Nte Afo Ọmọdiọn̄ọ Esop Jehovah?

“Ntem ke Jehovah ọdọhọ, ete, Enyọn̄ edi ebekpo mi, isọn̄ onyụn̄ edi udoriukot mi.”—ISAIAH 66:1.

1, 2. (a) Ewe uyarade oro ẹkụtde ke enyịn emi aban̄ade esop Jehovah ke afo ekeme ndiwụt? (b) Jehovah odụn̄ ke m̀mọ̀n̄?

NTE afo emenịm ete ke Jehovah enyene esop? Ke edide ntre, ntak emi afo enịmde? Afo emekeme ndibọrọ ete: ‘Ọfọn, nnyịn imenyene Ufọkmbono Obio Ubọn̄. Nnyịn imenyene esop oro ẹtịmde mfọn mfọn ye otu mbiowo. Nnyịn imenyene esenyịn circuit oro ẹmekde emi esidide edise nnyịn kpukpru ini. Nnyịn imesidụk n̄kpri ye ikpọ mbono oro ẹdiomide. Nnyịn imenyene n̄kọk itieutom Watch Tower Society ke idụt nnyịn. Ke akpanikọ, kpukpru ẹmi ye ekese efen efen ẹwụt nte ke Jehovah enyene esop oro odude ke edinam.’

² Mme utọ ndutịm oro ẹdi uyarade esop. Edi edieke ofụri se nnyịn ikụtde inyụn̄ ifiọkde etrede mi ke isọn̄, esop Jehovah itịmke in̄wan̄a nnyịn. Jehovah ọkọdọhọ Isaiah ete ke isọn̄ edi sụk udoriukot imọ, edi ke enyọn̄ edi ebekpo imọ. (Isaiah 66:1) Ewe “enyọn̄” ke Jehovah eketịn̄ aban̄a? Enyọn̄ oro isidade ikụt? Ndi edem ikpaenyọn̄? Mîdịghe nte ndusụk ikpehe uwem efen? Isaiah etịn̄ aban̄a ‘edisana ebiet idụn̄ ye idụn̄ ubọn̄’ Jehovah, ndien andiwet psalm etịn̄ aban̄a enyọn̄ emi nte “ebiet idụn̄ esie.” Ntem, “enyọn̄” ke Isaiah 66:1 etịn̄ aban̄a obio mme spirit oro enyịn mîkwe emi Jehovah enyenede akakan, m̀mê n̄kponn̄kan, itie.—Isaiah 63:15; Psalm 33:13, 14.

3. Didie ke nnyịn ikeme ndikan eyịghe?

³ Ke ntre, edieke inen̄erede iyom ndikụt nnyụn̄ mfiọk esop Jehovah, ana nnyịn ikere iban̄a enyọn̄. Ndien do ke ndusụk owo ẹnyene mfịna. Sia owo mîkemeke ndikụt esop Jehovah eke enyọn̄, nnyịn isan̄a didie ifiọk ke enye enen̄ede odu? Ndusụk owo ẹkeme ndikam nnyene eyịghe ke ndusụk ini, ẹkerede ẹte, ‘Didie ke ikeme nditịm mfiọk?’ Ọfọn, didie ke mbuọtidem ekeme ndikan eyịghe? Akpan usụn̄ iba ẹdi ifịk ifịk ọkpọkpọ ukpepn̄kpọ Ikọ Abasi ye edidụk nnyụn̄ ntiene mbuana ke mme mbono esop Christian kpukpru ini. Do nnyịn iyokụt un̄wana akpanikọ emende eyịghe efep. Mme asan̄autom Abasi efen ẹma ẹdu ẹmi ẹkenyenede eyịghe. Ẹyak nnyịn idụn̄ọde n̄kpọ aban̄ade asan̄autom Elisha ke ini edidem Syria akadade ekọn̄ odụk Israel.—Men John 20:24-29; James 1:5-8 domo.

Owo Emi Okokụtde Ata Ediwak Udịm Enyọn̄

4, 5. (a) Nso mfịna ke asan̄autom Elisha ekenyene? (b) Didie ke Jehovah ekeyere akam Elisha?

⁴ Edidem Syria ama ọdọn̄ akwa udịmekọn̄ aka Dothan ke okoneyo ndikomụm Elisha. Ke ini asan̄autom Elisha akabakde edemede ke usenubọk onyụn̄ ọwọrọde an̄wa, ndusụk ndibọ ofụm ke enyọn̄ ufọk mmọ ke Ufọt Ufọt N̄kan̄ Edem Usiahautịn, sese, nso n̄kpọ n̄kpaidem ke enye okokụt ntem! Ofụri udịmekọn̄ mbon Syria ye mme enan̄-mbakara ye mme chariot ẹma ẹkan obio ẹkụk, ẹbetde ndimụm prọfet Abasi. Asan̄autom oro ama ofiori okot Elisha ete: “Ahah, ete mi, nnyịn idinam didie?” Nte an̄wan̄ade, Elisha ama ọbọrọ sụn̄sụn̄ edi ye uko ete: “Kûfehe ndịk: koro mmọ ẹmi ẹdude ye nnyịn, ẹwakde ẹkan mmọ eke ẹdude ye mmọ.” Anaedi asan̄autom oro ama eyịk ete, ‘Enye mmọ-ọ? N̄kemeke ndikụt mmọ!’ Ndusụk ini oro ekeme n̄ko ndidi mfịna nnyịn—unana edifiọk, m̀mê edida enyịn ikike n̄kụt, ata ediwak udịm eke enyọn̄.—2 Ndidem 6:8-16; Ephesus 1:18.

⁵ Elisha ama ọbọn̄ akam ete ẹtat enyịn asan̄autom esie. Nso iketịbe ke oro ebede? “Ndien Jehovah atat eyen oro enyịn; ndien enye okụt: ndien, sese, horse, ye chariot ikan̄ ke ẹyọhọ ke obot ẹkan Elisha ẹkụk.” (2 Ndidem 6:17) Ih, enye ama okụt udịm eke enyọn̄, udịm mme angel ẹdade ẹbet ndikpeme asan̄autom Abasi. Idahaemi ama an̄wan̄a enye ntak emi Elisha ekenyenede mbuọtidem.

6. Didie ke nnyịn ikeme ndinyene ifiọk mban̄a esop Jehovah eke enyọn̄?

⁶ Nte nnyịn ndusụk ini imesinyene mfịna edida n̄kụt n̄kpọ ukem nte asan̄autom Elisha ekenyenede? Nte nnyịn imesinyene ntụhọ edikụt sụk mme enyọn̄ enyọn̄ idaha oro ẹdịghede nnyịn m̀mê utom Christian ke ndusụk idụt? Ke edide ntre, nte nnyịn imekeme ndidori enyịn ndinyene san̄asan̄a n̄kukụt man esịn nnyịn ke un̄wana? Baba, koro nnyịn imenyene n̄kpọ oro asan̄autom Elisha mîkenyeneke—ofụri n̄wed emi ọdọn̄ọde ediwak n̄kukụt, kpa Bible, emi ekemede ndinam nnyịn inyene ifiọk iban̄a esop eke enyọn̄. Ikọ eke odudu spirit oro ọnọ n̄ko mme edumbet oro ẹnọde ndausụn̄ ndinen̄ede ekikere ye usụn̄ uwem nnyịn. Nte ededi, ana nnyịn isịn ukeme ndiyom mbufiọk nnyụn̄ n̄kọri esịtekọm nnọ ndutịm Jehovah. Ndien nnyịn imekeme ndinam oro ebe ke ọkpọkpọ ukpepn̄kpọ, ọkọrọ ye akam ye editie n̄kere.—Rome 12:12; Philippi 4:6; 2 Timothy 3:15-17.

Ndikpep N̄kpọ Man Ẹfiọk

7. (a) Nso mfịna ke ndusụk owo ẹkeme ndinyene ye ọkpọkpọ ukpepn̄kpọ Bible? (b) Ntak emi ọkpọkpọ ukpepn̄kpọ odotde ye ukeme ẹsịnde?

⁷ Ọkpọkpọ ukpepn̄kpọ inen̄ekede idi inem inem n̄kpọ inọ ediwak owo, utọ nte mbon oro akanam ukpepn̄kpọ mîdịghe inem n̄kpọ inọ mmọ ke ufọkn̄wed m̀mê oro akanam mînyeneke ifet ndikpep n̄kpọ. Nte ededi, edieke nnyịn iyomde ndifiọk nnyụn̄ n̄kụt esop Jehovah ke enyịn ikike nnyịn, ana nnyịn ikọri udọn̄ ndikpep n̄kpọ. Nte emekeme ndidia inem udia ke mûtemke? Nte etemudia ekededi editịn̄de ọnọ fi, ekese utom esidu ke nditem inem udia. Kpa ye oro, ekeme ndidia enye n̄kụre ke ubak hour m̀mê osụhọrede akan oro. Ke n̄kan̄ eken, mme ufọn ọkpọkpọ ukpepn̄kpọ ẹkeme ndibịghi ke ofụri eyouwem. Ọkpọkpọ ukpepn̄kpọ ekeme ndikabade ndi n̄kpọ oro imade ke ini ikụtde n̄kọri oro ikemede ndinam. Apostle Paul ama etịn̄ nte enende ete ke nnyịn ikpenyene nditịm n̄kpeme idem nnyịn ye se nnyịn ikpepde owo inyụn̄ iyịre ke edikot n̄wed nnọ owo. Oyom ukeme ofụri ini, edi mme ufọn ẹkeme ndibịghi ke nsinsi.—1 Timothy 4:13-16.

8. Nso edu ke Mme N̄ke otoro ete ẹnyene?

⁸ Owo ọniọn̄ kiet ke eset ọkọdọhọ ete: “Eyen mi, afo ama ọbọ ikọ mi, onyụn̄ enịm mbet mi ke idem fo; onyụn̄ akpan̄ utọn̄ fo ke eti ibuot, onyụn̄ esịn esịt fo ke mbufiọk; ama ofiori okot asian, emenede uyo fo ọnọ mbufiọk; ama oyom enye nte silver, onyụn̄ odụn̄ọde enye nte n̄kpọ-uto eke edịbede; ndien afo eyetịm ọfiọk uten̄e Jehovah, onyụn̄ esịme ifiọk Abasi.”—Mme N̄ke 2:1-5.

9. (a) Didie ke ẹmen ekọmurua gold ẹdomo ye “ifiọk Abasi”? (b) Nso n̄kpọutom ke oyom nnyịn inyene man inyene nnennen ifiọk?

⁹ Nte ọmọfiọk owo emi enyenede mbiomo ndisịn ukeme? ‘Afo ama’ edi ikọ emi ẹtịn̄de ẹfiak ẹtịn̄. Ndien tịm fiọk ikọ oro, ‘ama odụn̄ọde enye nte n̄kpọ-uto eke edịbede.’ Kere ban̄a mme ọdọk n̄kpọuto ẹmi ke ediwak isua ikie ẹdọkde isọn̄ ẹyom silver m̀mê gold ke Bolivia, Mexico, South Africa, ye mme idụt eken. Mmọ ẹsinam utom ọkpọsọn̄, ẹkamade mme n̄kpọ utịbi isọn̄ ye mme udọk mbakara, ndibom ikpọ itiat emi mmọ ẹdisiode mme ọsọn̄urua itiat. Mmọ ẹda gold ke ọsọn̄urua n̄kpọ tutu ke itie udọk n̄kpọuto kiet ke California, U.S.A., mmọ ẹma ẹdọk obube ọniọn̄de ke kilomita 591, otụn̄ọde ke n̄kpọ nte kilomita kiet ye ubak—man ẹkụt gold. Edi, nte afo emekeme ndidia gold? Ndin̄wọn̄ gold? Nte enye ekpenịm fi uwem ke desat edieke biọn̄ ye nsatitọn̄ ẹkpeyomde ndiwot fi? Baba, ekọmurua esie edi se ẹkerede-kere ye se ẹbierede nte ẹmade, okpụhọde ke usen ke usen nte ẹwụtde ke urua ofụri ererimbot. Kpa ye oro, mme owo ẹkpan̄a ke ntak esie. Idahaemi ukeme okponde adan̄a didie ke oyom ẹsịn man ẹnyene gold eke spirit, kpa “ifiọk Abasi”? Kere ban̄a oro, ata ifiọk Ọbọn̄ Andikara ekondo, esop esie, ye mme uduak esie! Ke afan̄ emi, nnyịn imekeme ndikama mme n̄kpọ utịbi isọn̄ ye mme udọk mbakara eke spirit. Mmọ oro ẹdi mme n̄wed ẹkọn̄ọde ke Bible oro ẹn̄wamde nnyịn ndidọk Ikọ Jehovah nnyụn̄ mfiọk se enye ọwọrọde.—Job 28:12-19.

Ndidọk Nyom Ikike

10. Nso ke Daniel okokụt ke n̄kukụt?

¹⁰ Ẹyak nnyịn inam ndusụk edidọk eke spirit man itọn̄ọ ndinyene ata ifiọk mban̄a esop Jehovah eke enyọn̄. Man inyene akpan ikike, ẹyak nnyịn ikụbọde ika n̄kukụt Daniel aban̄ade Andisọn̄ọ Usen ke ebekpo esie. Daniel ewet ete: “N̄kụt tutu ebekpo ẹdiọhọ, Andisọn̄ọ usen onyụn̄ etie, edisịnen̄kpọ esie edi afia nte snow, idet ibuot esie onyụn̄ ebiet edisana idet erọn̄: ebekpo esie ebiet edemeikan̄, mme wheel esie ẹdi ikan̄ eke asakde. Ikan̄ oto enye ke iso ewet nte akpa mmọn̄: tọsịn tọsịn ke itie tọsịn ẹnam n̄kpọ ẹnọ enye; tọsịn duop ke itie tọsịn duop ẹnyụn̄ ẹda enye ke iso: ẹnịm ikpe, ẹnyụn̄ ẹkụbọde n̄wed.” (Daniel 7:9, 10) Mmanie ẹkedi ediwak tọsịn ẹmi ẹkenamde n̄kpọ ẹnọ Jehovah? Ikọ mben ke New World Translation, oro ẹdade nte “mme n̄kpọ utịbi isọn̄” ye “mme udọk mbakara,” ẹda nnyịn ẹka mme utọ itie nte Psalm 68:17 ye Mme Hebrew 1:14. Ih, mbon oro ẹnamde n̄kpọ do ẹkedi mme angel eke enyọn̄!

11. Didie ke n̄kukụt Daniel ekeme ndin̄wam ndinam mme ikọ Elisha ẹn̄wan̄a nnyịn?

¹¹ Mbụk Daniel idọhọke ke enye ama okụt kpukpru mme anam-akpanikọ angel oro Abasi enyenede ke idak esie. Eyedi ediwak miliọn efen efen ẹdu. Edi ke akpanikọ nnyịn idahaemi imekeme ndifiọk ntak emi Elisha ekekemede ndidọhọ: “Mmọ ẹmi ẹdude ye nnyịn, [ẹwak] ẹkan mmọ eke ẹdude ye mmọ.” Okposụkedi mme angel oro mîkanamke akpanikọ, kpa mme demon, ẹkenọde udịmekọn̄ edidem Syria ibetedem, mme udịmekọn̄ Jehovah eke enyọn̄ ẹma ẹwak ẹkan mmọ!—Psalm 34:7; 91:11.

12. Didie ke afo ekeme ndifiọk ekese mban̄a mme angel?

¹² Eyedi afo akpama ndifiọk ekese mban̄a mme angel ẹmi, utọ nte udeme oro mmọ ẹnyenede ke ndinam n̄kpọ Jehovah. Otode ikọ Greek adade ọnọ angel, nnyịn imekeme ndikụt nte ke mmọ ẹdi mme asan̄autom koro ikọ oro n̄ko ọwọrọ “asan̄autom.” Nte ededi, utom mmọ esịne ekese n̄kpọ efen. Nte ededi, man ọfiọk se emi edide, ana afo ọdọk. Edieke afo enyenede Insight on the Scriptures, afo emekeme ndidụn̄ọde ibuotikọ oro “Angels,” mîdịghe afo emekeme ndise n̄kani ibuotikọ ẹban̄ade mme angel ke Enyọn̄-Ukpeme. Idem ayakpa fi ndikụt adan̄a ediwak n̄kpọ oro afo ekemede ndikpep mban̄a mme asan̄autom Abasi eke enyọn̄ ẹmi oyonyụn̄ edi edifiọk ibetedem oro mmọ ẹnọde. (Ediyarade 14:6, 7) Nte ededi, ke esop Abasi eke enyọn̄, ndusụk edibotn̄kpọ ẹdide spirit ẹnam utom kaban̄a san̄asan̄a uduak.

Se Isaiah Okokụtde

13, 14. Nso ke Isaiah okokụt ke n̄kukụt, ndien didie ke emi okotụk enye?

¹³ Idahaemi ẹyak nnyịn idọk n̄kukụt Isaiah. Ke ini afo okotde ibuot 6, ufan̄ikọ 1 esịm 7, emi ekpenyene nditụk fi. Isaiah ọdọhọ ete ke imọ ‘ima ikụt Jehovah etiede ke ebekpo,’ ndien “mme Seraphim ẹda enye ke enyọn̄.” Mmọ ẹketan̄a ubọn̄ Jehovah, ẹtorode edisana idaha esie. Ndikot mbụk emi ekpenyene nditụk fi. Didie ke Isaiah akanam n̄kpọ? “Ami ndọhọ, nte, Mbọm mi! koro mmakpa [ke Sheol]: koro ami ndide owo edidehe n̄kpọk-inua, nnyụn̄ ndụn̄ ke otu mbon edidehe n̄kpọk-inua: koro enyịn mi okụtde edidem, Jehovah mme udịm.” N̄kukụt emi okotụk enye didie ntem! Ndi otụk fi?

¹⁴ Ntre didie ke Isaiah ekekeme ndida nse ubọn̄ ubọn̄ ndise emi? Enye anam an̄wan̄a ete ke seraph kiet ama edi edinyan̄a imọ onyụn̄ ọdọhọ ete: ‘Ẹmesio isop idiọk ido fo.’ (Isaiah 6:7) Isaiah ama ekeme ndiberi edem ke mbọm Abasi onyụn̄ akpan̄ utọn̄ ọnọ mme ikọ Jehovah. Idahaemi, nte afo ukpamaha ndifiọk ekese n̄kpọ mban̄a mme edibotn̄kpọ eke spirit ẹmi ẹnyenede n̄kokon̄ idaha mi? Do nso ke afo enyene ndinam? Dọk yom ntọt efen efen. N̄kpọutom kiet ndikama ekpedi Watch Tower Publications Index, etienede mme itie oro enye etịn̄de otụk ediwak ebiet oro ẹnamde n̄kpọ ẹn̄wan̄a.

Nso ke Ezekiel Okokụt?

15. Nso iwụt nte ke n̄kukụt Ezekiel edi se ẹkemede ndiberi edem?

¹⁵ Ẹyak nnyịn ifiak iwọn̄ọde ika orụk edibotn̄kpọ eke spirit efen. Ezekiel ama enyene ifet ndikụt enyene-uten̄e n̄kukụt ke ini okosụk edide owo ntan̄mfep ke Babylon. Kụbọde Bible fo ka Ezekiel ibuot 1, akpa ufan̄ikọ ita. Mbụk emi ọtọn̄ọ didie? Ndi enye ọdọhọ, ‘Ini kiet ko, ke anyan idụt kiet . . .’? Baba, emi idịghe mbụk n̄ke oro mînyeneke nsọn̄ọ. Ufan̄ikọ 1 ọdọhọ ete: “Edikem ke ọyọhọ isua edịp ye duop, ke ọyọhọ ọfiọn̄ inan̄, ke ọyọhọ usen ọfiọn̄ ition, ke ini ami ndude ke otu mbon ntan̄mfep ke mben akpa Chebar, enyọn̄ okụbọde, ndien n̄kụt n̄kukụt Abasi.” Nso ke afo okụt ke ufan̄ikọ emi? Enye ọnọ nnennen usenọfiọn̄ ye nnennen ebiet. Ofụri ntọt ẹmi ẹnyan ubọk ẹwụt ọyọhọ isua ition tọn̄ọ nte ẹkeda Edidem Jehoiachin ẹka ntan̄mfep, kpa isua 613 M.E.N.

16. Nso ke Ezekiel okokụt?

¹⁶ Ubọk Jehovah ama odoro Ezekiel ke idem, ndien enye ama ọtọn̄ọ ndikụt enyene-uten̄e n̄kukụt aban̄ade Jehovah ke ebekpo ke ufọt ediwak chariot eke enyọn̄ oro ẹnyenede ikpọ wheel ye enyịn ẹkanade mme wheel oro. Ọyọhọ ntọt oro edide n̄kpọ udọn̄ ọnọ nnyịn mi edi nte ke edibotn̄kpọ inan̄ ẹma ẹdu, kiet adade ke wheel kiet. “Iso mmọ ẹnyụn̄ ẹtie ntem; mmọ ẹbiet owo. Kiet kiet onyụn̄ enyene iso inan̄, kiet kiet onyụn̄ enyene mba inan̄. . . . Ndien ama edi mbiet iso mmọ, iso owo ye iso lion ẹdu mmọ mbinan̄ ke nnasia: mmọ mbinan̄ ẹnyụn̄ ẹnyene iso enan̄ ke ufien; mmọ mbinan̄ ẹnyụn̄ ẹnyene iso ntrukpom.”—Ezekiel 1:5, 6, 10.

17. Nso ke iso inan̄ eke cherub ẹda ẹban̄a?

¹⁷ N̄kpọ uwem inan̄ ẹmi ẹkedi nso? Ezekiel ke idemesie asian nnyịn ete ke mmọ ẹkedi mme cherub. (Ezekiel 10:1-3, 14) Ntak emi mmọ ẹkenyenede iso inan̄? Man ẹwụt n̄wọrọnda edu inan̄ emi Jehovah Ọbọn̄ Andikara enyenede. Iso ntrukpom ekedi idiọn̄ọ ọniọn̄ oro adade okụt n̄kpọ anyan usụn̄. (Job 39:27-29) Nso ke iso enan̄ akada aban̄a? Ye akwa odudu ke itọn̄ ye afara esie, ẹdiọn̄ọ enan̄ oro an̄wanade en̄wan nte esimende enan̄-mbakara ye andiwat akama ufụm. Ke akpanikọ, enan̄ edi idiọn̄ọ akakan odudu Jehovah. Ẹda lion ẹtịn̄ ikọ nte idiọn̄ọ uko uko unenikpe. Ke akpatre, iso owo nte odotde ada aban̄a ima Abasi, sia owo edide n̄kukụre edibotn̄kpọ eke isọn̄ oro ekemede ndiwụt edu emi ke usụn̄ oro owụtde ifiọk.—Matthew 22:37, 39; 1 John 4:8.

18. Didie ke apostle John adian n̄kpọ ke ifiọk oro nnyịn inyenede iban̄a esop eke enyọn̄?

¹⁸ N̄kukụt efen ẹdu oro ẹkemede ndin̄wam nnyịn nditịm nnyene ifiọk. Mmọ ẹmi ẹsịne mme n̄kukụt John oro ẹbụkde ke n̄wed Ediyarade eke Bible. Enye, ukem nte Ezekiel, okụt Jehovah ke ubọn̄ ubọn̄ ebekpo oro mme cherub ẹtienede. Nso ke mme cherub ẹnam? Mmọ ẹfiak ẹtan̄a se mme seraph ẹketan̄ade ke Isaiah ibuot 6, ẹdọhọde ete: “Edisana, edisana, edisana, Jehovah Abasi, Andikara kpukpru n̄kpọ, Enye emi okodude-du, emi onyụn̄ odude-du, emi edinyụn̄ edide.” (Ediyarade 4:6-8) John n̄ko okụt eyenerọn̄ ke ebekpo. Anie ke oro akpada aban̄a? Kpa Eyenerọn̄ Abasi, Jesus Christ.—Ediyarade 5:13, 14.

19. Ebede ke ukpepn̄kpọ emi, afo ọdiọn̄ọ nso aban̄a esop Jehovah?

¹⁹ Ntre ebede ke mme n̄kukụt ẹmi, nso ke nnyịn ikụt? Nte ke Jehovah Abasi emi odorode ke ebekpo esie adianade ye Eyenerọn̄, Jesus Christ, emi edide Ikọ m̀mê Logos, ẹdu ke ata ufọt esop eke enyọn̄ oro. Ndien nnyịn imokụt udịm mme angel eke enyọn̄, esịnede mme seraph ye mme cherub. Mmọ ẹdi ubak akwa esop oro adianade kiet emi anamde mme uduak Jehovah. Ndien kiet ke otu mme uduak oro edi ndikwọrọ eti mbụk ke ofụri ererimbot ke utịt ini emi.—Mark 13:10; John 1:1-3; Ediyarade 14:6, 7.

20. Nso mbụme ke ẹdibọrọ ke ibuotikọ oro etienede?

²⁰ Ke akpatre, nnyịn imenyene Mme Ntiense Jehovah ke isọn̄ ẹsopde idem ke mme Ufọkmbono Obio Ubọn̄ mmọ man ẹkpep nte ẹnamde uduak Ọbọn̄ Andikara. Ke akpanikọ, idahaemi nnyịn imekeme ndifiọk nte ke ediwak owo ẹdu ẹmi ẹdude ye nnyịn akan mbon oro ẹdude ye Satan ye mme asua akpanikọ. Mbụme oro osụhọde edi, Nso ke esop eke enyọn̄ enyene ndinam ye edikwọrọ eti mbụk Obio Ubọn̄? Ibuotikọ oro etienede oyodụn̄ọde oro ye mme n̄kpọ efen.

Mme Mbụme Ndụn̄ọde

◻ Man idiọn̄ọ esop Jehovah, nso ke ana nnyịn ifiọk?

◻ Nso ifiọk n̄kpọntịbe ke asan̄autom Elisha ekenyene, ndien didie ke prọfet oro ọkọsọn̄ọ enye idem?

◻ Didie ke nnyịn ikpese ọkpọkpọ ukpepn̄kpọ?

◻ Didie ke Daniel, Isaiah, ye Ezekiel ẹnọ ọyọhọ ntọt ẹban̄a esop eke enyọn̄?

[Mme ndise ke page 13]

Mme ufọn ọkpọkpọ ukpepn̄kpọ ẹnen̄ede ẹkan udia oro ẹtịmde ẹtem

[Ndise ke page 15]

N̄kukụt udịm eke enyọn̄ ekedi ibọrọ oro Jehovah ọkọbọrọde akam Elisha