Se Idinamde Bible An̄wan̄a Fi

3. Yak Mme Owo Ẹn̄wam Fi

Ke ini Edward John Eyre, emi ekedide anam ndụn̄ọde, ekebede ukpọk ukpọk Unaisọn̄ Nullarbor, mme amanaisọn̄ Australia ẹma ẹkpep enye nte ẹsibọde mmọn̄ ke ebok ntan ye eto eucalyptus. Se ikanyan̄ade Eyre ekedi ndikayak mbon oro ẹfiọkde ebiet oro ẹn̄wam enye.

UWỤTN̄KPỌ emi owụt ke esifọn iyak owo emi ọfiọkde n̄kpọ akan nnyịn eteme nnyịn nte ikpanamde n̄kpọ oro ọsọn̄de akan nnyịn. Se okponyụn̄ anamde edi oro ke ini ọtọn̄ọde ndikot Bible.

Jesus ama ọfiọk ke Bible idin̄wan̄ake mme anditiene imọ edieke owo mîdụhe ndinam an̄wan̄a mmọ. Isan̄ kiet, “enye [ama] an̄wan̄ade mmọ ikike ọyọhọ ọyọhọ man mmọ ẹfiọk se N̄wed Abasi ọwọrọde.” (Luke 24:45) Jesus ama ọfiọk ke oyom ẹn̄wam mme andikot Bible man Ikọ Abasi an̄wan̄a mmọ.

Mmanie Ẹkpen̄wam Fi?

Jesus akayak utom emi ọnọ ata mme anditiene enye. Enye ọkọdọhọ mmọ mbemiso ọnyọn̄de heaven ete: “Ẹka ẹkenam mme owo ke kpukpru idụt ẹdi mbet mi, . . . ẹkpep mmọ ẹnam kpukpru n̄kpọ eke n̄ketemede mbufo.” (Matthew 28:19, 20) Akpan utom mme Christian edi ndikpep mme owo n̄kpọ, emi esịnede ndinam mmọ ẹfiọk nte ẹkemede ndida mme edumbet Bible nsịn ke edinam. Ata mme Christian ẹsinam Bible an̄wan̄a mme owo.

Esisịt ini ke Jesus ama ọkọnọ mme mbet esie ewụhọ oro, Bible ọdọhọ ke ọbọn̄ kiet emi akanamde utom ke ufọk ubọn̄ Ethiopia okosụk okot itie kiet ke ntịn̄nnịm ikọ Isaiah. Enye ama okot ekesịm itie oro mîkan̄wan̄ake enye. Itie oro ọdọhọ ete: “Ẹda enye nte erọn̄ ẹka ndiwot, ndien nte eyenerọn̄ eke mîsioroke uyo ke iso andifat enye idet, ntre enye itatke inua esie. Ke ini emi ẹsụhọrede enye itie, ẹyụrọde ikpe esie. Anie edibụk emana esie ọyọhọ ọyọhọ? Koro ẹsịbede uwem esie ẹfep ke isọn̄.”—Utom 8:32, 33; Isaiah 53:7, 8.

Ọbọn̄ oro ama obụp Philip, Christian emi ekenen̄erede ọfiọk Ikọ Abasi, ete: “Prọfet etịn̄ emi aban̄a anie? Ndi etịn̄ aban̄a idemesie m̀mê etịn̄ aban̄a owo efen?” (Utom 8:34) Owo Ethiopia emi ekenyenede esịt akpanikọ mi ama akaka Jerusalem akatuak ibuot, ndien ekeme ndidi enye ama ọbọn̄ akam eben̄e ndausụn̄. Anaedi enye ama osụhọde idem okot N̄wed Abasi onyụn̄ enen̄ede ama se enye okokotde. Edi itie oro ikosụk in̄wan̄ake enye. Enye ama osụhọde idem ọdọhọ Philip an̄wam imọ. Nte Philip akanamde itie oro an̄wan̄a enye ama adat enye esịt tutu enye ke idem esiemmọ akabade edi Christian.—Utom 8:35-39.

Mme Ntiense Jehovah ke ẹka iso ẹnam utom oro Philip ye mme Christian eken ke eyo oro ẹkesinamde. Mme Ntiense ke ẹda imaesịt ẹnam se Bible enen̄erede ekpep an̄wan̄a mme owo ke se ibede idụt 235. Mmọ ẹsinam emi ke ndikpep mme owo Bible ke nde ke nde. Emi abuana edidụn̄ọde se Bible etịn̄de aban̄a n̄kpọ kiet kiet.a—Se ekebe oro “Nti Ibọrọ Oro Ẹnọde ke Mme Mbụme Bible.”

‘Ẹma Ẹbọrọ Kpukpru Mbụme Mi’

Steven, Valvanera, ye Jo-Anne, oro ikewetde se mmọ eketịn̄de ke akpa ibuotikọ, ẹma ẹtọn̄ọ ndikpep Bible ye Mme Ntiense Jehovah. Steven ọdọhọ ete: “Ama akpa mi idem ndikụt ke isọn̄ke ndinyene ibọrọ ke kpukpru mbụme Bible oro n̄kesibụpde. N̄kukụre se ikesinamde ekedi ndimen itie Bible kiet ndomo ye en̄wen. Owo ndomokiet iketemeke mi ite nnam oro mbemiso n̄kọtọn̄ọde ndikpep Bible ye Mme Ntiense. Ama enen̄ede enem mi ndidi ndifiọk ke Bible idịghe se mme owo ẹkpetiede ẹfan̄a ke nsinsi ẹnyụn̄ ẹnọ nsio nsio ekikere, edi inyeneke akpan ibọrọ.”

Valvanera ọdọhọ ke ikọ oro edi akpanikọ. Enye ọdọhọ ete: “Kpukpru n̄kpọ ẹkesan̄a kiet onyụn̄ esịne ifiọk. Se ẹketịn̄de ẹkedi akpanikọ, idịghe ke ntak emi edide ‘Ufọkabasi’ eketịn̄, edi koro ẹma ẹnọ eti ntak.” Jo-Anne ọdọhọ ete: “Ndikada Bible mbọrọ kpukpru mbụme mi ama enen̄ede odoro mi uten̄e—anam nnen̄ede nten̄e Andinyene Bible—sia enye akadade okụt ke mme owo ẹyebụp ekese mbụme onyụn̄ anam ẹwet mme ibọrọ mbụme oro ẹdọn̄ ke Bible.”

Nte ọmọfiọk kiet ke otu Mme Ntiense Jehovah? Mbọk dọhọ enye owụt fi nte ẹsinịmde ukpepn̄kpọ emi. Edieke mûfiọkke kiet ke otu Mme Ntiense Jehovah, mbọk wet n̄wed nọ ẹsọk kiet ke otu mme adres oro ẹdude ke page 4 ke magazine emi. Idisọn̄ke Bible ndin̄wan̄a fi edieke enyenede spirit Abasi, in̄wan̄-in̄wan̄ esịt, ye mme andikpep Bible oro ẹdotde. Ih, Bible ekeme ndin̄wan̄a fi!

[Ikọ Idakisọn̄]

[Ekebe/Ndise ke page 8]

Nti Ibọrọ Oro Ẹnọde ke Mme Mbụme Bible

Ndusụk ibuotikọ oro Mme Ntiense Jehovah ẹsikpepde ẹdi emi:

• Nso idi uduak Abasi kaban̄a isọn̄?

• Mme akpan̄kpa ẹdu m̀mọ̀n̄?

• Nte nnyịn idu uwem ke “mme akpatre usen”?

• Ntak emi Abasi ayakde ndutụhọ odu-o?

• Didie ke n̄keme ndinam uwem ubon mi enem?

[Mme ndise ke page 7]

Man Bible an̄wan̄a fi . . . bọn̄ akam ben̄e Abasi spirit esie, da in̄wan̄-in̄wan̄ esịt kot, nyụn̄ nyịme mbon en̄wen ẹn̄wam fi