Ndutịm Oro Ẹnamde Ẹnọ Mme Asan̄autom Christian
1. Nso obufa ndutịm ọkọtọn̄ọ ke 1938, ndien ye nso uduak?
1 Ke 1938, esop Jehovah ama ọtọn̄ọ obufa ndutịm. Ẹma ẹkot mme esop ẹdidụk mbono eke ikpehe ke ikpehe, oro ẹkotde idahaemi mbono circuit. Nso ikedi uduak mbono enye emi? Informant (idahaemi edide Utom Obio Ubọn̄ Nnyịn) eke January 1939 ọbọrọ ete: “Mme mbono emi ẹdi ubak Ndutịm Ukara Abasi oro Jehovah anamde ọnọ utom Obio Ubọn̄ esie. Mme item oro ẹnọde do ẹdi akpan n̄kpọ ẹnọ kpukpru owo man ẹkeme ndinam utom mmọ ọfọn.” Ke ini ikerede iban̄a nte ibat mme anditan̄a Obio Ubọn̄ emi ẹkedide 58,000 kpọt ke 1938 ọkọride ebe 7,000,000 ke 2009, imokụt ke mme mbono circuit ke ẹn̄wam mme asan̄autom “ẹkeme ndinam utom mmọ” kpa nte ẹkeduakde!
2. Nso ke ẹdineme ke mbono circuit nnyịn eke 2011?
2 Ibuotikọ Isua Efen: Nnyịn ke itie ibet ndutịm mbono circuit oro editọn̄ọde ke January 2011 ye nsịnudọn̄ oro enye edinọde. Ẹda ibuotikọ esie ‘Mbufo Idịghe Ubak Ererimbot,’ ẹto John 15:19. Nso idi ndusụk utịn̄ikọ oro ẹdinyenede ufọn inọ mme asan̄autom Christian? Ke Saturday iyokop utịn̄ikọ oro ọdọhọde “Didie ke Utom Uyọhọ Ini Ekpeme Nnyịn?” Iyokop utịn̄ikọ ikpehe ita oro ọdọhọde, “Kûyak . . . Asabade Fi”—“Idiọk Unam,” “Akwa Akpara,” ye “Mbonurua.” Ke Sunday iyokop nneme eke ikpehe ke ikpehe oro ibuotikọ edide “Ẹma Jehovah, Ẹkûma Ererimbot.” Mme utịn̄ikọ eken ẹsịne “Ẹka Iso Ẹdụn̄ Nte ‘Isenowo ye Mme Odudụn̄,’” ye “Ẹnyene Uko! Mbufo Ẹmekeme Ndikan Ererimbot.”
3. Nso ufọn ke ikeme ndibọ edieke idụkde mbono circuit?
3 Ke ama okodụk mbono circuit kiet ke ndondo emi, eyenete an̄wan kiet oro mîkesịnke idem ke an̄wautom aba ama ewet ete ke mbono oro ama anam imọ ifiak idụn̄ọde idaha imọ, ibiere “ndiwọrọ an̄wautom inyụn̄ itre ndifu ifu!” Ke akpanikọ ndutịm mbono circuit eke 2011 ayan̄wam kpukpru nnyịn ima Jehovah utu ke ndima ererimbot. (1 John 2:15-17) Kụt ete imodu do inyụn̄ ikpan̄ utọn̄ man ekeme ndibọ ọyọhọ ufọn nto ima ima ndutịm emi ẹnamde mi ẹnọ mme asan̄autom Christian!