Kpeme Ubieresịt Fo
1. Nso idi ibuotikọ usen akpan mbono nnyịn eke isua 2013, ndien nso inam ẹtịm mbono emi?
1 Kpukpru usen, nnyịn imesisobo mme idaha oro ẹkemede ndinam nnyịn inam n̄kpọ oro atuahade ye ubieresịt nnyịn. Ntak edi oro ibuotikọ ndutịm usen akpan mbono nnyịn eke isua 2013 emi editọn̄ọde ke February 2013, edide “Kpeme Ubieresịt Fo.” (1 Tim. 1:19) Ẹtịm mbono emi ndin̄wam nnyịn owo kiet kiet itịm ikpeme nte idade n̄wọrọnda enọ oro Andibot nnyịn ọnọde nnyịn mi inam n̄kpọ.
2. Mme akpan mbụme ewe ke ẹdibọrọ ke ndutịm mbono oro?
2 Yom Mme Akpan N̄kpọ Emi: Ke ndutịm mbono oro, ẹyebọrọ mme akpan mbụme itiaba oro ẹban̄ade ubieresịt:
• Nso ikeme ndibiat ubieresịt nnyịn?
• Didie ke ikeme ndinọ ubieresịt nnyịn ukpep?
• Didie ke ikeme ndisana ke iyịp kpukpru owo?
• Nte ikerede inyụn̄ inamde n̄kpọ iban̄a mme edumbet Bible ayarade nso aban̄a nnyịn?
• Didie ke nnyịn ikeme ndifep ndinọ ubieresịt mbon en̄wen unan?
• Mme uyen, didie ke mbufo ẹkeme ndisọn̄ọ nda ke ini ẹnyịkde mbufo ẹnam se idiọkde?
• Mbon oro ẹtienede ubieresịt mmọ oro spirit adade usụn̄ ẹsinyene mme edidiọn̄ ewe?
3. Didie ke ikeme ndibọ ufọn nto ndutịm emi?
3 Ke un̄wam Jehovah nnyịn imekeme ndisọn̄ọ nda mbiọn̄ọ ukeme oro Satan esịnde ndibiat ubieresịt nnyịn. Edima Ete nnyịn eke heaven ke ada Ikọ esie ye esop esie ọdọhọ nnyịn ete: “Ọkpọusụn̄ edi emi. Mbufo ẹsan̄a ke esịt.” (Isa. 30:21) Ndutịm emi edi usụn̄ kiet oro Jehovah adade ọnọ nnyịn utọ ndausụn̄ oro. Mmọdo, nam ndutịm man odụk ofụri ndutịm oro. Tịm kpan̄ utọn̄, nyụn̄ kere nte afo akpadade se ẹtịn̄de oro esịn ke edinam. Tie ọtọkiet ye ubon fo neme ndutịm mbono emi. Nnyịn ndinam item oro ibọde ọyọsọn̄ọ nnyịn idem ndika iso ‘nnyene eti ubieresịt,’ nnyịn idinyụn̄ iyakke inemesịt ibio ini ererimbot Satan anam nnyịn itụn usụn̄.—1 Pet. 3:16.