Obufa Ndutịm Mbono Circuit

Nnyịn imọfiọk ite ke Jehovah Abasi odot ndibọ ima ye san̄asan̄a utuakibuot nnyịn. Nte ededi, ererimbot oyom nditap nnyịn n̄kpọn̄ edika iso nnyene n̄kpet n̄kpet itie ebuana ye enye. (John 17:14) Man ẹnen̄ede ẹsọn̄ọ ima emi nnyịn inyenede inọ Jehovah ẹnyụn̄ ẹsọn̄ọ nnyịn idem ndibiọn̄ọ mme n̄kpọ ererimbot oro ẹsịnde idaha eke spirit nnyịn ke itiendịk, obufa ndutịm mbono circuit eke isua utom 2001 edinyene ibuotikọ emi: “Ma Abasi—Kûma Se Idude ke Ererimbot.”—1 John 2:15-17.

Ntotụn̄ọ ima oro inyenede inọ Jehovah onụk nnyịn ndinọ ikọ ntiense mban̄a enye. Kpa ye oro, utom an̄wautom idịghe mmemmem n̄kpọ inọ ediwak ke otu ikọt Abasi. Ke ikpehe oro, “Ima Inyenede Inọ Abasi Onụk Nnyịn Ndinam Utom Ukwọrọikọ Nnyịn,” fiọk nte ediwak owo ẹkande bụt ye mme n̄kpọ ubiọn̄ọ eken man ẹbuana ọyọhọ ọyọhọ ke utom emi.

Didie ke mme idaha ererimbot emi ẹkade-ka iso ndidiọk ẹtụk nnyịn? Mme edinam oro ẹkebatde ini kiet ko nte idiọk edi se ẹkotde eti edu uwem idahaemi. Utịn̄ikọ oro, “Mbon Emi Ẹmade Jehovah Ẹsua Idiọkido” ye nneme oro “Se Idude ke Ererimbot—Didie ke Nnyịn Ise Mmọ?” ẹyesọn̄ọ ubiere nnyịn ndisịn ndiọi udọn̄.

Ẹyesịn uwụtn̄kpọ ke nte ẹkpenịmde Ufọkn̄wed Utom Ukara Abasi ye Esoputom ke ndutịm, ọkọrọ ye utịn̄ikọ ibuotikọ Enyọn̄-Ukpeme eke urua oro. Utịn̄ikọ an̄wa oro “Nte Ima ye Mbuọtidem Ẹkande Ererimbot,” eyesịn udọn̄ ọnọ nnyịn ndikpebe Jesus ke ndibiọn̄ọ mme mfịghe ererimbot. (John 16:33) Kụt ete ke ọmọnọ nditọ ukpepn̄kpọ Bible fo ikot ndidụk. Owo ekededi oro oyomde ndina baptism ekpenyene nditịn̄ nnọ esenyịn oro etiede ibuot usọp usọp nte ekekeme man ẹkeme ndinam mme ndutịm oro ẹyomde.

Mbono circuit emi oyodụri ntịn̄enyịn nnyịn owụt nnennen ebiet oro ima nnyịn ekpenyenede ndiwụhọ man otodo inyene uwak edidiọn̄ Jehovah. Kûtaba ikpehe ndomokiet!