Edinam Inemesịt—Ukụre Ukpep Ọyọhọ Otu 104 eke Gilead
“EMI edi usen inemesịt, ndien kpukpru nnyịn imokop idatesịt.” Carey Barber, andibuana ke Otu Ukara eke Mme Ntiense Jehovah, akada mme ikọ oro eberede inem inem edinam ukụre ukpep eke ọyọhọ otu 104 eke Ufọkn̄wed Enyọn̄-Ukpeme Ukpep Bible eke Gilead ke March 14, 1998. Ẹma ẹnọ owo 4,945 ikot nditọn̄ọ edinam oro ebe ke ndikwọ ikwọ Obio Ubọn̄ ọyọhọ 208, emi ọdọhọde “A Song of Rejoicing” (Ikwọ Idatesịt).
Eti Item Ndika Iso N̄kop Inemesịt
Ntọn̄ọ ikpehe edinam oro, udịm udịm utịn̄ikọ ition ẹkọn̄ọde ke Bible, ama ọnọ ndusụk nti item ke nte ẹkpekade iso ẹnyene edu idatesịt oro okodude ke ofụri usen ukụre ukpep oro.
Joseph Eames eke Itieutom Uwetn̄wed ọkọnọ akpa utịn̄ikọ. Enye eketịn̄ ikọ ke ibuotikọ oro “Ẹkpebe Edu Mbon Nsọn̄ọnda,” ọkọn̄ọde ke mbụk Bible ke 2 Samuel ibuot 15 ye 17, emi Absalom, eyen David, okodụkde odu ndibọ ete esie obio ubọn̄ oro Abasi ọkọnọde ebe ke ndidemede nsọn̄ibuot. Nte ededi, ama odu mbon oro ẹkesọn̄ọde ẹda ye enye emi Jehovah ekeyetde aran, Edidem David. Nso ukpepn̄kpọ ke mbufa isụn̄utom oro ẹkekpep ẹto emi? “Ebiet ekededi oro mbufo ẹkade ke utom isụn̄utom mbufo, ẹsọn̄ọ ẹda ẹsịn udọn̄ ẹnọ edu edidianakiet ye ediwụt ukpono nnọ ndutịm ukara Abasi. Ẹn̄wam mbon en̄wen ndinam kpa ntre,” ntem ke Brọda Eames akada ekeberi.
Owo efen ke ndutịm oro ekedi David Sinclair, emi okowụtde n̄kpọ duop oro ẹyomde, ẹmi ẹsiakde ke Psalm 15, man owo odụn̄ ke ‘tent Jehovah.’ Utịn̄ikọ esie, ọdọhọde “Ẹka Iso Ẹdụn̄ ke Tent Isụn̄utom Mbufo,” ama esịn udọn̄ ọnọ nditọ ufọkn̄wed oro ẹkụrede ukpep do ndida psalm emi nsịn ke edinam ke mme utom isụn̄utom mmọ, ke ebiet emi mmọ ẹdidụn̄de. Brọda Sinclair ama owụt nte edide akpan n̄kpọ ndida mme idaha oro Abasi enịmde ndu uwem kpukpru ini. Nso ididi utịp? Psalm 15:5 ọdọhọ ete: “Owo eke anamde n̄kpọ ẹmi idisehekede ke nsinsi.”
John Barr, andibuana ke Otu Ukara, ama adiana onyụn̄ odụri ntịn̄enyịn owụt odudu nsịnudọn̄ oro edikwọ ikwọ ke mme mbono esop Christian enyenede. Edi ewe ikwọ emi akamade idatesịt akan ke ẹkwọ ke ofụri isọn̄ mfịn? Enye edi eti mbụk Obio Ubọn̄ Messiah Abasi. Nso isụn̄ọ ito kpukpru ikwọ emi, m̀mê edikwọrọ mban̄a Obio Ubọn̄? Ọyọhọ udịm iba ke ọyọhọ ikwọ 208 etịn̄ ibio ibio ete: “Ebede ke ukwọrọikọ Obio Ubọn̄ ye ukpepn̄kpọ Christian, ẹdụri ediwak owo ẹka n̄kan̄ Jehovah. Mmọ ẹmi, n̄ko, ke ẹkwọ mme ikwọ idatesịt, ẹkwọde mmọ uyo ọsọn̄, O ke kpukpru ebiet!” Ih, kpukpru usen n̄kpọ nte mbufa mbet 1,000 ke ẹna baptism. Brọda Barr ama eberi ete: “Nditọete, nte idịghe utịben̄kpọ ndikere ke ẹdọn̄ mbufo ẹka mme efakutom man ẹkesobo mme owo ẹmi ẹkam ẹtiede-tie ẹbet ndikop ikwọ itoro mbufo?”
“Ẹkpan̄ Utọn̄ Ẹkop Ikọ Mbon Oro Ẹnyenede Mbufiọk” ekedi ibuotikọ utịn̄ikọ oro James Mantz eke Itieutom Uwetn̄wed ọkọnọde. Enye ama owụt ete ke ẹkeme ndikpep ndusụk n̄kpọ ebe ke ọkpọkpọ ifiọk n̄kpọntịbe kpọt. (Mme Hebrew 5:8) Kpa ye oro, Mme N̄ke 22:17 esịn udọn̄ ọnọ nnyịn ete ‘ikpan̄ utọn̄ inyụn̄ ikop uyo mme ọfiọkn̄kpọ owo,’ m̀mê mbon oro ẹnyenede mbufiọk. Nditọ ufọkn̄wed oro ẹkụrede ukpep ẹkeme ndikpep ekese nto mbon oro ẹkebemde mmọ iso ẹka. “Mmọ ẹdiọn̄ọ nte ẹkpede urua ye mme anyam ufọkurua n̄kann̄kụk. Mmọ ẹdiọn̄ọ mme ikpehe obio oro ẹnyenede ndifep ke ntak ata ata n̄kpọndịk m̀mê eke ido uwem. Mmọ ẹdiọn̄ọ m̀mê mbon n̄kann̄kụk ẹsisọp m̀mê isisọpke iyat esịt. Mme isụn̄utom oro ẹma ẹkenam utom ke anyan ini ẹdiọn̄ọ se mbufo ẹyomde man ẹkop inemesịt ẹnyụn̄ ẹkụt unen ke utom mbufo,” ntre ke Brọda Mantz ọkọdọhọ.
Ke etịn̄de ikọ ke ibuotikọ emi “Ẹwụt Esịtekọm Ẹban̄a Utom Ukara Abasi Mbufo,” Wallace Liverance, esịn-owo-enyịn̄ ke Ufọkn̄wed Gilead, ama anam an̄wan̄a ete ke adan̄aemi ndusụk isụn̄utom, utọ nte apostle Paul, Timothy, ye Barnabas, ẹkebọde efakutom mmọ ẹto Abasi ebe ke edisana spirit m̀mê ndusụk utịbe utịbe uyarade, “asan̄autom emi anamde akpanikọ, onyụn̄ enyenede ọniọn̄” ọnọ isụn̄utom oro ẹbọde ukpep ke Gilead efakutom ke an̄wautom ofụri ererimbot. (Matthew 24:45-47) Enye ama emen utom isụn̄utom odomo ye mme itie oro Gideon ọkọnọde irenowo esie ẹmi ẹkenyenede ndin̄wana ekọn̄ ye mbon Midian ẹka. (Judges 7:16-21) “Ẹwụt esịtekọm ẹban̄a utom isụn̄utom mbufo eke ukara Abasi. Kpa nte mbonekọn̄ Gideon ‘ẹkekade iso ẹda kpukpru owo ke itie esie,’ ẹda efakutom mbufo nte itie oro mbufo ẹnyenede ndidu. Ẹnyene mbuọtidem nte ke Jehovah ekeme ndida mbufa nnam n̄kpọ kpa nte enye akadade owo Gideon ikie ita,” ntre ke Brọda Liverance eketeme.
Ndidi Mbon Oro Ẹmade Mme Owo Osụn̄ọ ke Inemesịt
Enyọn̄-Ukpeme ama etịn̄ ini kiet ete: “Utu ke ndiböp me udöñ nyin ye uwem nyin ñkanare me ñkpö uquak enamde ke editim-ñkpö odude idahaemi, kpa me ñkpö oro midikaha iso idu, öfön adaña didie akan onyuñ owut ifiök didie akan ndinam me owo edi akpan udöñ nyin nyuñ ñkpep ndikut ata idara ke ndinam ñkpö nö mbon efen.” Ke n̄kemuyo ye oro, Brọda Mark Noumair, kiet ke otu mme ọnọ-ukpep ke Ufọkn̄wed Gilead, ama enyene nneme ye otu nditọ ufọkn̄wed aban̄a ifiọkutom an̄wautom mmọ onyụn̄ ọdọhọ ete: “Ndiwụt ọkpọkpọ udọn̄ ke idem mbon en̄wen edinam mbufo ẹdi nti isụn̄utom.”
Mme Ukpọhọde Inemesịt ke An̄wautom Esenidụt
Nso idi ndusụk ukpọhọde edikụt unen ye inemesịt ke utom isụn̄utom? Brọda Charles Woody eke Itieutom Utịmutom ye Harold Jackson, akani isụn̄utom ke Latin America ye andin̄wam Kọmiti Unọ Ukpep, ama anam ndụn̄ọde ye mme andibuana ke nsio nsio Kọmiti N̄kọk Itieutom ẹmi ẹkedụkde ọyọhọ otu usụkkiet eke ufọkn̄wed unọ mme anamutom n̄kọk itieutom ukpep. Emi edi ubak ke otu item oro mmọ ẹmi ẹkenọde:
Albert Musonda otode Zambia ama ọdọhọ ete: “Ke ini isụn̄utom anamde usio-ukot ndika n̄kọkọm nditọete, emi edemede ata eti edu koro nditọete ẹyesịk ẹkpere isụn̄utom oro, isụn̄utom oro oyonyụn̄ esịk ekpere mmọ.”
Rolando Morales eke Guatemala ama ọnọ ekikere ete ke ini mme owo oro ẹtiede ufan ufan ẹnọde mbufa isụn̄utom n̄kpọ ndin̄wọn̄, mmọ ẹkeme ndibọrọ ke mfọnido ye ke usọ ẹte: “Ami ndi obufa owo ke idụt emi. N̄kpama ndin̄wọn̄, edi idem mi inyeneke oto-obot editịbe oro idem mbufo enyenede. Mmodori enyịn nte ke usen kiet ami nyekeme ndin̄wọn̄ enye, ndien nyokop inemesịt ndinam ntre.” Nso idi mme ufọn utọ ibọrọ oro? “Mme owo idiyatke esịt, ndien isụn̄utom oro ayanam n̄kpọ ye mbon efen ke mfọnido.”
Nso ikeme ndin̄wam mme isụn̄utom ndiyọ ke mme itie utom mmọ? Brọda Paul Crudass, andikụre ukpep ke ọyọhọ otu 79 eke Gilead, emi ama akanam utom ke Liberia ke isua 12 ẹmi ẹkebede, ọdọhọ ntem: “Mmọfiọk ke edi akpanikọ nte ke mme ete ye eka ẹsiyom ndikụt nditọ mmọ. Edi mme ini ẹsidu emi isụn̄utom esidomode ndimehe ye idụt, n̄kann̄kụk, ido edinam, mme owo. Ekeme nditie enye ke idem nte ọkpọnyọnyọn̄. Edieke enye ọbọde leta oto ufọk emi ọdọhọde ete, ‘Nnyịn imataba fi idiọk idiọk; nnyịn ifiọkke se ikpanamde ke afo mûdụhe,’ oro ekeme ndidi ofụri se oyomde ndinam enye atan̄ n̄kpoduoho esie onyụn̄ ọnyọn̄ ufọk. Edi ata akpan n̄kpọ ọnọ mme iman oro ẹdude mi mfịn nditi oro.”
Ke ndụn̄ọde oro ama okokụre, Theodore Jaracz, andibuana ke Otu Ukara, ọkọnọ akpatre utịn̄ikọ ke edinam oro. Ibuotikọ esie: “Ẹnam Obio Ubọn̄ Edi Ata Akpan N̄kpọ ke Uwem Mbufo.” Didie ke mme isụn̄utom ẹkeme ndiwụk ntịn̄enyịn inyụn̄ iyakke ẹwọn̄ọde ntịn̄enyịn mmọ ẹkpọn̄ utom mmọ? Enye ama esịn udọn̄ ọnọ mmọ ndinyene ndutịm ọkpọkpọ ukpepn̄kpọ Bible, emi edin̄wamde mmọ ndinam mme udọn̄ n̄kpọ Obio Ubọn̄ edi ata akpan n̄kpọ ke uwem. Ndien ẹma ẹnọ ekemini n̄kpọ editi emi: “Ndusụk isụn̄utom ẹma ẹfụmi ọkpọkpọ ukpepn̄kpọ ke ntak emi mmọ ẹkesịnde idem ke mme n̄kpọutom ilektrọnik, ndutịm unọ etop kọmputa, ye kọmputa. Nnyịn ikpenyene ndinyene eti ekikere oro adade ukem ukem ke ndida n̄kpọutom ekededi nnam n̄kpọ inyụn̄ ibiatke ekese ini ke n̄kpọ oro ekemede ndituaha ye ọkpọkpọ ukpepn̄kpọ Ikọ Abasi nnyịn.”
Ke utịn̄ikọ Brọda Jaracz okụrede ẹma ẹnọ mme n̄weditoro ẹnyụn̄ ẹkot leta esịtekọm otode otu oro. Andida ke ibuot otu oro ama etịn̄ ekikere kpukpru owo ke usụn̄ emi: “Nnyịn ima ikụt ata uyarade ima oro Jesus ọkọdọhọde ke ẹdida ẹdiọn̄ọ mbet imọ, ndien emi ọmọsọn̄ọ ọnọ nnyịn nte ke inamke n̄kpọ m̀mê nnyịn idu ke m̀mọ̀n̄, ufiop ufiop, ima ima esop oro ebietde eka odu ndinọ nnyịn ibetedem. Ye utọ ibetedem oro, nnyịn imeben̄e idem ndika ke utịt isọn̄.” Emi ekedi ediberi oro okotụkde owo ke idem ke inem inem usen ukụre ukpep oro ọnọ ọyọhọ otu 104 eke Gilead.
[Ekebe ke page 24]
Idaha Otu
Ibat idụt ẹtode: 9
Ibat idụt ẹnọde ẹka: 16
Ibat nditọ ufọkn̄wed: 48
Ibat mme ọdọ ndọ: 24
Isua emana ke ẹbaharede ukem ukem: 33
Isua ẹdude ke akpanikọ ke ẹbaharede ukem ukem: 16
Isua ẹdude ke utom uyọhọ ini ke ẹbaharede ukem ukem: 12
[Ndise ke page 25]
Ọyọhọ Otu 104 Oro Ẹkụrede Ukpep ke Ufọkn̄wed Enyọn̄-Ukpeme Ukpep Bible eke Gilead
Ke udịm enyịn̄ etienede ke idak, ẹtọn̄ọ ke udịm iso ẹnọ nọmba ẹka edem, ẹnyụn̄ ẹtọn̄ọ ke ufien ẹwet enyịn̄ ẹka nnasia ke udịm kiet kiet
(1) Romero, M.; Howarth, J.; Blackburne-Kane, D.; Hohengasser, E.; West, S.; Thom, S. (2) Colon, W.; Glancy, J.; Kono, Y.; Drews, P.; Tam, S.; Kono, T. (3) Tam, D.; Zechmeister, S.; Gerdel, S.; Elwell, J.; Dunec, P.; Tibaudo, H. (4) Taylor, E.; Hildred, L.; Sanches, M.; Anderson, C.; Bucknor, T.; Hohengasser, E. (5) Howarth, D.; Ward, C.; Hinch, P.; McDonald, Y.; Sanches, T.; Thom, O. (6) Drews, T.; Tibaudo, E.; Elwell, D.; Dunec, W.; Blackburne-Kane, D.; Ward, W. (7) Anderson, M.; Zechmeister, R.; McDonald, R.; Bucknor, R.; Glancy, S.; Gerdel, G. (8) Romero, D.; Hinch, R.; Hildred, S.; Taylor, J.; Colon, A.; West, W.
[Ndise ke page 26]
Nditọete oro ẹketienede ẹbuana ke ndinọ ọyọhọ otu 104 ukpep: (tọn̄ọ ke ufien) W. Liverance, U. Glass, K. Adams, M. Noumair