ ẹnamde an̄wan̄a nte “mme ekikere ẹmi ẹsopde,” ẹdọhọde ke ẹma ẹsabade mmimọ ke idan̄ ke ini ikedide nditọwọn̄.a Ndusụk owo inyeneke ekikere iban̄a nte ẹkedan̄de mmọ tutu, ke mbuari, mmọ ẹfiak ẹti mme n̄kpọntịbe ye “mme ekikere” ini edem ẹban̄ade akwa owo (m̀mê ikpọ owo) oro akasabarede mmọ ke ini mmọ ẹkedide uyen. Nte owo ekededi ke esop Christian enyene utọ ntịme ntịme ekikere oro? Ih, ke ibat ibat idụt, ndien mmọemi ẹma ẹkeyak idem ẹnọ mi ẹkeme ndidu ke ọkpọsọn̄ nnanenyịn, iyatesịt, ubiomikpe, bụt, m̀mê ndobo. Ukem nte David ekeme nditie mmọ nte ẹdu nsannsan ẹkpọn̄ Abasi ndien ẹseme ẹte: “O Jehovah, nsinam afo adade anyan ebiet? Nsinam odịbede ke ini nnanenyịn?”—Psalm 10:1.

Nta mme ese n̄kpọ mban̄a nsọn̄idem ekikere itịmke ifiọk ediwak ikpehe “ekikere” ẹmi. Edi, mme utọ “ekikere” oro ekeme ndifịna idaha eke spirit mme Christan ẹmi ẹma ẹkeyak idem ẹnọ. Ntre nnyịn idụn̄ọde Ikọ Abasi ye mbuọtidem kaban̄a ndausụn̄ ke ndise mban̄a mmọ. Bible ọnọ “ọniọn̄ ke kpukpru nde.” (2 Timothy 2:7; 3:16) Enye n̄ko an̄wam kpukpru mbon oro emi ebehede ndinyene mbuọtidem ke Jehovah, “Ete mbọm ye Abasi kpukpru ndọn̄esịt: emi ọdọn̄de nnyịn esịt ke kpukpru ukụt nnyịn.”—2 Corinth 1:3, 4.

Nte Emi Ama Enen̄ede Otịbe?

Ke ererimbot ekese eneni ẹdu kaban̄a se “ekikere” ẹmi ẹdide ye m̀mê ke nso udomo ke mmọ ẹda ẹban̄a mme n̄kpọ ẹmi ẹkenen̄erede ẹtịbe. Mme Ntiense Jehovah “idịghe eke ererimbot” inyụn̄ itieneke ibuana ke eneni emi. (John 17:16) Nte ekemde ye mme ntọt ẹmi ẹmịn̄de, ẹwụt ke “mme ekikere” ẹmi ẹsinen ndusụk ini. Ke uwụtn̄kpọ, ke Frank Fitzpatrick, asan̄autom insurance kiet, “eketide” nte ke oku kiet ama adan̄ imọ, n̄kpọ nte owo ikie en̄wen ẹma ẹwọrọ ẹdi ndidọhọ ke ukem oku oro n̄ko ama asabade mmimọ. Ẹdọhọ ke oku oro ama onyịme ke ima inam edisabade oro.

Odot ẹtịm ẹfiọk, nte ededi, nte ke ediwak ibat mme owo ikemeke ndisọn̄ọ “mme ekikere” mmọ. Ndusụk mbon ẹmi ẹkụtde ukụt ke usụn̄ emi ẹsiti in̄wan̄în̄wan̄ nte ẹkesabarede mmọ mîdịghe nte ẹkenamde emi ke akpan ebiet kiet. Nte ededi, ke ukperedem, ata uyarade emi edide isio ye oro esinam an̄wan̄a nte ke ọyọhọ ntọt ẹmi “ẹtide” mi ikemeke ndidi akpanikọ.

Ndinọ Ubọhọ

Edi, didie ke ẹkeme ndinọ mbon ẹmi ‘spirit obụn̄ọde’ ndọn̄esịt ke ntak mme utọ “ekikere” oro? Ti n̄ke Jesus eke eti owo Samaria. Mbon n̄wo ẹkesobo ye eren kiet, ẹmia, ẹnyụn̄ ẹbọ mme inyene esie. Ke ini owo Samaria ekedide, mbọm ama anam enye aban̄a owo emi akadade unan mi. Nso ke enye akanam? Ndi enye ama eyịre ndikop kpukpru ntọt aban̄ade umia oro? Mîdịghe ndi owo Samaria oro ama ọdọhọ etịn̄ nte mbon n̄wo oro etiede ndien ebịne mmọ usọp usọp? Baba. Eren oro ama ada unan! Ntre owo Samaria oro ama ọsọbọ mme unan oro sụn̄sụn̄ onyụn̄ emen enye ke ima aka ufọkisen ke ebiet emi enye ekemede ndifiak n̄kop nsọn̄idem.—Luke 10:30-37.

Edi akpanikọ, ukpụhọde odu ke ufọt unan ikpọkidem ye ‘spirit obụn̄ọde’ emi otode ataata edisabade ke idan̄ eke ini uyen. Edi mbiba ẹsinam ẹnyene akwa ndutụhọ. Ntem, se owo Samaria akanamde ọnọ owo Jew emi akadade unan owụt se ẹkemede ndinam man ẹn̄wam ekemmọ Christian emi okụtde ukụt. Akpa n̄kpọ ndinam edi ndinọ ima ima ndọn̄esịt ye un̄wam man enye afiak okop nsọn̄idem.

Devil ama ada ukụt ọsọk anam-akpanikọ Job, nte an̄wan̄ade onịmde ke akpanikọ nte ke ubiak eke ntụk m̀mê eke ikpọkidem ekeme ndibiat nsọn̄ọnda esie. (Job 1:11; 2:5) Toto ke ini oro, Satan esiwak ndidomo ndida ndutụhọ—edide enye anam oro nnennen m̀mê mînamke—man anam mbuọtidem mme asan̄autom Abasi emem. (Men 2 Corinth 12:7-9 domo.) Nte nnyịn imekeme ndiyịk nte ke Devil idahaemi ada edisabade eyenọwọn̄ ye “n̄kpa-esịt” ediwak ikpọ owo ẹmi ẹbọde ndutụhọ ẹban̄a emi (m̀mê oro “mme ekikere” ẹfịnade nte ke ẹma ẹsobo oro) man odomo ndinam mbuọtidem mme Christian emem? Ukem nte Jesus ke ini okodude ke idak idomo Satan, Christian emi okopde ubiak edi emi ọsọn̄ọde ada esịn ndiduọk nsọn̄ọnda esie ọdọhọ ete: “Daha Mi ke usụn̄, Satan.”—Matthew 4:10.

Kop Nsọn̄idem ke N̄kan̄ eke Spirit

“Asan̄autom emi anamde akpanikọ, onyụn̄ enyenede ọniọn̄” emịn̄ ntọt ndin̄wam ndise mban̄a unan eke ntụk ye eke spirit emi otode ntak edisabade eyenọwọn̄. (Matthew 24:45-47) Ifiọk n̄kpọntịbe owụt nte ke owo ndutụhọ oro enyene un̄wam edieke enye ekemede ndiberi edem ke ‘odudu Ọbọn̄ ye ubom ukeme esie,’ esịnede “ofụri n̄kpọekọn̄ Abasi.” (Ephesus 6:10-17) N̄kpọekọn̄ emi esịne “akpanikọ” Bible, emi ayararede Satan nte akpatre asua onyụn̄ emende ekịm oro enye ye mme andinọ enye ibetedem ẹnamde utom efep. (John 3:19) Ndien, “edinen ido nte ukwak ikpanesịt” odu. Owo emi okụtde ukụt mi ekpenyene ndidomo ndimụm ndinen idaha n̄kama. Ke uwụtn̄kpọ, ndusụk owo ẹnyene n̄kpọsọn̄ ntụk ndinọ idemmọ unan m̀mê ndinam oburobụt ido. Kpukpru ini emi mmọ ẹbiọn̄ọde mme ntụk ẹmi, mmọ ẹnyene edikan!

N̄kpọekọn̄ eke spirit esịne n̄ko “gospel emem.” Nditịn̄ nnọ mbon en̄wen mban̄a mme uduak Jehovah ọsọn̄ọ owo emi etịn̄de ikọ idem ọkọrọ ye owo ekededi emi akpan̄de utọn̄. (1 Timothy 4:16) Edieke afo edide kiet oro ‘spirit obụn̄ọde,’ anamde edi ọkpọsọn̄ n̄kpọ ọnọ fi nditịn̄ mban̄a eti mbụk, domo ndisan̄a ye Christian en̄wen ke adan̄aemi enye anamde akpan utom emi. Ndien kûfre “mbuọtidem nte otu-ekọn̄.” Nyene mbuọtidem nte ke Jehovah ama fi ndien nte ke enye eyefiak ọnọ kpukpru se afo akatabade. Nịm ye unana eyịghe nte ke Jesus n̄ko ama fi, enye ama onyụn̄ anam emi owụt ke ndikpa nnọ fi. (John 3:16) Satan kpukpru ini esidọhọ ke abian̄a ete ke Jehovah ikereke iban̄a mme asan̄autom esie. Oro edi nsu en̄wen ke otu ndiọi, ubi ubi nsu esie.—John 8:44; men Job 4:1, 15-18; 42:10-15 domo.

Edieke ubiak esịt anamde edi ọkpọsọn̄ n̄kpọ ndinịm ke akpanikọ nte ke Jehovah ekere aban̄a fi, eyedi n̄kpọ un̄wam ndibuana ye mmọ en̄wen emi ẹtịmde ẹnịm ke akpanikọ nte ke enye esikere aban̄a. (Psalm 119:107, 111; Mme N̄ke 18:1; Mme Hebrew 10:23-25) Sịn ndiyak Satan anam fi ataba enọ uwem. Ti, “edinyan̄a nte ndụn” edi ubak n̄kpọekọn̄ oro; ntre ke “ofụt Spirit” edi. Ẹda odudu edisana spirit ẹwet Bible, emi Satan mîkemeke ndikan. (2 Timothy 3:16; Mme Hebrew 4:12) Mme ikọ usọbọ esie ẹkeme ndisụhọde ubiak eke ntụk.—Men Psalm 107:20; 2 Corinth 10:4, 5 domo.

Ke akpatre, bọn̄ akam kpukpru ini ben̄e ukeme ndiyọ. (Rome 12:12; Ephesus 6:18) Akam ofụri esịt ama ọsọn̄ọ Jesus idem ke ini ọkpọsọn̄ ubiak eke ntụk esie, ndien enye ekeme ndin̄wam fi n̄ko. (Luke 22:41-43) Nte edi ọkpọsọn̄ n̄kpọ ọnọ fi ndibọn̄ akam? Dọhọ mmọ en̄wen ẹbọn̄ akam ye afo ẹnyụn̄ ẹbọn̄ ẹnọ fi. (Colossae 1:3; James 5:14) Edisana spirit eyenọ akam fo un̄wam. (Men Rome 8:26, 27 domo.) Nte edide ye ubiak ubiak udọn̄ọ ikpọkidem, ekeme ndidi ndusụk mbon ẹmi ẹnyenede ikpọ unan eke ntụk idinyeneke usọbọ ofụri ofụri ke editịm n̄kpọ emi. Edi ye un̄wam Jehovah nnyịn imekeme ndiyọ, ndien ediyọ edi edikan, nte ekedide ye Jesus. (John 16:33) “Mbufo kpukpru owo, ẹbuọt idem ye [Jehovah] kpukpru ini; ẹn̄wan̄a esịt mbufo ke iso esie: Abasi edi ebiet ubọhọ nnyịn.”—Psalm 62:8.

Nso Kaban̄a Enyeemi Ẹdọhọde Nte Asabarede Owo Mi?

Owo emi ke akpan asabarede eyenọwọn̄ ke idan̄ edi adan̄ owo ke n̄kanubọk ndien ẹkpenyene ndise enye ntre. Owo emi ẹnọmọde ke utọ usụn̄ emi enyene unen ndidori owo emi asabarede enye ikọ. Edi, owo ikpenyeneke ndinam edori ikọ emi usọp usọp edieke emi ọkọn̄ọde n̄kukụre ke “mme ekikere ẹmi ẹsopde.” Ke idaha enyeemi ata akpan n̄kpọ edi andikụt ndutụhọ oro ndifiak nda ukem ukem ke ntụk ke ndusụk udomo. Ke ndusụk ini ebede, enye ekeme ndidu ke mfọnn̄kan itie ndidụn̄ọde “mme ekikere” oro nnyụn̄ mbiere se enye oyomde ndinam mban̄a mmọ, edieke edide enye oyom ndinam n̄kpọ ekededi.

Kere ban̄a idaha Donna. Ẹdọhọ ke enye ama esinyene mfịna udia n̄kpọ onyụn̄ aka ebịne ọnọitem—nte an̄wan̄ade enyeemi ẹnyenede eyịghe ẹban̄a ukeme esie. Ikebịghike enye ama odori ete esie ikọ unyene idan̄ iman ndien ẹma ẹda enye ẹka esopikpe. Mbonikpe ikekemeke ndisịm ubiere, ntre ete ikakaha n̄kpọkọbi, edi enye ekenyene ndikpe $100,000 ke ekọmurua ikpe. Ekem, ke kpukpru oro ẹma ẹkebe, Donna ama etịn̄ ọnọ ete ye eka esie nte ke imọ inịmke aba ke akpanikọ nte ke edisabade oro ama ada itie!

Ke ọniọn̄, Solomon ọkọdọhọ ete: “Kûsọp uwọrọ utọk.” (Mme N̄ke 25:8) Edieke ndusụk nti ntak ẹdude ndikere nte ke ọdọk-ubi oro ẹdoride ikọ mi ke osụk asabade nditọwọn̄, ẹkeme ndidụri enye utọn̄. Mbiowo esop ẹkeme ndin̄wam ke utọ idaha emi. Mîdịghe ntre, kpeme idemfo. Ke akpatre afo emekeme ndision̄o idem mfep ke mfịna oro. Nte ededi, edieke afo oyomde ndisobo ye ọdọk-ubi oro ẹdoride ikọ mi (ke ama ekebem iso odụn̄ọde ese nte editiede fi ke idem aban̄a se ikemede nditịbe), afo emenyene unen ndinam oro.

Ke ufan̄ ini oro idem ọtọn̄ọde ndisọn̄ owo emi enyenede “ekikere,” mme etikwo etikwo idaha ẹkeme ndidemede. Ke uwụtn̄kpọ, owo ekeme nditi in̄wan̄în̄wan̄ nte ke owo emi enye esikụtde ke usen ke usen ama adan̄ imọ. Owo ikemeke ndinịm ibet ndomokiet ke nte ẹkpesede ẹban̄a emi. “Owo kiet kiet enyene ndibiom mbiomo idemesie.” (Galatia 6:5) Ndusụk ini owo ekeme ndikere ete ke iman mîdịghe kiet ke otu n̄kpet n̄kpet mbonubon esie abuana. Ti ban̄a nte ndusụk “ekikere ẹmi ẹsopde” ẹsitiede eyịghe eyịghe ke ini edide edisịm edidiọn̄ọ owo emi ekerede nte edide ọdọk-ubi. Ke utọ idaha oro, adan̄a nte owo mîtịmke inyene isọn̄, ndikaiso nnyene ebuana ye ubon—ke nsụhọde n̄kaha ebede ke edika n̄kese ke ini ke ini, ke leta, m̀mê ke urụk ukopikọ—eyewụt nte ke owo ke odomo nditiene usụn̄ N̄wed Abasi.—Men Ephesus 6:1-3 domo.

Nso ke Mbiowo Ẹkeme Ndinam?

Edieke andibuana ke esop emi enyenede ekikere ini edem m̀mê “mme ekikere ẹmi ẹsopde” nte ẹkesabade enye ke ini uyen akade ebịne mbiowo, nte ido edide eyenọ owo iba ke otu mmọ ẹken̄wam. Mbiowo ẹmi ke mfọnido ẹkpenyene ndisịn udọn̄ nnọ owo ukụt emi ndiwụk ntịn̄enyịn kan̄a ke ndiyọ ubiak eke ntụk emi. Ẹkpenyene ndinen̄ede nnịm enyịn̄ mme andisabade ẹmi “ẹtide” mi ke ndịbe.

Akpan utom mbiowo edi ndinam n̄kpọ nte mme ọbọkerọn̄. (Isaiah 32:1, 2; 1 Peter 5:2, 3) Akpana mmọ akpan akpan ẹtịn̄ enyịn “ẹda . . . esịt mbọm ẹsịne [ke idemmọ], ye mfọn-ido, ye nsụk-idem, ye ifụre-ifụre ido, ye ime.” (Colossae 3:12) Yak mmọ ẹnọ n̄kpan̄utọn̄ ke ima ima usụn̄ ẹnyụn̄ ẹda mme ikọ N̄wed Abasi ẹmi ẹnọde usọbọ ẹsịn ke edinam. (Mme N̄ke 12:18) Ndusụk mmọemi ẹmi ẹnyenede ubiak ubiak “ekikere” ẹmewụt esịtekọm ẹnọ mbiowo ẹmi ẹsinamde edika n̄kese ndien ndien m̀mê idem ẹnọde ikot ke urụk ukopikọ man ẹdụn̄ọde ẹfiọk nte mmọ ẹnamde n̄kpọ. Mme utọ ebuana oro inyeneke ndida ekese ini, edi mmọ ẹwụt nte ke esop Jehovah esikere aban̄a. Ke ini owo ukụt emi ọfiọkde ete ke nditọete Christian esie ẹnen̄ede ẹma imọ, ekeme ndin̄wam enye ke akamba udomo ndifiak nda ukem ukem ke n̄kan̄ eke ntụk.

Nso edieke owo ndutụhọ emi oyomde ndidori owo ikọ?b Do mbiowo iba oro ẹkeme nditeme enye nte ke enye ekpenyene ndika ke idemesie mbịne owo emi enye odoride ikọ mi kaban̄a mfịna emi, nte ekemde ye edumbet oro odude ke Matthew 18:15. Edieke andidori owo ikọ mîsọn̄ke idem ikem ke n̄kan̄ eke ntụk ndinam emi iso ye iso, ekeme ndinam emi ebe ke urụk ukopikọ mîdịghe ekeme ndidi ke ediwet leta. Ke usụn̄ emi ẹnọ owo emi ẹdoride ikọ mi ifet nditịn̄ ikọ ke iso Jehovah nnyụn̄ nnọ ibọrọ ke edori ikọ oro. Enye ekeme idem ndinọ uyarade nte ke imọ ikpekemeke ndinam utọ edisabade oro. Mîdịghe eyedi owo emi ẹdoride ikọ mi eyeyarade ndudue, ndien ekeme ndifiak nnam emem. Nso edidiọn̄ ke emi ekpedi ntem! Edieke uyarade ndudue odude, mbiowo iba oro ẹkeme ndikaiso nse mban̄a mme n̄kpọ ke nte ekemde ye mme edumbet N̄wed Abasi.

Edieke ẹkan̄de edori ikọ emi, mbiowo ẹkpenyene ndinam an̄wan̄a andidori owo ikọ emi nte ke n̄kpọ en̄wen ndomokiet idụhe emi ekemede ndinam ke n̄kan̄ ikpe. Ndien esop eyekaiso ndise owo emi ẹdoride ikọ mi nte owo emi mîduehe. Bible ọdọhọ ete ke ana ntiense iba m̀mê ita ẹdu mbemiso ẹkemede ndikpe ikpe. (2 Corinth 13:1; 1 Timothy 5:19) Idem edieke se iwakde ikan owo kiet “etide” ke ukem owo oro ama asabade mmimọ, utọ editi ẹmi ikam inen̄ekede inyene iwụk ndidi se ẹkọn̄de mme ubiere ikpe ke mmọ ye unana uyarade eken ẹmi ẹnyenede nsọn̄ọ. Emi iwọrọke nte ke ẹda utọ “ekikere” oro ke abian̄a (mîdịghe ke ẹda mmọ ke akpanikọ). Edi ana ẹtiene mme edumbet Bible ke ndiwụt ke mfịna odot ẹkot ikpe.

Nso edieke owo emi ẹdoride ikọ—okposụkedi akan̄de idiọk edinam emi—enen̄erede enyene ubiomikpe? Nte enye “ọbọhọ ufen,” yak idọhọ ntre? Ke akpanikọ ibọhọke! Ẹkeme ndiyak eyịghe aban̄ade enye ndinyene ubiomikpe m̀mê utebeikpe nsịn Jehovah ke ubọk nte ọfọnde. “Idiọk-n̄kpọ ndusụk owo ẹyarade, ẹbem iso ẹwọrọ ubiere-ikpe; edi idiọk-n̄kpọ ke etiene ndusụk owo ke edem.” (1 Timothy 5:24; Rome 12:19; 14:12) N̄wed Mme N̄ke ọdọhọ ete: “Idori-enyịn mbon eti ido edi idatesịt: edi se mme idiọk owo ẹbetde eyetak.” “Ke ini idiọk owo akpade, idori-enyịn esie eyetak.” (Mme N̄ke 10:28; 11:7) Ke akpatre, Jehovah Abasi ye Christ Jesus ẹyenọ nsinsi ubiereikpe ke usụn̄ enende.—1 Corinth 4:5.

Ndibiọn̄ọ Devil

Ke ini mme ukpọn̄ ẹmi ẹma ẹkeyak idem ẹnọ ẹyọde kpa ye ubiak eke ikpọkidem m̀mê eke ntụk, nso uyarade ke emi edi ntem aban̄a odudu esịtidem mmọ ye ima ẹnyenede ẹnọ Abasi! Ndien nso uyarade ke emi edi ntem aban̄a odudu spirit Jehovah ndisọn̄ọ mmọ idem!—Men 2 Corinth 4:7 domo.

Mme ikọ Peter ẹnyene n̄kpọ ndinam ye utọ mbon ẹmi: “Ẹsọn̄ọ ẹda ke mbuọtidem ẹn̄wana ye [Satan].” (1 Peter 5:9) Ekeme ndidi idimemke ndinam ntre. Ndusụk ini, idem ekeme ndidi ọkpọsọn̄ n̄kpọ ndikere n̄kpọ in̄wan̄în̄wan̄ ye nte owụtde eti ibuot. Edi sọn̄ esịt! Ibịghike, Devil ye mme n̄kari n̄kari edinam esie ididụhe aba. Ke akpanikọ, nnyịn imenyene udọn̄ ndikụt ini oro, emi “Abasi ke Idem Esie . . . [edikwọhọrede] kpukpru mmọn̄eyet ke enyịn mmọ ẹfep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebe-iso n̄kpọ ẹma ẹbe ẹfep.”—Ediyarade 21:3, 4.

[Mme Ikọ idakisọn̄]