Nditọ-Ete Emi Ẹma Ẹkesọn̄​—Ẹmenyene Ufọn Ẹnọ Esop

Ana-edi usọn̄ odụri fi n̄ko ọnyọn̄ edem kpa ye edide ọmọsọn̄ọ ada anam n̄kpọ ọnọ Jehovah ke ediwak isua. Nte n̄kpọ etiede ye afo idaha-emi ekeme ndinam ekere ke imọ inyeneke ufọn aba. Ke uwụtn̄kpọ, emekeme ndimen se anamde mfịn odomo ye se ekesinamde ke eyo n̄kpọn̄. Ekpedi amanam ntre, nso ikeme ndin̄wam fi etre ndikere ke unyeneke ufọn aba?

SE JEHOVAH OYOMDE FI ANAM

Bụp idemfo ete: ‘Nso ke Jehovah oyom nnam?’ Deuteronomy 6:5 ekeme ndidọn̄ fi esịt. Itie oro ọdọhọ ete: “Afo enyene ndima Jehovah Abasi fo ke ofụri esịt fo ye ke ofụri ukpọn̄ fo ye ke ofụri odudu fo.”

Itie oro owụt ke Jehovah oyom fi anam n̄kpọ ọnọ imọ ke ofụri esịt fo, ofụri ukpọn̄ fo, ye ofụri odudu fo. Se ẹtịn̄de do ekeme ndin̄wam fi etre ndimen idem ndomo ye mbon en̄wen, mîdịghe etre ndimen se ekemede ndinam idaha-emi ndomo ye se ekesikemede ndinam ke ini edem.

Kere ise: Akanam didie n̄kpọ ọnọ Jehovah ini mûkokponke owo? N̄wakn̄kan ikọt Jehovah ẹkeme ndidọhọ ẹte ke mmimọ ikesinam ofụri ukeme mmimọ inọ enye. Okwo, ofụri ukeme fo ke akanam oro etiene nte n̄kpọ eketiede ye afo ini oro. Anam didie n̄kpọ ọnọ Jehovah idaha-emi? Imenịm ke afo ke anam ofụri se ekemede ọnọ enye idaha-emi etiene nte n̄kpọ etiede ye afo mfịn. Ekpese n̄kpọ emi nte isụk itịn̄de oro, oyokụt ke afo ke anam ofụri ukeme fo ọnọ Jehovah kpa nte akanamde ke ini edem. Akanam ofụri ukeme fo ọnọ enye ini oro, ke onyụn̄ anam kpa ntre idaha-emi.

EMEKEME NDINEN̄EDE N̄N̄WAM MBON EN̄WEN

Se usụn̄ en̄wen emi akpadade se inemede emi mi: Utu ke ndikere ke usọn̄ ọbọ fi n̄kpọ abiat, domo ndikụt ediwak nti n̄kpọ emi ekemede ndinam ke ntak emi okponde owo. Idaha-emi afo edide Christian emi ama okokpon owo mi, enyene ndusụk n̄kpọ emi ekemede ndinam emi mûkekemeke ndinam ini emi mûkokponke owo. Se ndusụk mi:

Men se ekpepde ke uwem tịn̄ nọ mbon en̄wen. Kop se Bible etịn̄de mi ke mme ufan̄ikọ emi:

Edidem David: “N̄kedi eyenọwọn̄, mmonyụn̄ nsọn̄, edi akanam n̄kwe nte ẹkpọn̄de edinen owo ofụri ofụri, m̀mê nte nditọ esie ẹben̄ede udia.”​—Ps. 37:25.

Joshua: “Ndien, sese! mfịn emi ami mmọn̄ n̄ka usụn̄ ofụri ererimbot, ndien mbufo ẹmetịm ẹfiọk ke ofụri esịt mbufo ye ke ofụri ukpọn̄ mbufo ẹte ke baba ikọ kiet ke otu kpukpru nti ikọ emi Jehovah Abasi mbufo eketịn̄de ọnọ mbufo ikpụhu. Kpukpru ẹmesu ẹnọ mbufo. Baba ikọ kiet ke otu mmọ ikpụhu.”​—Josh. 23:14.

Ekeme ndidi emetịn̄ mbiet ikọ oro. Se iketịbede inọ David ye Joshua akanam mmọ ẹtịn̄ se mmọ ẹketịn̄de oro. Se nti ikọt Jehovah oro ẹkekụtde ẹnyụn̄ ẹkopde ke ediwak isua emi mmọ ẹkekamade enyịn mmọ ẹkụt se ubọk Jehovah ekemede ndinam akanam ikọ mmọ enen̄ede enyene udop.

Ekpedi amanam n̄kpọ ọnọ Jehovah ke ediwak isua idaha-emi, afo n̄ko emekeme nditịn̄ ufọn emi adiade ọnọ mbon en̄wen. Ndi emeti ini emi okokụtde nte Jehovah anamde n̄kpọ an̄wam ikọt esie? Dọhọ mbon en̄wen, kûkama utọ mbụk oro utie ikpọn̄! Ekeme ndinem mmọ kpa nte ekenemde fi. N̄kpọ en̄wen edi ke mbon en̄wen ẹma ẹkop nsio nsio mbụk emi aban̄ade nte ekesinamde n̄kpọ ọnọ Jehovah, mbụk fo ekeme ndisọn̄ọ mmọ idem.​—Rome 1:11, 12.

Ekpesidụk mbono esop ke Ufọkmbono Obio Ubọn̄ ke ini idem ayakde, usụn̄ en̄wen emi ekemede ndisọn̄ọ mbon en̄wen idem edi oro. Ama odu do, emekeme ndinam ufọn nnọ nditọ-ete fo onyụn̄ anam idemfo ufọn. Sista Connie emi ima iketetịn̄ iban̄a ọdọhọ ete: “Ami ndidụk mbono esop isiyakke idem emem mi. Idem akpanam didie emem mi nditọ-ete ẹma ẹwụt adan̄a nte mmọ ẹmade mi ke Ufọkmbono Obio Ubọn̄? Mmesinọ mmọ n̄kpri n̄kpri n̄kpọ man ndomo ndiwụt mmọ ke mmama se mmọ ẹnamde ẹnọ mi, mmesinyụn̄ n̄kụt nte ke mmaka iso ndiana ye mmọ nnam n̄kpọ Abasi.”

JEHOVAH AMA KPUKPRU SE ANAMDE ỌNỌ ENYE

Enyene mme owo emi mîkekemeke ndinam n̄kpọ nnọ Jehovah aba nte mmọ ẹkpemade ndinam, edi emi Jehovah okosụk amade mmọ. Mbụk mmọ ọyọyọhọ Bible. Kop uwụtn̄kpọ Simeon. Enye ekedi eyen Israel onyụn̄ edi akani eren ini emi Jesus akamanade. Ini Simeon ekesikade temple, ana-edi enye ama esikụt irenowo emi mîkokponke owo nte ẹnamde mme akpan utom emi akanade ẹnam ke temple. Edi enye Simeon ke idemesie? Ekeme ndidi enye ama ekere ke usọn̄ iyakke imọ inen̄ede idi n̄kpọ ke enyịn Jehovah aba. Nte mme owo ẹkpekekerede edi oro, edi Jehovah ikekereke ntre. Enye akada Simeon nte “edinen owo eke abakde Abasi,” ama onyụn̄ anam enye okụt Jesus ke nsek. Ukpono ke Abasi okokpono Simeon oro. Jehovah ama akam anam Simeon etịn̄ prọfesi aban̄a eyen emi edidide Messiah ke ini iso do! (Luke 2:25-35) Imenen̄ede ikụt ke idịghe idem usọn̄ Simeon ke Jehovah ekesịn ekikere, ke enye ekesịn ekikere ke utọ owo emi Simeon ekedide; enye ekedi owo emi ekenen̄erede ọbuọt idem ye Jehovah, “edisana spirit onyụn̄ odoro enye ke idem.”

Afo n̄ko nịm ke Jehovah idaha kpukpru se anamde ọnọ enye ke ekpri n̄kpọ inamke n̄kpọ m̀mê nso mîyakke fi ekeme ndinam n̄kpọ nnọ enye nte ekesinamde akpa. Ke enyịn Abasi, se owo anamde ọnọ Abasi “enen̄ede enem Abasi esịt ndibọ nte ekemde ye se owo enyenede, idịghe se owo mînyeneke.”​—2 Cor. 8:12.

Ke ama okokop kpukpru emi, nen̄ede sịn ekikere ke se ekemede ndinam. Se uwụtn̄kpọ mi-o. Mme usụn̄ ewe ke osụk ekeme ndikwọrọ ikọ ekpededi ke minit ifan̄? Ndi emekeme ndikot mbon en̄wen ekpri ke fon nsọn̄ọ mmọ idem mîdịghe ewet leta ọsọn̄ọ mmọ idem? N̄kpri n̄kpọ emi anamde ke ntak emi amade nditọ-ete fo ekeme ndinen̄ede n̄n̄wam mmọ akpan akpan sia edide afo emi ama akanam n̄kpọ ọnọ Jehovah ke ediwak isua anam ọnọ mmọ.

Ndusụk mbon emi ẹkponde owo ẹnyene akpan n̄kpọ emi edide n̄kpọ mfịna ọnọ mmọ. Kpa ye mme n̄kpọ ntre, mbufo nditọ-ete emi ẹma ẹkesọn̄ ẹmekeme ndisụk nnam ekese nnọ Jehovah. Kop uwụtn̄kpọ akamba sista kiet ke East Africa ke ekebe emi “Oro Akanyan̄a Uwem Esie.”

Diọn̄ọ ete ke eti uwụtn̄kpọ emi afo enịmde ke nte afo ọbuọtde idem ye Jehovah onyụn̄ ọsọn̄ọde ada ye enye ke ediwak isua ekeme ndisọn̄ọ mbon en̄wen idem. Uwem fo owụt ke owo ekeme ndiyọ nnam n̄kpọ nnọ Abasi, nịm n̄ko ke “Abasi ikwan̄ake eke ekpesịnde enye efre utom mbufo ye ima eke mbufo ẹwụtde ẹban̄a enyịn̄ esie, ke emi mbufo ẹkenamde n̄kpọ ẹnọ ndisana owo ẹnyụn̄ ẹsụk ẹkade iso ẹnam.”​—Heb. 6:10.

SE EKPEKEKEME NDINAM NNỌ MBON EN̄WEN, KA ISO NAM

Ndụn̄ọde emi ẹnamde owụt ke ediwak n̄kani iren ye n̄kani iban emi ẹsin̄wamde mbon en̄wen ẹsitịm ẹkop nsọn̄idem, ẹkere n̄kpọ enye etịm ọfọn, ẹnyụn̄ ẹbịghi uwem ẹkan mbon eken emi mînamke ntre.

Imọdiọn̄ọ ke ndinam nti n̄kpọ nnọ mbon en̄wen idinamke kpukpru mfịna emi ẹsisan̄ade ye usọn̄ ẹtre. Obio Ubọn̄ Abasi kpọt edinam enye oro. Enye edibiat idiọkn̄kpọ emi ikadade imana ifep, koro enye idiọkn̄kpọ oro edi akpan ntak emi owo esisọn̄de onyụn̄ akpade.​—Rome 5:12.

Kpa ye oro, se afo anamde ọnọ Jehovah esịnede nte afo an̄wamde mbon en̄wen ẹdidiọn̄ọ enye anam fi akaka iso odori enyịn ke nti n̄kpọ emi ẹdide ke iso, onyụn̄ ekeme ndinam fi okop nsọn̄idem. Nditọ-ete emi ẹma ẹkekpon owo, mbọk ẹdiọn̄ọ ẹte ke Jehovah enen̄ede ama se mbufo ẹnamde ẹnọ enye, ke nditọ-ete ke esop ẹnyụn̄ ẹma nte mbufo ẹkade iso ẹbuọt idem ye enye.